Ankama Xikwembu axi fuma, aku ni kurhula ni vun’we ka swilo hinkwaswu

Hi Mhaka Muni Hi Lava Mfumu Wa Xikwembu?

Ankama Mutumbuluxi wa hina lweyi vito la yena anga Yehovha, anga hamba vanhu va kusungula akunga na hosi yin’wana handle ka yena. A afuma vanhu hi lirhandzu. A yendle jardim la kuxonga leli ali vitaniwa Edeni leswaku va tshama kona na va tsakile. A tlhele ava nyika swakudla swa swinyingi, a tlhela ava nyika mintirho ya kutsakisa. (Genesa 1:28, 29; 2:8, 15) Loko vanhu ava yingise Xikwembu lexi fumaka hi lirhandzu, ni namuntlha avata va ni kurhula.

Adamu na a khome handzu lowu tsimbisiwaka, anga nyikiwa hi Evh a. — Vanhu va kusungula va yale kufumiwa hi Xikwembu

Bibele li tlhamusela swaku kuni ntsumi yinga delela Xikwembu. Hi kufamba ka nkama, ntsumi leyi yi vitaniwe Davulosi. Yi delele Xikwembu hi kuvula swaku axina mfanelo ya kufuma vanhu. Sathana a vule swaku vanhu avata tsaka ngopfu loko avanga fumiwi hi Xikwembu. Xa kubiha hi leswaku vapsali va hina Adamu na Evha va yingise Sathana hi kupfukela Xikwembu. — Genesa 3:1-6; Nhlavutelo 12:9.

Leswi Adamu na Evha vanga yala kufumiwa hi Xikwembu, va luzekeliwe hi kaya ka vona ni hi ntshembo wa kuhanya hi laha kunga heliki na va hetisekile. (Genesa 3:17-19) Leswi vangaswi yendla swi khumbe ni vana va vona hi kufamba ka nkama. Bibele li vula swaku leswi Adamu anga djoha ni ‘lifu li nghenile hikolaho ka kudjoha’. (Varhoma 5:12) Xidjoho xi vange swin’wana: ‘Munhu a fuma munhu mun’wana kumu yendla swa kubiha.’ (Eklesiasta 8:9) Hi marito man’wana loko vanhu va fuma van’wana, a swikarhatu aswi heli.

VANHU VA SUNGULA KUFUMANA

Nimirodo na a nyimile a tlhela a tikulisa. A ndzhaku ka yena kuvoneka vanhu na va yaka. — Nimirodo a lwisane ni wuhosi la Yehovha

A hosi ya kusungula leyi kuvulavuliwaka hi yona ka Bibele kuve Nimirodo. A pfukele Yehovha naswona aangaswi lavi swaku Yehovha a fuma vanhu. Kusukela masikwini ya Nimirodo, tihosi ti sungule kukhonzisa vanhu. Kolomu ka 3.000 wa malembe manga hundza hosi Solomoni a tsale leswi: “Ni vone minhloti ya lava xanisiwaka, kambe akunga na wa kuva chavelela. Naswona lava avava xanisa ava ni matimba, lakakuva avanga na wa kuva chavelela.” — Eklesiasta 4:1.

Akuse cinca nchumu, ni swoswi mimfumu yaha xanisa vanhu. A relatoriyu lin’wana lelinga tsaliwa hi Nações Unidas hi 2009, li vula swaku “a kutala ka wubihi namuntlha, kuvangiwa hi mafumela ya kubiha.”

NKAMA WA KULULAMISA SWILO!

Laha misaveni kulaveka tihosi ta tinene letinga ni mafumela ya manene. Mutumbuluxi wa hina ahi tshembisa swoleswo!

Mifoto: Leswi yendlekaka hi mhaka mimfumu ya vanhu. 1. Wansati wa le Ásia na a tshame ka xitaratu xinga ni nsila na a rileliwa hi n’wana. 2. Madala lweyi anga baxara axipiritana. 3. Masonchwa na ma duvulela anyimpini. 4. Xitshungu na xi hamba xitereka. 5. Mamana ni n’wana va kuma xipfalu xa yindlu ya vona na xi pfotlosiwe vhidru. 6.Doropa lelinga tala hi tifiyu ta magezi ni ximusi lexi humaka ka tikomponi. — Hambi hi tihosi ta kuyampsa ta kona atiswi koti kululamisa swikarhatu swa swikulu swa vanhu

Xikwembu xi veke Mfumu lowungata helisa mimfumu hinkwayu ya vanhu naswona “wona woxe wuta tshama na wuli kona minkama hinkwayu”. (Daniyele 2:44) Lowu hi wona Mfumu lowu vanhu vanyingi va khongelaka va kombela leswaku wu ta. (Matewu 6:9, 10) Kambe Xikwembu axingata fuma hi xoxe ka Mfumu lowu. Xi lange munhu mun’wana lweyi anga tshama a hanya la misaveni akuva a va Hosi. Hi mani munhu wa kona?