Ndjangu Lowu Twananaka Amisaveni Hinkwayu

KU RINGANA kolomu ka 1.500 wa malembe, Vayisrayele a ku li vona ntsena lava a va vitaniwa hi vito la Yehovha. Kambe hi ku famba ka nkama, Yehovha ‘a khumbuke vamatiko leswaku a sungula ku tilangela vanhu lava nga ta vitaniwa hi vito la yena.’ (Min. 15:14) Vanhu lava va vitaniwaka hi vito la Yehovha a ku ta va Timboni ta Yena, leti ti nga ni mapimiselo man’we naswona ti yendlaka swilo leswi fanaka ku nga na mhaka swaku ti tshama kwini. Leswaku vanhu volavo va kumiwa, a swi ta koteka hi mhaka ya ntirho wa ku chumayela lowu Yesu a nga rhuma vadjondzisiwa va yena swaku va wu yendla. A va byele leswi: “Fambani mi ya djondzisa vanhu va matiko hinkwawu leswaku va va vadjondzisiwa va mina, mi va tsakamisa hi vito la Papayi ni la N’wana ni la moya wa ku kwetsima, mi va djondzisa ku yingisa hinkwaswu leswi ni nga mi byela swona.” — Mat. 28:19, 20.

² Nkama u nga tinyiketela ka Yehovha u tlhela u tsakamisiwa, u ve mudjondzisiwa wa Yesu Kreste. Phela swoswi se u lumba ndjangu wa vamakwerhu amisaveni hinkwayu lava twananaka, lava kalaka va nga pfumeli leswaku ku twanana ka vona ku wonhiwa hi mhaka ya leswi va tshamaka ka matiko ya ku hambanahambana, tinxaka ta ku hambana kumbe hileswi van’wani va nga ganya kasi van’wani va li swisiwana. (Ps. 133:1) Leswo swi yendla leswaku u va rhandza swinene u tlhela u va hlonipha vamakwerhu lava nga ka bandla la wena. Swi nga yendleka van’wani va vona va hambanile hi kori, tiko, lomu va nga kulela kona kumbe van’wani va djondzekile kasi van’wani va nga djondzekanga, ku nga vanhu lava swi nga yendleka a wu nga ta tshuka u twana na vona, kambe swoswi ma twana funtshi mi tlhanganisiwa hi lirhandzu la ntiyiso leli nga likulu ku tlula leli nga kona xikarhi ka vavhizinyu kumbe maxaka. — Mar. 10:29, 30; Kol. 3:14; 1 Pe. 1:22.

KU LULAMISA MAPIMISELO

³ Van’wani va nga ha swi vona swi karhata ku hlula xikheto, ku nga ha va hileswi va nga hambana ka swa politika, kori ya xikhumba, ku hambana loku nga kona ka tiko kumbe ku hambana kun’wani. Ka xiyimu lexo hi nga ha pimisa hi Vakreste va Vayuda ka nkama wa vapostolo. Vakreste lava swi lave va hlula xikheto hileswi a va hambanile hi wukhongeli ni vanhu va matiko man’wanyani. Hambi hi mupostolo Pedru swi mu yendlekelile leswo, hi mhaka leyo nkama a nga yamukela xiyavelo swaku a ya ka Korneliyo murhangeli wa masonchwa ya Varoma, Yehovha hi lirhandzu a mu lunghiselelile ka xiyavelo xa yena. — Mintirho, ndzima 10.

⁴ Yehovha a swi yendlise ku yini leswo? A tirhise xivono swaku a rhuma Pedru a dlaya a tlhela a dla swiharhi swin’wani leswi ka Vayuda a swi nga basanga. Nkama lowu Pedru a nga yala ku yendla leswo, a twe rito na li ta hi tilweni li ku: “Tshika ku vula swaku ya yila minchumu leyi Xikwembu xi nga yi basisa.” (Min. 10:15) Leswo a swi laveka ka Pedru leswaku a ta kota ku txintxa mapimiselo ya yena a tlhela a yendla ntirho lowu a a ta rhumiwa wona, ku nga ku yendzela wanuna wa matiko. Hi ku landza leswi Yehovha a nga mu byela swona, Pedru a vule leswi ka lava a va tlhanganile lahayani: “Mi swi tiva kahle swaku swa yila kuva Muyuda a tipatsa ni munhu wa lixaka lin’wani kumbe ku mu tshinelela, kambe Xikwembu xi ni kombile swaku ni nga tshuki ni vula swaku munhu wa yila kumbe a nga basanga. Hi mhaka leyo, loko ni rhumiwile, ni tile na ni nga kanakani.” (Min. 10:28, 29) Pedru a game a swi vona swaku Yehovha a a yamukele Korneliyo ni ndjangu wa yena.

