Mareferensiya Ya Xibukwana Xa Mintlhanganu Ya Mahanyelo Ni Ntirho
© 2024 Watch Tower Bible and Tract Society of Pennsylvania
2 KU YA KA 8 KA SETEMBRO
XUMA XI NGA KA RITO LA XIKWEMBU TIPISALEMA 79-81
Kombisa Swaku Wa Li Rhandza Vito La Yehovha La Ku Kwetsima
Murindzi 02/17 paj. 9 par. 5
Nkutsulu I “Nyiko Leyi Hetisekeke” Ya Xikwembu
5 Hi nga swi kombisisa ku yini leswaku ha li rhandza vito la Yehovha? Hi ku va ni mahanyelo ya manene. Yehovha a lava leswaku hi kwetsima kumbe hi basa. (Lerha 1 Pedru 1:15, 16.) Swi vula leswaku hi fanele hi gandzela Yehovha ku hela naswona hi mu yingisa hi mbilu hinkwayu. Hambiloko hi hluphiwa, hi yendla hinkwaswu leswi hi nga swi kotaka leswaku hi hanya hi matshinya ya minawu ya yena ya ku lulama. Loko hi ni mahanyelo ya manene, vanhu va ta hi vona kutani leswo swi ta dzunisa vito la Yehovha. (Mat. 5:14-16) Tanihi vanhu va ku kwestima, hi swi kombisa hi mahanyelo ya hina ya manene leswaku minawu ya Yehovha yi lulamile ni leswaku leswi Sathana a nga swi vula i mavunhwa. Loko hi phazama, ha tisola hi mbilu hinkwayu, naswona hi tshika mahanyelo ya ku biha lama susaka Yehovha xindzhuti. — Ps. 79:9.
Nhlokomhaka 3 ya Tindzimana Leti Nga Tlhamuseliwa mapar. 4-5
Varoma 10:13 — “Lweyi A Vitanaka Vito La Yehovha”
Loko Bibele li vulavula hi ku “vitana a vito la Yehovha” a lo vula ku va hi tiva vito leli ni ku tlhela hi li tirhisa loko hi gandzela ntsena. (Tipisalema 116:12-14) Kambe swi patsa ni ku va hi mu tshemba Yehovha ni ku va hi kombela ku pfuniwa hi yena loko hi humeleliwa hi xanchumu. — Tipisalema 20:7; 99:6.
Hambi hi Yesu a yi basisile mhaka leyi nkama lowu a nga djondzisa valandzeli va yena leswi a va fanele va khongelisa xiswona. A sungule hi marito lawa ma nge: “Papayi wa hina lweyi a nga matilweni, vito la wena a li kwetsimisiwe.” (Matewu 6:9) Yesu a tlhele a kombisa swaku, kuva hi kuma wutomi la ku kala li nga heli, hi fanele hi li tiva vito leli, hi tlhela hi mu hlonipha Yehovha ni ku mu rhandza. — Yohani 17:3, 6, 26.
Lavetela Xuma Ka Rito La Xikwembu
Perspicaz vol. 2 paj. 145
Yosefa
Vito La Yosefa A Li Li La Lisima Hintamu. Leswi Yosefa a a li wa lisima hintamu xikarhi ka vana va Yakobe, swa twala ku va minkama yin’wani vito la yena li tirhiseliwa ku kombetela ka lixaka hinkwalu la Israyele. (Ps 80:1) Vito la yena ku tlhela ku vulavuliwa hi lona ka wuprofeta la Bibele. (Ps 78:67; Amo 5:6, 15; 6:6) Ka leswi swi nga voniwa hi Ezekiyele, Yosefa a humelela na a nyikiwa tshomba leli nga phindhiwa kambirhi. (Eze 47:13) Wun’we wa tinyangwa ta doropa lowu nga tsaliwa swaku “Yehovha Hi Yexe A A Li Kolahayani,” wu vuya hi vito la Yosefa. (Eze 48:32, 35) Naswona loko ku vulavuliwa hi nkama lowu vanhu va Yehovha a va ta vuyelelana hi wona, ku kombisiwa swaku Yosefa a a ta va murhangeli wa ntlawa wun’we, se Yuda a va murhangeli wa ntlawa lowun’wani. (Eze 37:15-26) A wuprofeta la Obadiya na lona li kombisa swaku a ‘munti wa Yosefa’ a wu ta pfunisa ka ku helisa ‘munti wa Esawu.’ (Oba 18) Se Zacariya na yena a kombise swaku Yehovha a a ta ponisa ‘munti wa Yosefa.’ — Zak 10:6.
9 KU YA KA 15 KA SETEMBRO
XUMA XI NGA KA RITO LA XIKWEMBU TIPISALEMA 82-84
Yi Nyiki Lisima Mintirho Leyi U Yi Yendlaka Ka Nhlengeletanu Ya Yehovha
Murindzi N.o 6 wa 2016 paj. 8 mapar. 2-3
Leswi Hi Swi Djondzaka Ka Swinyenyani
Lava a va tshama aYerusalema a va swi tiva kahle swinyenyani leswi vitaniwaka andorinhas kumbe tinkondjani. A swinyenyani leswi swi vona tempele liyani ku li ndhawu ya kahle swaku swi yaka swisaka swi tlhela swi kulisa vana va swona.
Tipisalema 84, leyi nga tsaliwa hi mun’we wa vana va Kora, yi vulavula hi swisaka swa tinkondjani ka tempele. Phela vana va Kora a va ni nkateko wa ku tirha tempeleni vhiki lin’we ka 6 wa tiwheti. Kambe mutsali wa buku leli la Tipisalema, a a lava ku fana ni tinkondjani leti, leti a ti hanya ka yindlo ya Yehovha. Yena a te: “Tabernakela ya wena yayikulu yi saseke ndjhani, Yehovha murhangeli wa tintsumi! Ni swi navela hi mbilu hinkwayu, ku ya ka mikintari ya yindlo ya Yehovha, a na ha tikoti hi ku navela. . . . Hambi xinyanyani xi kume yindlo kolanu. Ni nkondjani yi tikumele xisaka, lomu yi hlayisaka kona vana va yona kusuhi ni altari ya wena yayikulu, Yehovha murhangeli wa tintsumi, hosi ya mina ni Xikwembu xa mina!” (Tipisalema 84:1-3) Indjhe na wena u na kona ku navela ka ku tlhangana ni vanhu lava tirhelaka Xikwembu ku patsa ni vana wa wena? — Tipisalema 26:8, 12.
Murindzi 15/07/08 paj. 30 mapar. 3-4
Pimisa Hi Leswi U Nga Kotaka Ku Swi Yendla U Tlhela U Tsaka Hi Swona
Loko hi vabya hintamu, kumbe ntanga yi ya yi famba, swi nga yendleka leswaku hi nga ha swi koti ku yendla swa ku tala ka ntirho wa Yehovha. Loko swi ku u mupsali lweyi a nga ni vana, swi nga yendleka u vona ingi a wa ha na nkama wa ku yenela wa ku djondza, kumbe ku pfuneka kahle loko u li mintlhanganwini hi mhaka ya vana lava swi nga ha yendlekaka va tshamela ku ku kavanyetela. Kambe loko wo tshamela ku pimisa ngopfu hi swilo swa ku fana ni leswo, swi nga ha ku heta ntamu wa ku yendla leswi u nga swi kotaka ka ntirho wa Yehovha.
