Kutala ka vanhu se va tshikile kuya tikerekeni ta vona hikusa avawu kumi nchavelelo ni tinhlamulu ta swivutiso leswiva karhataka wuton’wini. Se hi mhaka muni u fanele u ya ka mintlhanganu ya Timboni ta Yehovha? Uta ya kuma yini?

Uta tsaka hi kuva xikarhi ka vanhu lavanga ni wumunhu lelinene ni lirhandzu. Ka nkama wa vapostola, Vakreste ava li ka mabandla naswona ava tlhangana leswaku va dzunisa Xikwembu, va djondza Matsalwa ni kutlhela va tiyisana. (Vaheveru 10:24, 25) Loko va tlhangana ka tindhawu leti kunga ni lirhandzu, ava titwa xikarhi ka vanghanu va ntiyiso kunga Vakrestekuloni. (2 Vatesalonika 1:3; 3 Yohane 14) Na hina namuntlha ha tikhorisa hi kutsaka hileswi hi landzaka xikombiso xa Vakreste volavo va kusungula.

Uta pfuneka hi kudjondza matshinya ya minawu ya Bibele. Hilaha swi tlhamuseliweke hi kona ka Bibele, vavanuna, ni vavasati ni vana, ava hlengeletana hinkwavu. Vadjondzisi lava fanelekaka, va tirhisa Bibele leswaku vahi pfuna kutiva matirhisela ya matshinya ya minawu ya Bibele ka wutomi la hina la siku ni siku. (Deteronoma 31:12; Nehemiya 8:8) Hinkwerhu hinga yimbelela ni kuhlamula kuva hi kombisa lipfumelo la hina. — Vaheveru 10:23.

Uta va ni nkateko wa kutiyisa lipfumelo la wena ka Xikwembu. Mupostola Pawulo a byele bandla lin’wana la nkameni wa yena a ku: ‘Ni navela ngopfu kumi vona . . . leswaku hi tiyisana loko ni li koseyo ka n’wina, hi kupfumela loku mina na n’wina hinga nakona.’ (Varhoma 1:11, 12) Loko hi li ni Vakreste van’wana amintlhanganwini, hi tiyisa lipfumelo la hina ni kutinyimisela kuhanya tani hi Vakreste.

Haku rhamba ka mintlhanganu ya hina leyi taka leswaku uya tivonela hi wexe swilo leswi vuliweke ka djondzo leyi. Tiyiseka swaku haku yamukela hi mandla mambirhi. Kungheniwa mahala naswona a kuhumesiwi minhlengo.

• Mitlhanganu ya hina yi fanisa kuyini ni mintlhanganu ya le minkameni ya Bibele?

• Hita pfuneka hi yini loko hi ya mintlhanganwini?

Hambi swi sindzisa kufamba hi makhwati kumbe ka maxelo lamanga liki manene, ahi tshiki kuya mintlhanganwini. Kasi hi mhaka muni Timboni ta Yehovha tinga godoli kuya mintlhanganwini hambi ti kumana ni swikarhatu swa wutomi kumbe minkarhalu ya ntirho?

Swahi pfuna ka wutomi la hina. Loko Pawulo a vulavula hi wuxaka la vamakwerhu va le bandleni, a te: “ahi laveni tindlela topfuxana”. (Vaheveru 10:24) A marito lawo ma vula “kuyanakanya hi wunyaminyami”, leswi vulaka kuva tiva kahle vamakwerhu. Mahi pfuna kuva ni mhaka ni vamakwerhu. Loko hiyi tiva kahle mindjangu ya Vakreste leyi hi hlangamelaka na yona, hita tsumbula leswaku yin’wana yi kumana ni swikarhatu swa kufana ni swa hina naswona yingahi pfuna kuswi hlula.

Swihi pfuna kuva ni vanghanu lavanene. Amintlhanganwini, ahi le xikarhi ka vanhu lava hingava tiviki, kambe hi ni vanghanu lavanene. Minkama yin’wana hi tikhorhisa hi kuva xikan’we hi hungata hi ndlela yayinene. Kasi hi pfuneka hi yini ka minkama yoleyo hiyi hetaka xikan’we? Hi djondza kuteka van’wana va li va lisima ni kutlhela hi tiyisa wunghanu la hina. Kutani swahi vevukela kupfuna munghanu wa hina loko a humeleliwa hi swikarhatu hikusa se hi ni wunghanu la kutiya. (Swivuriso 17:17) Hi kombisa leswaku ‘swirho hinkwaswu [swa bandla] swa tirhelana kumbe kuhlayisana’ loko hi tinyika nkama wa kuva na swona. — 1 Vakorinto 12:25, 26.

