Djondzo ya wena ya Bibele ni Timboni ta Yehovha yi yendle leswaku u tiva ntiyiso. Leswi u nga swi djondza swi ku pfunile leswaku u va ni wunghanu lalinene ni Xikwembu swi tlhela swi ku yendla u va ni ntshembo wa ku kuma wutomi la ku kala li nga heli aParadesi hansi ka Mfumu wa Xikwembu. U ye u li tshemba swinene Rito la Xikwembu naswona ku va kona ka bandla la Wukreste swi yendle swaku u kuma minkateko ya yinyingi. Naswona u tlhele u twisisa ndlela leyi Yehovha a va pfunaka hi yona vanhu va yena namuntlha. — Zak. 8:23.

Leswi se u lavaka ku tsakamisiwa, u ta pfuneka swinene hi ku tlhela u kambisisa tidjondzo tin’wani ta lisima ni madoda. (Heb. 6:1-3) Hi navela swaku Yehovha a tama a katekisa minzamu ya wena ya ku lava ku mu tiva, a tlhela a ku nyika hinkwaswu leswi a nga ku tshembisa swona. — Yoh. 17:3.

1. Hi mhaka muni u lava ku tsakamisiwa?

2. I mani Yehovha?

• “Yehovha i Xikwembu xa ntiyiso, amatilweni ni lani misaveni. A ku na mun’wani.” — Det. 4:39.

• “Wena lweyi vito la wena ku nga Yehovha, hi wena ntsena Lweyi A Nga Tlakuka amisaveni hinkwayu.” — Ps. 83:18.

3. Hi mhaka muni swi li swa lisima ku tirhisa vito la Xikwembu?

• “Mi fanele mi khongelisa leswi: ‘Papayi wa hina lweyi a nga matilweni, vito la wena a li kwetsimisiwe.’” — Mat. 6:9.

• “Lweyi a vitanaka vito la Yehovha a ta ponisiwa.” — Rom. 10:13.

4. Hi wani marito man’wani lawa Bibele li ma tirhisaka swaku li tlhamusela leswi Yehovha a nga tshamisa xiswona?

• “Yehovha, Lweyi a nga yendla hinkwaswu leswi nga misaveni, i Xikwembu hi masiku ni masiku.” — Esa. 40:28.

• “Papayi wa hina lweyi a nga matilweni.” — Mat. 6:9.

• “Xikwembu i lirhandzu.” — 1 Yo. 4:8.

5. U nga mu yendlela yini Yehovha Xikwembu?

• “U fanele u rhandza Yehovha Xikwembu xa wena hi mbilu ya wena hinkwayu, hi wutomi la wena hinkwalu, hi mimpimiso ya wena hinkwayu ni hi matimba ya wena hinkwawu.” — Mar. 12:30.

• “U fanele u gandzela Yehovha Xikwembu xa wena naswona u fanele u tirhela yena ntsena.” — Luk. 4:8.

6. Hi mhaka muni u lava ku tshembeka ka Yehovha?

• “Tlhariha n’wananga, u tsakisa mbilu ya mina, swaku ni ta hlamula lweyi a ni tlhontlhaka.” — Swiv. 27:11.

7. U khongela ka mani, naswona hi vito la mani?

• “Ni mi byela ntiyiso: Lexi mi nga ta xi kombela ka Papayi hi vito la mina [Yesu], a ta mi nyika xona.” — Yoh. 16:23.

8. I mpsini swin’wani leswi u nga swi vulaka ka xikhongelo?

• “Kutani mi fanele mi khongelisa leswi: ‘Papayi wa hina lweyi a nga matilweni, vito la wena a li kwetsimisiwe. Mfumu wa wena a wu te. Ku rhandza ka wena a ku yendleke amisaveni ku fana ni leswi ku yendlekisaka xiswona tilweni. Hi nyiki pawu la siku la namuntlha; naswona hi rivaleli swidjoho swa hina, ku fana ni leswi na hina hi va rivalelaka lava hi djohelaka. Hi pfuni leswaku hi nga hluliwi hi ndzingo; u hi vhikela ka Davulosi.’” — Mat. 6:9-13.

• “Ha tshemba swaku Xikwembu xa hi twa loko hi kombela xin’wani ni xin’wani lexi fambisanaka ni ku rhandza ka xona.” — 1 Yo. 5:14.

9. I mpsini swi yendlaka Yehovha a nga swi yingisi swikhongelo swin’wani?

• “Va ta kombela Yehovha swaku a va pfuna, kambe a nga ta va hlamula . . . hi mhaka ya mintirho ya vona ya ku biha.” — Mik. 3:4.

• “Hikusa matihlo ya Yehovha ma txuvuke va ku lulama ni tindleve ta yena ta xi yingisa xikhongelo xa vona, kambe Yehovha a va komba nhlana lava yendlaka swa ku biha.” — 1 Pe. 3:12.

10. I mani Yesu Kreste?

• “Simoni Pedru a hlamula a ku: ‘U Kreste, N’wana wa Xikwembu lexi hanyaka.’” — Mat. 16:16.

11. Hi mhaka muni Yesu a tile misaveni?

• “Leswi N’wana wa munhu a kalaka a nga telanga ku ta tirheliwa, kambe a nga tela ku ta tirhela van’wani ni ku nyikela wutomi la yena swaku li kutsula vanhu va vanyingi.” — Mat. 20:28.