Hi xikombiso, Mulevhi mun’wani a a ni ku navela ka ku karhi ka ku a a nga ta swi kota ku ku hetisisa. Yena a a ni lunghelo la ku tirha mavhiki mambirhi hi lembe atempeleni. Kambe ku navela ka yena a ku li ku tshama kolayani atempeleni masiku hinkwawu. (Ps. 84:1-3) I mpsini swi nga mu pfuna leswaku a tsaka hi leswi a a kota ku swi yendla? A pimise hi nkateko lowu munhu a nga na wona wa ku tirha atempeleni hambi ko va siku lin’we ntsena. (Ps. 84:4, 5, 10) Na hina hi fanele hi pimisa ngopfu hi leswi hi kotaka ku swi yendla, handle ka leswi hi kalaka hi nga swi koti ku swi yendla, hi tlhela hi swi nyika lisima swoleswo.
Murindzi 01/20 paj. 17 par. 12
U Wa Lisima ka Yehovha!
12 Loko u ni mavabyi, tiyiseka swaku Yehovha wa swi tiva leswi ku humelelaka. Kombela Yehovha kuva a ku pfuna u va ni mavonelo yamanene hi leswi swi ku humelelaka. U gama u lavetela tindzimana leti tiyisaka. Tshamela ku pimisa hi tindzimana leti kombisaka swaku malandza ya Yehovha i ya lisima ka yena. Loko u ya u yendla leswo, u ta swi vona kahle swaku Yehovha i munene ka lava va mu tirhelaka hi ku tshembeka. — Pis. 84:11.
Lavetela Xuma Ka Rito La Xikwembu
Perspicaz vol. 2 paj. 350
N’wana Lweyi A Nga Feliwa Hi Vapsali
A nkama lowu Vayisrayele a va tikhorisa hi wunghanu lalinene na Yehovha, a ntirho wun’wani lowu a va li na wona a ku li ku hlayisa vana lava nga feliwa hi vapsali. (Ps 82:3; 94:6; Esa 1:17, 23; Yer 7:5-7; 22:3; Eze 22:7; Zak 7:9-11; Mal 3:5) Phela ka nkama lowuyani, a swi ta vevuka ku vana lava va khomiwa hi ndlela ya ku biha. Yehovha a ze a vula swaku a ta va khatisa vanhu lava a va va hlupha vana lava va nga feliwe hi vapsali va vona. (Det 27:19; Esa 10:1, 2) Hi leswo swi yendlaka Bibele li vula swaku Yehovha i Muponisi. (Swiv 23:10, 11) I Mupfuni. (Ps 10:14) Ni Papayi wa vana lava kalaka va nga na vapsali. (Ps 68:5) Naswona Yehovha a ta va khatisa vanhu lava hluphaka vana lava nga feliwa hi vapsali va vona, leswaku a va ponisa a tlhela a va vhikela. — Yer 49:11.
Ninamuntlha, lexi kombisaka swaku hi Vakreste va ntiyiso i ku va khoma kahle vana lava nga feliwa hi vapsali, ni vavasati lava nga feliwa hi vanuna. Yakobe a tsalele Vakreste va ntiyiso a ku: “Wugandzeli leli nga basa hi ku ya hi Xikwembu lexi nga Papayi wa hina hi leli: Ku hlayisa vana lava kalaka va nga na vapsali ni vavasati lava lava nga feliwa hi vanuna va vona lava nga nhlomulweni, ni ku tshama na hi nga na xivati xa misava.” — Yak 1:27.
16 KU YA KA 22 KA SETEMBRO
XUMA XI NGA KA RITO LA XIKWEMBU TIPISALEMA 85-87
Xikhongelo Xi Hi Pfuna Ku Tiyisela
Murindzi 15/05/12 paj. 25 par. 10
Dzunisa Yehovha
10 Leswaku hi kota ku xi dzunisa kahle Xikwembu swi lava leswaku hi khongela nkama ni nkama. (Rom. 12:12) Swi lava leswaku hi khongela ka Yehovha leswaku a hi pfuna leswaku hi mu tirhela hi ndlela yayinene. Hi mhaka leyo, hi nga kombela moya wa ku kwetsima, lipfumelo ni ntamu leswaku hi kota ku tiyisela mindzingo ni ku tlhela hi li tirhisa kahle rito la Xikwembu. (2 Tm. 2:15; Mat. 6:13; Luk. 11:13; 17:5) Ku fana ni n’wana lweyi a dependeraka hi papayi wa yena, na hina hi fanele hi dependera hi Papayi wa hina lweyi a nga matilweni Yehovha. Loko hi mu kombela leswaku a hi pfuna hi mu tirhela hi ndlela ya kahle, hi nga tiyiseka swaku yena a ta hi pfuna. A hi fanelanga hi titwa ingi ho mu hlupha! Kambe a hi tameni hi khongela, hi mu dzunisa, hi mu khensa, hi yingisa minkongomiso leyi a hi nyikaka yona ni ku tlhela hi mu kombela leswaku a hi pfuna hi mu tirhela hi ndlela leyi dzunisaka vito la yena. — Ps. 86:12; Yak. 1:5-7.
Murindzi 05/23 paj. 13 mapar. 17-18
Yehovha A Swi Hlamulisa Ku Yini Swikhongelo?
17 Lerha Tipisalema 86:6, 7. Davhida a a tiyiseka swaku Yehovha a a swi twa swikhongelo swa yena ni leswaku a a swi hlamula. Na wena u nga va ni ku tiyiseka loku fanaka. Swiperiyensiya leswi hi nga djondza hi swona ka nhlokomhaka leyi, swi hi tiyisekisa swaku Yehovha a nga hi nyika wutlharhi ni ntamu lowu lavekaka swaku hi kota ku tiyisela. A nga tirhisa vamakwerhu, hambi hi vanhu lava kalaka va nga mu gandzeli leswaku va hi pfuna.
18 I ntiyiso swaku a hi minkama hinkwayu leyi Yehovha a nga ta hlamula swikhongelo swa hina hi ndlela leyi hina hi yi lavaka, kambe hi nga tiyiseka hi nchumu xin’we: Minkama hinkwayu wa swi hlamula swikhongelo swa hina. A hi nyika leswi hi swi lavaka hi nkama wa kona. Hi mhaka leyo, u nga tshiki ku khongela na u tiyiseka swaku Yehovha a ta ku hlayisa swoswi naswona ka misava ya nyuwani a ta ku nyika xin’wani ni xin’wani lexi u nga ta xi lava. — Pis. 145:16.
Lavetela Xuma Ka Rito La Xikwembu
Perspicaz vol. 1 paj. 556 par. 6
Mbilu
Ku Tirhela Yehovha Hi Mbilu Hinkwayu. Loko mbilu ya hina yi yo yavana, a swi nga ta koteka swaku yi tirha kahle. Phela mbilu ya hina ya ku fanekisela swa koteka swaku yi yavana. Davhida a khongelile a ku: “Ni pfune swaku ni hlonipha vito la wena hi mbilu ya mina hinkwayu;” leswi vulaka swaku swi nga yendleka munhu a rhandza Xikwembu a tlhela a xi hlonipha kambe ku nga li hi mbilu ya yena hinkwayu. (Ps 86:11) Mbilu ya munhu yelweyo yi nga ha va yi yavanile, leswi vulaka swaku a yi hisekeli ku gandzela Yehovha. (Ps 119:113; Nhl 3:16) Munhu a nga tlhela a va ni “timbilu timbirhi” loko a gandzela swikwembu swimbirhi, kumbe a kanganyisa munhu mun’wani hi ku vula xan’wachumu kuve mbilu ya yena yi pimisa swin’wani. (1Tik 12:33; Ps 12:2) Yesu a swi hlayile phambheni ka vanhu swaku vanhu va ku tshamisa xileswo a va li vakanganyisi. — Mat 15:7, 8.