Hiku khutaza kutilangela vanghanu lava yendlaka kurhandza ka Xikwembu. Vanghanu lavo ungava kuma ka Timboni ta Yehovha. Se unga pfumeleli nchumu ni xin’we xiku sivela kutitlhanganisa na hina.

• Hi pfuneka hi yini loko hi kumana mintlhanganwini ni vamakwerhu?

• U tsakela kuya tiva bandla la hina siku muni?

Loko Vakreste va kusungula va yendla mintlhanganu, ava yimbelela, va khongela ni kulerha Matsalwa va tlhela va bulisana hi wona. Akunga yendliwi mihivahivana. (1 Vakorinto 14:26) Utaya kuma swa kufana ka mintlhanganu ya hina namuntlha.

Tidjondzo ti sekeliwa Bibeleni naswona ta pfuna ka wutomi la siku ni siku. Hi kuhela ka vhiki, bandla lin’wana ni lin’wana la kumana swaku li yingisela wukaneli la le livaleni leli hetaka 30 minutu; li vulavula hi ndlela leyi Matsalwa mangahi pfunaka hi yona ka wutomi la hina ni ndlela leyi ma fambelanaka hi yona ni masiku lawa hi hanyaka ka wona. Hinkwerhu hi khutaziwa kulandzisela ka Bibele la hina loko kulerhiwa tindzimana. Loko wukaneli li hela, kugama kudjondziwa revhixta leli vitaniwaka “Murindzi” leli hetaka wora naswona hinkwavu lavanga kona va rhambiwa kuhlangamela hi tinhlamulu ta vona. Djondzo yoleyo yihi pfuna kuvona tindlela totirhisa leswi hiswi djondzaka ka Bibele ka wutomi la siku ni siku. Naswona amisaveni hinkwayu, mabandla ya kutlula 120.000 ma yendla djondzo ya kufana.

Hi pfuniwa kuyampsisa madjondzisela ya hina. Hi tlhela hi tlhangana phakati ka vhiki ka mintlhanganu leyi vitaniwaka Mahanyelo ni Ntirho wa Hina wa Wukreste. Kukambisisiwa rungula leli susiwaka ka Xibukwana xa Mintlhanganu ya Mahanyelo ni Ntirho, lexi hixi yamukelaka wheti ni wheti. A xiyenge xa kusungula xi vitaniwa Xuma Xinga ka Rito la Xikwembu; xihi pfuna kutwisisa kahle xiyenge xa rungula la kukarhi la Bibele leli vamakwerhu va le bandleni vangali lerha kaya. Xa wumbirhi xi vitaniwa Hisekela Ntirho wa Kuchumayela; xihi pfuna kuvona ndlela ya kutirhisa Bibele swaku hi bulisana ni van’wana. Naswona mukongomisi wa ntlhanganu a gama ahi byela leswingahi pfunaka kuyampsisa madjondzisela ya hina. (1 Timotiya 4:13) Xiyenge xa wugamu, xi vitaniwa Mahanyelo ya Hina Vakreste; xihi pfuna kuvona ndlela ya kutirhisa matshinya ya minawu ya Bibele ka wutomi la siku ni siku, naswona kutlhela kuva ni xiyenge xa swivutiso ni tinhlamulu lexi yengetelaka ndlela leyi hili twisisaka ha yona Bibele.

Loko uya ka mintlhanganu ya hina, utayi tsakela swinene djondzo ya lisima ya Bibele leyi ungatayi kuma. — Esaya 54:13.

• Unga rindzela kuya twa yini ka mintlhanganu ya Timboni ta Yehovha?

• Hi yihi mintlhanganu ya hina leyi u tsakelaka kuya ka yona khambi li taka?

Uyi tsumbulile ka mafoto ya broxura leli ndlela leyi Timboni ta Yehovha ti yambalaka ha yona loko ti ya mintlhanganwini? Swa tikomba swaku ti yambala kahle. Kasi hi mhaka muni hi yambala kahle ni kutisasekisa hi ndlela yayinene?

