I tingaki Timboni ta Yehovha uti tivaka? Swinga yendleka tin’wana ti li vayakelani va wena, vatirhikuloni kumbe vadjondzikuloni. Kumbe swinga yendleka u tshame u bulisana na hina hi Bibele. Kasi hi hina vamani naswona hi mhaka muni hi vulavula ni van’wana hi leswi hiswi kholwaka?

Ha fana ni vanhu van’wana. Hi ta hi ka mindhavuku yo hambanahambana naswona swiyimu swa hina swa wutomi swi hambanile. Van’wana va hina ahi li ka wukhongeli lin’wana naswona van’wana avanga kholwi ka Xikwembu. Kambe hingese va Timboni ta Yehovha, hinkwerhu hi tinyike nkama wa kukambisisa kahle tidjondzo ta Bibele. (Mintirho 17:11) Hi kholwile ka leswi hiswi djondzeke, hi gama hi tilangela kugandzela Yehovha Xikwembu.

Ha pfuneka hi kudjondza Bibele. Kufana ni vanhu van’wana, hi kumana ni swikarhato hi tlhela hi hela ntamu. Kambe hi tsumbule swaku kutirhisa matshinya ya minawu ya Bibele ka wutomi la hina la siku ni siku swihi yendla hi hanya wutomi la kutsakisa. (Tipisalema 128:1, 2) Lexi i xin’wana xa swivangelo leswi yendlaka hi byela van’wana hi swilo swaswinene leswi hiswi djondzaka ka Bibele.

Hi hanya hi minawu ya Xikwembu. Minawu leyi kumekaka ka Bibele yihi pfuna kuva hi tsaka ni kuhlonipha van’wana naswona yihi pfuna kutshembeka ni kukombisa wunene. Minawu leyi yihi pfuna kuva ni mahanyelo ya kahle ni kuva lava pfunaka lomu hi tshamaka kona, naswona yi pfuna mindjangu kuva ni vun’we ni mahanyelo ya kahle. Leswi hi kholwaka swaku “Xikwembu axiyi hi nghohe,” hi lumba ntlawa wa Vamakwerhu va misava hinkwayu; ahi na xihlawuhlawu naswona ahi tipeti ka politika. Hambileswi hi fanaka ni van’wana, hi hlawulekile. — Mintirho 4:13; 10:34, 35

• I yini leswi yendlaka Timboni ta Yehovha ti fana ni vanhu van’wana?

• Hi yihi minawu leyi Timboni tingayi djondza ka Bibele?

Va kutala va pimisa swaku vito lelinge Timboni ta Yehovha i la wukhongeli la nyuwani. Kambe ka malembe lama tlulaka 2.700 lamanga hundza, vagandzeli va Xikwembu xa ntiyiso va vitaniwe “timboni” ta xona. (Esaya 43:10-12) Kufikela hi lembe la 1931, ahi vitaniwa Vadjondzi va Bibele. Kutani hi mhaka muni hi lange vito lelinge Timboni ta Yehovha?

Hikusa li kombisa swaku i mani Xikwembu xa hina. Hikuya hi matsalwa lamanga tsaliwa hi voko, vito la Xikwembu lelinge Yehovha, li kumeka makhambi yamanyingi swinene aBibeleni. Ka maBibele ya kutala va cince vito la Xikwembu hi mavitanela ya kufana ni Hosi kumbe Xikwembu. Kambe, Xikwembu xa ntiyiso xi titivisile ka Moxe hi kutirhisa vito la xona, Yehovha, xi ku: “Leli i vito la mina hilaha kunga heliki”. (Eksoda 3:15) Hi kuyendla leswo, xi tihambanisile ni swikwembu hinkwaswu swa mavunhwa. Ha tibuma hi kuvitaniwa hi vito leli la kukwetsima la Xikwembu.

Hikusa li tlhamusela ntirho wa hina. Vanhu va kutala va minkameni ya khale, kusukela ka Abele wanuna wa kululama, va nyikele wumboni la swaku va ni lipfumelo ka Yehovha. Loko malembe mali karhi ma famba, Nowa, Abrahama, Sara, Moxe, Davhida ni van’wana va nghene ka ntlawa wa ‘rhefu lelikulu la timboni’. (Vaheveru 11:4–12:1) Kufana ni munhu lweyi a vekaka wumboni atribunali na a nyimelela munhu lweyi a kalaka anga na nandzu, na hina hi tinyimisele kutivisa ntiyiso hi Xikwembu xa hina.

Hikusa hi tekelela Yesu. Bibele limu vitana “mboni leyi tshembekeke ya ntiyiso”. (Nhlavutelo 3:14) Yesu a vule swaku a ‘tivise’ vito la Xikwembu naswona a ‘veke vumboni henhla ka ntiyiso’ hi Xikwembu. (Yohane 17:26; 18:37) Hi mhaka leyo, Vakreste va ntiyiso va fanele va tiviwa hi vito la Yehovha ni kuli tivisa ka van’wana. Hi leswo Timboni ta Yehovha ti lwelaka kuswi yendla.

• Hi mhaka muni Vadjondzi va Bibele va lange vito lelinge Timboni ta Yehovha?

• Kusukela nkama muni Yehovha a ni Timboni laha misaveni?

• I mani Mboni yayikulu ya Yehovha?

Bibele li profete swaku ndzhaku ka lifu la Kreste, akuta humelela vadjondzisi va mavunhwa xikarhi ka Vakreste va kusungula lava avata soholota ntiyiso wa Bibele. (Mintirho 20:29, 30) Kutani swi yendlekile hi kufamba ka nkama. Va patsele tidjondzo ta ntiyiso ni ta mavunhwa, kugama kusungula Vakreste va mavunhwa. (2 Timotiya 4:3, 4) Se i yini lexingahi kholwisaka leswaku impela hiwu twisisa kahle ntiyiso wa Bibele namuntlha?