23 KU YA KA 29 KA SETEMBRO
XUMA XI NGA KA RITO LA XIKWEMBU TIPISALEMA 88-89
Mafumelo Ya Yehovha Hi Wona Ya Ku Yampsa
Murindzi 06/17 paj. 28 par. 5
Tama U Seketela A Wuhosi La Yehovha!
5 Vona swivangelo swin’wani leswi yendlaka Yehovha a va ni mfanelo ya ku fuma misava hinkwayu. Yena a tirhisa wululami la yena hi ndlela yayinene. Yena a vula leswi: “Hi mina Yehovha, Lweyi a nga ni lirhandzu, ku lulama ni lweyi a tshembekaka misaveni, hikusa leswi hi swona ni swi rhandzaka, ku vula Yehovha.” (Yer. 9:24) Yehovha a nga lavi minawu leyi humaka hi ka vanhu va ku kala ku hetiseka swaku a kota ku vula xan’wanchumu. Tanihi leswi yena a nga Munhu wa ku lulama, hi yena a vekelaka vanhu minawu. A Bibele li vula swaku a ‘ku lulama ni wululami i masungulu ya xitshamu xa wuhosi la yena’. Hi mhaka leyo hi nga tshemba swaku a minawu hinkwayu ya Yehovha ni swiboho hinkwaswu swa twisiseka. (Ps. 89:14; 119:128) Hambileswi Sathana a nga djikela a wuhosi la Yehovha, a nga swi kotanga ku yendla misava ya yinene.
Murindzi 06/17 paj. 29 mapar. 10-11
Tama U Seketela A Wuhosi La Yehovha!
10 Yehovha a nga fumi hi voko la nsimbi. A hi nyika nchunseko lowu hi wu lavaka leswaku hi kota ku tsaka. (2 Ko. 3:17) Loko Davhida a vulavula hi Yehovha, a te: “Wa phatima, wa hlonipheka; lani a tshamaka kona ku ni matimba ni ku tsaka.” (1 Tik. 16:7, 27) Na yena mupisalema Etani a te: “Va tsaka vanhu lava tivaka ku huwelela hi ku tsaka. Va famba ku vonakaleni ka wena, wena Yehovha. Va tshama na va tsakile hi mhaka ya vito la wena, naswona va tlakusiwa hi ku lulama ka wena.” — Ps. 89:15, 16.
11 Loko hi pimisa hi wunene la Yehovha, hi ya hi tiyiseka swaku i Xikwembu lexi fumaka kahle, hi titwa na hi tsakile ku fana ni mupisalema lweyi a nga te: “Siku lin’we ka kintari wa yindlo ya wena li tlula 1.000 wa masiku ka ndhawu yin’wani!” (Ps. 84:10) Ka mupisalema lweyi, a ku nga na nchumu xin’wani xa ku tsakisa ku tlula ku tirhela Yehovha. Phela leswi swa twala, hikusa Yehovha hi yena a nga hi hamba naswona wa swi tiva leswi nga kahle ka hina ni leswi nga hi yendlaka hi tsaka. Yehovha i Xikwembu lexi nyikaka naswona xi hi nyika leswi tlulaka leswi hi swi lavaka. Xin’wani ni xin’wani lexi Yehovha a hi byelaka leswaku hi xi yendla, hi hina hi pfunekaka hambiloko minkama yin’wani swi lava leswaku hi yendla minzamu. Kambe magamu ya mhaka hi leswaku ku yingisa Yehovha swi hi tisela ntsaku wa hikakunene. — Lerha Esaya 48:17.
Murindzi 15/10/14 paj. 10 par. 14
Wu Tshembi Hi Ku Helela Mfumu Wa Xikwembu
14 Nkama lowu Davhida a a fuma aYerusalema, Yehovha a yendle ntwananu na yena a mu tshembisa swaku Mesiya a a ta huma hi ka lixaka la yena. (Lerha 2 Samuwele 7:12, 16; Luk. 1:30-33) Phela leswo swi kombisa leswaku leswi Yesu a nga ta hi ka lixaka la Davhida, a ni mfanelo ya ku fuma ka mfumu wa Mesiya. (Eze. 21:25-27; Ps. 89:34-37) Naswona Yesu a ta hi fuma hi ndlela yayinene funtshi leswi a nga ta swi yendla swi ta tisa minkateko ya hi masiku ni masiku!
Lavetela Xuma Ka Rito La Xikwembu
Murindzi 01/01/93 paj. 32
N’weti Wu Kona Minkama Hinkwayu
Loko Vayisrayele va vona n’weti a va khumbuka nchumu wa ku hlamalisa swinene, a wu va khumbukisa leswi Yehovha a nga va tshembisa swona swaku a ntukulu wa Davhida a a ta fuma hi masiku ni masiku ku fana ni leswi n’weti wu humelelaka nkama hinkwawu atilweni. (Tipisalema 89:35-39) Xitshembiso lexi xi hetisekile ka Yesu ku nga n’wana wa Davhida. (Luka 18:38) Nkama lowu Yesu a nga fa, a pfuxiwile na a li ntsumi leswaku a ya hanya atilweni. (Mintirho 2:4-36) Hi ku famba ka nkama Yehovha a mu nyike wuhosi leswaku a fuma ka Mfumu wa Xikwembu. (Nhlawutelo 2:10) Phela Mfumu lowu se wa fuma, funtshi “wu ta fuma hi masiku ni masiku.” (Daniyele 2:44) Leswi vulaka swaku Yesu lweyi Bibele li vulaka swaku i ntukulu wa Davhida, a ta fuma hi masiku ni masiku ‘ku fana ni leswi n’weti wu humelelaka nkama hinkwawu atilweni.’
Se nkama ni nkama loko u vona n’weti niwusiku, tiyiseka swaku a xitshembiso xa Xikwembu lexi a nga xi yendlela Davhida xi ta hetiseka hikakunene, ni leswaku a Mfumu wa Xikwembu lowu se wu fumaka tilweni, wu ta tlhela wu fuma misava hinkwayu hilani ku nga heliki wu tlhela wu tisela vanhu minkateko ya ku kala yi nga heli! — Nhlawutelo 11:15.
HISEKELA NTIRHO WA KU CHUMAYELA
Nhlokomhaka 181 ya Tinhlamulu Ta Swivutiso Swa Bibele
Bibele Li Vulavula Hi Yini?
A buku la ku sungula la Bibele li vulavula hi leswi Xikwembu xi nga ma yendlisa xiswona matilo ni misava. Bibele li tlhela li hi byela swaku a vito la Xikwembu i Yehovha, li tlhela li hi byela swaku Xikwembu xi lava leswaku hi xi tiva. — Tipisalema 83:18.
Bibele li tlhela li tlhamusela leswaku ku ve ni mavunhwa ya manyingi hi Xikwembu, naswona li tlhela li hi pfuna ku vona leswaku Xikwembu xi ta swi yendlisa ku yini leswaku xi lulamisa mhaka yoleyo.
Bibele li vulavula hi xikongomelo xa Xikwembu hi misava ni vanhu. Li tlhela li hi byela ndlela leyi Xikwembu xi nga ta helisaka hi yona swilo hinkwaswu swa ku biha ka nkama lowu taka.