Hi kombisa kuhlonipha Xikwembu xa hina. I ntiyiso swaku Yehovha anga languti leswi hinga xiswona handle ntsena. (1 Samuwele 16:7) Kambe loko hi tlhangana swaku himu dzunisa, hi navela kukombisa xihloniphu ka yena ni ka vamakwerhu. Hi xikombiso, loko hi ya tribunali, hi yendla hinkwaswu leswi hingaswi kotaka swaku hi languteka hi ndlela leyi kombisaka xihloniphu. Hilaha kufanaka, ndlela leyi hi yambalaka ha yona loko hi ya mintlhanganwini, yi kombisa xihloniphu ka “Muyavanyisi wa misava hinkwayu”, kunga Yehovha Xikwembu ni ka ndhawu leyi himu gandzelaka ka yona. — Genesa 18:25.

Hi kombisa lisima la minawu ya Xikwembu leyi kongomisaka wutomi la hina. Bibele yi pfuna Vakreste swaku va yambala ‘leswinga khomisiki tingana, va tisasekisa hi mpimo’. (1 Timotiya 2:9, 10) Kuyambala ‘leswinga khomisiki tingana’ swi vula kunga yambali mpahla ya kuvonekela, leyi yendlaka vanhu vaku languta hintamu kumbe va navela kufamba masangu na wena. Nakambe a ‘kutisasekisa hi mpimo’ swihi pfuna kulanga mpahla ya kusaseka, leyingahi yendliki vanhu va futa kumbe va kutitshika. Kambe, matshinya wolawo ya minawu ama siveli munhu kulanga leswi naveliwaka hi mbilu ya yena. Hambi hinga zanga hi vula hi nomo, kambe ndlela leyi hi yambalaka ni kulanguteka ha yona, yinga ‘komba kusaseka ka leswi djondzisiwaka hi tlhelo la Xikwembu Muponisi wa hina’ ni kutlhela yi ‘dzunisa Xikwembu’. (Tito 2:10; 1 Petro 2:12) Loko hi yambala kahle loko hi ya mintlhanganwini, hita pfuna vanhu van’wana swaku va va ni mavonelo lamanene hi wugandzeli la Yehovha.

Unga tshiki kuya ka Yindlo ya Mfumu ya Timboni ta Yehovha hi kutibyela swaku awu na mpahla leyi fanelekaka. Aswi lavi mpahla ya kudura kumbe leyinga ka moda swaku uta ya mintlhanganwini, kambe ntsena u fanele u yambala mpahla leyi baseke yi tlhela yi lunghisiwa kahle.

• Mayambalela ya hina loko hi gandzela Yehovha i ya lisima hi mhaka muni?

• Hi wahi matshinya ya minawu lamahi kongomisaka ka mayambalela ni kutisasekisa ka hina?

Loko ku li swaku se u djondza Bibele ni Timboni ta Yehovha, swinga yendleka u lunghiselela buku la wena. Kutani swinga va kahle kuva u lunghiselela ni mintlhanganu na ungese ya swaku uta kota kupfuneka. Uta pfuneka swinene loko u tiyendlela xiyimiso.

Tilangeli nkama ni ndhawu ya kudjondza. Hi wihi nkama lowu u kotaka kutwisisa kahle leswi uswi djondzaka? Nimixo loko ungese sungula mintirho ya wena? Kumbe niwusiku loko vana se va yetlelile? Hambi unga koti kudjondza nkama woleha, kambe tivekeli nkama lowu ungatawu heta na u djondza naswona unga pfumeleli nchumu ni xin’we xiku rivata. Lavetela ndhawu leyi rhuleke, susa hinkwaswu leswingaku rivataka, tima radiyu, televhizori ni telefoni. Rhanga hi kukhongela hikusa leswo switaku pfuna kupumba swivilelo ka mimpimiso ni kuveka mbilu ya wena ka Rito la Xikwembu. — Vafilipiya 4:6, 7.