⁵ Sawulo wa le Tarsu lweyi a a li mufarisi naswona a a djondzekile swinene, swi lave leswaku na yena a tiveka hansi a tlhela a txintxa mapimiselo ya yena. Phela swi lave leswaku a titlhanganisa ni vanhu lava na a nge se txintxa a va Mukreste a a nga ta tshuka a titlhanganisa na vona. Phela Sawulo swi lave a landza ni minkongomiso leyi a yi ta hi ka vanhu volavo. (Min. 4:13; Gal. 1:13-20; Filp. 3:4-11) A swi kanakanisi leswaku vanhu va ku fana na Serjiyo Pawulo, Diyoniso, Damarisi, Filimoni, Onezimu ni van’wani, swi lave va txintxa swinene ndlela leyi a va pimisa hi yona nkama va nga yamukela mahungu ya ku tsakisa va tlhela va va vadjondzisiwa va Yesu Kreste. — Min. 13:6-12; 17:22, 33, 34; Flm. 8-20.

KU HLAYISA KU TWANANA LOKU HI NGA NA KONA AMISAVENI HINKWAYU

⁶ Phela a lirhandzu la vamakwerhu abandleni li ku pfunile swaku u tshinela ka Yehovha ni nhlengeletanu ya yena. U tivonele hi ya wena a lirhandzu leli nga kona, ku nga mfungu wa vadjondzisiwa va ntiyiso va Yesu Kreste. Yesu a te: “Ni mi nyika nawu wa nyuwani wa leswaku mi rhandzana; ku fana ni leswi na mina ni nga mi rhandza, na n’wina rhandzanani. Hinkwavu va ta tiva swaku mi vadjondzisiwa va mina loko mi rhandzana.” (Yoh. 13:34, 35) Nkama u nga vona swaku a lirhandzu leli a li kombisiwi ntsena ka bandla la wena, kambe ka malandza ya Xikwembu amisaveni hinkwayu, u ye u mu rhandza hintamu Yehovha ni nhlengeletanu ya yena naswona u ku vona hi kusuhi ku hetiseka ka wuprofeta la Bibele leli vulavulaka hi ku tlhangana ka vanhu ka masiku ya wugamu leswaku va gandzela Yehovha hi ku rhula ni hi ku twanana. — Mik. 4:1-5.

⁷ Leswi namuntlha ku ngo yo tala hi swilo leswi hambanisaka vanhu, i mani lweyi a a swi pimisa swaku “matiko hinkwawu ni tinxaka hinkwatu ni vanhu hinkwavu ni tirimi hinkwatu” va nga hanyisana xikan’we hi ku rhula? (Nhl. 7:9) Pimisa hi ku yavana loku vanhu va nga na kona hileswi van’wanyani va rhandzaka ku hanya wutomi la manguva lawa, leli tirhisaka hintamu teknolojiya, kasi van’wanyani va rhandza swilo swa xikhale. Pimisa nakambe hi ku yavana loku vanhu va nga na kona hi mhaka ya wukhongeli, hi leswi va nga ni xikhumba xa ku hambana ni hi leswi va hambanaka hi matiko. Leswi vanhu va fevhaka tiko leli va humaka ka lona va ya va yavana swinene ka timhaka ta politika. Naswona leswi swiyimu swa timale swi hambanaka ka matiko ya ku hambanahambana ni swilo swin’wani swa ku tala leswi va hambanisaka, swaku vanhu va matiko ya ku hambanahambana ni tirimi ta ku hambana va rhandzana va tlhela va hanyisana hi ku rhula, swo koteka ntsena hileswi Yehovha Xikwembu xa Matimba Hinkwawu a yendlaka swaku swi koteka. — Zak. 4:6.

