MISAVA LEYI NGA TALA HI SWIKARHATU

1 | Tihlayisi Leswaku U Tivhikela Ka Mavabyi

HI MHAKA MUNI SWI LI SWA LISIMA

A swikarhatu ni tinghozi swi nga ha khumba wutomi la vanhu hi tindlela ta ku hambanahambana.

Phela loko ku va ni swikarhatu ni tinghozi swi nga yendla leswaku vanhu va biwa hi xitresi naswona hi ku famba ka nkama swi nga ha yendla leswaku va vabya.
Loko ku humelela swikarhatu swi nga ha yendleka swibelhela ku tala hintamu naswona swi karhata ku kuma makinina kumbe mimirhi yin’wani.
Loko ku humelela tinghozi swi nga yendleka vanhu va txona hintamu naswona swi va karhatela ku kuma male ya ku xava swakudla kumbe makinina.

Leswi U Faneleke U Swi Tiva

Mavabyi yamakulu ni xitresi swi nga khumba ndlela leyi u pimisaka hi yona, se u nga ha sungula ku kala u nga tivhikeli ka mavabyi naswona mavabyi ya wena ma nga ya ma kula.
Loko mavabyi ya wena ma nga tenderiwi kumbe ku dahiwa ma to ya ma kula ma tlhela ma ku dlaya.
Phela loko u tihlayisa swi ta ku pfuna leswaku u swi kota ku yendla swiboho swa wutlharhi loko ku humelela swikarhatu.
A swi na mhaka leswaku u ni male kumbe a wu na male u nga swi kota ku tihlayisa ni ku tivhikela ka mavabyi.

I Mpsini Leswi U Nga Swi Yendlaka

Munhu wa ku tlhariha minkama hinkwayu, a zama ku pimisa hi tinghozi leti nga ha vaka kona se a gama a yendla xanchumu swaku a tivhikela. Phela leswo swa tirha ni ka mavabyi. Ku va munhu a tshama na a basile swa pfuna leswaku a nga ngheniwi hi mavabyi hi ku vevuka kumbe loko a vabya mavabyi ya yena ma nga kuli. Phela swa yampsa ku tivhikela ka mavabyi ku tlula ku ngheniwa hi mavabyi u gama u lwa ni ku ma daha.

“Loko hi tshama na hi basile hi tlhela hi basisa ni kaya ka hina, swi ta hi pfuna leswaku hi nga heti male ya hina hi ku tshamela ku ya xibelhela ni ku xava makinina.” — André.a

a Mavito man’wani ma txintxiwile.

I MPSINI LESWI U NGA SWI YENDLAKA — Leswi Nga Ku Pfunaka

Swilo leswi swi ta ku pfuna swaku u tivhikela ka mavabyi loko ku ni tinghozi kumbe u kumana ni swikarhatu

TSHAMA NA U BASILE

Tshama na u basile

Bibele li li: “Munhu wa ku tlhariha a vona khombo kutani a tumbela”. (Swivuriso 22:3) Zama ku vona swiyimu leswi nga ku yendlaka u vabya u tlhela u fambela kule na swona.

Hlamba mandla hi mati ni sabão nkama ni nkama, ngopfungopfu loko u nga se khomakhoma swakudla kumbe u vuya hi xikoti kakukulu kumbe kakutsongo.
Limpa kaya ka wena u tlhela u ku chela swa ku dlaya switsongwatsongwani, ngopfungopfu ka tindhawu kumbe minchumu leyi mi yi khomaka nkama ni nkama.
Yendla leswi u nga swi kotaka leswaku u nga gamakani ni munhu lweyi a nga ni mavabyi lawa ma tlulelanaka.

DLANA SWAKUDLA SWASWINENE

Dlana swakudla swaswinene

Bibele li li: “A nga kona munhu lweyi a nga tshama a nyenya muzimbha wa yena, kambe wa wu wundla a tlhela a wu hlayisa”. (Vaefeza 5:29) Hi kombisa swaku ha wu rhandza muzimbha wa hina hi ku tivonela ka leswi hi swi dlaka ni leswi hi swi phuzaka.

Phuza mati ya manyingi.
Dlana mafruta ya ku hambanahambana ni matsavu ya ku hambanahambana.
Pumba ku dla swakudla leswi nga tala mafurha, swi nga tala munyu kumbe swi nga tala chukela.
U nga dzahi kumbe ku tirhisa timbagi naswona u nga phuzi byala ku tlula mpimu kumbe ku tirhisa makinina na swi nga bohi.

• “Leswaku hi tivhikela ka mavabyi, hi zama ku dla swakudla swaswinene hikusa loko hi nga yendli leswo hi nga tihetela male ya hina yayitsongo hi nga na yona hi ku xavetela mimirhi. Se hi zama ku tirhisa male leyi hi nga na yona swaku hi dla swakudla swaswinene.” — Carlos.

**YENDLA MA EXERCÍCIO U TLHELA U HUMULA KAHLE**

Yendla ma exercício

Bibele li li: “Swa yampsa ku humula ku tlula ku tshamela ku tirha ni ku hlongolisa moya.” (Ekleziyaxta 4:6) I ntiyiso leswaku swi lava hi tirha kambe ku humula na kona ka laveka.

Zama ku yendla ma exercício nkama ni nkama. U nga ha sungula hi ku fambanyana mpfhuka wa ku leha nkama ni nkama. Phela ku yendla ma exercício swi nga ku pfuna ku hanya kahle hambiloko u vabya, u gugile, u limalile kumbe u li ni mavabyi ya ku kala ma nga daheki.
Humula kahle

Yetlela nkama wa ku yenela. Phela loko u nga yetleli nkama wa ku yenela swi nga ku vangela xitresi naswona swi nga yendla leswaku u nga pimisi kahle. Hi ku famba ka nkama swi nga ha ku vangela mavabyi.
Tivekeli nkama lowu u nga ta yetlela hi wona u tlhela u zama ku wu landzelela. Zama ku yetlela ni ku pfuka hi nkama wolowu wa wun’we siku ni siku.
U nga sixtiri televhizori, ku deketela telefoni kumbe swin’wani loko u li kusuhi ni ku yetlela.
U nga dli swakudla swa swinyingi kumbe u phuza khofi ni byala loko u li kusuhi ni ku yetlela.

“Ni tsumbule swaku a wurhongo li khumba swiyimu hinkwaswu swa wutomi la mina. Loko ni nga yetleli nkama wa ku yenela minkama yin’wani ni pfuka na ni twa nhloko ni muzimbha. Kambe loko ni yetlela nkama wa ku yenela ni pfuka na ni ni matimba ya ku yendla xin’wani ni xin’wani! Funtshi swa kala kuva ni vabya.” — Justin.