Lunghiselela u tlhela u markara tinhlamulu. Sungula hi kutwisisa rungula hinkwalu. Yanakanyisisa hi nhlokomhaka ya djondzo kumbe ya ndzima leyi u lavaka kuyi lunghiselela, kambela ndlela leyi swihlokwanamhaka swi yelanaka hi yona ni nhlokomhaka naswona kambisisa mafoto ni swivutiso leswi kumekaka magamu ka ndzima leswi seketelaka mhaka leyi kuvulavuliwaka hi yona. Loko u hetile, sungula kulerha maparagrafu hi lin’we hi lin’we naswona zama kukuma tinhlamulu ta swivutiso swa wona. Lerha tindzimana ta Bibele leti kombisiweke u tlhela u zama kutwisisa ndlela leyi ti yelanaka hi yona ni mhaka leyi kuvulavuliwaka hi yona. (Mintirho 17:11) Loko se u kume nhlamulu, yi markari kumbe kumarkara marito yokarhi lamangataku pfuna kukhumbuka nhlamulu loko se u li mintlhanganwini. Kutani loko se u li mintlhanganwini, unga tlakusa voko swaku u hlamula na unga lerhi ka buku, loko uswi tsakela.

Loko u kambela marungula yo hambanahambana lama djondziwaka mintlhanganwini vhiki ni vhiki, uta yengetela wutivi la wena hi Bibele. — Matewu 13:51, 52.

• Hi xihi xiyimiso lexi unga tiyendlelaka xona swaku u kota kulunghiselela mintlhanganu?

• Unga tilunghiselelisa kuyini swaku u hlamula mintlhanganwini?

Kusukela khale swinene, Yehovha a lava swaku mindjangu yi heta nkama xikan’we swaku yi tivana kuyampsa ni kutlhela yi tiyisa wuxaka la yona ni Xikwembu. (Deteronoma 6:6, 7) Hi leswo swi yendlaka Timboni ta Yehovha ti veka nkama vhiki ni vhiki swaku ti tlhangana tani hi ndjangu kuva ti gandzela Yehovha xikan’we. Ti bulisana hi swilo leswi fambisanaka ni wuxaka la tona ni Xikwembu ni swilaveko swa tona. Hambi u tshama wexe, ungati vekela nkama swaku u yendla Djondzo ya wena wexe ya Bibele, leswingataku pfuna kutiyisa wuxaka la wena ni Xikwembu.

I nkama wa kutshinela ka Yehovha. Yakobo 4:8 yi li: “Tshinelani kusuhi ni Xikwembu kutani xita tshinela kusuhi na n’wina.” Kutani hingamu tiva kahle Yehovha loko hi djondza hi wumunhu ni mintirho ya yena ka Bibele. Ndlela ya kahle yosungula kuva ni wugandzeli la ndjangu, i kutivekela nkama wa kulerha Bibele hi rito leli twalaka. Kungaha tirhisiwa xiyimiso xa kulerha Bibele vhiki ni vhiki, lexi kumekaka ka Xibukwana xa Mintlhanganu ya Mahanyelo ni Ntirho. Hinkwavu andjangwini vangaha lerha swiyenge leswi hambaneke va gama va bulisana hi leswi vaswi djondzeke ka Matsalwa.

I nkama wa kutiyisa wuxaka andjangwini. Loko nuna ni nsati, vapsali ni vana va djondza Bibele xikan’we, swi tiyisa wuxaka la vona tani hi ndjangu. Nkama lowu wu fanele wu va lowu rhuleke naswona wu tsakisa, lakakuva ndjangu hinkwawu wuli rindzela swinene siku leli swaku li fika. Vapsali vangaha tirhisa mhaka leyingata pfuna vana hikuya hi ntanga ya vona, kumbexana vangaha tirhisa timhaka leti kumekaka ka Murindzi ni Kindlimuka!, ka jw.org kumbe ka mabuku man’wana. Nakambe vangaha vulavula hi swikarhatu leswi vana va vona va kumanaka na swona axikolweni ni ndlela leyi vanga lwisanaka na swona ha yona. Mingaha sixtira nongonoko ka xitichi xa JW Broadcasting (tv.jw.org) mi gama mi bulisana hi leswi miswi djondzeke. Naswona mingaha tikhorisa hi kuyinsayara tinsimu ta mintlhanganu leyi taka, mi gama mi miyeta nyoka na mi pfa mi titimeta nkolo.

Nkama wolowo wa kuhlawuleka lowu miwu hetaka xikan’we vhiki ni vhiki tani hi ndjangu swaku mi gandzela Yehovha, wuta pfuna hinkwenu swaku mi tsakela kudjondza Rito la Xikwembu naswona xitayi katekisa swinene minzamu yoleyo. — Tipisalema 1:1-3.

• Hi mhaka muni hi veka nkama wa kuyendla wugandzeli la ndjangu?

