BIBLIYOTEKA KA INTERNETI la Watchtower
Watchtower
BIBLIYOTEKA KA INTERNETI
xiChangana (Moçambique)
  • BIBELE
  • MABUKU
  • MINTLHANGANU
  • mwbr24 Novembro pp 1-14
  • Mareferensiya Ya Xibukwana Xa Mintlhanganu Ya Mahanyelo Ni Ntirho

Aku na vhidiyu lihlawuliweke.

Hivaleli, aswikotekanga kuchaya vhidiyu.

  • Mareferensiya Ya Xibukwana Xa Mintlhanganu Ya Mahanyelo Ni Ntirho
  • Mareferensiya Ya Xibukwana Xa Mintlhanganu Ya Mahanyelo Ni Ntirhu — 2024
  • Swihlokwana
  • 4 KU YA KA 10 KA NOVEMBRO
  • 11 KU YA KA 17 KA NOVEMBRO
  • 18 KU YA KA 24 KA NOVEMBRO
  • HISEKELA NTIRHO WA KU CHUMAYELA
  • 25 KA NOVEMBRO KU YA KA 1 KA DEZEMBRO
  • 2 KU YA KA 8 KA DEZEMBRO
  • 9 KU YA KA 15 KA DEZEMBRO
  • 16 KU YA KA 22 KA DEZEMBRO
  • 23 KU YA KA 29 KA DEZEMBRO
  • 30 KA DEZEMBRO KU YA KA 5 KA JANEIRO
Mareferensiya Ya Xibukwana Xa Mintlhanganu Ya Mahanyelo Ni Ntirhu — 2024
mwbr24 Novembro pp 1-14

Mareferensiya Ya Xibukwana Xa Mintlhanganu Ya Mahanyelo Ni Ntirho

© 2024 Watch Tower Bible and Tract Society of Pennsylvania

4 KU YA KA 10 KA NOVEMBRO

XUMA XI NGA KA RITO LA XIKWEMBU TIPISALEMA 105

“Wa Wu Khumbuka Ntwananu Wa Yena Minkama Hinkwayu”

Murindzi 04/23 paj. 28 mapar. 11-12

Hi Nga Li Tiyisisa Ku Yini Lipfumelo Ka Ntshembo Wa Misava Ya Nyuwani?

11 Swoswi a hi voneni switshembiso swin’wani leswi Yehovha a nga swi yendla ka vanhu va yena ka minkama ya khale, leswi a swi tikomba ingi a swi nge koteki ku swi hetisisa. A tshembise Abrahamu na Sara swaku hambileswi a va gugile a va ta psala n’wana. (Gen. 17:15-17) A tlhele a byela Abrahamu swaku a a ta nyika vatukulu va yena a tiko la Kanana. Xitshembiso lexi a swi tikomba ingi swi nge koteki ku xi hetisisa hikusa Vayisrayele, ku nga vatukulu va Abrahamu va hete malembe ya manyingi na va hlupheka na va li swikarawa aGibita. Kambe xitshembiso lexi xi hetisekile. Hi ku famba ka nkama, Yehovha a vule swaku Elizabeti hambileswi se a a gugile a a ta va ni n’wana. A tlhele a tshembisa Mariya hambileswi a a nge se famba masangu ni wanuna, swaku a a ta va ni nyimba leswaku a psala N’wana wa Xikwembu. Hi ndlela leyo, ku hetiseka xitshembiso lexi Yehovha a a xi yendlile ka malembe ya manyingi lawa a ma hundzile a jardim la Edeni. — Gen. 3:15.

12 Loko hi pimisa hi switshembiso leswi Yehovha se a nga swi hetisisa ka vanhu va nkama lowu nga hundza, hi ya hi tiyiseka swaku xitshembiso lexi a nga hi yendlela xona xa misava ya nyuwani hikakunene xi ta yendleka. (Lerha Yoxuwa 23:14; Esaya 55:10, 11.) Hi ndlela leyo, hi va hi lunghekile ku pfuna vanhu van’wani ku twisisa swaku a xitshembiso lexi a nga hi yendlela xona xa ku hi nyika misava ya nyuwani, xi ta hetiseka hikakunene. Yehovha a vule leswi mayelana ni misava ya nyuwani ni matilo ya nyuwani: “Marito lawa ma tshembeka naswona i ya ntiyiso.” — Nhl. 21:1, 5.

Perspicaz vol. 2 paj. 563 par. 3

Rito

A ntumbuluku hinkwawu wu kongomisiwa hi rito la Xikwembu naswona xi nga wu tirhisa leswaku xi hetisisa swikongomelo swa xona. (Ps 103:20; 148:8) A rito la xona la tshembeka naswona hinkwaswu leswi xi swi tshembisaka swa hetiseka minkama hinkwayu. (Det 9:5; Ps 105:42-45) Hi lani xi nga vula hi kona, a rito la xona li “ta tshama hi masiku ni masiku”; a li nge tlheli na li nga hetisisanga a swikongomelo swa xona. — Esa 40:8; 55:10, 11; 1Pe 1:25.

Lavetela Xuma Ka Rito La Xikwembu

Murindzi 01/11/86 paj. 19 par. 15

Majovhem — Mi Va Lisima Ka Nhlengeletanu Ya Yehovha

15 “Va bohe minenge ya yena [Yosefa] hi machini, nhamu ya yena va yi bohe hi tinsimbi; anze ku fika nkama lowu leswi a nga swi hlaya swi yendleka, rito la Yehovha hi lona li nga mu lulamisa.” (Tipisalema 105:17-19) Ku ringana 13 wa malembe, Yosefa a ve xikarawa a tlhela a hluphiwa ka tiko la Gibita. Kambe leswo swi mu djondzise swilo swa lisima. Hambileswi Yehovha a nga swi pfumelela swaku swikarhatu hinkwaswu leswo swi mu humelela ka wutomi la yena, kambe a xivutiso hi lexi: Ku nga va swaku a xiyimu lexo xi mu pfunile Yosefa leswaku a djondza ku tshemba Yehovha? Ku nga va leswaku a xi tirhisile xiyimu lexo kuva a djondza ku lehisa mbilu, ku tiveka hansi ni ku va a tiva ku tiyisela loko a kumana ni swiyimu swa ku tika? A hi kanakani! Yosefa a swi yendlile leswo hi ku pfuniwa hi Yehovha naswona a ve wa lisima hintamu ka Yehovha. Naswona hi ku famba ka nkama, Xikwembu xi mu tirhisile hi ndlela ya ku hlamalisa swinene. — Genesa 41:14, 38-41, 46; 42:6, 9.

11 KU YA KA 17 KA NOVEMBRO

XUMA XI NGA KA RITO LA XIKWEMBU TIPISALEMA 106

“Va Khohlwe Xikwembu Muponisi Wa Vona”

Murindzi 07/18 paj. 18 par. 13

‘I Mani Lweyi A Nyimaka Na Yehovha?’

13 Vayisrayele va chavisiwile hi ndlela ya ku hlamalisa leyi Yehovha a kombiseke ha yona matimba ya yena. Hi mhaka leyo, a va vanga ni xivindzi xa ku vulavula na Yehovha. Va kombele Moxe leswaku a khwela ntshava ya Sinayi leswaku a ya vulavula na yena. (Eksoda 20:18-21) Kambe ku hundze nkama wa wunyingi, Moxe a nga tlheli. Swi nga yendleka Vayisrayele va sungule ku pimisa leswaku a va ta fela mananga tanihi leswi mukongomisi wa vona a a nga li na vona. Se a va ta yendla yini? Va sungule ku vilela. Hikolaho ka leswi a va khomelele hintamu ka munhu wa nyama, va byele Aroni va ku: “Sekeleka, u hi yendlela xikwembu lexi nga ta hi rhangela, hikusa a hi swi tivi leswi nga humelela Moxe, wanuna loyi a hi rhangeleke hi huma atikweni la Gibita.” — Eksoda 32:1, 2.