A Rito la Xikwembu li hi nyika minawu leyi nga hi pfunaka ka wutomi la hina siku ni siku. Vona swikombiso swin’wani:
Ndlela ya ku hanyisana ni vanhu: “Hinkwaswu leswi mi lavaka swaku van’wani va mi yendlela swona, na n’wina mi fanele mi va yendlela.” — Matewu 7:12.
Yi lava ku vula yini ndzimana leyi? Hinkwaswu leswi hi navelaka swaku vanhu van’wani va hi yendlela swona, hi fanele hi va yendlela swona.
Ku hlula xitresi: “Mi nga tshuki mi vilela hi swa mundzuku, hikusa siku la mundzuku li ta va ni mivilelo ya lona.” — Matewu 6:34.
Yi lava ku vula yini ndzimana leyi? Handle ka ku va hi tshamela ku tidlaya hi ku vilela hi swilo leswi nga ta hi yendlekela ka nkama lowu taka, hi fanele hi tsaka hi leswi hi nga na swona swoswi.
Ku va ni ndjangu lowu tsakeke: “Mun’wani ni mun’wani wa n’wina a fanele a rhandza nsati wa yena ku fana ni leswi a tirhandzisaka xiswona; na yena wansati a fanele a mu hlonipha hintamu swinene nuna wa yena.” — Vaefeza 5:33.
Yi lava ku vula yini ndzimana leyi? Leswaku u tsaka andjangwini, i swa lisima hintamu kuva u kombisa lirhandzu ni xihlonipho.
30 KA SETEMBRO KU YA KA 6 KA OUTUBRO
XUMA XI NGA KA RITO LA XIKWEMBU TIPISALEMA 90-91
Loko U Lava Ku Hanya Nkama Wa Ku Leha, Tshemba Yehovha
Murindzi N.o 3 wa 2019 paj. 5 mapar. 3-5
Minzamu Leyi Vanhu Va Nga Yi Yendla Ya Ku Lava Ku Yengesela Wutomi
Vasiyentixta va ku tala va vula leswaku a swilo swa ku daha leswaku u nga gugi swi nga yendla leswaku u hanya hintamu. I ntiyiso swaku a mahanyelo ya vanhu ma yampsile nyana ku sukela hi ma 1800. Kambe leswo swi yendleke hi mhaka ya ndlela leyi wubasisi li tamaka li yampsisiwa hi yona leswaku hi tivhikela ka mavabyi lawa ma tlulelanaka ni ndlela leyi va tirhisaka hi yona mavhasina.
Kolomuyani ka 3.500 wa malembe lawa ma nga hundza, Moxe lweyi a nga va mun’wani wa lava nga tsala Bibele, a tsale leswi: “Hi hanya 70 wa malembe, kumbe 80 loko munhu wa kona a tiyile. Kambe ma tale hi swikarhatu ni mahlomulu; ma hundza hi ku hantlisa, hi gama hi nyamalala.” (Tipisalema 90:10) Hambileswi vanhu va tamaka va yendla minzamu ka mhaka leyi, a wutomi la ha tama li fana ni ka masiku ya Moxe.
Phela swiharhi swin’wani swa lwandle swi nga hanya ku tlula 200 wa malembe. Loko hi txuvuka malembe hinkwavu lawa ma hanyiwaka hi swiharhi swoleswo, hi gama hi pimisa hi 70 kumbe 80 wa malembe lawa ma hanyiwa hi hina vanhu, hi nga ha gama hi tivutisa swaku: ‘Indjhe a wutomi la kona hi swoleswi?’
Murindzi N.o 1 wa 2019 paj. 5, kwadru
Vito La Xikwembu I Mani?
Vanhu vo tala va tivutisa xivutiso lexi. Kumbexana na wena u tshame u tivutisa. Hi nga veka xivutiso lexi hi ndlela leyi: Loko ku li leswaku hinkwaswu leswi nga kona ka ntumbuluku swi yo vumbiwa hi Xikwembu, xona ke, xi vumbiwe hi mani?
A ku tala ka vasiyentixta va pfumela leswaku ntumbuluku lowu hi wu vonaka wu ve ni masungulo. Hi ku pfumelelana ni ntiyiso lowo, a ndzimana ya ku sungula ya Bibele yi li: “A ku sunguleni Xikwembu xi tumbuluxe tilo ni misava.” — Genesa 1:1.
A swi nga ta koteka leswaku ntumbuluku wu titumbuluxa hi woxe. Ku hava nchumu lexi nga ti tumbuluxaka hi xoxe. A ntumbuluku a wu nga ta va kona loko a ku li leswaku a ku nga na nchumu lexi a xi li kona na wona wu nga se va kona. Hambileswi swi karhataka ku yi twisisa kahle mhaka leyi, ntiyiso wa mhaka hi leswaku ku fanele ku va ni munhu lweyi a a hanya na ntumbuluku wu nga se va kona, lweyi a vumbeke swilo hinkwaswu. Yehovha Xikwembu, Munhu wa moya lweyi a nga ni matimba lama nga heliki, hi yena a vumbeke swilo hinkwaswu. — Yohani 4:24.
Loko li vulavula hi Xikwembu, Bibele li li: “U yendle misava ni tiko, na tintshava ti nga se va kona, u Xikwembu hi masiku ni masiku.” (Tipisalema 90:2) Kutani Xikwembu xi tshama xi li kona minkama hinkwayu. Se swa twala ku vula leswaku “a ku sunguleni” xi tumbuluxe swilo hinkwaswu. — Nhlawutelo 4:11.
Murindzi 06/22 paj. 18 mapar. 16-17
Lirhandzu Li Nga Hi Pfunisa Ku Yini Swaku Hi Nga Chavi?
16 Sathana wa swi tiva swaku wutomi i la lisima hintamu ka hina. A vula swaku hi nga pfumela hambi hi ku luzekeliwa hi wunghanu la hina na Yehovha swaku hi nga fi. (Yob. 2:4, 5) Phela leswo a hi ntiyiso. Se, leswi Sathana “a kotaka ku yentxa swaku ku fiwa”, a tirhisa ku chava lifu swaku a hi tshikisa ku tirhela Yehovha. (Heb. 2:14, 15) Minkama yin’wana, lava nyimaka na Sathana va dlaya vanhu va Yehovha hileswi va yalaka ku tshika ku yingisa minawu ya Yena. Minkama yin’wana Sathana a nga ha tirhisa mavabyi swaku a hi yentxa hi nga yingisi minawu ya Yehovha. Vadotori ni maxaka ya hina va nga ha hi sindzisa ku pfumela ku cheliwa ngati kumbe hi pfumela madahelo lama lwisanaka ni minawu ya Bibele.
17 Hambileswi hi kalaka hi nga swi lavi ku fa, ha swi tiva swaku Yehovha a nga ta tshika ku hi rhandza hambiloko hi fa. (Lerha Varoma 8:37-39.) Yehovha wa va khumbuka vanghanu va yena lava va nga fa, ka yena swi fana ni loko va ha hanya. (Luk. 20:37, 38) Wa swi lava ku va pfuxa. (Yob. 14:15) A ze a nyikela hi N’wana wa yena Yesu swaku hi “kuma wutomi la ku kala li nga heli.” (Yoh. 3:16) Ha swi tiva swaku Yehovha a hi rhandza hintamu naswona a ni mhaka na hina. Hi mhaka leyo, loko hi vabya kumbe hi chava ku fa, hi fanele hi tshemba swaku Yehovha a ta hi tiyisa a tlhela a hi nyika wutlharhi. Leswo hi leswi Valéria ni nuna wa yena va nga swi yendla. — Pis. 41:3.