• “[Yesu] a xi byela a ku: ‘Ni fanele ni ya chumayela mahungu ya ku tsakisa ya Mfumu wa Xikwembu ni le ka madoropa man’wani, hikusa hi swona ni nga rhumiwa swona.’” — Luk. 4:43.

12. U nga swi kombisisa ku yini swaku wa khensa hileswi Yesu a nga hi fela?

• “Naswona a fele hinkwavu leswaku lava hanyaka va nga ha tihanyeli, kambe va hanyela lweyi a nga va fela a tlhela a pfuxiwa.” — 2 Ko. 5:15.

13. Hi xini xitshamu lexi Yesu a nga nyikiwa xona?

• “Ni nyikiwe matimba ya ku fuma atilweni ni lani misaveni.” — Mat. 28:18.

• “Xikwembu xi mu tlakusile hintamu, naswona hi timpsalu xi mu nyika vito leli nga henhla ka mavito hinkwawu.” — Filp. 2:9.

14. Wa kholwa swaku Ntlawa Lowu Rhangelaka wa Timboni ta Yehovha hi yena “mutirhi wa ku tshembeka ni wa ku tlhariha” lweyi a nga langiwa hi Yesu?

• “Kasi i mani mutirhi wa ku tshembeka ni wa ku tlhariha, lweyi n’winyi wa yena a nga mu veka swaku a hlayisa vatirhi va yena, a va phamela swakudla hi nkama wa kona?” — Mat. 24:45.

15. Ku nga va swaku moya wa ku kwetsima i munhu?

• “Ntsumi yi mu hlamula yi ku: ‘Moya wa ku kwetsima wu ta va henhla ka wena, naswona matimba ya Xikwembu Xa Ku Tlakuka Hintamu ma ta ku funengeta. Hi mhaka leyo, n’wana yelweyo a ta kwetsima naswona a ta vitaniwa N’wana wa Xikwembu.’” — Luk. 1:35.

• “Se loko n’wina hambileswi mi nga vadjohi, mi swi kotaka ku nyika vana va n’wina minchumu yayinene, Papayi wa le matilweni a nge va nyiki moya wa ku kwetsima hi ku tlulisa lava mu kombelaka ke?” — Luk. 11:13.

16. Yehovha a wu tirhisisa ku yini moya wa ku kwetsima?

• “Yehovha a yendle tilo hi rito la yena, naswona hinkwaswu leswi nga tilweni a swi yendle hi moya wa yena.” — Ps. 33:6.

• “Kambe mi ta yamukela matimba loko moya wa ku kwetsima wu fika henhla ka n’wina, funtshi mi ta va timboni ta mina . . . anze amagamu ya misava.” — Min. 1:8.

• “A ku na wuprofeta la Matsalwa leli taka hi ka vanhu, hikusa wuprofeta a li vanga kona hi ku rhandza ka munhu, kambe vanhu a va vulavula leswi taka hi ka Xikwembu na va kongomisiwa hi moya wa ku kwetsima.” — 2 Pe. 1:20, 21.

17. I yini Mfumu wa Xikwembu?

• “Xikwembu xa le tilweni xi ta veka mfumu lowu nga ta kala wu nga helisiwi. Mfumu lowu a wu nge nyikiwi vanhu van’wani. Wu ta pfotlosa wu tlhela wu helisa mimfumu leyi hinkwayu, kambe wona wu ta fuma hi masiku ni masiku.” — Dan. 2:44.

18. U ta pfunekisa ku yini hi Mfumu wa Xikwembu?

• “Xi ta limpa mihloti hinkwayu ka matihlo ya vona, lifu a li nga ha ta va kona, hambi nkosi, ku rila ni ku twa ku vava a swi nge he vi kona. Swilo swa ku sungula swi hundzile.” — Nhl. 21:4.

19. U swi tivisa ku yini swaku minkateko leyi nga ta tisiwa hi Mfumu wa Xikwembu se yi kola kusuhi?

• “Vadjondzisiwa va mu yela hi tlhelo va ku: ‘Hi nga hi byela, swi ta yendleka siku muni swilo leswi naswona xi ta va xihi xikombiso xa nkama wa ku vuya ka wena ni xa ku fika ka nkama wa wugamu?’ Kutani Yesu a va hlamula a ku: ‘. . . Matiko ma ta lwa hi xiwona, ni mimfumu yi ta lwa hi xiyona, ku ta pfumaleka swakudla ni misava yi ta tsekatseka ka tindhawu ta ku hambanahambana. Naswona mahungu lawa ya ku tsakisa ya Mfumu ma ta chumayeliwa amisaveni hinkwayu leswaku ma va wumboni ka matiko hinkwawu; kutani hi kona magamu ma nga ta fika.’” — Mat. 24:3, 4, 7, 14.

• “Ka masiku ya wugamu ku ta fika minkama ya ku karhata leyi swi tikaka ku hanya ka yona. Hikusa vanhu va ta va lava tirhandzaka, va rhandza male, va tibyela, va titlakusa, va vulavula nhlambha, va nga yingisi vapsali, va nga khensi, va nga tshembeki, va nga na lirhandzu, va womelela ka mavonelo ya vona, va lumbeta van’wani, va nga tikhomi, va va ni mona, va nga rhandzi wunene, vaxengi, va nkanu, va ku tikulisa, va ku rhandza ku titsakisa va tshika ku rhandza Xikwembu, va tikomba ingaku va gandzela Xikwembu kambe a swi tikombi hi mahanyelo ya vona.” — 2 Tm. 3:1-5.