Lavetela Xuma Ka Rito La Xikwembu

Murindzi 15/07/06 paj. 13 par. 9

Tipontu Ta Lisima Ta Buku La Tipisalema

106:36, 37. A tindzimana leti ti kombisa leswaku lweyi a gandzelaka swifaniso a nga ha va a gandzela a madimoni hi ku kongoma. Leswo swi kombisa swaku a munhu lweyi a tirhisaka swifaniso a nga ha tshuka a kongomisiwa hi madimoni ka wutomi la yena hi ku kongoma. Kambe a Bibele la hi tsundzuxa ka leswaku hi fanele hi tivonela ka swifaniso. — 1 Yo. 5:21.

18 KU YA KA 24 KA NOVEMBRO

XUMA XI NGA KA RITO LA XIKWEMBU TIPISALEMA 107-108

“Khensani Yehovha Hikusa I Munene”

Murindzi 15/04/07 paj. 20 par. 2

A Bandla Li Dzunisa Yehovha

2 A bandla la Wukreste a ko va ntlawa wa vanhu lava ngo tlhangana ntsena hi xikongomelo xo karhi xa le mugangeni, kumbe ku ta hamba ntlangu wo karhi ku nga ha va wa bola kumbe swin’wanyani. Kambe i ntlawa wa vanhu lava tlhanganaka hi xikongomelo xa ku dzunisa Yehovha. Khale ni khale a swi yendlisa swoleswo, hilani Tipisalema 35:18 yi vulaka hi kona loko yi ku: “Kutani ni ta ku khensa ka nhlengeletanu yayikulu; ni ta ku dzunisa axikarhi ka vanhu va vanyingi.” Se a leyi ya Tipisalema 107:31, 32 yi hi kutxa yi ku: ‘Khensani Yehovha hi mhaka ya lirhandzu la yena lalikulu, ni hi mhaka ya mintirho ya yena ya ku hlamalisa leyi a nga mi yendlela yona, mu dzuniseni lomu vanhu va hlengeletanaka kona.’

Murindzi 15/01/15 paj. 9 par. 4

Khensa Yehovha U Tlhela U Katekisiwa

4 Leswaku hi va ni mbilu ya ku khensa hi fanele hi pimisa hi minkateko leyi Yehovha a hi nyikaka. Hi pimisa hi wunene ni lirhandzu leli a hi kombaka lona. Phela na yena mupisalema ku va a tinyikile nkama wa ku pimisa hi hinkwaswu leswi Yehovha a nga mu yendlela swona, swi mu hlamalisile hintamu. — Lerha Tipisalema 40:5; 107:43.

Lavetela Xuma Ka Rito La Xikwembu

Perspicaz vol. 2 paj. 396 par. 3

Mowabu

Hi ku famba ka malembe na Davhida wa ha fuma, ku ve ni nyimpi, lana a ku lwa a tiko la Israyele ni la Mowabu. Vamowabu va hluliwile naswona va game va sindzisiwa ku hakela a rhesa ka Davhida, kambe leswo swi game hi manyala. Hikusa swi tikomba ingaku Vamowabu va vanyingi va game va dlayeteliwa hi ndlela ya ku chavisa hi Davhida. (2Sa 8:2, 11, 12; 1Tik 18:2, 11) Phela ku va Davhida a hlulile hi ndlela liya ya ku hlamalisa a swi hetisisa a wuprofeta leli nga vuliwa hi Balama kolomuyani ka 400 wa malembe lawa ma nga hundza loko a te: “Ku ta huma nyeleti ka Yakobe, ku ta huma nhonga ya wuhosi aIsrayele. Kunene a ta faya ximombo xa Vamowabu, ni tinhloko ta hinkwavu lava rhandzaka nyimpi.” (Tin 24:17) Phela swi nga yendleka nkama lowu Davhida a nga hlula Vamowabu hi ndlela leyo, ku li nkama wolowo a nga vula leswaku a Vamowabu i “baziya” leli Xikwembu xi hlambelaka ka lona. — Ps 60:8; 108:9.

HISEKELA NTIRHO WA KU CHUMAYELA

Nhlokomhaka 90 ya Vampsha Va Vutisa

I Ntxini Xi Nga Ku Pfunaka Swaku U Vona Swilo Hi Ndlela Yayinene?

Hi mhaka muni swi li swa lisima ku pimisa hi leswi? A Bibele ka buku ya Swivuriso 15:15 li li: “Lweyi mbilu ya yena yi nga tsaka a tshama na a tsakile.” Hilani ndzimana leyi yi vulaka hi kona, a vanhu lava va tshamelaka ku pimisa swilo swaswinene, va tibyelaka swaku swi ta famba kahle minkama hinkwayu va tshama na va tsakile. Naswona vanhu va ku tshamisa xileswo va tolovela ku va ni vanghanu va vanyingi. Leswo swi yendleka hikusa hi ntolovelo hina hi rhandza ku va kusuhi ni vanhu lava pimisaka minchumu yayinene.

Se i ntxini xi nga hi pfunaka? Swi lava hi djondza ku ringanisela. A hi nga ta yendla ingaku a hi na swikarhatu ka wutomi la hina; naswona a swi lavi ku vula swaku hi ta kulisa swikarhatu leswi hi nga na swona, lakakuva hi tshama na hi xukuvalile minkama hinkwayu. A loko hi djondza ku ringanisela swi ta hi pfuna swaku hi nga ti tikiseli wutomi naswona swikarhatu leswi hi kumanaka na swona swi nga hi heti ntamu.

I yini leswi u nga swi yendlaka?

U nga tshameli ku pimisa hi swihoxo swa wena. Bibele li li: “A nga kona munhu . . . lani misaveni lweyi a yendlaka swaswinene ntsena funtshi a kalaka a nga djohi.” (Ekleziyaxta 7:20) Leswo swi kombisa swaku a ku va u phazama a swi lavi ku vula swaku u munhu wa ku biha naswona a swi vuli swaku minkama hinkwayu u ta tshamela ku yendla swilo swa ku biha, kambe o va xikombiso ntsena xa leswaku ku fana ni vanhu hinkwavu na wena wa phazama hikusa u ni xidjoho.

U nga swi kotisa ku yini ku yendla swilo hi ndlela ya kona? Zama ku lulamisa swihoxo swa wena kambe u nga ti tikiseli. Djaha lin’wani leli vitaniwaka Caleb li te: “Ni zama ku vona lomu ni phazamaka kona, ni djondza ka swihoxo swa mina ni tlhela ni lwela ku lulamisa.”

Tshika ku tifanisa ni vanhu van’wani. A Bibele ka buku ya Vagalatiya 5:26 yi li: “Hi nga tshuki hi tibyela, hi phikizana ni vanhu van’wani ni ku kweleta van’wani.” U nga ha tshuka u vona mafoto ka ma redes sociais ya vanghanu va wena naswona u tlhela u tsumbula swaku a va ku rhambanga ka fexta la ku karhi, kambe leswo a swi fanelanga swi ku yendla u kwata u tlhela u hela matimba hikusa leswo swi nga yendla u va kwatela hintamu vanghanu va wena.

U nga yendla yini swaku u vona swilo hi ndlela ya kona?

Pfumela swaku a hi ka tindhawu hinkwatu vanghanu va wena va nga ta ku rhamba ka tona. Xin’wani xi nga ku pfunaka i ku khumbuka leswaku a mafoto lawa vanhu va tolovelaka ku ma poxtara ka ma redes sociais, i ya swilo leswiyani swa ku tsakisa leswi va yendlekelaka ka wutomi la vona. Jovhem lin’wani leli vitaniwaka Alexis li vule leswi: “A vanhu va tolovela ku poxtara swilo swa ku tsakisa leswi va yendlekelaka ka wutomi la vona, a ku na munhu lweyi a poxtaraka swilo hinkwaswu swa wutomi la yena la siku ni siku.”

Hanya hi ku rhula ni vanhu hinkwavu, ngopfungopfu andjangwini wa wena. A Bibele ka Varoma 12:18 yi li: “Loko swi koteka hanyani hi ku rhula ni vanhu hinkwavu.” I ntiyiso swaku mun’wani ni mun’wani a nga tilangela ku yendla leswi a swi lavaka andjangwini, swi nga va swi bihile kumbe i swinene; kambe wena minkama hinkwayu u nga ha langa ku yendla leswi nga swinene, leswi nga ta pfunisaka swaku ku va ni ku rhula andjangwini.

