A Wu Swi Tiva?

Hi mhaka muni Yehovha a pfumele swaku Vayisrayele va yentxa minyikelo hi ku tirhisa swinyenyana kumbe matuva?

NAWU a wu pfumela swaku munhu a tirhisa tuva kumbe swinyenyana swimbirhi swaku a nyikela gandzelo ka Yehovha. Loko munhu a nyikela magandzelo, a a fanele a tirhisa swinyenyana loko a nga na tuva kumbe a tirhisa tuva loko a nga na swinyenyana. (Lev. 1:14; 12:8; 14:30) Hi mhaka muni ku yentxa leswo a swi pfuna? Hikusa minkama yin’wana swinyenyana swoleswo a swi kala aIsrayele. Se hi mhaka muni a swi kala?

Swinyenyana swoleswo a swi tshama aIsrayele hi nkama wa ku hisa, kambe leswi hi Outubro a ku titimela, a swi rhurha swi ya tshama ka matiko man’wana lomu a ku hisa. (Ris. 2:11, 12; Yer. 8:7) Leswo swi kombisa swaku a swi ta va karhatela Vayisrayele ku nyikela magandzelo hi ku tirhisa swinyenyana hi nkama wa ku titimela.

Minkama hinkwayu matuva a ma tshama na ma li kona aIsrayele hikusa matuva a ma nga rhurhi ma ya ka ndhawu yin’wana, funtshi vanhu van’wana a va ma fuya makaya ka vona. (Vona ni Yohani 2:14, 16.) Buku lin’wana leli vulavulaka hi maplanta ni swiharhi swa Bibele li vula leswi: “Ka madoropa ya Palestina a ku tale hi matuva ya ku fuyiwa. Mun’wana ni mun’wana lweyi a a fuya matuva, a a ni ndhawu lani matuva a ma tshama kona kumbe mbhovo lowu a ma ta tshama ka wona.” — Vona ni Esaya 60:8.

Yehovha a kombise swaku a a va rhandza vanhu va yena a tlhela a twisisa swiyimu swa vona hi ku pfumelela swaku va tirhisa matuva loko va yentxa minyikelo, hikusa a swi vevuka ku ma kuma minkama hinkwayu.