DJONDZO 4
Kuva Ni Wutihlamuleli
SWI KATSA YINI KUVA NI WUTIHLAMULELI?
Vanhu lavanga ni wutihlamuleli va tshembeka. Loko u kombela munhu lweyi anga ni wutihlamuleli leswaku a yendla nchumu, awu karhateki hikusa waswi tiva swaku ataswi yendla.
N’wana anga djondzisiwa kuva ni wutihlamuleli hambiloko aha li mutsongo hintamu. Buku lin’wana leli vulavulaka hi kuwundla vana li vula leswi: “Loko n’wana a li ni lembe ni 3 wa tiwheti a yendla hinkwaswu leswi vapsali vamu byelaka swona. Loko a li ni lembe ni hafu a lava kuyendla hinkwaswu leswi vapsali vaswi yendlaka. Ka tindhawu tinyingi, loko vana va ni kolomuya ka 5 kuya ka 7 wa malembe, vapsali va sungula kuva nyika swintirhwana kaya. Hambileswi vanga vatsongo, ku ni mintirho yinyingi ya le kaya leyi vangayi yendlaka kahle.”
HAYINI SWI LI SWA LISIMA KUVA NI WUTIHLAMULELI?
Ka tindhawu tokarhi, vampsha lavahaku hetaka kudjondza xikola va zama kuhuma munti hi xikongomelo xa kuya tshama voxe. Kambe makhambi manyingi va hluleka va gama va tlhelela kaya ka vapsali va vona. Minkama yin’wana leswo swi yendleka hikusa vampsha volavo avase tshama va djondzisiwa kutirhisa male hi wutlhari, kuhlayisa munti ni kuva ni wutihlamuleli.
Hi mhaka leyo, i swa lisima kuva vapsali va djondzisa vana va vona kuva ni wutihlamuleli swoswi leswaku vata va na lona loko se va kulile. Buku leli vulavulaka hi kukulisa vana lavanga ni wutihlamuleli li te: “Unga nyimeli leswaku n’wana wa wena a va ni 18 wa malembe leswaku utamu djondzisa kuhanya.”
UNGAMU DJONDZISISA KUYINI N’WANA WA WENA KUVA NI WUTIHLAMULELI?
Mu nyiki mintirho kaya.
LESWI BIBELE LISWI DJONDZISAKA: “Kutirha ntirho wun’wana ni wun’wana hi matimba swa pfuna”. — Swivuriso 14:23.
Hi ntumbuluku vatsongwana va rhandza kupfuna vapsali ka hinkwaswu leswi vaswi yendlaka. Hi mhaka leyi, tirhisani mukhandlu lowu leswaku miva nyika mintirho akaya leswaku vayi yendla.
Vapsali vanyingi avaswi yendli leswo. Va vula leswaku avangeva nyiki mintirho akaya hikusa va ni ma T.P.C. yamanyingi.
Kambe a ntiyiso hileswaku vana lava yendlaka mintirho akaya va humelela axikolweni hikusa va djondza kusungula ni kuheta ntirho wun’wana ni wun’wana lowu va nyikiwaka wona. Buku lin’wana leli vulavulaka hi kuwundla vana li li: “Loko hi sivela vana va hina kuhi pfuna ka mintirho ya le kaya, vata kula na va pimisa leswaku kupfuna van’wana ahi swa lisima . . . naswona vata nyimela kutirheliwa hi van’wani.”
Hilaha buku leli kombisiweke henhla li kombisaka ha kona, loko vana va yendla mintirho akaya vata djondza leswaku i swinene kupimisa hi van’wani ni kuva tirhela. Vata titwa va li va lisima hileswi va yendlaka xokarhi andjangwini naswona vataswi twisisa leswaku lowo i ntirho wa vona.
Pfuna n’wana wa wena kutwisisa leswaku swihoxo swa yena swita va ni vuyelo.
LESWI BIBELE LISWI DJONDZISAKA: “Yingisa xitsundzuxo utlhela uyamukela kulayiwa, akuva utlhariha mundzuku ka siku.” — Swivuriso 19:20.
Ungamu sirheleli n’wana wa wena loko a phazama. Hi xikombiso, loko a wonhe nchumu xa munhu mun’wani unga tshami hi swona. Mu djondzisi kuya kombela rivalelo naswona loko swi laveka a fanele a lunghisa leswi aswi wonheke kumbe a hakela.
Vana va fanele vaswi twisisa swaku swihoxo leswi vaswi yendlaka swita va ni vuyelo. Leswo switava pfuna leswaku . . .
va va vanhu va kutshembeka ni lavanga fihliki swihoxo swa vona
vanga nyiki nandzu van’wana loko va phazama
vanga tinyimeleli
va kombela rivalelo loko swi laveka