I Mpsini Swi Nga Ku Pfunaka Ku Tolovelana Ni Bandla La Nyuwani?

INDJHE u tshama u txintxa bandla? Loko nhlamulu ya wena i li ‘ina’, ha tiyiseka leswaku u ta nyima na wona marito lawa Jean-Charles a nga ma vula: “A swi vevuki ku tolovelana ni bandla la nyuwani kuve hi nkama wun’we u zama ku pfuna ndjangu wa wena swaku wu va ni wunghanu lalinene na Yehovha.” Lava txintxaka bandla va kumana ni swikarhatu swin’wanyani swa ku fana ni ku kuma ntirho, xikola xa ku va vana va fundha ka xona, munti wa ku tshama ka wona, maxelo ya nyuwani ni ndhawu leyi va nga ta chumayela ka yona.

Nicolas na Céline va kumane ni xikarhatu lexi hambaneke. A Betele la França li va rhume ku ya tirha ka bandla la nyuwani. Vona va li: “Akusunguleni a hi tsake hintamu hi ku va ka bandla la nyuwani, kambe hi ku famba ka nkama hi sungule ku va xuva vanghanu va hina. Phela ka bandla leli la nyuwani a hi nga se va ni vanghanu va vanyingi.” Se u nga yendla yini swaku u tsaka hambi u li ka bandla la nyuwani?a Vanhu van’wani va nga yendla yini swaku va ku pfuna? Hi yini minkateko leyi u nga ta yi kuma loko u pfuna vanhu van’wani ka bandla la nyuwani?

4 WA SWILO LESWI NGA KU PFUNAKA KU TOLOVELANA NI BANDLA LA NYUWANI

Makwerhu wa xisati a nyime ku petela swilo ka makaxa swaku a lerha Bibele. — Tshemba Yehovha

1. Tshemba Yehovha. (Ps. 37:5) Makwerhu Kazumi lweyi a tshamaka Japão, a a ni 20 wa malembe na a li ka bandla la yena nkama lowu swi nga lava yena ni nuna wa yena va rhurha va ya ka ndhawu yin’wani hi mhaka ya ntirho wa nuna. Se a swi kotise ku yini ku tshemba Yehovha? Yena a li: “Ni khongele swinene ka Yehovha ni mu byela hinkwaswu leswi a ni titwisa xiswona. A ni chava funtshi a ni titwa na ni li noxe ni tlhela ni vilela swinene. Kambe nkama lowu a ni ya ni khongela ka Yehovha, yena a a ni nyika ntamu wa ku tiyisela xiyimu lexi a ni kumana na xona.”

U nga yendla yini swaku u tama u tshemba Yehovha? Ku fana ni nsinya lowu lavaka mati ni xitrumi leswaku wu tama wu kula, se na hina hi ndlela ya ku fanekisela hi lava mati ni xitrumi leswaku hi tama hi tiya. Nicolas lweyi se hi nga bula hi yena, a tiyise ntshembo wa yena hi ku va a djondze hi xikombiso xa Abrahamu, Yesu na mupostolo Pawulo, lava nga yendla minzamu swaku va yendla ku rhandza ka Yehovha. Se a ku va ni djondzo ya munhu hi xiyexe nkama ni nkama swi nga hi pfuna kuva hi hlula swikarhatu leswi hi nga ha kumanaka na swona; funtshi swi nga hi pfuna kuva hi tiyisa vanhu van’wani ka bandla la nyuwani.