Nkama wa kuva Yehovha a boxa ntiyiso. Yehovha a profete swaku ka ‘nkama wa magamu, wutivi la ntiyiso lita tala’. (Daniyele 12:4) Hi 1870 ku ni ntlawa wawutsongo lowunga sungula kukambisisa ntiyiso wa Bibele. Wu tsumbule swaku tikereke tatinyingi a tidjondzisa swilo leswinga humiki ka Bibele. Kutani wu sungule kukambisisa tidjondzo ta Bibele letinga ntiyiso naswona Yehovha awu katekisile.

Vavanuna va timbilu letinene va kambisise Bibele hi wunyaminyami. Vadjondzi lavaya va Bibele, namuntlha va vitaniwa Timboni ta Yehovha naswona madjondzela ya vona ya khale maha fana ni madjondzela ya hina namuntlha. Loko va djondza Bibele, ava kambisisa mhaka ha yin’we yin’we. Loko va kumana ni mhaka leyi karhataka kuyi twisisa, ava lavetela ntlhamuselo ka tindzimana tin’wana. Loko va twisisa mhaka ya kukarhi leyi twananaka ni Matsalwa man’wana, avayi tsala. Leswi ava tshika Bibele li titlhamusela hi loxe, va tsumbule swaku Mfumu wa Xikwembu i yini, vito la xona i mani, hi wahi makungu ya xona hi vanhu, leswi yendlekaka loko munhu a fa ni swaku vafi vata pfuxiwa. Kukambisisa ka vona kuva pfune kuhuma ka tidjondzo ni swihena swaswinyingi swa mavunhwa. — Yohane 8:31, 32.

Hi 1879 Vadjondzi va Bibele se avaswi twisisile swaku nkama awu fikile wa leswaku va hangalasa ntiyiso. Kutani hi lembe lelo, va sungule kuyendla revhixta lelinge: Murindzi Atwalisa Mfumu wa Yehovha, naswona laha yendliwa kuta fikela namuntlha. Swoswi hi twalisa ntiyiso wa Bibele ka 240 wa matiko hi tirimi ta kutlula 900. Phela wutivi la ntiyiso alise tshama li hangalasiwa kufana ni swoswi!

• Kuyendleke yini hi ntiyiso wa Bibele loko Yesu a file?

• I yini lexingahi pfuna kutlhela hi tsumbula ntiyiso wa Rito la Xikwembu?

Timboni ta Yehovha ti hete nkama wawunyingi swinene na ti tirhisa maBibele ya ku hambanahambana ti tlhela tima imprimira ni kuma hangalasa. Kambe hi game hi tsumbula swaku a kulaveka a wuhundzuluxeli la nyuwani leli alitava pfuna kahle vanhu ‘kutiva leswi swinga ntiyiso’, kunga leswi Xikwembu xiswi lavaka ka vanhu. (1 Timotiya 2:3, 4) Se hi 1950, hi sungule kuhumesa swiyenge swa Bibele la hina la Tradução do Novo Mundo, hi Xinghiza. Li hundzuluxeliwe hi kutshembeka hi tirimi ta kutlula 170.

A kulaveka Bibele leli twisisekaka hi kuwolovaka. Lirimi la cinca hi kufamba ka nkama, naswona maBibele yamanyingi ma tirhisa marito ya kuhundzeliwa hi nkama, ya kutika kuma twisisa ni lama soholotaka mhaka. Nakambe se kutsumbuliwe mabuku yotshembeka ya khale lama tsaliweke hi voko naswona ma yelanaka ni rungula leli tsaliweke akusunguleni. Swihi pfune kutwisisa kahle tirimi letinga tirhisiwa ka kutsala Bibele: Xiheberu, Xiyaramayiku ni Xigriki.

A kulaveka Bibele leli tshembekaka ka rungula la Xikwembu. Handle ka kuyengetela leswi vaswi lavaka, vahundzuluxeli va Bibele va fanele va tshembeka ka rungula lelinga tsaliwa kusunguleni. Kambe ka wuhundzuluxeli la kutala la Matsalwa Yokwetsima, vito la Xikwembu lelinge Yehovha, ali tirhisiwi.

A kulaveka Bibele leli dzunisaka Mutsali wa lona. (2 Samuwele 23:2) Ka Tradução do Novo Mundo, a vito la Yehovha li tlhelisiwile makhambi ya kutlula 7.000 hilaha aswi li hi kona ka matsalwa ya khale lamanga tsaliwa hi voko, hilaha swi kombisiwaka ha kona ka mufoto lowunga la tlhelweni. (Tipisalema 83:18) Kuhetiwe malembe yamanyingi na kukambisisiwa, kutani leswo swi pfune kuva ni Bibele leli tsakisaka kuli lerha hikusa li tlhamusela marito ya Xikwembu hi kuvevuka. Kumbe u na lona Tradução do Novo Mundo hi lirimi la wena kumbe awu na lona, hiku kombela swaku u tiyendlela xiyimisu xa kulerha Rito la Yehovha siku ni siku. — Yoxuwa 1:8; Tipisalema 1:2, 3.

• I yini lexinga yendla hi twisisa swaku a kulaveka wuhundzuluxeli la nyuwani la Bibele?

• I yini lexinga xa lisima kuva munhu axi yendla siku ni siku loko a lava kudjondza kurhandza ka Xikwembu?