-
I Yini Mfumu Wa Xikwembu?Tikhorisi Hi Wutomi La Ku Kala Li Nga Heli — Djondzo Ya Bibele
-
-
DJONDZO 31
I Yini Mfumu Wa Xikwembu?
A mhaka ya yikulu leyi Bibele yi vulavulaka hi yona i Mfumu wa Xikwembu. Yehovha a ta tirhisa wona swaku a yentxa misava yi va paradesi. Kasi i yini Mfumu wa Xikwembu? Hi swi tivisa ku yini swaku se wu sungule ku fuma? I mpsini leswi Mfumu lowu se wu nga swi yentxa? Naswona i yini leswi Mfumu lowu wu nga ta swi yentxa ka nkama lowu taka? Djondzo leyi ni tidjondzo timbirhi leti landzelaka ti ta hlamula swivutiso leswi.
1. I yini Mfumu wa Xikwembu naswona i mani Hosi ya wona?
Mfumu wa Xikwembu i wuhosi leli nga vekiwa hi Yehovha atilweni. A Hosi ya wona i Yesu Kreste, naswona se wa fuma atilweni. (Matewu 4:17; Yohani 18:36) Bibele li hi byela swaku Yesu “a tava Hosi . . . hi masiku ni masiku.” (Luka 1:32, 33) Tani hi Hosi ya Mfumu wa Xikwembu, Yesu a ta fuma vanhu hinkwavu amisaveni.
2. I vamani va nga ta fuma na Yesu?
Yesu a nga ta fuma yexe. Bibele li hi byela swaku vanhu va ‘tinxaka hinkwatu, tirimi hinkwatu, vanhu hinkwavu ni matiko hinkwawu . . . va ta fuma misava na yena.’ (Nhlawutelo 5:9, 10) I vanhu vangaki va nga ta fuma na Kreste? Ku sukela nkama lowu Yesu a nga ta lani misaveni, vanhu va ku tala va ve Vakreste. Kambe leswo swi vula leswaku Vakreste hinkwavu va ta fuma na yena? A swi vuli swona. Ntsena lava va 144.000 hi vona va nga ta fuma na Yesu atilweni. (Lerha Nhlawutelo 14:1-4.) Vakreste hinkwavu, va ta va vanhu va Xikwembu lani misaveni. — Tipisalema 37:29.
3. Hi mhaka muni Mfumu wa Xikwembu wu li wunene ku tlula mimfumu ya vanhu?
Hambiloko mimfumu ya vanhu yi zama ku yentxa swilo swa swinene, a yi na matimba ya ku yentxa hinkwaswu leswi yi swi lavaka. Naswona hi ku famba ka nkama yi gama yi txintxiwa hi yin’wana, leyi minkama yin’wana yi kalaka yi nga swi lavi ku yentxela vanhu swilo swa swinene. Kambe Yesu, Hosi ya Mfumu wa Xikwembu, a nga ta tshuka a txintxiwile a pfaletiwa hi mun’wana. Xikwembu ‘xi veke mfumu lowu nga ta kala wu nga helisiwi.’ (Daniyele 2:44) Yesu a ta fuma misava hinkwayu naswona a nga ta va ni xikheto a ta va khoma kahle vanhu hinkwavu. Yena a ni lirhandzu, a ni wunene naswona a lulamile. A ta tlhela a djondzisa vanhu leswaku va hanyisana hi ndlela leyi fanaka, va kombisana lirhandzu, wunene ni wululami. — Lerha Esaya 11:9.
DJONDZA SWIN’WANA
Vona swaku hi mhaka muni Mfumu wa Xikwembu wu li wunene ku tlula mimfumu ya vanhu.
4. Mfumu wa Xikwembu wu ta fuma misava hinkwayu
Matimba lawa Yesu a nga na wona ya ku fuma, ma tlula ya tihosi hinkwatu leti nga tshama ti va kona. Lerhani Matewu 28:18, mi gama mi bula hi xivutiso lexi landzelaka:
Hi kwini ku hambana ka matimba lawa Yesu a nga na wona ya ku fuma ni lawa mimfumu ya vanhu yi nga na wona?