Lavetela Xuma Ka Rito La Xikwembu
Murindzi N.o 5 wa 2017 paj. 5
Munhu Mun’wani Ni Mun’wani A Ni Ntsumi Leyi Mu Vonelelaka?
A Bibele a li djondzisi swona swaku munhu a ni ntsumi leyi mu vonelelaka ka wutomi la yena. Khambi lin’wani Yesu a tshame a vula a ku: “Tivoneleni swaku mi nga va voneli hansi vanhu lava va ku fana ni swivanani; hikusa na mi byela swaku tintsumi ta vona leti nga matilweni ta mu vona Papayi wa mina lweyi a nga tilweni minkama hinkwayu.” (Matewu 18:10) A a lava ku vula yini Yesu hi marito lawa? A a lava ku vula swaku tintsumi ti ni mhaka na hina vanhu. Kambe a a nga lavi ku vula swona swaku munhu mun’wani ni mun’wani a ni ntsumi leyi mu vonelelaka ka wutomi la yena. Se a Vakreste va ntiyiso a va fambi va tipeta nghozini hi ku pimisa leswaku ntsumi leyi yi va vonelelaka ka wutomi la vona yi ta va vhikela.
Ku nga va swaku leswo swi lava ku vula swaku a tintsumi a ti na mhaka ni vanhu? A swi vuli swona. (Tipisalema 91:11) Van’wani va tiyiseka swaku Xikwembu xa ti tirhisa tintsumi swaku ti va pfuna ka wutomi la vona. Hi xikombiso, Kenneth na yena wa kholwa swaku a tintsumi ti mu pfunile ka wutomi la yena. Swi nga yendleka a tiyisile ka mhaka leyo. A Timboni ta Yehovha minkama ya yinyingi na tona ta swi vona swaku a tintsumi ta ti pfuna ka wutomi la tona ngopfungopfu ka ntirho wa ku chumayela. Kambe leswi tintsumi ti kalaka ti nga voneki, a hi nge swi tivi hi ku helela swaku Xikwembu xi ti tirhisa ku fikela kwini swaku ti pfuna vanhu. Se a swi bihanga ku va hi nga xi khensa Xikwembu hi lulamiselo la ku va ni tintsumi swaku ti hi pfuna. — Vakolosa 3:15; Yakobe 1:17, 18.
7 KU YA KA 13 KA OUTUBRO
XUMA XI NGA KA RITO LA XIKWEMBU TIPISALEMA 92-95
Ku Tirhela Yehovha I Nchumu Xa Lisima Hintamu Ka Wutomi La Hina!
Murindzi 04/18 paj. 26 par. 5
Wena Jovhem, U Navela Ku Mu Yendlela Yini Yehovha?
5 Loko u li jovhem, xin’wani lexi u nga xi yendlaka swaku u kombisa swaku wa swi khensa leswi Yehovha a ku yendlelaka swona, i ku tivekela mintirho leyi u lavaka ku yi yendla ka ntirho wa yena. Mupisalema a te: “I swinene ku khensa Yehovha . . . hikusa Yehovha Xikwembu xa mina, u ni tsakisile hi mhaka ya mintirho ya wena; ni huwelela hi ku tsaka hi mhaka ya mintirho ya mavoko ya wena.” (Ps. 92:1, 4) Hi xikombiso, pimisa hi hinkwaswu leswi Yehovha a nga ku nyika swona swa ku fana ni wutomi, Bibele, vamakwerhu bandleni ni tshembo wa ku hanya wutomi la ku tsakisa ka nkama lowu taka. Se loko u tivekela mintirho ya ku yi yendla, u yi yendlela Yehovha, u va u kombisa swaku wa mu khensa hi mhaka ya swilo hinkwaswu leswi a nga ku yendlela swona. Funtshi mintirho yoleyo yi ta ku pfuna swaku u tama u va kusuhi na yena.
Murindzi 11/18 paj. 20 par. 8
I Mani Lweyi A Fumaka Mimpimiso Ya Wena?
8 Ku fana ni mupsali wa munene, Yehovha a lava leswaku vana va yena va va ni wutomi leli tsakisaka. (Esa. 48:17, 18) Kutani a hi djondzisa matshinya ya minawu mayelana ni ku va ni mahanyelo lamanene ni ndlela leyi hi faneleke hi khoma van’wani ha yona. A hi rhamba leswaku hi vona swilo hilani yena a swi vonaka ha kona ni ku hanya hi ku landza minawu ya yena. Leswo a swi hi tsoni ntsaku, kambe swi hi pfuna ku va ni wutlharhi ni ku yendla swiboho leswinene. (Ps. 92:5; Swiv. 2:1-5; Esa. 55:9) Swi ta hi pfuna ku yendla swiboho leswinene leswi nga ta hi yendla hi tsaka. (Ps. 1:2, 3) Hakunene, loko hi pimisa ku fana na Yehovha hi vuyeliwa hi tindlela totala!
Murindzi 01/20 paj. 19 par. 18
U Wa Lisima ka Yehovha!
18 Hambiloko hi ya hi guga, hi nga tiyiseka swaku swi kona leswi hi nga swi yendlelaka Yehovha. (Ps. 92:12-15) Yesu a djondzise swaku leswi hi swi kotaka ku swi yendla kambe hi swi tekaka swi nga li swa nchumu ka hina, Yehovha a swi teka swi li swa lisima. (Luk. 21:2-4) Xa lisima i ku yendla leswi hi nga swi kotaka. Hi xikombiso, u nga chumayela, u khongelela vamakwerhu ni ku tiyisa van’wani swaku va tshama va tshembekile. Yehovha a ku nyika lisima, ku nga li hileswi u kotaka ku mu yendlela swona kambe hileswi u mu yingisaka hi mbilu hinkwayu. — 1 Ko. 3:5-9.
Lavetela Xuma Ka Rito La Xikwembu
Tshinela Ka Yehovha paj. 176 par. 18
A Wutlharhi La Yehovha I Likulu Ndjhani!
18 Loko Pawulo a vulavula hi wutlharhi la Yehovha a te: “Hi nga vona ku tala ka minkateko, wutlharhi ni wutivi la Xikwembu! Wuyavanyisi ni tindlela ta xona a swi koteki ku ti twisisa!” (Varoma 11:33) A marito ya Xigriki lawa Pawulo a nga ma tirhisa ku sunguleni ka ndzimana leyi, ma kombisa swaku a a hlamalisiwa hintamu loko a pimisa hi wutlharhi la Yehovha. Kasi a rito la Xigriki leli nga hundzuluxeliwa li va ‘ku yenta’, li hi yendla hi pimisa hi xihlovo xa ku yenta hintamu swinene lexi kalaka xi nga voneki swaku xi gama kwini. Se hi leswo wutlharhi la Yehovha li nga tshamisa xiswona hambiloko ho lava ku zama ku vona swaku li famba anze kwini a hi nge swi koti ku swi tiva hikusa i likulu hintamu swinene. Se ku pimisa hi leswo swi fanele swi hi yendla hi tiveka hansi! — Tipisalema 92:5.
14 KU YA KA 20 KA OUTUBRO
XUMA XI NGA KA RITO LA XIKWEMBU TIPISALEMA 96-99
“Vulani Mahungu Ya Ku Tsakisa”!
Murindzi 01/03/11 paj. 6 mapar. 1-2
I Yini Mahungu Ya Ku Tsakisa?