⁸ Ku twanana koloko namuntlha ka koteka. Phela leswi wena u nga Mboni ya Yehovha leyi nga tsakamisiwa, u lumba ndjangu wolowo lowu twananaka. Leswi u pfunekaka swinene hi ku twanana loku nga kona, i swa lisima leswaku u yendla hinkwaswu leswi u nga swi kotaka leswaku u ku hlayisa. U nga yendla leswo hi ku yingisa marito ya Pawulo lawa ma nga ka buku la Vagalatiya 6:10, leyi nge: “Loko ha ha li ni nkama, a hi yendleleni hinkwavu swaswinene, kambe ngopfungopfu lava nga na hina lipfumelweni.” Naswona hi fanele hi tlhela hi yingisa xitsundzuxu lexi: “Mi nga yendli nchumu hi ku phikizana kumbe hi ku tibyela, kambe tivekeni hansi mi teka van’wani va li va lisima ku tlula n’wina, mi nga pimiseni hi leswi pfunaka n’wina ntsena, kambe pimiselani ni van’wani.” (Filp. 2:3, 4) Swi ta koteka leswaku hi hanya hi ku rhula ni vamakwerhu va hina hi tlhela hi tsaka, loko ntsena hi va vonisa leswi Yehovha a va vonisaka xiswona hi tlhela hi nga va yavanyisi hi leswi va nga tshamisa xiswona. — Efe. 4:23, 24.

KU KOMBISA SWAKU U NI MHAKA NI VAN’WANI

⁹ Mupostolo Pawulo a tirhise muzimbha wa munhu swaku a kombisa swaku a bandla a li yavananga, kambe mun’wani ni mun’wani a ni mhaka ni mun’wani. (1 Ko. 12:14-26) Hambileswi hi nga hambanisiwa hi mpfhuka ni van’wani va vamakwerhu va hina amisaveni hinkwayu, lirhandzu la hina hi vona a li pumbeki hi mhaka leswo. Loko vamakwerhu va hina va xanisiwa, na hina ha karhateka. Loko va pfumala kumbe va kumana ni tinghozi ta ntumbuluku, tinyimpi, hi ku hantlisa hi lava tindlela ta ku va pfuna hi leswi va swi lavaka ni ku va pfuna ku tiyisa wunghanu la vona na Yehovha. — 2 Ko. 1:8-11.

¹⁰ Siku ni siku hinkwerhu hi fanele hi khongelela vamakwerhu. Van’wanyani va kumana ni miringo ya ku xengeteliwa ku yendla swilo swa ku biha. Van’wanyani swi nga yendleka swi tiviwa hi vanhu va vanyingi swaku va le ku hluphekeni, kasi van’wani va kanetiwa xikola, mintirhweni, va hanya ka mindjangu leyi nga yavana naswona swi nga yendleka va li vatsongo lava swi tivaka swiyimu swa ku karhata leswi va kumanaka na swona. (Mat. 10:35, 36; 1 Tes. 2:14) Phela leswo swi hi yendla hi karhateka swinene hikusa hinkwerhu hi ndjangu wun’we amisaveni hinkwayu. (1 Pe. 5:9) Ku ni van’wani xikarhi ka hina lava va balhaka ni xinyukwana ka ntirho wa Yehovha, va rhangela ntirho wa ku chumayela va tlhela va rhangela mabandleni. Naswona ku ni lava va nga ni ntirho wa ku vonelela ntirho wa ku chumayela amisaveni hinkwayu. Hinkwavu lava va swi lava ku khongeleliwa, naswona loko hi va khongelela hi kombisa swaku ha va rhandza ni swaku hi ni mhaka na vona, hambiloko ku nga li na xin’wani lexi hi nga xi yendlaka hi ku kongoma swaku hi va pfuna. — Efe. 1:16; 1 Tes. 1:2, 3; 5:25.