Mimfumu ya vanhu ya txintxa nkama ni nkama, naswona wun’wana ni wun’wana wo fuma tlhelo lin’we la misava. Se hi nga ku yini hi Mfumu wa Xikwembu? Lerhani Daniyele 7:14, mi gama mi bula hi swivutiso leswi landzelaka:
Hi mhaka muni swi tsakisa ku tiva leswaku Mfumu wa Xikwembu ‘a wu nga ta helisiwa’?
Hi mhaka muni swi tsakisa ku tiva leswaku Mfumu wa Xikwembu wu ta fuma misava hinkwayu?
5. Mimfumu ya vanhu yi fanele yi txintxiwa
Hi mhaka muni ku laveka swaku Mfumu wa Xikwembu wu helisa mimfumu ya vanhu se ku fuma wona ntsena? Sixtirani VHIDIYO, mi gama mi bula hi swivutiso leswi landzelaka.
I yini leswi yentxekaka hi mhaka leswi ku fumaka mimfumu ya vanhu?
Lerhani Eklesiasta 8:9, mi gama mi bula hi xivutiso lexi landzelaka:
U pimisa leswaku Mfumu wa Xikwembu wu fanele wu helisa mimfumu ya vanhu leswaku wona wu fuma? Hi mhaka muni u pimisa leswo?
6. Mfumu wa Xikwembu wu ni vafumi lava va hi twisisaka
Hosi ya hina Yesu, a tile a ta hanya lani misaveni tani hi munhu. Hi mhaka leyo, a nga “hi twela wusiwana ka ku tsana ka hina.” (Vaheberu 4:15) Handle ka leswo, Yehovha a lange 144.000 wa vavanuna ni vavasati va ku tshembeka leswaku va ta fuma na Yesu, ku nga vanhu va “tinxaka hinkwatu, tirimi hinkwatu, vanhu hinkwavu ni matiko hinkwawu.” — Nhlawutelo 5:9.
U titwisa ku yini hi ku tiva leswaku Yesu ni lava a nga ta fuma na vona va swi twisisa swikarhatu leswi hi kumanaka na swona? Hi mhaka muni u titwisa xileswo?
Yehovha a lange vavanuna ni vavasati va tinxaka hinkwatu leswaku va ta fuma na Yesu
7. Minawu ya Mfumu wa Xikwembu ya yampsa ku tlula ya vanhu
A mimfumu yi veka minawu leswaku yi pfuna ni ku vhikela xitshungu. Mfumu wa Xikwembu na wona wu ni minawu. Lerhani 1 Vakorinto 6:9-11, mi gama mi bula hi swivutiso leswi landzelaka:
U vona swaku misava a yi ta tshamisa ku yini loko vanhu hinkwavu a vo yingisa minawu ya Xikwembu?a
U vona swaku Yehovha a ni mfanelo ya ku lava swaku vanhu hinkwavu va yingisa minawu ya Mfumu wa Yena? Hi mhaka muni u swi vonisa xileswo?
I yini lexi kombisaka swaku vanhu lava kalaka va nga yingisi minawu leyi va nga txintxa? — Vona ndzimana 11.
A mimfumu yi veka minawu leswaku yi vhikela ni ku pfuna vanhu. Na wona Mfumu wa Xikwembu wu ni minawu leyi xona xi nga yi veka swaku yi pfuna ni ku vhikela vanhu. Kambe minawu leyi, yi yampsa hintamu ku tlula leyi vekiwaka hi vanhu.
VANHU VAN’WANA VA NGA KU VUTISA VA KU: “I yini Mfumu wa Xikwembu?”
A wu ta hlamulisa ku yini?
LESWI HI NGA SWI DJONDZA
Mfumu wa Xikwembu i Mfumu lowu nga tilweni naswona wu ta fuma misava hinkwayu.
Ku kambela leswi hi nga swi djondza
I vamani lava nga ta fuma ka Mfumu wa Xikwembu?
Hi mhaka muni Mfumu wa Xikwembu wu li wunene ku tlula mimfumu hinkwayu ya vanhu?
I yini leswi Yehovha a lavaka leswaku vanhu va swi yentxa leswaku va kota ku va ka Mfumu lowu?
LOKO U LAVA KU TIVA SWIN’WANA
Vona leswaku Yesu a djondzise swaku Mfumu wa Xikwembu wu kumeka kwini.