25 KA NOVEMBRO KU YA KA 1 KA DEZEMBRO

XUMA XI NGA KA RITO LA XIKWEMBU TIPISALEMA 109-112

Seketela Yesu Lweyi A Nga Hosi!

Murindzi 01/09/06 paj. 13 par. 5

Tipontu Ta Lisima Ta Buku La Tipisalema

110:1, 2 — A yendla yini Yesu ka tlhelo la xinene la Xikwembu? Nkama a nga pfuxiwa a ku feni, Yesu a tlhele a ya matilweni a ya tshama ka tlhelo la xinene la Xikwembu, na a nyimela swaku a sungula ku fuma hi lembe la 1914. Kambe ka nkama wolowo hinkwawu na wa ha rindza ku nyikiwa a wuhosi, Yesu a a pfuna Vakreste lava va nga totiwa ka ntirho wa ku chumayela ni ku yendla vadjondzisiwa, ni ku tlhela a va lunghiselela leswaku va ya fuma ka Mfumu wa Xikwembu. — Matewu 24:14; 28:18-20; Luka 22:28-30.

Murindzi 01/04/00 paj. 18 par. 3

Lava Va Lwaka Ni Xikwembu A Va Nga Ta Hlula!

3 Ku sukela hi malembe ya ma 1900 a vanhu va Yehovha va hlaseliwa hintamu swinene. Ka matiko ya manyingi vanhu va zama hi tindlela ta ku hambanahambana leswaku va nyimisa ntirho wa ku chumayela. Kambe leswo a vo swi sukela, va swi yendla hi ku kongomisiwa hi nala wamukulu swinene wa hina ku nga Sathana Davulosi, lweyi a “bongaka ku fana ni nghonyama” leyi lavaka a nchumu xa ku xi hahlulela. (1 Pedru 5:8) Kambe hi 1914 nkama ku nga hela minkama ya matiko, Xikwembu xi veke Yesu leswaku a fuma misava hinkwayu, xi gama xi mu rhuma leswaku a “yavanyisa a xikarhi ka valala va yena.” (Luka 21:24; Tipisalema 110:2) Nkama Yesu a nga sungula ku tirhisa a wuhosi la yena, xa ku sungula a hlongole Sathana atilweni a mu txukumetela lani misaveni. Se leswi Sathana a tivaka leswaku a saleliwe hi nkama wawutsongo a kwatile swinene, naswona a zama ku hlasela Vakreste lava va nga totiwa ni Vakreste lavan’wani hinkwavu. (Nhlawutelo 12:9, 17) Se ina ka, a minzamu yoleyo hinkwayu ya ku nyimisa a ntirho wa ku chumayela yi humelelile?

Beneficie-se paj. 76 par. 2

Tama U Kulisa A Wunghanu La Wena Na Yehovha!

Leswaku u kulisa a wunghanu la wena na Yehovha ku ni leswi u nga ha swi yendlaka. Hi xikombiso, u nga ha yendla hinkwaswu leswi u nga swi kotaka leswaku u tirha nkama wa ku leha ka ntirho wa ku chumayela, ni ku lavetela a tindlela ta ku pfuna vamakwerhu bandleni, ngopfungopfu lava va ha ku sungulaka ku hlengemela na hina. Ku nga ha va majovhem kumbe lava va vabyaka. U nga ha tinyikela swaku u pfunisa ka ku basisa aYindlo ya Wugandzeli, u pfunisa ka masembleya ni makongresu. Naswona u nga ha pimisa hi ku prenxera petição leswaku u va mupfuli wa ndlela wa nkamanyana, kumbe ku kambela a swiyimu swa wena ku vona swaku u nga va mupfuli wa ndlela wa nkama hinkwawu, kumbe ku ya pfunisa ka mabandla lawa ku nga ni xilaveko. Naswona loko u li wanuna u nga ha yendla hinkwaswu leswi u nga swi kotaka swaku u faneleka ku va doda kumbe mupfunisi wa bandla. Loko u yendla swilo hinkwaswu leswo, u ta va u kombisa swaku vhela u tama u kulisa a wunghanu la wena na Yehovha. — Ps. 110:3.

Lavetela Xuma Ka Rito La Xikwembu

Perspicaz vol. 2 paj. 559 par. 4

Ntwananu

Ntwananu Wa Ku Va Yesu A Va Muprista Ku Fana Na Melkisedeki. A lweyi a nga tsala a buku la Vaheberu 7:1-3, 15-17, a kombisa leswaku a ntwananu lowu ku vulavuliwaka hi wona ka Tipisalema 110:4, wu kombetela ka Yesu Kreste naswona lowu i ntwananu lowu Yehovha a nga wu hamba na Yesu. A kombise swaku Yesu a ta va Hosi a tlhela a va Muprista ku fana na Melkisedeki. Kambe leswo a ta swi yendleka atilweni hikusa Melkisedeki a a li hosi a tlhela a va muprista lani misaveni. — Heb 6:20; 7:26, 28; 7:3; 8:1.

HISEKELA NTIRHO WA KU CHUMAYELA

Nhlokomhaka 23 ya Swivutiso Leswi Vanhu Va Tolovelaka Ku Swi Vutisa

Hi Mhaka Muni Timboni Ta Yehovha Ti Nga Yi Nyimpini?

Hi leswi swivangelo leswi swi yendlaka Timboni ta Yehovha ti nga yi nyimpini:

1. Ti Yingisa Xikwembu. A Bibele ka Esaya 2:4 yi vula swaku lava va tirhelaka Xikwembu a “va ta txintxa swipada swa vona swi va swikomu, naswona a va nga ha ta djondza nyimpi.”

2. Ti yingisa Yesu Kreste. Yesu a byele mupostolo Pedru a ku: “Tlhelisa xipada xa wena ka ndhawu ya xona, hikusa hinkwavu lava khomaka xipada va ta dlayiwa hi xipada.” (Matewu 26:52) Hi ku vula leswo Yesu a swi basisile kahle leswaku valandzeli va yena a va nga ta khoma a swibamu.

Phela hi ku va Timboni ti nga tipeti ka maguwa ya politika ti va ti yingisa nawu wa Yesu lowu nga ka Yohani 17:16 lana a nga vula leswaku ‘a hi lumbi misava leyi.’ Xin’wani a Timboni a ti tipeti ka timhaka ta ku ya a wusonchweni, naswona a ti va holovisi lava va yendlaka a xiboho xa ku ya a wusonchweni.

3. Ti rhandza a vanhu van’wani. Yesu a byele vadjondzisiwa va yena swaku “va rhandzana.” (Yohani 13:34, 35) Leswi Timboni ta Yehovha ti rhandzanaka amisaveni hinkwayu, leswo swi yendla leswaku tona ti nga khomi a xibamu ti ya lwa ni vamakwavu va tona. — 1 Yohani 3:10-12.

4. Ti tekelela a xikombiso xa Vakreste va ku sungula. A Enciclopédia da Religião da Guerra yi vule leswi: “A Vakreste va ku sungula a va nga yi nyimpini kumbe ku ya djondzela ku va masonchwa, hikusa a va vona leswo na swi nga twanani ni leswi Yesu a nga va djondzisa swona. Hikusa a va byele leswaku a “va fanele va rhandza van’wani ku patsa ni vanhu lava a va va nyenya.” Ntivi yin’wani leyi vitaniwaka Peter Meinhold na yona yi te: “Ku va munhu a va Mukreste a tlhela a va musonchwa hi nkama wun’we a swi nga twani.”

Ta Pfunisa Ka Swin’wani Lomu Ti Tshamaka Kona

A Timboni ta Yehovha i vanhu lava va hanyisanaka kahle ni vanhu van’wani amugangeni kumbe va le tikweni ka vona. Va yi yingisa mimfumu hi ku landza a minawu ya Bibele leyi nge:

“Yingisani lava va fumaka.” — Varoma 13:1.