20. U nga swi kombisisa ku yini swaku Mfumu wa Xikwembu i wa lisima ka wena?

• “Tamani mi lava Mfumu ni ku lulama ka Xikwembu ku sungula.” — Mat. 6:33.

• “Kutani Yesu a byela vadjondzisiwa va yena a ku: ‘Lweyi a lavaka ku ni landzela, a a titshiki, se a rhwala mhandzi ya yena ya nxaniso a ni landzela nkama hinkwawu.’” — Mat. 16:24.

21. I mani Sathana ni madimoni ya yena?

• “Papayi wa n’wina i Davulosi . . . a a li mudlayi ku sukela nkama lowu a nga hembela Xikwembu. — Yoh. 8:44.

• “Se dragona leyi, ku nga nyoka ya khale, leyi vitaniwaka Davulosi na Sathana, leyi kanganyisaka misava hinkwayu, yi txukumeteliwa hansi misaveni yona ni tintsumi ta yona.” — Nhl. 12:9.

22. Sathana a mu lumbete hi yini Yehovha ni lava va mu gandzelaka?

• “Wansati a hlamula nyoka a ku: ‘Mihandzu ya minsinya leyi nga ka jardim hi nga dla. Kambe mihandzu ya nsinya lowu wu nga xikarhi ka jardim, Xikwembu xi te: “Mi nga tshuki mi yi dla naswona mi nga tshuki mi yi khumba; hikusa loko mo yi dla mi ta fa.”’ Se nyoka yi byela wansati yi ku: ‘Leswo a hi ntiyiso, a mi nga ta fa. Xikwembu xa swi tiva swaku siku mi nga ta yi dla, matihlo ya n’wina ma ta pfuleka, mi ta fana ni Xikwembu, mi ta tiva swaswinene ni swa ku biha.’” — Gen. 3:2-5.

• “Kambe Sathana a hlamula Yehovha a ku: ‘Xikhumba hi xikhumba. Munhu a ta humesa hinkwaswu leswi a nga na swona swaku a ponisa wutomi la yena.’” — Yob. 2:4.

23. U nga swi kombisisa ku yini swaku Sathana wa hemba?

• “Tirhela Yehovha Xikwembu xa wena hi mbilu ya wena hinkwayu.” — 1 Tik. 28:9.

• “Ni ta za ni ya fa na na ha tshembekile!” — Yob. 27:5.

24. Hi mhaka muni vanhu va fa?

• “Hi mhaka leyo, leswi xidjoho xi nga nghena misaveni hi munhu mun’we, na lona lifu li nghenile hi mhaka ya xidjoho, se lifu li tlulele vanhu hinkwavu hikusa hinkwavu va djohile.” — Rom. 5:12.

25. Ku yendleka yini hi munhu loko se a file?

• “Hikusa lava hanyaka va swi tiva swaku va ta fa, kambe lava nga fa a va tivi nchumu.” — Ekl. 9:5.

26. Hi wini ntshembo lowu hi nga na wona hi lava nga fa?

• “Lava ku lulama ni lava kalaka va nga lulamanga va ta pfuxiwa.” — Min. 24:15.

27. I vanhu vangani lava yaka tilweni swaku va ya fuma na Yesu?

• “Ni vona Xinyempfani na xi nyime ka Ntshava ya Siyoni; a xi ni 144.000 wa vanhu lava nga tsaliwa vito la xona ni vito la Papayi wa xona ka swimombo swa vona.” — Nhl. 14:1.

Ka djondzo ya wena ya Bibele u djondze hi leswi Yehovha Xikwembu a swi lavaka ka wena ni leswaku u nga yendla yini leswaku u hanya hi minawu ya yena ya ku lulama. Leswaku u hanya hi leswi u nga swi djondza, swi lave leswaku u txintxa minchumu ya yinyingi ka mahanyelo ya wena ni ndlela leyi u li vonaka hi yona wutomi. Swoswi u tibohele leswaku u ta hanya hi ku landzelela minawu ya ku lulama ya Yehovha, naswona se u le ka xiyimu xa kahle leswaku u mu tirhela hi ndlela leyi a yi lavaka tanihi muchumayeli wa mahungu ya ku tsakisa wa ku kala a nga tsakamisiwanga.

Nkama u yaka u kambisisa swivutiso leswi landzelaka, swi ta yendla leswaku minawu ya Yehovha ya ku lulama yi ya yi tshama ka mimpimiso ya wena naswona swi ta tlhela swi ku khumbukisa swilo swin’wani leswi u nga swi yendlaka leswaku u va mutirheli wa Yehovha lweyi a mu tsakelaka. Rungula leli li ta tlhela li ku pfuna ku vona a lisima la ku yendla swilo hinkwaswu hi lipfalu la ku basa leswaku u dzunisa Yehovha. — 2 Ko. 1:12; 1 Tm. 1:19; 1 Pe. 3:16, 21.