Hi mhaka muni Timboni ta Yehovha ti vona swaku i swa lisima ku tshembeka ka Mfumu wa Xikwembu ku tlula ku tshembeka ka mimfumu ya vanhu?
Vona leswi Bibele li swi vulaka hi lava va 144.000 lava Yehovha a nga va langa leswaku va ta fuma na Yesu.
“I Vamani Lava Yaka eTilweni?” (Nhlokomhaka leyi nga ka site la jw.org hi Xitsonga)
I yini lexi nga kholwisa wansanti lweyi a a li djele leswaku ko va Mfumu wa Xikwembu ntsena lowu nga tisaka wululami misaveni?
“A minha procura por um mundo sem injustiça” (Khindlimuka! wa Novembro wa 2011 hi Xiputukezi)
a Hi ta vona yin’wana ya minawu leyi ka Xiyenge xa wunharhu xa buku leli.
-
-
Mfumu Wa Xikwembu Se Wa Fuma!Tikhorisi Hi Wutomi La Ku Kala Li Nga Heli — Djondzo Ya Bibele
-
-
DJONDZO 32
Mfumu Wa Xikwembu Se Wa Fuma!
Mfumu wa Xikwembu wu sungule ku fuma tilweni hi 1914. Ku ve hi nkama wolowo ku nga sungula masiku ya wugamu ya mimfumu ya vanhu. Hi swi tivisa ku yini leswo? A hi voneni leswi Bibele se a li swi profetile hi mhaka leyi, ni leswi xiyimu xa misava xi nga tshamisa xiswona ku sukela hi 1914.
1. I mpsini leswi Bibele a li swi profetile?
Buku la Daniyele li hi pfuna ku twisisa swaku Mfumu wa Xikwembu a wu ta sungula ku fuma a ku heleni ka “7 wa minkama.” (Daniyele 4:16, 17) Loko se ku hundze malembe ya manyingi, Yesu a yi vitane “nkama lowu nga vekiwa wa matiko,” naswona a djondzise leswaku a wu nga se hela. (Luka 21:24) Minkama leyi ya 7 yi hele hi 1914.
2. I mpsini leswi yentxekaka amisaveni ku sukela hi 1914?
Vadjondzisiwa va Yesu va mu vutise va ku: “Swi ta yentxeka siku muni swilo leswi naswona xi ta va xihi xikombiso xa nkama wa ku vuya ka wena ni xa ku hela ka misava?” (Matewu 24:3) Ka nhlamulu ya yena, Yesu a vulavule hi swilo swa ku tala leswi a swi ta humelela loko a sungula ku fuma atilweni tani hi Hosi. Swin’wana swa swona a ku ta va tinyimpi, ku pfumaleka ka swakudla, ni ku tsekatseka ka misava. (Lerha Matewu 24:7.) Bibele li profete swaku matshamelo ya vanhu va “masiku ya wugamu” a ma ta yentxa swaku wutomi li “karhata”. (2 Timotiyu 3:1-5) Mahanyelo lawa ya vanhu ni swilo leswi swa ku biha, swi ye swi tinyika matimba ku sukela hi 1914.
3. Hi mhaka muni swilo swa ku biha swi ye swi tinyika matimba ku sukela loko Mfumu wa Xikwembu wu sungule ku fuma?
Loko Yesu a ha ku vekiwa swaku a va Hosi ya Mfumu wa Xikwembu, a lwe na Sathana ni madimoni ya yena amatilweni. Sathana a hluliwile. Bibele li vula leswaku ‘a txukumetiwe hansi misaveni yena ni tintsumi ta yena.’ (Nhlawutelo 12:9, 10, 12) Sathana a kwate hintamu hikusa wa swi tiva swaku a ta helisiwa a nga ha li kona. Hi mhaka leyo, a yentxa swaku ku va ni ku hlupheka ni ku karhateka amisaveni hinkwayu. Se a swi hlamalisi kuva lani misaveni ku tale hi wubihi hi ndlela leyi, kambe Mfumu wa Xikwembu wu ta swi helisa swikarhatu leswi hinkwaswu.
DJONDZA SWIN’WANA
Kambisisa swaku hi swi tivisa ku yini swaku Mfumu wa Xikwembu wu sungule ku fuma hi 1914, u tlhela u vona swaku leswo swi hi pfuna ku va hi yentxa yini.