“Tlheliselani swa Khezari ka Khezari, kambe swa Xikwembu ka Xikwembu.” — Matewu 22:21.

Hina Timboni ta Yehovha ha yi yingisa a minawu ya tiko. Ha hakela a ma impoxtu, hi tlhela hi tirhisana ni mimfumu ka swin’wani leswi lavekaka amugangeni.

2 KU YA KA 8 KA DEZEMBRO

XUMA XI NGA KA RITO LA XIKWEMBU TIPISALEMA 113-118

Ni Ta Mu Hakela Hi Yini Yehovha?

Murindzi 01/01/01 paj. 11 par. 13

Kulisa Lirhandzu La Wena Hi Yehovha

13 Hina vanhu a hi psaliwi na hi mu rhandza Yehovha, kambe leswaku hi kota ku mu rhandza hi fanele hi yendla xan’wanchumu. Nchumu wolowo i ku va hi djondza hi ndlela leyi Yehovha a va kombaka hi yona vanhu leswaku wa va rhandza. (Genesa 2:5-23) Hi xikombiso, nkama lowu Adamu na Evha va nga djoha ajardim la Edeni, a nga va tsukulanga kambe a yendle xan’wanchumu leswaku hina vanhu hi tlhela hi swi kota ku va ni wunghanu lalinene na yena. (Genesa 3:1-5, 15) Xin’wani a nga xi yendla leswaku a kombisa leswaku wa va rhandza vanhu, i ku va a rhumele N’wana wa yena Yesu leswaku a ta hi fela kuva a hi chunsa ka xidjoho ni lifu. (Yohani 3:16, 36; Esaya 25:1) Hambi hi Hosi Davhida a li hanyile lirhandzu lolelo la Yehovha, lakakuva a za vula leswaku a mu rhandza hintamu Yehovha Xikwembu xa yena. (Tipisalema116:1-9) Se na hina namuntlha, loko hi txuvuka ndlela leyi Yehovha a hi kombaka hi yona leswaku wa hi rhandza, swi yendla leswaku lirhandzu la hina hi yena li ya li kula swinene. — Tipisalema 31:23; Sofaniya 3:17; Varoma 8:28.

Murindzi 15/07/09 paj. 29 mapar. 4-5

Lavetela Tindlela Ta Ku Khensa Yehovha Hileswi A Nga Ku Yendlela Swona

A mupisalema a vutisile a ku: “Ni ta mu hakela hi yini Yehovha hi mhaka ya hinkwaswu leswi a nga ni yendlela swona?” (Ps. 116:12) Kasi Yehovha a a yo mu yendlela yini mupisalema lweyi? Yehovha a a mu pfunile ka swiyimu swa ku karhata leswi a nga kumana na swona, a tlhela a mu vhikela nkama na a li nghozini ya ku dlayiwa. Se mupisalema a a lavetela tindlela ta ku khensa Yehovha hi mhaka ya leswo. A a ta mu yendlela yini? Yena hi yexe a te: “Ni ta yendla hinkwaswu leswi ni nga mu tshembisa swona Yehovha.” (Ps. 116:3, 4, 8, 10-14) Mupisalema a a tinyimiselile ku yendla hinkwaswu leswi a nga swi tshembisa ku swi yendlela Yehovha.

Se wena ke, u nga xi tekelelisa ku yini a xikombiso xa mupisalema lweyi? Hi ku yingisa minawu ya Yehovha leyi nga ka Bibele, u rhangisa ntirho wa yena ka wutomi la wena u tlhela u kongomisiwa hi moya wa yena wa ku kwetsima ka hinkwaswu leswi u swi yendlaka. (Ekl. 12:13; Gal. 5:16-18) Loko u yendla leswo, Yehovha a ta tsaka hintamu swinene. I ntiyiso leswaku a hi nge swi koti ku mu hakela hi ku helela Yehovha hi minchumu leyi a hi yendlelaka yona, kambe loko a ku vona na u yendla leswo, a ta tsaka hintamu. (Swiv. 27:11) Phela i nkateko a ku tirhela Xikwembu xa ku tshamisa xileswi!

Murindzi 11/19 mapaj. 22-23 mapar. 9-11

Leswi Hi Nga Swi Djondzaka Ka Buku La Levhitika

9 Xawumbirhi hi nga xi djondzaka: Hi tirhela Yehovha hi mhaka ha mu khensa hi leswi a hi yendleleke swona. Leswaku hi twisisa mhaka leyi, a hi buleni hi magandzelo ya xinakulobye lawa a ma yendliwa ka wugandzeli la ntiyiso a Israyele wa khale. Ka buku la Levhitika hi djondza leswaku Vayisrayele a va nyikela magandzelo ya xinakulobye tanihi “magandzelo ya ku khensa.” (Lev. 7:11-13, 16-18) Vayisrayele a va nyikela magandzelo ku nga li hi ku sindzisiwa kambe hi ku swi rhandza. Mun’wana ni mun’wana a a nyikela swi suka mbilwini hileswi a a rhandza Yehovha. Nyama ya xiharhi lexi a xi nyikeliwa a yi dliwa hi lweyi a a nyikela magandzelo, ndjangu wa yena xikan’we ni vaprista. Kambe swiyenge swin’wana swa xiharhi a swi nyikeliwa ka Yehovha ntsena. Hi swihi swiyenge swa kona?

10 Xawunharhu hi nga xi djondzaka: Lirhandzu li hi yendla hi nyika Yehovha leswi nga matimbeni ya hina. Yehovha a a vona mafurha ku li wona ya lisima ngopfu ka xiharhi. Naswona a a vula leswaku swirho swo karhi swa ku fana ni tiyinso, a swi li swa lisima hintamu. (Lerha Levhitika 3:6, 12, 14-16.) Hi mhaka leyo, Yehovha a a tsaka swinene loko Vayisrayele va mu nyika swirho swa lisima ku patsa ni mafurha ya kona hi ku tirhandzela. Muyisrayele lweyi a a nyikela swilo leswi ka Yehovha, a a kombisa leswaku a lava ku mu yendlela leswi nga matimbeni ya yena. Hi ku fanana, Yesu a nyike Yehovha leswi nga matimbeni ya yena hi ku tirhandzela hileswi a a mu tirhela hi mbilu ya yena hinkwayu. (Yoh. 14:31) Yesu a a tsaka swinene hi ku yendla ku rhandza ka Xikwembu hikusa a a wu rhandza ngopfu nawu wa xona. (Ps. 40:8) Yehovha a tsake hintamu hi ku vona leswaku Yesu a a mu tirhela hi ku swi rhandza!

11 Ntirho lowu hi wu yendlelaka Yehovha wu fana ni magandzelo ya xinakulobye hikusa wu komba Yehovha leswi hi mu rhandzisaka xiswona. Hi mu nyika leswi nga matimbeni ya hina hileswi hi mu rhandzaka hi mbilu hinkwayu. Yehovha a tsaka hintamu loko a vona vagandzeli va yena va timiliyoni va mu tirhela hileswi va mu rhandzaka hintamu va tlhela va rhandza ni minawu ya yena. Swa hi chavelela ku tiva leswaku Yehovha wa swi vona leswi hi swi yendlaka a tlhela a swi nyika lisima, nakambe a vona ni swivangelo swa kona. Hi xikombiso, loko u gugile naswona u nga ha li na ntamu wa ku yendla leswi a wu navela ku swi yendla, tiyiseka swaku Yehovha wa xi twisisa xiyimu xa wena. U nga ha vona ingi leswi u mu yendlelaka swona Yehovha a swi nyawuli, kambe yena a vona lirhandzu leli u nga na lona, leli li ku susumetelaka ku yendla leswi u swi kotaka. A tsaka ngopfu loko u mu nyika leswi nga matimbeni ya wena.