Leswi se u nga djondza swa swinyingi u za u fika lani, ha tiyiseka swaku u swi lava hintamu ku va xikarhi ka nhlengeletanu ya Yehovha u tlhela u tama u tiveka hansi ka wuhosi la yena ni ku mu yingisa. A swivutiso leswi landzelaka ni tindzimana ta kona ta Bibele, swi ta ku pfuna ku twisisa swaku i mpsini leswi Yehovha a nyimelaka swaku mun’wani ni mun’wani wa hina a swi yendla abandleni, andjangwini ni ka mimfumu. A hi kanakani swaku u ta ya u ti tsakela tindlela leti Yehovha a ti tirhisaka swaku a hi djondzisa ni ku hi pfuna swaku hi va ni lipfumelo la ku tiya. Leswo swi patsa ku va kona mintlhanganwini u tlhela u hlamula ka yona hi ku ya hi swiyimu swa wena.

Handle ka leswo, swivutiso leswi landzelaka swi ta ku pfuna ku vona lisima la ku hlangamela hi xitalu ka ntirho wa ku chumayela nkama ni nkama u pfuna vanhu van’wani swaku va tiva Yehovha ni leswi a swi yendlelaka vanhu hinkwavu. (Mat. 24:14; 28:19, 20) Swivutiso leswi swi ta ku pfuna swaku u vona lisima la ku tinyiketela ka wena ni ku tsakamisiwa. U nga tiyiseka swaku Yehovha a swi nyika lisima hinkwaswu leswi u swi yendlaka swaku u kombisa ku khensa hi mhaka timpsalu tatikulu leti a nga ku komba tona.

1. Hi wini nawu wa Yehovha hi muchadu? Hi xihi xivangelo xin’we xa Matsalwa xa ku dlaya wukati?

• “A mi lerhanga swaku ku sukela ku sunguleni Xikwembu xi yendle wanuna ni wansati, se xi gama xi ku: ‘Hi mhaka leyo, wanuna a ta siya papayi wa yena ni mamani wa yena kutani a namarhela nsati wa yena, se havambirhi va ta va nyama yin’we’? Leswo swi vula swaku a va ha li vambirhi, kambe se i nyama yin’we. Hi mhaka leyo, leswi Xikwembu xi nga swi patsa xikan’we, swi nga tshuki swi hambanisiwa hi munhu. Lweyi a tshikaka nsati wa yena a gama a chada mun’wani, na ku nga li hi mhaka ya wuntunga la swa masangu, o mbuyeta.” — Mat. 19:4-6, 9.

2. Hi mhaka muni lava va tshamaka xikan’we tanihi nuna na nsati va fanele va chadile hi ku ya hi nawu? Loko i li swaku u chadile, ku nga va swaku muchadu wa wena wu tsalisiwile hi ku ya hi nawu naswona wa tiviwa hi mfumu?

• “Tama u va tsundzuxa swaku va tiveka hansi ni ku yingisa mimfumu ni tihosi.” — Tit. 3:1.

• “Wukati li fanele li hloniphiwa hi vanhu hinkwavu naswona a li fanelanga li chakisiwa, hikusa Xikwembu xi ta yavanyisa vanhu lava yendlaka wuntunga la swa masangu ni lava mbuyetaka.” — Heb. 13:4.

3. Hi wini ntirho wa wena andjangwini?

• “N’wananga, yingisa loko papayi wa wena a ku laya, U nga wu tshiki nawu wa mamani wa wena.” — Swiv. 1:8.

• “Wanuna i nhloko ya nsati wa yena ku fana ni leswi Kreste a nga nhloko ya bandla . . . vavanuna, tamani mi rhandza vasati va n’wina, ku fana ni leswi Kreste na yena a nga rhandza bandla.” — Efe. 5:23, 25.

• “N’wina vapapayi, mi nga hlupheni vana va n’wina kambe va kuliseni hi ku va laya ni ku va djondzisa minawu ya Yehovha.” — Efe. 6:4.

• “N’wina vana, yingisani vapsali va n’wina ka swilo hinkwaswu, hikusa leswi swi yi tsakisa swinene Hosi.” — Kol. 3:20.

• “N’wina vavasati, tivekeni hansi ka vanuna va n’wina.” — 1 Pe. 3:1.

4. Hi mhaka muni hi fanele hi li nyika lisima wutomi?

• “[Xikwembu] hi xona xi nyikaka vanhu hinkwavu wutomi, moya lowu va wu hefemulaka ni swilo hinkwaswu . . . hikusa hi xona xi hi nyikaka wutomi swaku hi hanya hi tlhela hi kota ku fambafamba.” — Min. 17:25, 28.

5. Hi mhaka muni hi nga fanelanga hi dlaya munhu ku patsa ni n’wana lweyi a kalaka a nge se psaliwa?

• “Loko vanhu vo tshuka va lwa va gama va vavisa wansati lweyi a nga ni nyimba se . . . ku fa munhu, wutomi li fanele li hakeliwa hi wutomi.” — Eks. 21:22, 23.

• “Matihlo ya wena ma ni vonile na ni nge se psaliwa; swirho swa mina hinkwaswu a swi tsaliwile ka buku la wena, hambi ni masiku lawa swi nga yendliwa hi wona, na ku nge se va ni xin’we xa swona.” — Ps. 139:16.