4. Wuprofeta la Bibele li kombetela ka 1914
Xikwembu xi yentxe swaku Hosi Nebukadnetsara, lweyi a a li hosi ya Babilona a va ni norho. Ka norho wa kona, Yehovha a kombise leswi a swi ta yentxeka ka nkama lowu taka. Daniyele a tlhamusele leswi norho lowu a wu vula swona. Phela norho lowu, a wu tirha ka mfumu wa Nebukadnetsara ni ka Mfumu wa Xikwembu. — Lerhani Daniyele 4:17.a
Lerhani Daniyele 4:20-26, mi gama mi tirhisa kwadru leli nga ka pajina 133 swaku mi hlamula swivutiso leswi landzelaka:
(A) Nebukadnetsara a vone yini ka norho wa yena? — Vona tindzimana 20 na 21.
(B) A ku ta yentxeka yini hi nsinya? — Vona ndzimana 23.
(C) A ku ta yentxeka yini loko yi hela “7 wa minkama”? — Vona ndzimana 26.
A Norho Wa Nsinya Wu Fambisana Ndjhani Ni Mfumu Wa Xikwembu
WUPROFETA (Daniyele 4:20-36)
Mfumu
(A) Nsinya wa wukulu
A wu ta nyima ku fuma
(B) “Tsemani nsinya,” ku fikela “loko ku hundze 7 wa minkama”
A wu ta tlhela wu fuma
(C) “Mfumu wu ta tlhela wu va wa wena”
Nkama wuprofeta li nga hetiseka hi khambi la ku sungula . . .
(D) A nsinya a wu nyimela mani? — Vona ndzimana 22.
(E) A nyime ku fuma hi nkama muni? — Lerhani Daniyele 4:29-33.
(F) I mpsini swi nga humelela Nebukadnetsara loko se ku hundze “7 wa minkama”? — Lerhani Daniyele 4:34-36.
KU HETISEKA KA KU SUNGULA KA WUPROFETA
Mfumu
(D) Nebukadnetsara, Hosi ya Babilona
A wu ta nyima ku fuma
(E) Loko se ku hundze lembe la 606 na Yesu a nga se ta misaveni, Nebukadnetsara a sungule ku hlanya naswona a nga swi kotanga ku fuma ku ringana 7 wa malembe
A wu ta tlhela wu fuma
(F) Nebukadnetsara a va kahle a tlhela a sungula ku fuma
Nkama wuprofeta li nga hetiseka ka khambi la wumbirhi . . .
(G) A nsinya a wu nyimela mani? — Lerhani 1 Tikronika 29:23.
(H) Va nyime ku fuma hi nkama muni? Hi swi tivisa ku yini swaku a va nga se sungula ku fuma hambi hi nkama lowu Yesu a a li lani misaveni? — Lerhani Luka 21:24.
(I) Mfumu lowu wu tlhele wu sungula ku fuma kwini naswona hi nkama muni?
KU HETISEKA KA WUMBIRHI KA WUPROFETA
Mfumu
(G) Tihosi ta Israyele leti a ti nyimela Mfumu wa Xikwembu
A wu ta nyima ku fuma
(H) Yerusalema a lovisiwa, tihosi ta Israyele ti nyima ku fuma ku ringana 2.520 wa malembe
A wu ta tlhela wu fuma
(I) Yesu a sungula ku fuma atilweni tani hi Hosi ya Mfumu wa Xikwembu
I malembe mangaki ma nga hela ka 7 wa minkama?
Ku ni tindzimana tin‘wana ta Bibele ti hi pfunaka ku twisisa xiyenge xin’wana xa nkama lowu. Hi xikombiso, a buku la Nhlawutelo li hi byela swaku a 3 wa minkama ni hafu yi ringana ni 1.260 wa masiku. (Nhlawutelo 12:6, 14) Se loko hi yi phinda kambirhi minkama leyi yi ringana 7 wa minkama, ku nga 2.520 wa masiku. Minkama yin’wana loko Bibele li vulavula hi siku lin’we li va li vulavula hi lembe lin’we. (Ezekiyele 4:6) Leswi hi leswi nga yentxeka ka 7 wa minkama leyi thlamuseliwaka ka buku la Daniyele. Yona yi nyimela 2.520 wa malembe.