VAKRESTE va fanele va “chumayela mahungu ya ku tsakisa ya Mfumu” hi ku byela van’wani, ni ku va tlhamusela swaku Mfumu lowu i wuhosi leli nga ta fuma misava hinkwayu hi ndlela ya ku rhula. Marito lawa ma nge: “Mahungu ya ku tsakisa” ma tirhisiwa hi ndlela yin’wani ka Bibele. Hi xikombiso ku vulavuliwa hi “mahungu ya ku ponisa.” (Tipisalema 96:2) “Mahungu ya ku tsakisa ya Xikwembu.” (Varoma 15:16) Ni “mahungu ya ku tsakisa hi Yesu Kreste”. — Marka 1:1.
Hi ndlela ya ku vevuka, a mahungu ya ku tsakisa i swilo hinkwaswu leswi Yesu a nga swi vula, leswi vadjondzisiwa va yena va nga gama va swi tsala. Na Yesu a nga se famba a ya tilweni, a byele valandzeli va yena a ku: “Hi mhaka leyo, fambani mi ya djondzisa vanhu va matiko hinkwawu leswaku va va vadjondzisiwa va mina, mi va tsakamisa hi vito la Papayi ni la N’wana ni la moya wa ku kwetsima, mi va djondzisa ku yingisa hinkwaswu leswi ni nga mi byela swona.” (Matewu 28:19, 20) Marito lawa ma kombisa swaku a ntirho wa Vakreste, a hi ku chumayela mahungu ya ku tsakisa ntsena, kambe wu patsa ni ku djondzisa vanhu leswaku va va valandzeli va Yesu.
Murindzi 01/09/12 paj. 16 par. 1
Ku Ta Yendleka Yini Hi Siku La Ku Yavanyisa?
Vanhu va ku tala va pimisa swaku ka Siku La Ku Yavanyisa, a vanhu va ta fola hi bixa ka xitshamu xa wuhosi xa Xikwembu se va yavanyisiwa hi ku ya hi leswi a va swi yendla lani misaveni, van’wani va ta hakeliwa hi ku yisiwa tilweni va ya hanya kona, se van’wani va ta hisiwa ka ndzilu wa ku kala wu nga timeki, kumbe ka inferno. Kambe a Bibele a li djondzisi swona leswo, li vula swaku a Siku La Ku Yavanyisa i siku leli Xikwembu xi nga ta li tirhisa swaku xi lulamisa swilo lani misaveni. (Tipisalema 96:13) Naswona xi veke Yesu swaku a yendla ntirho lowo. — Lerha Esaya 11:1-5; Mintirho 17:31.
Murindzi 15/09/12 paj. 12 mapar. 18-19
Ku Rhula Hi Masiku Ni Masiku!
18 A ku sunguleni a ku ni ku rhula lani misaveni. Kambe nkama Adamu na Evha va nga pfumela ku xengeteliwa hi Sathana Davulosi swaku va djikela Yehovha, ku rhula loku a va li na kona ku helile. Kambe lexi tsakisaka hi leswaku ku sukela hi 1914, a Mfumu Wa Kreste wu yendla hinkwaswu swaku wu tlhelisela ku rhula loku a ku li kona, naswona ka nkama lowu taka loku Mfumu Wa Yesu Wa 1.000 Wa Malembe wu ta sungula ku fuma, ku ta yendleka minchumu ya ku hlamalisa hintamu swinene lani misaveni ya ku a yi nga se tshama yi va kona. (Efe. 1:9, 10) Kambe loko se wu helile Mfumu wa 1.000 wa Malembe, i mpsini swi nga ta yendleka? Yesu Kreste a ta tlhelisela Mfumu ka Papayi wa yena. Phela Yesu Kreste a nga fani na Sathana a tshamelaka ku navela swilo swa ku kala swi nga mu faneli. Yesu Kreste wa tiveka hansi. A tirhisa xitshamu lexi a nga nyikiwa xona hi Papayi wa yena swaku a tsakisa Papayi wa yena. Naswona loko nkama lowo wu fika, a ta tlhelisela Mfumu ka Papayi wa yena. Ntirho hinkwawu lowu Yesu Kreste a nga ta wu yendla, wu ta yendla swaku vito la Yehovha li dzunisiwa hi nkama wa ku kala wu nga heli. — Mat. 28:18; Filp. 2:9-11.
19 Loko se ku ta va ku hundzile nkama lowo hinkwawu, vanhu hinkwavu lava nga ta va na va hanya lani misaveni va ta va se va nga ha na xidjoho. Va ta tekelela xikombiso xa Yesu xa ku tiveka hansi, va pfumela ku fumiwa hi Yehovha. Va ta swi kombisa leswo loko va nyima na Yehovha nkama lowu va nga ta ringiwaka ka wugamu loko ku hela 1.000 wa malembe. (Nhl. 20:7-10) Ndzhaku ka leswo, hinkwavu lava nga ta kalaka va nga mu yingisanga Yehovha ku patsa na Sathana Davulosi ni madimona ya yena va ta helisiwa swa wugamu. Phela swi ta tsakisa ndjhani ku hanya ka nkama wolowo! Vanhu hinkwavu amisaveni hinkwayu va ta dzunisa Yehovha lweyi a nga ta va swilo hinkwaswu ka vanhu hinkwavu. — Lerha Tipisalema 99:1-3.
Lavetela Xuma Ka Rito La Xikwembu
Perspicaz vol. 1 paj. 427
Lisimu
A rito leli nge: “Lisimu la nyuwani” a lo humelela ka buku la Tipisalema ntsena. Kambe la tlhela li humelela ka buku la Esaya ni ka mabuku lawa ma nga tsaliwa hi Yohani. (Ps 33:3; 40:3; 96:1; 98:1; 144:9; 149:1; Esa 42:10; Nhl 5:9; 14:3) Ka ku tala lani rito leli li humelelaka kona ka Bibele, ku va ku kulungeliwa mfanelo leyi Yehovha a nga na yona ya ku fuma. Hi xikombiso, ka buku la Tipisalema 96:10 ku tsaliwe swaku “Yehovha i Hosi.” Naswona a ntsutsu wa rito leli nge “lisimu la nyuwani” wu va wu kombisa malulamiselo hinkwawu lawa Yehovha a ma yendlaka leswaku a fuma misava hinkwayu. — Ps 96:11-13; 98:9; Esa 42:10, 13.
21 KU YA KA 27 KA OUTUBRO
XUMA XI NGA KA RITO LA XIKWEMBU TIPISALEMA 100-102
Kombisa Leswaku Wa Li Khensa Lirhandzu La Yehovha
Murindzi 03/23 paj. 12 mapar. 18-19
U Nga Yendla Yini Swaku U Tilulamisela Ku Tsakamisiwa?
18 Ku rhandza Yehovha hi lona tlharhi lalikulu leli nga ku pfunaka ku hlula swikarhatu leswo. (Lerha Swivuriso 3:3-6.) Loko u mu rhandza hintamu Yehovha Xikwembu, hambi wo kumana ni xikarhatu xa ku tshamisa ku yini a xi nga ta swi kota ku ku hambanisa na yena. Bibele li vula swaku lirhandzu leli Yehovha a nga na lona hi vanhu va yena i likulu hintamu lakakuva a nga va tshiki kumbe ku va khohlwa. (Pis. 100:5) Se, na wena u nga swi kota ku mu tekelela hikusa u yendliwe hi xifaniso xa yena. (Gen. 1:26) Se i ntxini xi nga ku pfunaka ku kombisa lirhandzu la ku tshamisa xileswo?