• “Yehovha [a nyenya] . . . lava dlayaka vanhu va ku kala va nga na nandzu.” — Swiv. 6:16, 17.

6. Hi wihi nawu wa Xikwembu mayelana ni ngati?

• “Fambela kule ni . . . ngati, [ni] swiharhi leswi nga dlayiwa hi ku tlimbiwa nkolo.” — Min. 15:29.

7. Hi mhaka muni hi fanele hi rhandza vamakwerhu va hina?

• “Ni mi nyika nawu wa nyuwani wa leswaku mi rhandzana; ku fana ni leswi na mina ni nga mi rhandza, na n’wina rhandzanani. Hinkwavu va ta tiva swaku mi vadjondzisiwa va mina loko mi rhandzana.” — Yoh. 13:34, 35.

8. Leswaku munhu a nga tluleti van’wani mavabyi lawa ma tlulelanaka kumbe lama dlayanaka: a) Hi mhaka muni munhu lweyi a nga ni mavabyi lawa ma tlulelanaka a nga fanelanga a barasara kumbe ku bejara vanhu van’wani? b) Hi mhaka muni a nga fanelanga a kwata loko va nga mu rhambi swaku a ya makaya ya vona? c) Hi mhaka muni swi li swa lisima akuva munhu lweyi swi nga yendleka a tshame a va ni mavabyi lama tlulelanaka a fanele a rhanga hi ku ya xibedlela a ya hamba xikambelo xa ngati na a nga se sungula ku namorara? d) Hi mhaka muni munhu lweyi a nga ni mavabyi lama tlulelanaka a fanele a byela mutlhanganisi wa ntlawa wa madoda na a nge se tsakamisiwa?

• “Mi nga devheni munhu nchumu, devhani ku rhandzana. . . . ‘U fanele u rhandza vanhu van’wani ku fana ni leswi u tirhandzisaka swona.’ Lweyi a nga ni lirhandzu a nga yendleli van’wani swa ku biha.” — Rom. 13:8-10.

• “Mi nga pimiseni hi leswi pfunaka n’wina ntsena, kambe pimiselani ni van’wani.” — Filp. 2:4.

9. Hi mhaka muni Yehovha a nyimela swaku hi rivalela vanhu van’wani?

• “Tamani mi lehiselana mbilu ni ku rivalelana hi ku chunseka hambiloko munhu a ni xa ku mu sola hi xona munhu mun’wani. Ku fana ni leswi Yehovha a nga mi rivalela hi ku chunseka, na n’wina mi fanele mi yendla swoleswo.” — Kol. 3:13.

10. U nga yendla yini loko makwerhu o tshuka a vulavula ku biha hi wena, kumbe a ku hembela swaku a ku kanganyisa male kumbe nchumu wun’wani wa lisima?

• “Se loko makwenu a ku djohela, famba u ya kombisana na yena ku hoxa ka yena, na mi li n’wina vambirhi ntsena; loko a ku yingisa, u ta va u pfune makwenu ku yendla swaswinene. Kambe loko a nga ku yingisi, famba ni munhu mun’we kumbe vambirhi, leswaku mhaka yin’wani ni yin’wani yi ta tiyisiwa hi vafakazi vambirhi kumbe vanharhu. Loko a nga va yingisi, byela bandla. Loko a yala ni ku yingisa bandla, mu voni ku fana ni munhu wa matiko ni muhakelisi wa rhesa.” — Mat. 18:15-17.

11. Yehovha a swi vonisa ku yini swidjoho leswi landzelaka?

▪ Wuntunga la swa masangu

▪ Ku gandzela swifaniso

▪ Ku famba masangu ka wanuna ni wanuna kumbe wansati ni wansati

▪ Ku yiva

▪ Ku joga swaku u ganya male

▪ Ku dakwa

• “Mi nga kanganyisiwi. Lava yendlaka wuntunga la swa masangu, lava gandzelaka swikwembu swa mavunhwa, lava mbuyetaka, vavanuna lava tiyendlaka vavasati ni vavanuna lava fambaka masangu ni vavanuna van’wani, vayivi, vanhu va makwanga, swidakwa, lava rhuketelaka ni vakanganyisi, a va nge dli tshomba la Mfumu wa Xikwembu.” — 1 Ko. 6:9, 10.

12. Wuntunga la swa masangu li patsa swilo swa ku hambanahambana swa masangu leswi yendliwaka hi wanuna ni wansati lava kalaka va nga chadanga. Hi mhaka leyo, u tinyimisele ku yendla yini?

• “Balekani wuntunga la swa masangu!” — 1 Ko. 6:18.

13. Hi mhaka muni hi nga fanelanga hi tirhisa swilo swa ku vhisiyarana swa ku fana ni masigari, timbangi kumbe swin’wani na hi nga byeliwanga hi dotori?

• “Mi nyikela muzimbha wa n’wina wu va gandzelo la ku hanya, la ku kwetsima li tlhela li yamukeleka ka Xikwembu. Hi ku yendla leswo mi ta va mi yendlela Xikwembu ntirho wa ku kwetsima hi mimpimiso ya n’wina hinkwayu. Tshikani ku tekelela mahanyelo ya misava leyi, tisoleni mi txintxa mapimiselo ya n’wina, leswaku mi ta tiyiseka swaku leswi Xikwembu xi lavaka swaku mi swi yendla i swinene, swa yamukeleka naswona swi hetisekile.” — Rom. 12:1, 2.