5. Misava yi txintxe ngopfu ku sukela hi 1914
Yesu a profete leswaku misava a yi ta tshamisa ku yini loko a sungula ku fuma tani hi Hosi. Lerhani Luka 21:9-11, mi gama mi bula hi xivutiso lexi landzelaka:
Ka swilo leswi hinkwaswu, hi swini leswi u swi vonaka swi yentxeka namuntlha?
Mupostolo Pawulo a tlhamusele leswi vanhu a va ta tshamisa xiswona ka masiku ya wugamu ya ku fuma ka vanhu. Lerhani 2 Timotiyu 3:1-5, mi gama mi bula hi xivutiso lexi landzelaka:
U pimisa swaku vanhu va swi yentxa leswi ka masiku ya hina?
6. Hi lava ku seketela Mfumu wa Xikwembu
Lerhani Matewu 24:3, 14, mi gama mi bula hi swivutiso leswi landzelaka:
Hi wini ntirho wa lisima lowu kombisaka leswaku Mfumu wa Xikwembu se wa fuma?
I yini leswi wena u nga swi yentxaka leswaku u va ka ntirho lowu?
Mfumu wa Xikwembu se wa fuma. Naswona siku la leswaku wu fuma misava hinkwayu se li kusuhi. Lerhani Vaheberu 10:24, 25, mi gama mi bula hi xivutiso lexi landzelaka:
Leswi siku leli se li nga kusuhi, i mpsini leswi mun’wana ni mun’wana wa hina a faneleke a swi yentxa?
Loko a wo tiva nchumu lowu a wu ta pfuna ni ku tlhela wu ponisa van’wana, a wu ta yentxa yini?
VANHU VAN’WANA VA NGA KU VUTISA VA KU: “Hi mhaka muni lembe la 1914 li li la lisima ka Timboni ta Yehovha?”
A wu ta hlamulisa ku yini?
LESWI HI NGA SWI DJONDZA
Wuprofeta la Bibele ni leswi yentxekaka misaveni, swi tiyisekisa leswaku Mfumu wa Xikwembu se wa fuma. Loko hi chumayela ni ku va kona mintlhanganwini hi kombisa leswaku ha swi tshemba leswo.
Ku kambela leswi hi nga swi djondza
A buku la Daniyele li vulavula hi 7 wa minkama, ku yentxeke yini a ku heleni ka yona?
I ntxini lexi ku kholwisaka swaku Mfumu wa Xikwembu wu sungule ku fuma hi 1914?
U nga swi kombisisa ku yini swaku wa kholwa leswaku Mfumu wa Xikwembu se wa fuma?
LOKO U LAVA KU TIVA SWIN’WANA
Vona leswi vatsali va swilo leswi nga yentxeka khale va swi vulaka hi leswi misava yi nga txintxisa xiswona ku sukela hi 1914.
“O tempo em que a moral foi corrompida drasticamente” (Khindlimuka! wa Abril wa 2007 hi Xiputukezi)
Vona leswi wuprofeta leli nga ka Matewu 24:14 li nga txintxisa xiswona wutomi la wanuna mun’wana.
“A Ndzi Rhandza Baseball Ku Tlula Hinkwaswo!” (Murindzi wa N.o 3 wa 2017 hi Xitsonga)
Hi swi tivisa ku yini swaku wuprofeta la Daniyele ndzima 4 la tirha ni ka Mfumu wa Xikwembu?
Hi swi tivisa ku yini swaku a “7 wa minkama” leyi ku vulavuliwaka hi yona ka Daniyele ndzima 4 yi hele hi 1914?
a Vona tinhlokomhaka timbirhi ta wugamu ka xiyenge lexi nge: Loko U Lava Ku Tiva Swin’wana ka nhlokomhaka yoleyi.
-
-
Leswi Mfumu Wa Xikwembu Wu Nga Ta Swi YentxaTikhorisi Hi Wutomi La Ku Kala Li Nga Heli — Djondzo Ya Bibele
-
-
DJONDZO 33
Leswi Mfumu Wa Xikwembu Wu Nga Ta Swi Yentxa
Mfumu wa Xikwembu se wa fuma atilweni naswona a ku choti kule swaku wu txintxa minchumu ya yinyingi lani misaveni. A hi voni swilo swa ku tala swa swinene leswi Mfumu wa Xikwembu wu nga ta swi yentxa.