¹¹ Leswi ka masiku lawa ya wugamu amisaveni hinkwayu ku nga ni mpfilumpfilu, vanhu va Yehovha va fanele va lunghekela ku pfunana. Minkama yin’wani loko ku va ni timhangu ta ntumbuluku ta ku fana ni ku tsekatseka ka misava ni tindhambhi, swi lava leswaku ku yendliwa ntirho wa ku pfuna lava nga humeleliwa hi tinghozi toleto, naswona swi lava leswaku va pfuniwa hi swilo swa swinyingi. Vakreste va minkameni ya vapostolo va hi nyikile xikombiso xa kahle ka mhaka leyi. Hi ku pfuniwa hi xitsundzuxu xa Yesu, vadjondzisiwa va Antiyokiya va rhumele swilo leswi a swi ta pfuna vamakwerhu va Yudiya hi ku swi rhandza. (Min. 11:27-30; 20:35) Hi ku famba ka nkama, mupostolo Pawulo a byela vamakwerhu va Korinto leswaku va seketela ntirho wa ku pfuna van’wani lowu nga yendliwa hi nawu wa kona ni hi ndlela yayinene. (2 Ko. 9:1-15) Ninamuntlha vanhu va Yehovha (ku nga ha va munhu a li yexe kumbe hi ntlawa) va tekela ku pfuna vamakwerhu amisaveni hinkwayu loko va lava ku pfuniwa.

VANHU LAVA NGA LANGIWA SWAKU VA YENDLA KU RHANDZA KA YEHOVHA

¹² Vanhu va Yehovha amisaveni hinkwayu va yendla ku rhandza ka yena hi ku twanana. Namuntlha a ku rhandza ka Yehovha i ka ku mahungu ya ku tsakisa ya Mfumu ma chumayeliwa leswaku li va wumboni ka matiko hinkwawu. (Mat. 24:14) I ku rhandza ka Yehovha swaku nkama hi yendlaka ntirho lowu, hi hanya hi ku pfumelelana ni minawu ya ku tlakuka ya Yehovha ya mahanyelo. (1 Pe. 1:14-16) Hi fanele hi tinyimisela ku tiveka hansi ka van’wani hi tlhela hi chumayela mahungu ya ku tsakisa. (Efe. 5:21) Xa lisima hintamu lexi hi faneleke hi xi yendla, i ku lava Mfumu wa Xikwembu ku sungula ka wutomi la hina, ku tlula ku lwela ku lava ku titsakisa ntsena. (Mat. 6:33) Loko hi tirha hi ku twanana hi mhaka ya mahungu ya ku tsakisa, swi ta hi yendla hi tsaka swoswi naswona swi ta hi tisela minkateko ya yinyingi ka nkama lowu taka.

¹³ Leswi hi nga Timboni ta Yehovha hi vanhu lava hanyaka hi ku twanana, lava hambaneke ni vanhu va misava leyi hikusa hi basile naswona hi hisekela ntirho wa Xikwembu. (Tit. 2:14) Wugandzeli la hina ka Yehovha li hi yendla hi hambana ni vanhu van’wani. A ho tirha xikan’we ni vamakwerhu amisaveni hinkwayu ntsena, kambe hi vulavula lirimi lin’we la ntiyiso naswona hi hanya hi ku pfumelelana na lona. Leswo hi swona leswi Yehovha a nga swi profeta hi ku tirhisa muprofeta Sofaniya nkama a nga te: “Ni ta txintxa lirimi la vanhu li va lirimi la ku tenga, leswaku vanhu hinkwavu va vitana vito la Yehovha, va mu tirhela hi mbilu yin’we.” — Sof. 3:9.

¹⁴ Yehovha a tlhele a kongomisa Sofaniya swaku a vula leswi hi vamakwerhu amisaveni hinkwayu namuntlha: “Lava nga sala va Israyele a va nge yendli swa ku biha; a va nge vulavuli mavunhwa kumbe va kanganyisa van’wani. Va ta dla va gama va yetlela, a ku nga ta va ni munhu lweyi a nga ta va chavisa.” (Sof. 3:13) Swa koteka swaku hi tirhisana hi vun’we hikusa hi twisisa mintiyiso ya Bibele hi ndlela ya ku fana, hi txintxa mimpimiso ya hina hi tlhela hi twananisa mahanyelo ya hina ni leswi Bibele li swi vulaka. Hi yendla leswi hi mavonelo ya vanhu swi tikombaka ingi swi nge koteki. Phela hikakunene hi vanhu va Xikwembu lava va kalaka va nga fani ni van’wani, lava va dzunisaka Yehovha amisaveni hinkwayu. — Mik. 2:12.