Doda lin’wani li yingisela majovhem mambirhi lawa ma li tlhamuselaka ndlela leyi va tirhaka hi yona ka som ka Yindlo ya Wugandzeli. — U nga fanisi bandla la khale ni la nyuwani

2. U nga fanisi bandla la khale ni leli u nga ka lona swoswi. (Ekl. 7:10) Jules lweyi a nga rhurha a suka Benin aAfrika a ya Estados Unidos, a swi vonile swaku mahanyelo ya tindhawu leti ma hambanile swinene. Yena a li: “A ni vona ingi a ni ta kontarela xitoriya xa mina xa wutomi ka vanhu hinkwavu lava a ni bula na vona.” Hi mhaka ya ku hambana koloko ka tiko leli a a suka hi ka lona ni lani se a a tshama kona, makwerhu Jules a sungule ku kala a nga ha buli ni vamakwerhu kumbe ku titlhanganisa na vona. Kambe a nkama lowu a nga tinyika nkama wa leswaku a va tiva kahle vamakwerhu, a txintxe mavonelo ya yena. Yena a tlhele a ku: “Hina vanhu hinkwerhu ha fana, ku nga na mhaka swaku hi tshama kwini kumbe hi ta hi kwini. I swa lisima ku va hi nga nyimeli swaku vanhu hinkwavu va yendla swilo ku fana ni leswi hina hi swi yendlisaka xiswona.” Hi mhaka leyo, a swi nga ta va swinene kuva hi fanisa bandla leli a hi li ka lona khale ni leli hi nga ka lona swoswi. Anne-Lise lweyi a nga mupfuli wa ndlela, a te: “A ni nyimeli swaku bandla leli ni nga ka lona swoswi li fana ni leli ni nga suka ka lona, kambe ni nyimela ku djondza swilo swa nyuwani lani ni nga kona.”

Madoda loko ma txintxa bandla, a ma fanelanga ma fananisa bandla la khale ni leli ma nga ka lona swoswi. Phela loko u li doda, khumbuka swaku ku va vamakwerhu va bandla la wena la nyuwani va yendla swilo hi ndlela ya ku hambana ni leyi wena u nga yi tolovela, a swi vuli swona swaku a va swi yendli kahle. Swi kahle ku va u djondza swiyimu swa lomu u nga kona u tlhela u va tiva kahle vamakwerhu va bandla leli u nga ka lona na u nga se nyikela mavonelo. (Ekl. 3:1, 7b) Swa yampsa ku djondzisa vamakwerhu hi xikombiso xa wena ku tlula ku va sindzisa ku yendla swilo hi ku ya hi mavonelo ya wena. — 2 Ko. 1:24.

Vamakwerhu vambirhi na va limpa majanela ka Yindlo ya Wugandzeli. — Tshama na wu khomekile

3. Tshama na u khomekile. (Filp. 1:27) Phela a ku rhurha hi ya ka ndhawu yin’wani swi nga hi dlela nkama swi tlhela swi hi karhalisa. Kambe i swa lisima ku famba mintlhanganwini na wa ha ku fika, hikusa loko u nga li kona ka mintlhanganu, vamakwerhu va nga se tshama va ku vona, a va nga ta swi kota ku ku pfuna. Lucinda lweyi a tshamaka Djoni, a rhurhile a ya ka doropa lin’wani lalikulu na a ni tintombhi ta yena tatimbirhi. Yena a li: “Vanghanu va mina va ni kutxile swaku ni lwela ku va ni vanghanu ka bandla la mina la nyuwani. A ni ya nsin’wini na vona ni tlhela ni ya mintlhanganwini naswona hi nyikele kaya ka hina leswaku vamakwerhu va ta tlhangana kona loko va lava ku huma nsimu.”

Xin’wani lexi nga ta ku pfuna ku tolovelana ni bandla la nyuwani u tlhela u swi kota ku tiyisa van’wani, i ku tirha xikan’we ni vamakwerhu va bandla la nyuwani. Hi leswo a nga swi yendla makwerhu Anne-Lise lweyi hi nga bula hi yena. A madoda ya bandla la yena la nyuwani ma mu kutxe leswaku a huma nsimu ni vamakwerhu va bandla la yena. Yena a vule leswi: “Hi nkamanyana wawutsongo se a ni titwa na ni lumba bandla leliyani.” Phela loko u li kona ka mintirho ya ku fana ni ku hamba limpeza ka Yindlo ya Wugandzeli ni ku yendla mintirho yin’wani ka ndhawu leyi, u ta va u kombisa swaku a bandla la wena hi leli u nga ka lona swoswi ku nga li leliyani u nga suka ka lona. Loko u ya u va kona ka mintirho leyi, swi ta ku vevukela ku yendla xinghanu ni vamakwerhu va bandla la wena.