14. Hi swihi swiyendlo swin’wani swa wudimoni leswi Yehovha a swi nyenyaka?

• “Xikarhi ka wena ku nga tshuki ku kumiwa munhu . . . lweyi a hlahluvaka, lweyi a yendlaka masalamusi, lweyi a vhumbaka, muloyi, lweyi a loyaka van’wani, lweyi a vutisaka mungoma kumbe lweyi a vhumbaka kumbe lweyi a vutisaka lava va nga fa.” — Det. 18:10, 11.

15. Loko munhu a yendla xidjoho xaxikulu naswona a lava ku rivaleliwa hi Yehovha, i yini leswi a faneleke a swi yendla hi xihantla?

• “Ni ku byele xidjoho xa mina; a ni xi fihlanga. Ni te: ‘Ni ta byela Yehovha swidjoho swa mina.’” — Ps. 32:5.

• “Ku ni lweyi a vabyaka xikarhi ka n’wina? A a vitani madoda ya bandla leswaku ma ta mu khongelela, ma mu tota mafurha hi vito la Yehovha. Kutani xikhongelo xa ku yendliwa hi lipfumelo xi ta daha lweyi a vabyaka naswona Yehovha a ta mu hanyisa. Loko a yo djoha, a ta rivaleliwa swidjoho swa yena.” — Yak. 5:14, 15.

16. Loko u tiva swaku makwerhu a yendle xidjoho xaxikulu i yini leswi u faneleke u swi yendla?

• “Loko munhu o tshuka a swi vona kumbe a twa swaku mun’wani a yendle xidjoho kutani a twa na ku vuliwa swaku ku fanele ku fakaziwa mhaka ya kona, kambe a nga hlayi nchumu, a ta va ni nandzu naswona a ta tihlamulela hi mhaka ya xihoxo xa yena.” —  Lev. 5:1.

17. Loko ku tivisiwa swaku ximanyamanyani a nga ha li Mboni ya Yehovha hi fanele hi mu vonisa ku yini?

• “Tshika ku titlhanganisa ni munhu lweyi a vitaniwaka makwerhu kuve a yendla wuntunga la swa masangu, a ni makwanga, a gandzela swikwembu swa mavunhwa, wa rhuketela, i xidakwa kumbe i muyivi. Hambi ku dla mi nga dli na yena munhu yelweyo.” — 1 Ko. 5:11.

• “Loko mi teliwa hi munhu lweyi a djondzisaka swa ku hambana ni leswi, mi nga mu yamukeli kaya ka n’wina naswona mi nga mu xoweti.” — 2 Yo. 10.

18. Hi mhaka muni lava u va langaka swaku va va vanghanu va wena va fanele va rhandza Yehovha?

• “Lweyi a fambaka ni va ku tlhariha a ta tlhariha, kambe lweyi a tirhisanaka ni swiphunta a swi nga ta mu fambela kahle.” — Swiv. 13:20.

• “Mi nga kanganyisiwi. Vanghanu va ku biha va wonha mintirho yayinene.” — 1 Ko. 15:33.

19. Hi mhaka muni Timboni ta Yehovha ti nga tingheniseli ka swa politika?

• “A hi va misava, ku fana na mina [Yesu] ni kalaka ni nga li wa misava.” — Yoh. 17:16.

20. Hi mhaka muni hi fanele hi yingisa mimfumu?

• “Munhu mun’wani ni mun’wani a fanele a yingisa lava fumaka, hikusa a nga kona lweyi a nga fumaka na a nga pfumeleliwanga hi Xikwembu. Tihosi leti nga kona ti vekiwe hi Xikwembu ka switshamu swa tona leswi nga pimiwa.” — Rom. 13:1.

21. Loko nawu wa mfumu wu lwisana ni nawu wa Xikwembu i yini leswi u faneleke u swi yendla?

• “Hi fanele hi yingisa Xikwembu lexi nga Hosi ku tlula vanhu.” — Min. 5:29.

22. Loko u lava ntirho, hi tihi tindzimana ta Bibele leti nga ku pfunaka swaku u tihambanisa ni misava?

• “Tiko a li nge he lwi ni tiko lin’wani, naswona a va nge he djondzeli ku lwa nyimpi.” — Mik. 4:3.

• “Humani ka yena [Babilona Wamukulu], n’wina vanhu va mina, loko mi nga lavi ku tipatsa ka swidjoho swa yena ni loko mi nga lavi ku weliwa hi man’wani ya makhombo lama nga ta mu wela.” — Nhl. 18:4.

23. Hi swihi swilo leswi u nga hungataka hi swona naswona hi swihi leswi u nga fambelaka kule na swona?

• “Yehovha . . . a nyenya mun’wani ni mun’wani lweyi a rhandzaka ku lwa.” — Ps. 11:5.

• “Nyenyani swa ku biha, mi namarhela swaswinene.” — Rom. 12:9.

• “Swilo hinkwaswu leswi nga ntiyiso, swilo hinkwaswu leswi nga swa lisima, swilo hinkwaswu swa ku lulama, swilo hinkwaswu leswi nga tenga, swilo hinkwaswu swa ku rhandzeka, swilo hinkwaswu leswi ku vulavuliwaka kahle hi swona, swilo hinkwaswu leswi nga swinene ni swilo hinkwaswu leswi dzunekaka, tamani mi pimisa hi swona.” — Filp. 4:8.