• Vapsali vanga yendlisa kuyini swaku wugandzeli la ndjangu li tsakisa hinkwavu?

Vanhu lava va tsake hintamu hi mhaka muni? Va le ka yin’we ya tinhlengelatanu ta hina. Hiswi nyimela hi ntsaku swinene kuva xikan’we ni vamakwerhu van’wana ka tinhlengeletanu ta hina, kufana ni malandza ya Xikwembu ya khale, lawa ama byeliwe kuhlengeletana tani hi mintlawa ya yikulu, 3 wa makhambi hi lembe. (Deteronoma 16:16) Hi ni 3 wa tinhlengeletanu lembe ni lembe: 2 wa masembleya ni kongresu ya 3 wa masiku. Tinhlengeletanu leti tihi pfunisa kuyini?

Ti tiyisa wuxaka la hina ni vamakwerhu. Tani hileswi Vayisrayele ava tsaka swinene hi kudzunisa Yehovha “ka masembleya,” na hina hi tikhorisa swinene hi kumu gandzela xikan’we ni vamakwerhu ka tinhlengeletanu leti ta kuhlawuleka. (Tipisalema 26:12, ntlhamuselo ya le hansi; 111:1) Tinhlengeletanu leti, tihi nyika nkama wa kutlhangana ni Timboni ta mabandla man’wana kumbe matiko man’wana. Ka nkama wa kuhumula, hi miyeta nyoka ni kutikhorisa hi mabulu ni vamakwerhu. (Mintirho 2:42) Ka tinhlengeletanu leti tatikulu hi tivonela hi ya hina lirhandzu leli yendlaka swaku ‘nhlengeletanu ya vamakwerhu’ amisaveni hinkwayu yi va ni wun’we. — 1 Petro 2:17.

Tihi pfuna kukulisa wuxaka la hina ni Xikwembu. Vayisrayele va pfuneke swinene ka tinhlengeletanu leto hileswi va ‘twisiseke marito’ ya Matsalwa. (Nehemiya 8:8, 12) Djondzo leyi kumiwaka ka tinhlengeletanu hi kutirhisa Bibele, i ya lisima ka hina. Nongonoko wun’wana ni wun’wana wu sekeliwe ka nhlokomhaka ya le Matsalweni. Wukaneli, milongoloko ni minkombiso ya leswinga yendleka, swihi djondzisa ndlela leyi hi faneleke hi yendla kurhandza ka Xikwembu hi yona awuton’wini la hina. Ha tiyisiwa loko hi twa mintokoto ya vanhu lava tamaka va hanya tani hi Vakreste hambi va kumana ni swikarhatu ka minkama leyi ya kukarhata. Ka makongresu, madrama ma yendla rungula la Bibele li va la hikakunene ma tlhela mahi nyika tidjondzo ta lisima. Ka nhlengeletanu yin’wana ni yin’wana, lava tinyiketeleke ka Xikwembu, va tsakamisiwa.

• Hi mhaka muni tinhlengeletanu ti tsakisa?

• Unga pfunekisa kuyini loko u ya ka tinhlengeletanu?

Nakaha sale nkama nyana leswaku Yesu a dlayiwa, a te: “Evhangeli leyi ya Mfumu yita chumayeliwa misaveni hinkwayu, tani hi vumboni ka vanhu va matiko hinkwawu; kutani hi kona makumu mangata fika.” (Matewu 24:14) Awuta yendlisiwa kuyini ntirho lowu wa kuchumayela amisaveni hinkwayu? Hi kulandzela xikombiso lexi Yesu axi vekeke loko a li laha misaveni. — Luka 8:1.

Hi zama kuvulavula ni vanhu amakaya ka vona. Yesu a djondzise vadjondzisiwa va yena leswaku va chumayela mahungu ya kutsakisa hi munti ni munti. (Matewu 10:11-13; Mintirho 5:42; 20:20) Vachumayeli va nkama wa vapostola ava nyikiwe ndhawu leswaku va chumayela ka yona. (Matewu 10:5, 6; 2 Vakorinto 10:13) Ni namuntlha, ntirho wa kuchumayela wu fambisiwa kahle naswona bandla lin’wana ni lin’wana li nyikiwa ndhawu kuva li tirhela ka yona. Leswo swihi pfuna kuva hi hetisisa leswi hinga rhumiwa hi Yesu kunga “kupaluxa Evhangeli tikweni, ni kutiyisa wumboni [hi kuhelela]”. — Mintirho 10:42.

