Papila Leli Taka hi ka Ntlawa Lowu Rhangelaka

‘Mifanele kuva vadjondzisi’. (Hev. 5:12) Yanakanya hi leswi: Yehovha — Mudjondzisi Lwenkulu kutlula swivumbiwa hinkwaswo ka wuyaku hinkwalo ahi rhamba leswaku hi djondzisa vanhu hi yena! Xiyavelo xin’wana ni xin’wana xodjondzisa ntiyiso hi Yehovha — kungaha va andjangwini, abandleni, kumbe ka ntirho wochumayela — i lunghelo ni wutihlamuleli leli kulu swinene. Xana unga yendla yini leswaku u humelela?

A nhlamulo yi kumeka ka marito lawa mupostola Pawulo ama tsaleleke Timotiya lamange: ‘Tinyiketeli kuhlayela vanhu Matsalwa, ukhongotela ni kudjondzisa’. Pawulo a yengetele a ku: ‘Loko uyendlisa leswo, utatiponisa ni kuponisa vayingiseli va wena.’ (1 Tim. 4:13, 16) A wutomi la vanhu votala li le mavokweni ya wena, kutani u fanele u twalisa rungula la Yehovha. Hikolaho i swa lisima kuva uti karhatela kuyampsisa ndlela leyi u lerhaka ni kudjondzisa hi yona. A broxura leli li yendliwe hi xikongomelo xa kukupfuna kuva u yendla tanu. Vona swikombiso.

Kutshahiwe ndzimana ka tluka lin’wana ni lin’wana leyinga tshinya la nawu li yelanaka ni mhaka ya djondzo kumbe xikombiso xa ndlela leyi mhaka ya djondzo yinga tirhisiwaka hi yona

Yehovha i “Mudjondzisi Lwenkulu”. (Esa. 30:20) Leswi broxura leli lingataku pfuna kuva u lota wutshila leli unga na lona tani hi mulerhi ni mudjondzisi, unga tshuki u khohlwa leswaku i Yehovha lweyi a kokelaka vanhu ka yena naswona yena i xihlovo xa rungula leli u li twalisaka. (Yoh. 6:44) Hikolaho, khongelela moya wokwetsima minkama hinkwayo. Tirhisa Rito la Xikwembu minkama hinkwayo. Kongomisa yingiso wa vayingiseli va wena ka Yehovha, kunga li ka wena n’winyi. Tikarhateli kuva pfuna leswaku va rhandza Yehovha hi mbilu ya vona hinkwayo.

U rhambiwe leswaku u djondzisa rungula la lisima swinene ka vanhu, lelinga fanisiwiki ni nchumu hambi wuli wihi. Ha tiyiseka leswaku loko uti seketela ‘hi matimba lawa Xikwembu xikunyikaka wona’, hakunene uta humelela. — 1 Pet. 4:11.

Vadjondzisi kuloni,

Ntlawa Lowu Rhangelaka wa Timboni ta Yehovha