Mindjangu yimbirhi na yi dla xikan’we. — Yendla vanghanu va nyuwani

4. Yendla vanghanu va nyuwani. (2 Ko. 6:11-13) Ndlela yayinene ya ku yendla vanghanu va nyuwani i ku kombisa swaku wa va rhandza. U nga yendla leswo hi ku hantlisa u fika mintlhanganwini, ni loko mintlhanganu yi hela u nga tekeli ku muka. Zama ku bula ni vamakwerhu u va tiva ku yampsa, zama ku tiva mavito ya vona u tlhela u ma khumbuka. Kombisa leswaku u munhu wa kahle u tlhela u ngheneka; leswo swi ta yendla swaku van’wani va titwa na va chunsekile ku bula na wena. Loko u yendla leswo, u ta swi kota ku yendla wunghanu na vona naswona u ta tiyisa vamakwerhu u tlhela u va vona na va lumba ndjangu wa wena.

Handle ka ku va u karhateka hi swaku vamakwerhu va ku rhandza hintamu, yendla xan’wanchumu leswaku vamakwerhu va ku tiva ku yampsa. Phela hi leswo swi nga pfuna makwerhu Lucinda nkama a nga rhurha. Yena a te: “Lexi nga hi pfuna leswaku hi va ni vanghanu abandleni i ku va hi va rhambile swaku va ta kaya ka hina.”

“YAMUKELANANI”

Phela vanhu van’wani va nga ha chava ku nghena ka Yindlo ya Wugandzeli lani ku nga tala hi vanhu va ku kala va nga va tivi. Se u nga va pfunisa ku yini vanhu lava ha ku fikaka ka bandla la wena leswaku va tolovelana ni bandla la nyuwani? Mupostolo Pawulo a vule leswaku hi fanele hi ‘yamukelana ku fana ni leswi Kreste na yena a nga hi yamukela.’ (Rom. 15:7) Madoda na wona ma nga pfuna lava ha ku fikaka swaku va titwa na va li kaya kumbe na va yamukeliwile. Loko va yendla leswo, va ta va va tekelela Yesu. (Vona kwadru leli nge “U Nga Yendla Yini Swaku Swi Ku Vevukela Ku Rhurha?”) Vamakwerhu hinkwavu bandleni ku patsa ni vana, va nga va pfuna lava ha ku fikaka swaku va titwa na va yamukeliwile va tlhela va titwa na va li kaya.

U Nga Yendla Yini Swaku Swi Ku Vevukela Ku Rhurha?

Leswi u faneleke u swi yendla: Na u nga se rhurha, byela madoda ya bandla la wena ni madoda ya bandla leli u yaka ka lona swaku u lava ku rhurha. Tlhela u ma byela swaku u ta rhurha siku muni, u ta ya tshama kwini u tlhela u va nyika a numeru ya wena ya telefoni. Tlhela u vutisa swaku a Yindlo ya Wugandzeli yi kumeka kwini ni leswaku ku ngheniwa nkama muni mintlhanganwini. Se loko u fikile naswona u ya mintlhanganwini hi khambi la ku sungula, tekela ku ma byela madoda swaku wa ha li ku fika naswona byela ni vamakwerhu swaku wa ha li ku fika ka ndhawu liyani.

Leswi madoda ma faneleke ma swi yendla. A sekretariyu wa bandla leli lweyi a rhurhaka a a li ka lona, a fanele a posa karta la ku tlhamusela xiyimu xa makwerhu lweyi a rhurhaka, ni Cartão La Muchumayeli hi xihantla. Se a Comissão de Serviço li fanele li mu yava grupu ya nsimu leyi a faneleke a va ka yona. Naswona swi nga va kahle swinene swaku a muvoneleli wa grupu yoleyo ya nsimu a ya mu pfuxela swaku a mu hoyozela, a mu tiyisa a tlhela a tiva swaku a ndjhani.