24. Hi mhaka muni Timboni ta Yehovha ti nga gandzeli Xikwembu ni wukhongeli lin’wani?

• “A mi nge swi koti ku dla ka ‘meza wa Yehovha’ ni ka meza wa madimoni.” — 1 Ko. 10:21.

• “‘Mi tihambanisa na vona,’ ku vula Yehovha, ‘naswona tshikani ku khumba nchumu lowu kalaka wu nga basanga’; ‘kutani ni ta mi yamukela.’” — 2 Ko. 6:17.

25. Hi tihi tindzimana ta Bibele leti nga ku pfunaka ku vona swaku u nga ma tlangela masiku ya ku karhi lawa vanhu van’wani va ma tlangelaka kumbe u nge ma tlangeli?

• “Kambe va tshame ni vanhu va matiko va gama va tekelela mahanyelo ya vona. A va tshamela ku gandzela swifaniso swa vona, se swi va ntlhamu ka vona.” — Ps. 106:35, 36.

• “Lava nga fa a va tivi nchumu.” — Ekl. 9:5.

• “A hi va misava, ku fana na mina ni kalaka ni nga li wa misava.” — Yoh. 17:16.

• “Hikusa wa xega nkama lowu a mi hanyela ku yendla ku rhandza ka matiko, ku nga mahanyelo ya tingana, ku navela ku yendla swa ku biha, ku dakwa, mafexta ya mpfilumpfilu, ku phikizana hi ku phuza byala ni ku gandzela swifaniso.” — 1 Pe. 4:3.

26. Hi swihi swikombiso swa Bibele leswi nga ku pfunaka ku yendla xiboho loko swi ta ka mhaka ya ku tlangela siku la ku psaliwa ka munhu?

• “Hi siku la wunharhu, a ku li siku la ku psaliwa ka Faru; naswona a yendlele vatirhi va yena fexta. A humese murhangeli wa vacheli va vhinyu ni murhangeli wa vahambi va mapawu a va tisa phambheni ka vatirhi va yena lavan’wani. Se a tlhelisa mucheli wa vhinyu ka ntirho wa yena swaku a tama a mu chelela vhinyu . . . kambe a hayeke murhangeli wa vahambi va mapawu.” — Gen. 40:20-22.

• “Kambe siku leli a ku kulungeliwa ku psaliwa ka Heroda, n’wana wa xisati wa Herodiya a txinile ka fexta lolelo, se Heroda a tsaka hintamu a za a funga swaku a ta mu nyika xin’wani ni xin’wani lexi a nga ta xi kombela. Kutani hi ku xengeteliwa hi mamani wa yena, a ku: ‘Ni nyiki nhloko ya Yohani Mutsakamisi na yi li ka bandecha.’ Se yi rhuma vanhu swaku va ya tsema nhloko ya Yohani adjele.” — Mat. 14:6-8, 10.

27. Hi mhaka muni u lava ku yingisa nkongomiso lowu taka hi ka madoda?

• “Yingisani lava rhangelaka xikarhi ka n’wina mi tlhela mi tiveka hansi, hikusa va mi hlayisa hileswi va nga ta tihlamulela, leswaku va nga yendli leswo na va karhatekile kambe na va tsakile, hikusa leswo swi nga mi vavisa.” — Heb. 13:17.

28. Hi mhaka muni swi li swa lisima kuva wena ni ndjangu wa wena mi tivekela nkama wa ku lerha ni ku djondza Bibele nkama ni nkama?

• “A rhandza nawu wa Yehovha, naswona a lerha nawu wa Yena hi rito la le hansi wusiku ni nhlikanhi. A ta fana ni nsinya lowu nga byaliwa tlhelweni ka nambu wa mati, lowu psalaka mihandzu hi nkama wa kona, lowu matluka ya wona ma kalaka ma nga vuni. Naswona hinkwaswu leswi a swi yendlaka swi ta humelela.” — Ps. 1:2, 3.

29. Hi mhaka muni u swi rhandza ku va kona mintlhanganwini ni ku tlhela u hlamula ka yona?

• “Ni ta vula vito la wena ka vamakwerhu; ni ta ku dzunisa xikarhi ka nhlengeletanu.” — Ps. 22:22.

• “A hi hlayisaneni leswaku hi tiyisana, hi rhandzana hi tlhela hi yendla mintirho yayinene, hi nga tshikeni ku tlhangana ku fana ni leswi van’wani va yendlisaka xiswona kambe hi tiyisana naswona hi yendla leswo ngopfungopfu leswi mi vonaka leswaku siku li le kusuhi.” — Heb. 10:24, 25.

30. Hi wini ntirho wa lisima lowu Yesu a nga hi nyika wona?

• “Hi mhaka leyo, fambani mi ya djondzisa vanhu va matiko hinkwawu leswaku va va vadjondzisiwa va mina, mi va tsakamisa . . . mi va djondzisa ku yingisa hinkwaswu leswi ni nga mi byela swona.” — Mat. 28:19, 20.

31. Leswaku minyikelo ya hina yi tsakisa Yehovha, i yini lexi faneleke xi hi susumetela ku yi humesa?

• “Hlonipha Yehovha hi minchumu ya wena ya lisima.” — Swiv. 3:9.