19 Xa ku sungula lexi u nga xi yendlaka i ku mu khensa Yehovha hileswi a ku yendlelaka swona. (1 Tes. 5:18) Siku lin’wani ni lin’wani zama ku vona minchumu leyi Yehovha a ku yendlelaka yona, se loko u khongela, u mu tlangela hi mhaka ya yona. Funtshi nkama u pimisaka hi minchumu leyi, yi voni na ku li minchumu leyi Yehovha a yi yendlelaka wena hi ku kongoma ku nga li minchumu leyi Yehovha a yi yendlelaka vanhu hinkwavu. Leswo hi leswi mupostolo Pawulo na yena a a swi yendla. (Lerha Vagalatiya 2:20.) Ku yendla leswo swi ta ku pfuna swaku na wena u lava ku mu komba Yehovha swaku wa mu rhandza. Lirhandzu leli u nga na lona hi Yehovha li ta ku pfuna swaku u hlula mindzingo kumbe swikarhatu leswi u nga ha kumanaka na swona. Li ta tlhela li ku pfuna swaku u tama u gandzela Yehovha nkama ni nkama, u mu komba swaku wa mu rhandza siku ni siku.
Murindzi 02/23 paj. 17 par. 10
“Pfulani Matihlo Mi Tlhariha!”
10 Swin’wani leswi hi faneleke hi tivonela ka swona i ku tlanga hi ku gangisana, ku dakwa, makolo, mavulavulelo ya nhlambha, ku sixtira mafilmi ya tinyimpi, pornografiya ni swilo swa ku fambelana ni swoleswo. (Pis. 101:3) Nala wa hina Davulosi a zama tindlela ta kuva a wonha wunghanu la hina na Yehovha. (1 Ped. 5:8) Se, hi fanele hi tivonela hikusa yena a nga hi yendla hi va vanhu va ku tibyela, va wukwele, va ximbilwambilwani, va ku kala va nga tshembeki, va wunavenave ni va ku vekelana xiviti. (Gal. 5:19-21) A ku sunguleni swi nga ha tikomba swi nga li swa nchumu. Kambe loko hi nga yendli nchumu, swi nga ha kula swi za swi hi wonha, ku fana ni limintsu leli nga ni vhenenu leli nga ha yendlaka swaku leswi nga matlhelweni ka lona swi nga kuli kahle. — Yak. 1:14, 15.
Murindzi 15/07/11 paj. 16 mapar. 7-8
Pfumela Ku Basopisiwa Hi Yehovha
7 I mpsini hi nga swi yendlaka swaku hi nga landzeli vadjondzisi va mavunhwa? Tanihi Vakreste va ntiyiso, a hi fanelanga hi va yamukela makaya ya hina kumbe ku va pfuxela loko hi tlhangana na vona. Funtshi a hi lerhi swibukwana swa vona, a hi sixtiri leswi va swi vulaka ka matelevhizawu naswona a hi va landzeli ka internet kumbe ku lerha leswi va swi tsalaka ka ma site ya vona. Se hi mhaka muni hi yendla leswo? Hi mhaka ya lirhandzu. Hina hi rhandza Xikwembu xa ntiyiso, a hi pfumelelani ni leswi vona va swi djondzisaka. (Ps. 31:5; Yoh. 17:17) Handle ka leswo, hina hi rhandza nhlengeletanu ya Yehovha; hi mhaka ya yona hi djondza ntlhamuselo ya vito la Xikwembu, xikongomelo xa Yehovha hi misava hi tlhela hi tiva ni ntshembo lowu nga kona hi lava va nga fa. Wa khumbuka ndlela leyi u nga titwa hi yona nkama u nga djondza mintiyiso hinkwayu leyo? Se hi mhaka muni a wu ta pfumelela vadjondzisiwa va mavunhwa va ku susa ka nhlengeletanu ya Yehovha leyi nga ku djondzisa mintiyiso ya ku fana ni leyo? — Yoh. 6:66-69.
8 Ku nga na mhaka leswi vadjondzisiwa va mavunhwa va swi vulaka, hina a hi nga ta va landzela kumbe ku landzela minawu ya vona ya ku kala yi nga pfuni nchumu leswaku va hi hambukisa. Se a hi tameni hi tinyimisela ku tama hi tshembeka ka Yehovha ni ka nhlengeletanu ya yena leyi yi hi nyikaka mati ya wutomi. — Esa. 55:1-3; Mat. 24:45-47.
Lavetela Xuma Ka Rito La Xikwembu
Perspicaz vol. 2 paj. 624
Pelicano kumbe Gumbula
A xinyanyani lexi vitaniwaka pelicano kumbe gumbula, loko xi xurhile xi tolovela ku purhuma xi ya mananga xi ya fika xi tisonga xi tshama xoxe ku ringana nkama wa wunyingi swinene. Xinyenyani lexi xi hanya xivundzeni. Leyo i ndlela leyi mupisalema a nga titwa hi yona loko a tsalile a ku: “Ni fana ni gumbula la le mananga.” (Ps 102:6) A rito “mananga”, leli ku vulavuliwa hi lona lani i ndhawu ya kule swinene lani ku kalaka ku nga tshami vanhu naswona ku nga woma swinene.
HISEKELA NTIRHO WA KU CHUMAYELA
Nhlokomhaka 129 ya Tinhlamulu Ta Swivutiso Swa Bibele
Bibele Li Txintxiwile?
Ihim. Loko ku fananisiwa matsalwa ya khale ya ku tsaliwa hi voko, swa tikomba swaku Bibele a li txintxiwanga hambileswi li nga phindhaphindhiwa malembe ya manyingi ka mapapela ya ku kala ma nga tiyanga.
Vayuda lava a va tsala matsalwa hi ku phindaphinda ni Vakreste va ku sungula, va tsale swihoxo hinkwaswu swi nga yentxiwa hi vanhu va Xikwembu va khale. (Tinhlayo 20:12; 2 Samuwele 11:2-4; Vagalatiya 2:11-14) Va tlhele va tsala hi leswi a swi yentxeka ka Vayuda lava a va nga yingisi. Ni ku tsala hi wugandzeli la mavunhwa leli a li yentxiwa hi vanhu. (Hosiya 4:2; Malakiya 2:8, 9; Matewu 23:8, 9; 1 Yohani 5:21) Leswi lava a va tsala Bibele hi ku phindaphinda va nga swi tsala swihoxo leswi, swi kombisa swaku a va tshembeka naswona a va li hlonipha hintamu Rito la Xikwembu.
Leswi Xikwembu xi nga n’winyi wa Bibele a xi nga ta yentxa hinkwaswu swaku xi li vhikela? (Esaya 40:8, 1 Pedru 1:24, 25) A xi nga lavi swaku Bibele li pfuna vanhu va khale ntsena kambe ni va namuntlha. (1 Vakorinto 10:11) Phela “Hinkwaswu leswi nga tsaliwa khale swi tsaleliwe ku djondzisa hina swi hi nyika ntshembo hikusa Matsalwa lawa ma hi pfuna ku tiyisela ma tlhela ma hi tiyisa.” — Varoma 15:4.
Yesu ni valandzeli va yena a va vula Matsalwa ya Xiheberu na va nga kanakani swaku ma txintxiwile kumbe a ma txintxiwanga. — Luka 4:16-21; Mintirho 17:1-3.