Lavetela Xuma Ka Rito La Xikwembu

Murindzi 15/05/12 paj. 22 mapar. 1-2

Swivutiso Swa Valerhi

Mupisalema a tsalile a ku: “Swa vava ka Yehovha ku fa ka lava tshembekaka ka yena.” (Ps. 116:15; ntlhamuselo) I ntiyiso leswaku a vatirheli hinkwavu va Yehovha i va lisima ka yena. Kambe loko mupisalema a vulavula hi va ku tshembeka ka ndzimana leyi, a a nga vulavuli hi ku fa ka munhu mun’we ntsena, kambe a a vulavula hi ku fa vatirheli hinkwavu va ku tshembeka va Yehovha.

Hi leswo swi yendlaka swaku a ndzimana leyi swi nga li kahle kuva yi tirhisiwa ka nkulumi ya xilahlu, hikusa a yi vulavuli hi munhu mun’we ntsena lweyi a nga fa hi nkama wolowo. Kambe mupisalema a kombetela ka hinkwavu lava va tirhelaka Yehovha amisaveni hinkwayu, ndlela leyi swi mu vavaka hi yona loko va fa. — Vona Tipisalema 72:14; 116:8.

9 KU YA KA 15 KA DEZEMBRO

XUMA XI NGA KA RITO LA XIKWEMBU TIPISALEMA 119:1-56

“Djaha Li Nga Swi Kotisa Ku Yini Ku Tikhoma Hi Ndlela Yayinene?”

Murindzi 01/11/87 paj. 18 par. 10

Tshama Na U Basile Ka Swilo Hinkwaswu

10 Ka Vaefeza 5:5 mupostolo Pawulo a te: “Ma swi tiva naswona ma pfumela swaku a ku na munhu ni mun’we lweyi a nga ta va ni tshomba ka Mfumu wa Kreste ni wa Xikwembu loko a yendla wuntunga la swa masangu, minchumu ya ku nyenyentsa ni ku va ni makwanga, ku nga ku gandzela swikwembu.” (1 Vakorinto 6:18) Amisaveni hinkwayu, vanhu va vanyingi va susiwa amabandleni va tlhela va soliwa hi mhaka ya wuntunga la swa masangu. (Tipisalema 119:9) Minkama ya yinyingi leswo swi yendleka hi mhaka ya leswi vamakwerhu volavo va kalaka va nga li hlayisi wunghanu la vona na Yehovha, va khudzehela. Hi xikombiso, vamakwerhu van’wani loko va huma maferiya, va sungula ku tlanga ni vanhu lava kalaka va nga li Timboni, na va tibyela swaku vanhu volavo i vanhu vavanene naswona a va nge va kutxe ku yendla swilo swa ku biha. Swiyimu swa ku fana ni leswo swa yendleka hambi hi mintirhweni. Hi xikombiso, doda lin’wani li yendle wunghanu ni xitirhi xa lona xa xisati. Hi mhaka wunghanu leli se a va li na lona, doda leliyani li ze li tsukula ni ndjangu wa lona li ya tshama ni xitirhi lexiyani. Phela swiyimu leswi hinkwaswu swi tiyisekisa marito lawa ma nga ka 1 Vakorinto 15:33 lawa ma nge: “Vanghanu va ku biha va wonha mintirho yayinene.”

Murindzi 15/06/06 paj. 25 par. 1

“Na Swi Rhandza Switsundzuxu Swa Wena”

NAMUNTLHA ka siku Yehovha wa hi basopisa leswaku a hi pfuna ku va hi nga weli ka mindzingo leyi hi nga kumanaka na yona ka misava leyi. A tirhisa tindlela ta ku hambanahambana leswaku a hi basopisa, ku nga ha va nkama lowu hi lerhaka Bibele kumbe tinhlamulu leti hi ti twaka loko hi li mintlhanganwini. Minkama yin’wani swi nga yendleka a ho sungula ku swi twa a switsundzuxu swoleswo, kambe leswi hi kalaka hi nga hetisekanga ha khohlwa, se swi lava hi khumbukisiwa minkama yin’wanyani; hi khumbukisiwa minawu ya Yehovha, switsundzuxu swa yena ni leswi a lavaka leswaku hi swi yendla. Se hi fanele hi swi teka swi li swa lisima leswo, hikusa swi ta hi pfuna kuva hi tama hi hanya hi ndlela leyi tsakisaka Xikwembu. Loko hi yendla leswo, na hina hi ta titwa ku fana ni mupisalema lweyi a nga yimbelela a ku: “Na swi rhandza switsundzuxu swa wena.” — Ps. 119:24.

Murindzi 15/04/10 paj. 20 par. 2

U Nga Txuvuki Swilo Swa Ku Kala Swi Nga Pfuni Nchumu

2 Hi fanele hi tivonela ka swilo leswi hi swi txuvukaka hikusa swilo leswi hi swi vonaka swi nga ha khumba kumbe ku txintxa ndlela leyi hi titwaka hi yona swi tlhela swi hi yendla hi navela ku yendla swilo swa ku kala swi nga li swinene. Leswi hi hanyaka ka misava leyi yi fumiwaka hi Sathana, a vanhu va humesa swilo leswi hi ku swi txuvukanyana ka kutsongo ntsena swi nga hi yendlaka hi pimisa swilo swa ku biha. (1 Yohani 5:19) Se swa twala ku va mupisalema a kombele Yehovha a ku: “Yendla leswaku matihlo ya mina ma nga txuvuki minchumu ya ku kala yi nga pfuni nchumu; ni hlayisi ni hanya ka ndlela ya wena.” — Ps. 119:37.

Lavetela Xuma Ka Rito La Xikwembu

Murindzi 15/04/05 paj. 10 par. 2

Tshemba Rito La Xikwembu

2 A buku ya Tipisalema 119 yi vulavula hi lisima leli Rito la Xikwembu li nga na lona. Buku leyi yi ni 176 wa tindzimana, naswona mutsali wa yona a tsale timhaka hi ku landzelelana ka tona hi ku tirhisa ku landzelelana ka mabesedariyu ya Xiheberu. Kumbexana a yendle leswo leswaku a pfuna mulerhi leswaku a swi vekisa ka nhloko leswi a swi lerhaka.

HISEKELA NTIRHO WA KU CHUMAYELA

Nhlokomhaka 83 ya Vampsha Va Vutisa

U Nga Yendla Yini Swaku U Nga Yendli Swilo Swa Ku Biha?

Swi twisisi kahle leswi u kholwaka ka swona. Phela loko u nga tiyiseki hi leswi u swi kholwaka, u ta fana ni xibonekani lexi fumiwaka hi van’wani. I swinene ku yendla leswi Bibele li swi vulaka loko li ku: “Kambisisani swilo hinkwaswu; khomelelani swi tiya ka swaswinene.” (1 Vatesalonika 5:21) Loko u swi twisisa kahle leswi u kholwaka ka swona, swi ta ku vevukela leswaku u hanya hi swona. Funtshi a wu nga ta pfumela ku yendla nchumu lexi lwisanaka na swona.

Pimisa hi leswi: Hi mhaka muni u kholwa swaku ku yingisa minawu ya Xikwembu swi nga ku pfuna?

Kimberly a li: “Ni tsumbule swaku vanhu va ni hlonipha hintamu loko va vona swaku a ni yendli leswi van’wanyani va ni xengetelaka swaku ni swi yendla kambe ni nyima ni tiyile ka leswi ni kholwaka ka swona.”

Xikombiso xa munhu wa le Bibeleni: Daniyele. Swi nga yendleka na a ha li jovhem, Daniyele “a yendle xiboho” xa ku a a ta yingisa minawu ya Xikwembu. — Daniyele 1:8

Titivi kahle. Bibele li vulavula hi ku “navela ka wujovhem”, ku nga ku navela loko munhu a nga na kona hintamu nkama lowu a nga jovhem. (2 Timotiya 2:22) Ku navela koloko a ku patsi ntsena ku navela ku famba masangu, kambe ku nga ha tlhela ku patsa ku lava ku tsakeliwa hi vanhu van’wani ni ku kala u nga lavi ku mandiwa hi vapsali va wena, na u nga se swi lunghekela ku tiyendlela swiboho hi wexe.