Hi tikarhatela kulavetela vanhu hinkwaku lomu vanga kona. Yesu a tlhele a veka xikombiso hi kuchumayela ka tindhawu leti taleke hi vanhu, tofana ni lomu kukhiwaka mati ni kusuhi ni lwandle. (Marka 4:1; Yohane 4:5-15) Na hina hi bulisana ni vanhu hi Bibele kun’wana ni kun’wana ka kufana ni switaratwini, mabazara, majardim ni hi kutirhisa matelefoni. Hi tlhela hi chumayela vayakelani, lava hi tirhaka na vona ni maxaka ya hina loko hi kuma mukhandlu wa kuswi yendla. Minzamu leyi hinkwayu yi yendla leswaku vanhu va kutala swinene amisaveni hinkwayu va twa “mahungu yotsakisa ya kuponisiwa”. — Tipisalema 96:2.

Kunga va leswaku ku ni lweyi awu tsakela kubulisana na yena hi mahungu ya kutsakisa ya Mfumu wa Xikwembu ni ndlela leyi swingatamu pfuna ha yona ka nkama lowu taka? Unga tshami na wona mahungu lawo. Va byeli hi xihantla!

• Ma fanele ma chumayelisiwa kuyini “mahungu yotsakisa”?

• Timboni ta Yehovha tixi tekelelisa kuyini xikombiso xa Yesu xa kuchumayela?

Rito lelinge “mupfuli wa ndlela” hakanyingi li kombetela ka lava tirhaka ka ndhawu ya nyuwani naswona va pfulelaka van’wana ndlela swaku va va landzela. Yesu a afana ni mupfuli wa ndlela hikusa a rhumeliwe laha misaveni swaku a yendla ntirho lowu nyikaka wutomi wu tlhela wu pfulela vanhu ndlela ya kuponisiwa. (Matewu 20:28) Namuntlha, valandzeli va yena vamu tekelela hi kuheta nkama wa wunyingi hilaha va kotaka hi kona na ‘va yendla vadjondzisiwa’. (Matewu 28:19, 20) Van’wana va yendle leswo hi kunghenela ka ntirho wa kuva vapfuli va ndlela.

Mupfuli wa ndlela i munhu lweyi a chumayelaka nkama hinkwawu. Timboni hinkwatu ta Yehovha i vachumayeli va mahungu ya kutsakisa. Kambe van’wana va vevukisa wutomi la vona swaku va va vapfuli va ndlela va nkama hinkwawu; va tirha 70 wa mawora hi wheti ka ntirho wochumayela. Kuva va kota kuyendla leswo, va tirha nkama wa wutsongo leswaku va kuma male ya kutihlayisa. Van’wana va langiwa swaku va tirha tani hi vapfuli va ndlela va kuhlawuleka ka tindhawu leti kunga ni xilaveko xa vachumayeli va Mfumu. Va tirha 130 wa mawora hi wheti kumbe kutlula. Vapfuli va ndlela va yeneliseka hi kuhanya wutomi la xiyimu xa le hansi, va tshemba swaku Yehovha ata yenelisa swivilelo swa vona. (Matewu 6:31-33; 1 Timotiya 6:6-8) Lava tsandzekaka kuva vapfuli va ndlela va nkama hinkwawu vanga va vapfuli va ndlela va nkama nyana loko swiyimu swa vona swiva pfumelela. Kutani va tirha 30 kumbe 50 wa mawora hi wheti.

Lexi yendlaka munhu a va mupfuli wa ndlela i kurhandza Xikwembu ni vanhu. Kufana na Yesu, hi vona swaku vanhu namuntlha va lava kupfuniwa leswaku vava ni wuxaka ni Xikwembu. (Marka 6:34) Kambe hina hi ni wutivi lelingava pfunaka swoswi, lelingava nyikaka ntshembo lowu tiyeke hi wumundzuku. Kurhandza vayakelani swi yendla swaku hi kuswi rhandza, vapfuli va ndlela va nyikela nkama wa vona kuva va pfuna van’wana swaku va tiva mahungu ya kutsakisa. (Matewu 22:39; 1 Vatesalonika 2:8) Hi mhaka leyo, lipfumelo la vapfuli va ndlela la tiyisiwa, va tshinela kusuhi ni Xikwembu va tlhela va kuma ntsaku swinene. — Mintirho 20:35.

