Xikhongelo Xi Nga Ku Pfunisa Ku Yini?

Pamela lweyi a a vabya hi câncro a ye xipiritani swaku a ya dahiwa. Hambileswo a khongele ka Yehovha a mu kombela swaku a mu pfuna ku tiyisela. Xikhongelo xi mu pfunise ku yini?

Pamela a li: “A nkama na ni fambela xipiritani a ni karhateka hintamu ni tlhela ni chava. Kambe loko ni khongela ka Yehovha a ni va ni ku rhula naswona a ni swi kota ku tiyisela na ni nga chavi. Mavabyi ya mina ma vavisa hintamu, kambe xikhongelo xi ni pfuna ku va ni mavonelo ya manene. Loko vanhu va ni vutisa swaku swo yini, ni va byela swaku ‘a swi se yampsa, kambe ni tsakile!’”

Hambileswo, a hi nga ta nyimela swaku hi ngheniwa hi mavabyi ya makulu, ku li kona hi sungulaka ku khongela, hikusa hinkwerhu hi kumana ni swikarhatu, swi nga ha va swa switsongo kumbe swa swikulu, leswi hi lavaka ku pfuniwa ka swona. Se, xikhongelo xi nga hi pfunisa ku yini?

Bibele li li: “Rhula ndzhwalo wa wena ka Yehovha, ataku seketela. Ange tshuki a pfumelela swaku munhu wa kululama a wa.” (Tipisalema 55:22) Marito lawa ma tiyisa nhlana! Se xikhongelo xi nga ku pfunisa ku yini? Loko u khongela ka Xikwembu hi ku ya hi ku rhandza ka xona, xi ta ku nyika leswi u swi lavaka leswaku u kota ku tiyisela. — Vona kwadru leli nge: “Leswi Xikhongelo Xi Nga Ku Pfunisaka Xiswona.”

Leswi Xikhongelo Xi Nga Ku Pfunisaka Xiswona

Ku rhula ka mimpimiso

“Ka hinkwaswu khongelani mi tivisa Xikwembu leswi mi swi pfumalaka, mi kombela na mi khensa; kutani ku rhula ka Xikwembu loku tlulaka mimpimiso hinkwayu, ku ta vonelela timbilu ta n’wina ni mimpimiso ya n’wina hi ku tirhisa Kreste Yesu.” (Vafilipiya 4:6, 7) Loko u byela Xikwembu leswi ku karhataka xi ta ku pfuna swaku u va ni ku rhula u tlhela u yentxa swilo hi wutlhari na wu nga karhateki.

Wutlhari la ku ta hi ka Xikwembu

“Kutani loko ku ni lweyi a kalaka a nga na wutlharhi xikarhi ka n’wina, a a kombeli ka Xikwembu, xi ta mu nyika, hikusa xi nyika hinkwavu hi mbilu ya ku basa.” (Yakobo 1:5) Loko hi karhatekile, hi nga ha yentxa swiboho swa ku kala swi nga li swinene, kambe loko hi khongela ka Xikwembu xi nga hi pfuna swaku hi khumbuka leswi Bibele li swi vulaka, leswi swi nga hi pfunaka ka leswi hi kumanaka na swona.

U ta kuma ntamu

“Ka hinkwaswu ni ni ntamu hi mhaka ya lweyi a ni nyikaka matimba.” (Vafilipiya 4:13) Leswi Yehovha a nga Xikwembu xa matimba hinkwawu, a nga ku nyika ntamu lowu u wu lavaka swaku u kota ku tiyisela swikarhatu leswi u kumanaka na swona. (Esaya 40:29) Bibele li tlhela li vula swaku Yehovha i “Xikwembu lexi tiyisaka vanhu ka swiyimu hinkwaswu” naswona i Xikwembu “lexi hi tiyisaka ka mahlomulu ya hina hinkwawu”. — 2 Vakorinto 1:3, 4.

WA SWI LAVA KU PFUNIWA HI XIKHONGELO?

Yehovha a nga hi sindzisi swaku hi khongela ka yena. Ku hambana ni leswo, a hi rhamba hi lirhandzu. (Yeremiya 29:11, 12) U ta yentxa yini loko i li swaku u tshama u vona ingi swikhongelo swa wena a swi hlamuliwi? U nga godoli. Minkama yin’wana, vapsali a va mu pfuni n’wana hi nkama lowu yena a a nyimela swaku va ta mu pfuna hi wona kumbe xileswi yena a a pimisa swaku va ta mu pfunisa xiswona. Vapsali va swi tiva leswi nga swinene leswi nga pfunaka n’wana wa vona. A ntiyiso wa mhaka hi leswaku vapsali va ta mu pfuna n’wana wa vona.

Yehovha, Papayi lweyi a hi rhandzaka, wa swi lava ku ku pfuna. Loko u tikambela kahle tindzimana ta Bibele leti nga ka revhixta leli, u tlhela u zama hi lani u nga kotaka ha kona ku tirhisa leswi u nga swi djondza, Xikwembu xi ta hlamula swikhongelo swa wena. — Tipisalema 34:15; Matewu 7:7-11.