Pimisa hi leswi: Bibele li vula swaku “mun’wani ni mun’wani a ringiwa hi ku kokiwa ni ku wongiwa hi leswi a swi navelaka.” (Yakobe 1:14) Se i mpsini leswi u swi navelaka hintamu leswi nga yendlaka swaku u yendla minchumu ya ku biha?

Sylvia a li: “Pimisa hi swilo swa ku biha leswi u swi tivaka swaku swi nga ku vevukela ku wela ka swona. Pexkizara hi tindlela ta ku swi hlula u tlhela u tsala swin’wani leswi nga ku pfunaka. Se ka khambi leli taka loko u tshuka u kumana na swona u ta swi tiva leswi u nga swi yendlaka swaku u nga weli ka swona.”

16 KU YA KA 22 KA DEZEMBRO

XUMA XI NGA KA RITO LA XIKWEMBU TIPISALEMA 119:57-120

Hi Nga Swi Kotisa Ku Yini Ku Tiyisela Loko Hi Kumana Ni Swikarhatu?

Murindzi 15/06/06 paj. 20 par. 2

“Na Wu Rhandza Nawu Wa Wena”

2 Hi mhaka muni mupisalema a a wu rhandza nawu wa Yehovha? Lexi a xi yendla mupisalema lweyi a rhandza nawu wa Yehovha hileswi a a swi vona swaku Yehovha a a mu rhandza naswona a a li kombisa lirhandzu lolelo ka yena. Ku vona ndlela leyi Yehovha a a mu hlayisa hi yona hambileswi a a kumana ni swikarhatu leswi a a vangeliwa swona hi valala va yena, swi mu yendle a ya a wu rhandza hintamu nawu wa Yehovha. A a swi tiva leswaku Yehovha i Xikwembu lexi nga lulama naswona ku yingisa minawu ya Yehovha a swi mu pfuna leswaku a va ni wutlharhi ku tlula valala va yena, swi tlhela swi mu pfuna leswaku a va ni lipfalu la ku basa. — Ps. 119:1, 9, 65, 93, 98, 165.

Murindzi 01/12/00 paj. 14 par. 3

Indjhe Wena Wa Yi Rhandza Minawu Ya Yehovha?

3 Leswi mupisalema a a yi rhandza minawu ya Yehovha a yimbelelile a ku: “Ni hantlisile, a ni hlwelanga ku yingisa minawu ya wena. Magoda ya lava ku biha ma ni rhendzelile, kambe a ni wu khohlwi nawu wa wena.” (Tipisalema 119:60, 61) Minawu ya Yehovha yi hi pfuna leswaku hi tiyisela swikarhatu leswi hi kumanaka na swona hileswi hi gandzelaka Yehovha, naswona hi tshemba leswaku Yehovha Xikwembu xa hina, a ni matimba ya ku hi susela swikarhatu hinkwaswu leswi hi vangeliwaka swona hi valala va hina. Funtshi ha tiyiseka leswaku hi nkama wa kona, Yehovha a ta hi susela swikarhatu hinkwaswu leswaku swi koteka kuva hi tama hi chumayela mahungu ya ku tsakisa. — Marka 13:10.

Murindzi 01/09/06 paj. 14 par. 4

Tipontu Ta Lisima Ta Buku La Tipisalema

119:71 — Hi mhaka muni mupisalema a vule swaku “ku hlupheka i swinene”? Swikarhatu leswi hi kumanaka na swona swi hi djondzisa ku tshemba Yehovha, swi hi djondzisa ku khongela hi ndlela yayinene ni ku djondza Bibele hi tlhela hi tirhisa leswi hi swi djondzaka ka lona. Funtshi a ndlela leyi hi yangulaka hi yona loko hi kumana ni swikarhatu yi hi pfuna ku vona leswi hi nga tshamisa xiswona hi le ndzeni, swi tlhela swi hi pfuna leswaku hi yampsisa a wumunhu la hina. Se nkama lowu hi hluphekaka a hi pfumeleli leswaku swikarhatu swoleswo swi hi heta matimba, kambe hi tirhisa nkama wolowo wa swikarhatu leswaku hi yampsisa wumunhu la hina la Wukreste.

Murindzi 07/17 paj. 13 mapar. 3, 5

Rilani Ni Lava Rilaka

3 A hi na ku kanakana leswaku Yehovha i Papayi lweyi a hi tiyisaka. (Lerha 2 Vakorinto 1:3, 4.) Yena a yi twisisa kahle ndlela leyi hi titwaka hi yona naswona a hi tshembisa leswi: “Hi mina lweyi a mi tiyisaka.” — Esa. 51:12; Ps. 119:50, 52, 76.

5 Phela a hi na ku kanakana leswaku Yehovha a tama a hi pfuna nkama lowu hi wu lavaka. Hi mhaka leyo, hi fanele hi titwa na hi chunsekile leswaku hi mu pfulela timbilu ta hina, hi mu byela hinkwaswu leswi hi vavisaka ni ndlela leyi hi titwaka hi yona. Yehovha a hi twisisa kahle naswona a hi tshembisa ku hi tiyisa. Se Yehovha a hi tiyisisa ku yini?

Lavetela Xuma Ka Rito La Xikwembu

Murindzi 01/09/06 paj. 14 par. 5

Tipontu Ta Lisima Ta Buku La Tipisalema

119:96 — Marito lawa ma nge “minchumu hinkwayu yi ni swipimelo” ma lava ku vula yini? Swi nga yendleka mupisalema a a vulavula hi ndlela leyi hina hi yi vonaka hi yona minchumu hileswi hi kalaka hi nga hetisekanga. Kambe ndlela leyi hi swi vonaka hi yona swilo yi hambanile swinene ni minawu ya Yehovha, hikusa minawu ya Yehovha a yi na swipimelo funtshi ya tirha ka swiyimu hinkwaswu swa wutomi la hina. Hi leswo swi nga yendla mupisalema a vula leswi ka Tipisalema 119:96: “Ni vone swaku minchumu hinkwayu leyi nga hetiseka yi ni swipimelo, kambe minawu ya wena a yi na swipimelo.”

HISEKELA NTIRHO WA KU CHUMAYELA

Nhlokomhaka 157 ya Tinhlamulu Ta Swivutiso Swa Bibele

Li Li Yini Bibele Hi Mhaka Ya Swidzedze?

Nhlamulu Ya Bibele

Bibele li djondzisa leswaku Xikwembu a hi xona xi vangaka swidzedze leswi nga kona namuntlha naswona xi karhateka swinene loko xi vona vanhu lava xanisekaka hi mhaka ya swona. Se xi ta tirhisa Mfumu wa xona ka nkama lowu taka leswaku xi helisa ku xaniseka hinkwaku, ku patsa ni swidzedze swoleswo. Kambe namuntlha, ka vanhu hinkwavu lava kumanaka ni swidzedze, Xikwembu xa va tiyisa. — 2 Vakorinto 1:3.

Hi Swi Tivisa Ku Yini Swaku Xikwembu A Xi Tirhisi Swidzedze Swaku Xi Khatisa Vanhu Namuntlha?

Bibele li vula swaku ka minkama ya khale, Xikwembu xi swi tirhisile swidzedze ni swilo swin’wani swa ku fana na swona swaku xi helisa vanhu va ku kala va nga yingisi. Kambe leswi Xikwembu a xi swi yendla hi nkama wolowo, swi hambane swinene ni swidzedze leswi nga kona namuntlha wa siku.

Swidzedze leswi nga kona namuntlha, swi dlaya vanhu hinkwavu. Kambe khale loko Xikwembu xi tirhisa swidzedze a xi ngo suketana xi dlayetela vanhu hinkwavu. Hi xikombiso, nkama lowu xi nga helisa a madoropa ya Sodoma ni Gomora, xi vhikele Lota lweyi a a li wanuna wa ku lulama ni vana va yena va xisati. (Genesa 19:29, 30) A Xikwembu a xi yo suketana xi helisa vanhu hinkwavu, kambe xi rhange hi ku vona swaku hi vani vavanene lava a va fanele va ponisiwa ni swaku hi vani vanhu va ku biha lava a va fanele va helisiwa. — Genesa 18:23-32; 1 Samuwele 16:7.