1. Mfumu wa Xikwembu wu ta yentxa yini swaku ku va ni ku rhula ni ku lulama amisaveni?
Yesu Hosi ya Mfumu wa Xikwembu, a ta helisa vanhu hinkwavu lava yentxaka swilo swa ku biha ka nyimpi ya Armajedoni. (Nhlawutelo 16:14, 16) Se loko leswo swi yentxeka, ku ta hetiseka xitshembiso xa Bibele lexi nge: “Ku yo sala nkamanyana leswaku lava yentxaka swa ku biha va helisiwa.” (Tipisalema 37:10) Hi ku tirhisa Mfumu wa Xikwembu, Yesu a ta tisa ku rhula ni ku lulama amisaveni hinkwayu. — Lerhani Esaya 11:4.
2. Wutomi li ta tshamisa ku yini loko ku rhandza ka Xikwembu ku yentxeka amisaveni?
Tipimisi na u hanya ka misava leyi nga tala hi vanhu va vanene va ku lulama, hinkwavu va rhandza Yehovha ni vanhu van’wana. Phela hi swoleswo swi nga ta yentxeka ka Mfumu wa Xikwembu, hikusa “va ku lulama va ta tshama amisaveni, va ta hanya ka yona hi masiku ni masiku.” (Tipisalema 37:29) A nga kona a nga ta vabya naswona hinkwavu a va nga ha ta fa.
3. Mfumu wa Xikwembu wu ta yentxa yini loko se wu helise vanhu hinkwavu va ku biha?
Loko vanhu lava va yentxaka minchumu ya ku biha se va helisiwile, Yesu a ta fuma 1.000 wa malembe. Hi nkama wolowo, yena ni lava a nga ta fuma na vona va 144.000 va ta pfuna vanhu leswaku va va vanhu va ku hetiseka, va nga ha na xidjoho. Loko 1.000 wa malembe ma ta va helile misava hinkwayu yi ta va paradesi. Naswona vanhu hinkwavu va ta tshama na va tsakile, hikusa va ta yingisa minawu ya Yehovha. Se Yesu a ta gama a tlhelisa Mfumu ka Papayi wa yena Yehovha. Phela hi nkama wolowo, a vito la Yehovha li ta ‘kwetsimisiwa’ ku tlula minkama hinkwayu. (Matewu 6:9, 10) A swi nga ta kanakanisa swaku Yehovha i mufumi wa munene lweyi a nga ni mhaka ni vanhu, a ta helisa Sathana, madimoni ni vanhu hinkwavu lava nga ta langa ku kala va nga mu yingisi. (Nhlawutelo 20:7-10) Mfumu wa Xikwembu wu ta yentxa leswaku wutomi li tsakisa hi masiku ni masiku.
DJONDZA SWIN’WANA
Vona swaku hi mhaka muni hi tiyiseka leswaku Xikwembu xi ta tirhisa Mfumu wa xona leswaku xi yentxa minchumu hinkwayu leyi xi nga yi tshembisa ka Bibele.
4. Mfumu wa Xikwembu wu ta helisa mimfumu ya vanhu
“Munhu a fuma munhu mun’wana leswaku a mu yentxela swa ku biha.” (Eklesiasta 8:9) Yehovha a ta tirhisa Mfumu wa yena leswaku a helisa ku pfumala wululami.
Lerhani Daniyele 2:44 na 2 Vatesalonika 1:6-8, mi gama mi bula hi swivutiso leswi landzelaka:
Yehovha na Yesu va ta yentxa yini hi mimfumu ya vanhu, ni hi vanhu hinkwavu lava va yi seketelaka?
Leswi se u nga swi djondza hi Yehovha na Yesu, swi ku pfunisa ku yini kuva u tiyiseka swaku va ta yentxa swilo hi wululami?
5. Yesu i Hosi ya yinene
Leswi a nga ta va Hosi ya Mfumu wa Xikwembu, Yesu a ta yentxa minchumu ya yinyingi lani misaveni leswaku a pfuna vanhu. Sixtirani VHIDIYO leli kombisaka swaku Yesu wa swi lava ku pfuna vanhu naswona a ta tirhisa matimba lawa Xikwembu xi nga mu nyika swaku a yentxa leswo.