• “Mun’wani ni mun’wani a a nyikeli hi ku ya hi leswi a nga swi boha ka mbilu ya yena, na a nga nguranguri kumbe hi ku sindzisiwa, hikusa Xikwembu xi rhandza munhu lweyi a nyikaka na a tsakile.” — 2 Ko. 9:7.

32. Hi swini swikarhatu leswi Vakreste va nyimeleke ku kumana na swona?

• “Va tsaka lava hluphiwaka hi mhaka ya swa ku lulama, hikusa Mfumu wa matilo i wa vona. Tsakani loko vanhu va mi rhuketela, va mi hlupha va tlhela va mi hembela hi swilo hinkwaswu swa ku biha hi mhaka ya mina. Tsakani hintamu hikusa hakelo ya n’wina i yikulu matilweni; phela hambi vaprofeta lava nga hanya na mi nge se va kona, na vona va hluphisiwe swoleswo.” — Mat. 5:10-12.

33. Hi mhaka muni ku li nkateko kuva u tsakamisiwa swaku u va Mboni ya Yehovha?

• “Ni kume marito ya wena, se ni ma dla; Rito la wena li yendle mbilu ya mina yi tsaka ngopfu, hikusa ni vitaniwe hi vito la wena, Yehovha murhangeli wa tintsumi.” — Yer. 15:16.

Hi ntolovelo vanhu va tsakamisiwa masembleya ni makongresu ya Timboni ta Yehovha. Loko se ku helile dixkursu la ntsakamiso, lweyi a vekaka dixkursu a ta kombela lava yaka ku tsakamisiweni swaku va sekeleka va hlamula swivutiso leswi swa swimbirhi hi rito la ku tlakuka:

1. U tisolile ka swidjoho swa wena, u tlhela u tinyiketela ka Yehovha ni ku pfumela ndlela ya yena ya ku ponisa hi Yesu Kreste?

2. Wa swi twisisa leswaku ku tinyiketela ni ku tsakamisiwa ka wena swi ku yendla Mboni ya Yehovha ni ku lumba nhlengeletanu ya yena?

Loko va hlamula va ku “ina” va ‘swi vula hi nomo wa vona lomu ka vanhu’ swaku va ni lipfumelo ka nkutsulu ni swaku va nyiketele wutomi la vona ka Yehovha. (Rom. 10:9, 10) I swa lisima swaku va pimisa kahle hi swivutiso leswi va tlhela va khongela mayelana na swona na ka ha li nkama, leswaku va ta kota ku hlamula na va tiyiseka ka leswi va swi kholwaka.

U tinyiketelile ka Yehovha hi xikhongelo, u mu tshembisa leswaku u ta tirhela yena ntsena ni ku rhangisa ku yendla ku rhandza ka yena ka wutomi la wena?

Wa tiyiseka leswaku u lunghekile leswaku u tsakamisiwa?

Hi yini mpahla leyi fanelekaka leyi u faneleke u yi yambala loko u tsakamisiwa? (1 Tm. 2:9, 10; Yoh. 15:19; Filp. 1:10)

Hi fanele hi yambala mpahla ‘ya ku hlonipheka’ ni leyi kombisaka leswaku ‘hi ni mimpimiso yayinene’ leswaku hi kombisa leswaku ‘hi tinyiketelile ka Xikwembu.’ Se hinkwavu lava yaka ku tsakamisiweni a va fanelanga va yambala mpahla ya ku hlambela hi yona, ya ku vonekela kumbe leyi siyaka muzimbha handle, kumbe mpahla leyi nga tsaleteliwa kumbe leyi nga ni madezenyu. Va fanele va yambala mpahla ya ku hlonipheka, ya ku basa leyi fambisanaka ni xiyendlakalu lexi xa lisima.

I mpsini leswi munhu a kalaka a nga fanelanga a swi yendla loko a tsakamisiwa? (Luk. 3:21, 22)

Ntsakamiso wa Yesu wu tirha tanihi xikombiso ka ntsakamiso wa Vakreste namuntlha. Yena a a swi twisisa swaku ntsakamiso i xiyenge xa lisima hintamu. A swi kombisile hi leswi a a swi pimisa ni leswi a a swi yendla. Hi mhaka leyo, ndhawu ya ntsakamiso a yi fanelanga yi tirhiseliwa ku hlambeta kumbe ku tlangela kona, leswi a swi ta kombisa swaku a hi xi hloniphi xiyendlakalu lexi xa lisima. A swi nga ta va swi li swinene kuva loko munhu se a tsakamisiwile a sungula ku txinatxina kumbe ku tlulatlula hi ku tsaka kumbe swilo swin’wani. Hambileswi ku tsakamisiwa ku nga xiyendlakalu xa ku tsaka, hi fanele hi tsaka hi ndlela leyi fanelekaka.

Ku tlhangana ni vamakwerhu abandleni swi ta ku pfunisa ku yini ku tama u hanya hi ku landza ku tinyiketela ka wena ka Yehovha?

Loko se u tsakamisiwile, hi mhaka muni swi li swa lisima ku tama u va ni xiyimisu xa djondzo ya wena ya Bibele ni ku hlanganyela nkama ni nkama ka ntirho wa ku chumayela?