A swidzedze leswi nga kona namuntlha swi yendleka kola na kola. Swi hambanile ni masiku ya khale hikusa loko Xikwembu xi lava ku tisa xidzedze a xi rhanga hi ku va byela vanhu, se lava a va yingisa a va ponisiwa. — Genesa 7:1-5; Matewu 24:38, 39.

Swidzedze swin’wani swi vangiwa hi vanhu. Hi mhaka muni hi vula leswo? Hikusa vanhu van’wani va wonha misava naswona van’wani va yaka ka tindhawu leti ku tolovelaka ku va ni tindhambhi, ku tsekatseka ka misava kumbe swilo swin’wani swa ku fana ni leswo. (Nhlawutelo 11:18) Se a swi twali ku va hi nyika Xikwembu nandzu hi swilo leswi a vanhu va ngo tivangela hi voxe. — Swivuriso 19:3.

A swidzedze leswi nga kona namuntlha i xikombiso xa leswaku hi hanya ka masiku ya wugamu. Hi mhaka muni hi vula leswo? Hikusa a Bibele a li profetile leswaku a swidzedze a swi ta va xikombiso xa masiku ya wugamu. (Matewu 24:3; 2 Timotiya 3:1) Hi xikombiso, loko Yesu a vulavula hi masiku ya wugamu ka Matewu 24:7 a te: “Ku ta pfumaleka swakudla ni misava yi ta tsekatseka ka tindhawu ta ku hambanahambana.” Kambe ku nga li khale, Xikwembu xi ta helisa ku xaniseka hinkwaku, ku patsa ni swidzedze swoleswo. — Nhlawutelo 21:3, 4.

Xikwembu Xi Va Tiyisisa Ku Yini Lava Weliwaka Hi Swidzedze?

Xa ku sungula, xi tirhisa Bibele leswaku xi va tiyisa vanhu volavo. A Bibele la va tiyisekisa swaku Xikwembu xi ni mhaka na vona funtshi xa karhateka loko va kumana ni swiyimu swoleswo. (Esaya 63:9; 1 Pedru 5:6, 7) Xi tlhela xi tshembisa leswaku ku nga li khale xi ta helisa swidzedze hinkwaswu. — Vona kwadru leli nge “Tindzimana leti nga tiyisaka lava nga weliwa hi swidzedze.”

Xa wumbirhi, xi tirhisa vanhu. Xikwembu xi tirhisa vanhu va xona lani misaveni swaku xi pfuna lava nga weliwa hi swidzedze. Hi xikombiso Bibele li vule leswaku Yesu, a a ta “daha lava nga vaviseka timbilu” ni ku “tiyisa hinkwavu lava rilaka”. (Esaya 61:1, 2) Se vanhu lava tirhelaka Xikwembu namuntlha lani misaveni, va tekelela xikombiso xa Yesu hi ku pfuna lava nga weliwa hi swidzedze. — Yohani 13:15.

Xikwembu xi tlhela xi tirhisa vanhu va xona swaku va pfuna lava nga weliwa hi swidzedze hi ku va nyika leswi va swi lavaka hi nkama wolowo. — Mintirho 11:28-30; Vagalatiya 6:10.

A Bibele Li Nga Hi Pfunisa Ku Yini Ku Va Hi Tilunghiselela Na Swidzedze Swi Nga Se Na Fika?

Hambileswi Bibele li kalaka li nga li buku la ku vulavula hi swidzedze, kambe li ni swin’wani leswi nga hi pfunaka. Hi xikombiso:

Ku va hi tilunghiselela hi nkama na xidzedze xi nga se na fika. A ka Swivuriso 22:3, a Bibele li li: “Munhu wa ku tlhariha a vona khombo kutani a tumbela”. A marito lawo hi nga ma tirhisa hi ku va hi tilunghiselela hi nkama na xidzedze xi nga se na fika. Xin’wani hi nga xi yendlaka i ku va hi ni paxta leli hi nga ta peta leswi hi nga ta hantla hi swi lava loko ku fika xidzedze. Hi tlhela hi tilunghiselela ni mindjangu ya hina, hi insayara swaku hi ta yendla yini loko xidzedze xi fikile leswaku hi kota ku baleka.

Ku li nyika lisima hintamu wutomi la hina ku tlula swilo leswi hi nga na swona. Bibele li li: “A hi tanga ni nchumu lani misaveni naswona a hi nga ta famba ni nchumu.” (1 Timotiya 6:7, 8) Leswaku hi ponisa wutomi la hina, hi fanele hi tinyimisela ku baleka hi siya swilo swa hina hinkwaswu loko ku tshuka ku va ni xidzedze. Lexi nga ta hi pfuna ku yendla leswo, i ku khumbuka swaku a wutomi la hina i la lisima hintamu ku tlula swilo leswi hi nga na swona. — Matewu 6:25.

23 KU YA KA 29 KA DEZEMBRO

XUMA XI NGA KA RITO LA XIKWEMBU TIPISALEMA 119:121-176

U Nga Yendli Nchumu Lexi Nga Ku Yendlaka U Tisola Ka Nkama Lowu Taka

Murindzi 06/18 paj. 16 mapar. 5-6

Pfumelela Minawu ni Matshinya ya Minawu ya Bibele Swi Kongomisa Lipfalu la Wena

5 Loko hi lava leswaku minawu ya Xikwembu yihi pfuna, a hi fanelanga hi yi lerha kumbe ku yi tiva ntsena. Hi fanele hi yi rhandza hi tlhela hi yi hlonipha. Bibele li li: “Vengani leswo biha, mi namarhela leswinene.” (Varhoma 12:9) Hi nga swi yendlisa ku yini leswo? Hi fanele hi djondza ku vona swilo hi ndlela leyi Yehovha a swi vonisaka xiswona. Hi xikombiso, a hi nge swa ku tikela ku kuma wurhongo. Loko u ya ka dokodela, a ku byela leswaku u fanele u dla swakudla leswi nyikaka rihanyu, u tiwolola ni ku txintxa mahanyelo ya wena. A hi nge wa swi landzela leswi, naswona swa ku pfuna. A wu ta titwisa ku yini hi swona?

6 Hi ndlela leyi fanaka, Mutumbuluxi wa hina a hi nyike minawu leyi yihi sirhelelaka ka mavuyelo ya ku biha ya xidjoho ni ku tlhela ma yampsisa wutomi la hina. Hi xikombiso, Bibele li vula leswaku a hi fanelanga hi hemba, hi kanganyisa, hi yiva, hi tikhoma hi ndlela yobiha hi tlhelo la masangu, hi va ni tihanyi kumbe ku tipeta ka swilo leswi fambisanaka ni wudimona. (Lerha Swivuriso 6:16-19; Nhlavutelo 21:8) Xana lirhandzu la hina hi Yehovha ni minawu yakwe a li ku li loko hi vona mavuyelo lamanene lawa hi ma kumaka hi ku mu yingisa?

Murindzi 15/04/93 paj. 17 par. 12

Majovhem, Hi Kwihi Ku Tinyiketela Ka N’wina?

12 Phela u ta va u djondzile u swi tiva kahle leswaku swi kahle hintamu ku nyenya swilo swa ku biha. (Ps. 97:10) Se u nga swi kotisa ku yini ku nyenya a swilo leswi tikombaka na swi li swinene swi tlhela swi tsakisa? Loko u pimisa hi mavuyelo lawa ma nga ha vaka kona phela a wu nga ta pfumelela nchumu xi ku hambukisa. Vagalatiya 6:7, 8 yi li: “Mi nga kanganyisiwi: Xikwembu a hi xa ku kanganyisiwa. Lexi munhu a xi byalaka, a ta tlhela a tshovela xolexo; hikusa lweyi a hanyelaka ku tsakisa muzimbha wa yena a ta tshovela lifu.” Phela munhu lweyi a yendletelaka swilo swa ku biha, a mu kwatisa hintamu Yehovha. (Vona Tipisalema 78:41.) Hi xikombiso, munhu lweyi a yendlaka timhaka ta masangu ni lweyi a kalaka a nga chadanga na yena a nga ha kuma nyimba na a nga yi nyimelanga, mavabyi ya ku fana ni SIDA ni swin’wani. Makwerhu mun’wani wa xisati a vula leswaku na a nge se chada, yena ni nuna wa yena va tshame va famba masangu ni vanhu van’wani. A vula leswaku leswo swi vanga swikarhatu ka wukati ta vona, hikusa loko va swi khumbuka a va holova va tlhela va kweletana. Phela a swi va tisela swikarhatu swaswikulu. (1 Vakorinto 5:9-13) Se majovhem ma nga pfumeleli nchumu xi ma xenga swaku ma yendla minchumu ya ku biha, hikusa leswo swi nga ma yendla ma lahlekeliwa hi wunghanu la wona na Yehovha ma tlhela ma susiwa bandleni.