28 KA OUTUBRO KU YA KA 3 KA NOVEMBRO
XUMA XI NGA KA RITO LA XIKWEMBU TIPISALEMA 103-104
Yehovha Wa Khumbuka “Swaku Hi Wuthulu”
Tekelela Yehovha Hi Ku Va Munhu Wa Ku Twisisana
5 Yehovha a tiveka hansi naswona a ni ntwelawusiwana. Funtshi swilo leswi hi swona swi yendlaka swaku a twisisa vanhu van’wani. Hi xikombiso, Yehovha a tiveke hansi nkama a a li kusuhi ni ku helisa vanhu va le Sodoma. A byele Lota swaku a baleka a ya ka ndhawu leyi nga ni tintshava, kambe Lota a a chava ku ya seniyani. Se a kombele swaku yena ni ndjangu wa yena va ya tumbela aZowari, ku nga doropa lalitsongo leli Yehovha a a lava ku li helisa. Phela Yehovha a a ta va a byele Lota swaku ‘wena, yendla leswi ni ku byelaka swona!’ Kambe a nga yendlanga leswo. A mu yingisile a tlhela a txintxa mapimu ya yena, a nga li helisi doropa la Zowari. (Gen. 19:18-22) Ka malembe lawa ma nga landzela, Yehovha a kombise ntwelawusiwana ka vanhu lava a va tshama Ninivha. A rhume muprofeta wa yena Yonasi leswaku a ya va byela swaku doropa leliyani ni vanhu va kona hinkwavu a va ta helisiwa hi mhaka ya swilo swa ku biha leswi a va swi yendla. Kambe nkama Vaninivha va nga tisola, Yehovha a nga ha va helisanga, vona ni doropa la vona. — Yon. 3:1, 10; 4:10, 11.
Murindzi 09/23 mapaj. 6-7 mapar. 16-18
Tshemba Yehovha Ku Fana Na Samsoni
16 Samsoni a tshovele ku vava hi mhaka swilo leswi a nga swi yendla. Kambe ku ni nchumu xin’we xa ku a nga tshikanga ku xi yendla, ku nga ku tama a tirhela Yehovha. Se na hina, minkama yin’wani hi nga ha djoha kumbe hi phazama, hi gama hi layiwa kumbe hi luzekeliwa hi mintirho yin’wani leyi a hi li na yona abandleni. Kambe ku ni nchumu xin’we xa ku na hina a hi fanelanga hi xi yendla, ku nga ku tshika ku tirhela Yehovha. Phela hambiloko hi djohile kumbe hi phazamile, Yehovha wa ha hi rhandza funtshi a hi vona hi li va lisima ka yena. (Ps. 103:8-10) Se, a hi khumbukeni leswaku ku fana na Samsoni, ha ha li va lisima ka yena hambiloko hi pfana hi phazama.
17 Vona leswi nga yendlekela makwerhu wa hina Michael. A a tshama a khomekile hi mintirho leyi a a yi yendla abandleni hileswi a a li mupfunisi wa bandla a tlhela a va mupfuli wa ndlela wa nkama hinkwawu; kambe a game a djoha. Leswo swi yendle swaku a luzekeliwa hi mintirho leyi a a li na yona abandleni. Loko a vulavula hi swona, makwerhu lweyi a li: “A swilo a swi ni fambela kahle naswona a ni wu tsakela ntirho lowu a ni wu yendlela Yehovha, kambe kola na kola a swilo swi txintxile. A ni swi tiva swaku Yehovha a a nga ta ni tshika kambe a ni tshamela ku pimisa swaku ‘indjhe a na ha ta swi kota ku tlhela ni va ni wunghanu lalinene na Yehovha ni swaku a ni ta tlhela ni swi kota ku tama ni mu tirhela kahle bandleni ni tlhela ni yendla swilo hinkwaswu leswi a ni swi yendla khale na ni nge se djoha?’”
18 Lexi tsakisaka hi leswaku Michael a nga godolanga, a tame a tirhela Yehovha. Funtshi hi ku famba ka nkama, a game a tlhela a kuma mintirho leyi a a li na yona naswona namuntlha i doda a tlhela a va mupfuli wa ndlela. Loko a tlhamusela leswi swi nga mu pfuna, Michael a vula leswi: “Ni lwele ku yendla hinkwaswu leswi a ni swi kota swaku ni tiyisa wunghanu la mina na Yehovha hi ku va ni pfula mbilu ya mina hi xikhongelo ni mu byela leswi a ni titwisa swona, hi ku va ni djondza ni tlhela ni gayela hi leswi a ni swi djondza. Xin’wanyani xi nga ni pfuna ku ve madoda. Phela madoda a ma tshamela ku ni byela ma tlhela ma ni tiyisekisa swaku Yehovha wa ni rhandza. Swoswi ni tirhela Yehovha na mbilu ya mina yi pepile funtshi leswo swi ni pfune ku vona leswaku a munhu hambiloko o phazama kandjhani, loko a tisola hi mbilu hinkwayu, Yehovha a ta mu rivalela.” Se hina hi djondza yini ka xikombiso xa Michael? Hi djondza swaku hambiloko hi phazama, Yehovha a ha ta tama a hi tirhisa a tlhela a hi katekisa. Lexi xi lavekaka i ku va hina hi vona swaku hi kwini lani hi nga phazama kona, hi lunghisa lani hi nga phazama kona, hi tlhela hi mu tshemba. Loko hi yendla leswo Yehovha a ta hi tirhisa minkama hinkwayu. — Ps. 86:5; Swiv. 28:13.
U Nga Swi Kota Ku Fikelela Leswi U Lavaka Ku Swi Yendla
2 Loko ku li swaku u yendla minzamu ya ku fikelela nchumu wa ku karhi lowu u nga tivekisela swaku u wu yendla kambe u nga swi koti, u nga pimisi swaku a wu wa nchumu. Phela swi lava nkama ni minzamu leswaku u fikelela nchumu lexi u nga tivekisela xona hambiloko swi tikomba ingi a xi karhati. Naswona kuva u yendla minzamu ya leswaku u fikelela leswi u swi lavaka swi kombisa leswaku u li nyika lisima wunghanu leli u nga na lona na Yehovha, naswona u lava ku yendla hinkwaswu leswi u nga swi kotaka leswaku u mu tsakisa. Se swi tivi leswaku Yehovha na yena a yi nyika lisima minzamu leyi u yi yendlaka, naswona a nga nyimeli leswaku u yendla swilo leswi a swi tivaka swaku a wu nge swi koti. (Ps. 103:14; Mik. 6:8) Se nkama lowu u tivekiselaka nchumu wa ku karhi lowu u lavaka ku wu fikelela, u nga langi nchumu lexi u swi tivaka swaku a wu nga ta swi kota ku xi fikelela. Se ina ka, loko se u langile nchumu wa kona, u nga yendla yini swaku u wu fikelela? A hi swi voneni.
Lavetela Xuma Ka Rito La Xikwembu
Tshinela Ka Yehovha paj. 55 par. 18
Matimba Ya Ku Yendla Swilo — ‘Lweyi A Nga Yendla Matilo Ni Misava’
18 Matimba lawa Yehovha a nga ma tirhisa swaku a yendla swilo ma hi djondzisa yini hi yena? Hi djondza swaku Yehovha hi yena a nga tumbuluxa swilo hinkwaswu swa ku hlamalisa. Hi swona leswi mupisalema a nga swi vula a ku: “Mintirho ya wena yi tale ndjhani, Yehovha Xikwembu xa mina! . . . Misava yi tale hi minchumu leyi u nga yi yendla.” (Tipisalema 104:24) Phela hambi hi tintivi se ti kume minxakaxaka ya minchumu ya ku hlamalisa leyi Yehovha a nga yi yendla. Hambiloko munhu o zama kandjhani, a nga kona lweyi a nga vaka ni matimba ya ku fana ni ya Yehovha, kova yena ntsena lweyi a nga ni matimba ya ku kala ma nga heli ya ku yendla swilo hinkwaswu.