• I yini mupfuli wa ndlela?

• I yini lexi yendlaka van’wana va va vapfuli va ndlela va nkama hinkwawu?

Se i khale Timboni ta Yehovha ti tiviwa hi kuva ni swikola swa kudjondzisa Bibele. Ka lava tinyiketeleke ka ntirho wa kuchumayela hi Mfumu nkama hinkwawu, ku ni malulamiselo ya swikola swa kuhlawuleka swaku va kota ‘kuhetisisa timfanelo ta ntirho wa vona.’ — 2 Timotiya 4:5.

Xikola xa Ntirho wa Vapfuli va Ndlela. Loko mupfuli wa ndlela wa nkama hinkwawu a tlhanganisa lembe ka ntirho wa yena, a rhambiwa ka xikola lexi hetaka 6 wa masiku, lexingaha yendliwaka ka Yindlo ya hina ya Mfumu. Xikongomelo xa kona i kupfuna mupfuli wa ndlela swaku a tshinela kusuhi na Yehovha, a yampsisa ka swiyenge hinkwaswu swa kuchumayela a tlhela a tama a yendla ntirho wa yena hi kutshembeka.

Xikola xa Vachumeyeli va Mfumu. Xikola lexi xa 2 wa tiwheti, xi yendleliwe kudjondzisa vapfuli va ndlela lavanga ni xiperiyensiya naswona hi kuswi rhandza va tsakelaka kusuka lomu va tshamaka kona swaku vaya tirha lomu kunga ni xilaveko. Va tekelela Yesu Kreste, Muchumayeli lwenkulu lweyi anga tshama ava kona laha misaveni. Swi fana ni loko va ku: “Hi mina lweyi! Ni rhume!” (Esaya 6:8; Yohane 7:29) Kurhurhela ka ndhawu ya kule ni kaya swingaha lava swaku vapfuli va ndlela va titoloveta kuhanya hi swilo swa switsongo. Mahanyelo ya kona, maxelo ni swakudla, swingaha va leswi hambaneke swinene ni leswi se vangaswi tolovela. Swingaha lava swaku va djondza lirimi lin’wana. Xikola lexi xi pfuna vamakwerhu vaxinuna ni vaxisati lava kalaka vanga chadanga ni lava chadeke, lavanga ni 23 kuya ka 65 wa malembe, swaku va va ni wumunhu la Wukreste lelingatava pfuna ka swiyavelo swa vona. Naswona xiva pfuna kuva ni wutlharhi lelingata yendla swaku va tirhisiwa hi kuhelela hi Yehovha ni nhlengetanu ya yena.

Xikola xa Bibele xa Giliyadi xa Torre de Vigia. Hi Xiheberu, rito lelinge “Giliyadi” li vula “Wumboni La Kutala.” Xikola xa Giliyadi xi sungule hi 1943. Kusukela kolanu, vamakwerhu lava tlulaka 8.000 se va djondzile ka xikola lexi. Kutani va yaveliwe kuya tirha tani hi vamisiyonariyu swaku va kota kunyikela kahle wumboni “matlhelweni hinkwawu ya misava”. (Mintirho 13:47) Loko vamisiyonariyu va fike hi khambi la kusungula le Peru, akunga na bandla ka tiko lelo. Kambe namuntlha, ku ni mabandla lama tlulaka 1.000. Loko vamisiyonariyu va sungule kutirhela le Japão, Timboni ta Yehovha atinga fiki 10. Kambe namuntlha ti tlula 200.000. Xikola xa Giliyadi xi heta 5 wa tiwheti naswona ka xona kuni djondzo ya Rito la Xikwembu leyi yenteke swinene. Lava tirhaka tani hi vapfuli va ndlela va kuhlawuleka kumbe vamisiyonariyu, lava tirhaka Betele kumbe ka ntirho wa wudjikelezi, hi vona va rhambiwaka ka xikola lexi swaku va djondzisiwa hi xikongomelo xa leswaku va seketela ntirho lowu yendliwaka amisaveni hinkwayu.

• Hi xihi xikongomelo xa Xikola xa Ntirho wa Vapfuli va Ndlela?

• I vamani lava rhambiwaka ka Xikola xa Vachumayeli va Mfumu?