Lavetela Xuma Ka Rito La Xikwembu

Murindzi 01/23 paj. 2 par. 2

Wa Tiyiseka Swaku Rito La Xikwembu I Ntiyiso?

2 Hina malandza ya Xikwembu ha tiyiseka swaku xona xi ni ntiyiso ni swaku minkama hinkwayu xi lava ku hi pfuna. (Pis. 31:5; Esa. 48:17) Ha swi tshemba leswi nga ka Bibele hikusa marito ya Xikwembu “i ntiyiso.” (Lerha Tipisalema 119:160.) Ha pfumelelana ni leswi mudjondzi mun’wani wa Bibele a nga swi hlaya. A te: “Leswi swi nga ka Bibele a hi mavunhwa naswona leswi li swi vulaka swa yendleka minkama hinkwayu. Vanhu va Yehovha va swi tshemba leswi a swi vulaka hikusa minkama hinkwayu a vulavula ntiyiso.”

30 KA DEZEMBRO KU YA KA 5 KA JANEIRO

XUMA XI NGA KA RITO LA XIKWEMBU TIPISALEMA 120-126

Va Byale Na Va Rila Kambe Va Tshovele Na Va Tsakile

Murindzi 01/06/04 paj. 16 par. 10

Lweyi A Dzunisaka Xikwembu A Ta Katekisiwa

10 Loko hi pfumela ku layiwa hi Bibele hi ta va na hi kaneta Sathana. Hi leswi Yakobe 4:7 yi vulaka swona loko yi ku: “Kanetani Davulosi kutani a ta baleka a suka ka n’wina.” Phela ku yendla leswo a swi vevuki naswona leswaku hi tama hi gandzela Yehovha swi lava ku hi yendla minzamu. (Luka 13:24) Kambe Bibele yi hi tshembisa leswi ka buku ya Tipisalema 126:5: “Lava byalaka mbewu na va rila, va ta tshovela na va ba nkulungwani.” Phela hina hi gandzela Xikwembu lexi yi tlangelaka hintamu minzamu leyi hi yi yendlaka swaku hi xi tirhela. Hi xona xi “hakelaka lava xi lavaka hi mbilu hinkwayu,” naswona xi katekisa mun’wani ni mun’wani lweyi a xi dzunisaka. — Vaheberu 11:6.

Murindzi 11/21 paj. 24 par. 17

Hi Nga Yentxa Yini Swaku Hi Tiyisa Lipfumelo La Hina?

17 Ku nga va swaku u feliwe hi munhu lweyi u mu rhandzaka? Loko ku li leswo, tinyiki nkama wa ku tiyisa lipfumelo la wena ka ntshembo wa ku pfuxiwa ka vafi, ni ku djondza hi timhaka ta vanhu lava nga ka Bibele lava nga pfuxiwa ku feni. Ku nga va leswaku wa vaviseka hileswi lweyi u mu rhandzaka a nga susiwa bandleni? Tinyiki nkama wa ku djondza hi swaku ku layiwa hi Yehovha i swinene. Phela loko u kumana ni swikarhatu, hi nkama wolowo zama ku tiyisa lipfumelo la wena. Byela Yehovha hi ku kongoma leswi u titwisaka xiswona naswona minkama hinkwayu tipatsi ni vamakwerhu. (Swi. 18:1) Hambiloko minkama yin’wana ku khumbuka leswi nga ku humelela swi ku rilisa, yentxa swilo leswi nga ta ku pfuna kuva u tiyisela. (Pis. 126:5, 6) Tama u ya mintlhanganwini, u chumayela u tlhela u lerha Bibele, naswona tama u pimisa hi minkateko ya ku xonga leyi Yehovha a nga ta ku nyika yona ka nkama lowu taka. Phela loko u vona Yehovha a ku pfuna ka wutomi la wena, lipfumelo la wena li ta ya li kula hintamu.

Murindzi 15/07/01 mapaj. 18-19 mapar. 13-14

Mi Nga Godoli Ka Ntirho Wa Ku Tshovela!

13 Vanhu va Yehovha lava xanisiwaka namuntlha, ma ta va tiyisa swinene marito ya Tipisalema 126:5, 6 lama nge: “Lava byalaka mbewu na va rila, va ta tshovela na va ba nkulungwani. Lweyi a fambaka na a rila, na a rhwale nkwama wa yena wa mbewu, a ta vuya na a ba nkulungwani, na a rhwale leswi a nga swi tshovela.” A marito lawa ya mupisalema ma kombisa ndlela leyi Yehovha a nga va katekisa hi yona a tlhela a va hlayisa a vanhu va yena nkama va nga vuya hi wukaraweni la le Babilona. I ntiyiso leswaku a va tsakile hileswi va nga chunsiwa, kambe nkama va nga fika va vona leswi doropa a li hohlokise xiswona ni ndlela leyi a swi ta va karhatela hi yona ku rima hileswi misava a ku hundza nkama wa wunyingi na ku nga byaliwi ka yona, va rilile hintamu swinene. Kambe lava nga tiyisela va byala va tlhela va nghena ku yakeni, va katekisiwile swinene naswona va tsakile hi ntirho wa vona.

14 Minkama yin’wani na hina hi nga ha rila loko hi xanisiwa kumbe loko hi vona vamakwerhu van’wani va xanisiwa hi mhaka ya ntiyiso (1 Pe. 3:14) Naswona leswo swi nga ha khumba ndlela leyi hi wu yendlaka hi yona ntirho wa hina wa ku chumayela. Kambe loko hi nga godoli, hi tama hi chumayela hi ku hiseka, hi nga tiyiseka leswaku Yehovha a ta yi katekisa minzamu yoleyo. (1 Ko. 3:6) Swa tikomba vhela leswaku Yehovha wa swi katekisa loko hi vona ndlela leyi mabuku ya hina ku patsa ni Bibele swi fikelelaka vanhu va vanyingi hi yona.

Lavetela Xuma Ka Rito La Xikwembu

Tshinela Ka Yehovha paj. 73 par. 15

Yehovha A Ta Hi Vhikela Hi Voko La Yena La Matimba

15 Hi nga tiyiseka leswaku hinkwerhu hi mu tirhelaka Yehovha a ta hi vhikela tanihi ntlawa leswaku hi nga helisiwi. Phela Sathana a wa a pfuka leswaku a hi helisa ni ku helisa wugandzeli la ntiyiso. (Yohani 12:31; Nhlawutelo 12:17) A mimfumu se yi zamile hilani yi nga kota hi kona leswaku yi nyimisa ntirho wa ku chumayela ni ku i helisa hi nga ha li kona lani misaveni. Kambe lexi hi nga tiyisekaka hi xona, hileswaku Yehovha a ta tama a hi vhikela hi voko la yena la matimba tanihi ntlawa ni ku yendla leswaku ntirho wa ku chumayela wu tama wu ya mahlweni. — Tipisalema 17:7, 8.

    Mabuku ya xiChangana (2003-2025)
    Huma
    Nghena
    • xiChangana (Moçambique)
    • Rhumela
    • Hlawula
    • Copyright © 2025 Watch Tower Bible and Tract Society of Pennsylvania
    • Minawu ya Matirhiselo
    • Nawu wa Xihundla
    • Seta Swa Xihundla
    • JW.ORG
    • Nghena
    Rhumela