Swilo hinkwaswu leswi Yesu a nga swi yentxa nkama na a li lani misaveni, a ku li xikombiso xa leswi Mfumu wa Xikwembu wu nga ta swi yentxa. Ka minkateko leyi nga kombisiwa lani, hi yini leyi u navelaka ku yi vona na yi yentxeka? Lerhani matsalwa lawa ma nga kombisiwa lawa ma vulavulaka hi minkateko leyi.
NKAMA NA A LI LANI MISAVENI, YESU . . .
NA A LI TILWENI, YESU . . .
a lawule swidzedze. — Marku 4:36-41.
a ta lunghisa hinkwaswu leswi nga wonhiwa misaveni. — Esaya 35:1, 2.
hi singita a phamele vanhu va vanyingi. — Matewu 14:17-21.
a ta helisa ndlala amisaveni. — Tipisalema 72:16.
a dahe vanhu lava a va vabya. — Luka 18:35-43.
a ta yentxa leswaku vanhu va nga ha vabyi. — Esaya 33:24.
a pfuxe lava a va file. — Luka 8:49-55.
a ta pfuxa hinkwavu lava nga fa a tlhela a helisa lifu. — Nhlawutelo 21:3, 4.
6. Mfumu wa Xikwembu wu ta hi yentxela swilo swa ku tsakisa
Mfumu wa Xikwembu wu ta yentxa swaku vanhu va va ni wutomi la ku tsakisa, ku nga leswi Xikwembu a xi swi lava ku sukela ku sunguleni. A vanhu va ta hanya ka misava leyi nga paradesi naswona a va nga ha ta fa. Sixtirani VHIDIYO swaku mi ta vona ndlela leyi Yehovha a nga ta yentxa ku rhandza ka yena hi yona lani misaveni hi ku tirhisa n’wana wa yena Yesu Kreste.
Lerhani Tipisalema 145:16, mi gama mi bula hi xivutiso lexi landzelaka:
U titiwisa ku yini hi ku tiva leswaku Yehovha a ta “yenelisa ku navela ka xilo xin’wana ni xin’wana lexi hanyaka”?
VAN’WANA VA LI: “Loko hinkwerhu hi tirhisana, hi nga swi kota ku lunghisa swikarhatu hinkwaswu leswi nga misaveni.”
Hi swini swikarhatu leswi Mfumu wa Xikwembu wu nga ta swi lulamisa leswi mimfumu ya vanhu yi kalaka yi nga swi koti ku swi lulamisa?
LESWI HI NGA SWI DJONDZA
Mfumu wa Xikwembu wu ta yentxa leswi xona xi swi lavaka. Wu ta yentxa swaku misava leyi yi va paradesi leyi nga tala hi vanhu lava va nga ta tirhela Yehovha hi masiku ni masiku.
Ku kambela leswi hi nga swi djondza
A Mfumu wa Xikwembu wu ta yentxa yini swaku wu kwetsimisa vito la Yehovha?
Hi mhaka muni hi fanele hi kholwa leswaku Mfumu wa Xikwembu wu ta swi yentxa hinkwaswu leswi Bibele li swi tshembisaka?
Ka minchumu ya yinyingi leyi Mfumu wa Xikwembu wu nga ta yi yentxa, hi yini leyi u tsakelaka ku yi vona?
LOKO U LAVA KU TIVA SWIN’WANA
Vona swaku i yini Armajedoni.
“I Yini Nyimpi Ya Armagedoni?” (Nhlokomhaka leyi nga ka site la jw.org hi Xitsonga)
Lerha hi leswi nga ta ta yentxeka ka 1.000 wa malembe ya ku fuma ka Yesu ni loko se ma helile.
“Xana Ku Ta Humelela Yini Hi Siku Ra Vuavanyisi?” (Murindzi wa 1 ka Setembro wa 2012 hi Xitsonga)
Vona leswi mindjangu yi nga swi yentxaka leswaku yi tivona na yi li paradesi.
Ka nhlokomhaka leyi nge: “A Ndzi Ri Ni Swivutiso Swo Tala”, vona swaku munhu lweyi khale a a lwisana ni mfumu a ti kumise ku yini tinhlamulu leti a a ti lava.
“Bibele Yi Hundzula Vutomi Bya Vanhu” (Murindzi wa 1 ka Janeiro wa 2012 hi Xitsonga)
-