Xin’wani hi nga xi yendlaka swaku hi kombisa swaku ha va yamukela vamakwerhu va hina, i ku va rhamba va ta kaya ka hina hi tlhela hi va pfuna hi swilo swin’wani leswi va swi lavaka. Hi xikombiso, makwerhu mun’wani wa xisati lweyi a a li mupfuli wa ndlela a pfune makwerhu mun’wani lweyi a wa ha li ku fika bandleni ka yena, hi ku mu komba doropa a tlhela a mu pfuna ku kuma maxapa. Makwerhu lwiyani a nga pfuniwa, swi mu hlamalise hintamu leswi a nga yendleliwa swona naswona swi mu pfunile kuva a tolovelana ni bandla la nyuwani.

KU TXINTXA BANDLA SWI HI PFULELA TINDLELA TA KU YENDLA SWA KU TALA

Ku fana ni leswi ntete yi faneleke yi txintxelela xikhumba makhambi ya manyingi leswaku yi kota ku purhuma; hi ku fana, loko u txintxa bandla, swi lava leswaku u suselela ku chava hinkwaku loku u nga na kona leswaku u kota ku ya mahlweni u yendlela Yehovha swa ku tala. Nicolas na Céline, lava hi nga vulavula hi vona ku sunguleni, va te: “A ku txintxa bandla swi hi djondzise minchumu ya ku tala. Leswaku hi kota ku titwananisa ni ndhawu ya nyuwani hi tlhela hi hanyisana ni vamakwerhu va nyuwani, swi lave hi djondza ku va ni wumunhu la Wukreste.” Jean-Charles lweyi hi nga vulavula hi yena ku sunguleni, a vule swaku a ndjangu wa yena wu pfuneke hintamu hi ku va va rhurhile. A te: “Ka bandla la hina la nyuwani, vana va hina va li kulise hintamu wunghanu la vona na Yehovha. Ndzhaku ka tiwhetinyana, n’wana wa hina wa xisati a sungule ku hamba swiyenge ka mintlhanganu ya xikarhi ka vhiki, se lweyi wa xinuna a ve muchumayeli wa ku kala a nga tsakamisiwanga.”

Kambe loko swi ku na wena wa swi navela ku rhurha u ya pfunisa lani ku nga ni xilaveko, kambe swiyimu swa wena a swi ku pfumeleli ke? Ka xiyimu lexo, na wena u nga swi kota ku swi tirhisa leswi ku nga vulavuliwa hi swona ka Murindzi lweyi na u li ka bandla la wena. Loko u yendla leswo, u ta titwa ingaku u rhurhile u ya pfunisa ka bandla lin’wani. Se, tshemba Yehovha, tshama na u khomekile hi ku yendla mintirho ya ku hambanahambana abandleni u tlhela u tirha xikan’we ni vamakwerhu ansin’wini hilani u nga kotaka hi kona. Xin’wani u nga xi yendlaka i ku hamba vanghanu va nyuwani ni ku tlhela u kulisa wunghanu ni lava se u nga na vona hi khale. U nga tlhela u tinyikela swaku u pfuna lava ha ku nghenaka bandleni kumbe lava lavaka ku pfuniwa ka bandla la wena. Ku yendla leswo swi ta ku pfuna swaku u kulisa wunghanu la wena na Yehovha, hikusa lirhandzu hi lona li kombisaka Vakreste va ntiyiso. (Yoh. 13:35) Tiyiseka swaku Xikwembu xi tsaka swinene hi ku tikarhata koloko. — Heb. 13:16.

Hambileswi va kumanaka ni swikarhatu swa swinyingi, vamakwerhu van’wani va swi kotile ku titwananisa ni bandla la nyuwani. Se, na wena u nga swi kota ku yendla leswo. Anne-Lise a li: “Ku txintxa bandla swi ni pfune ku yendla vanghanu va nyuwani.” Kazumi na yena a vula swaku a ku txintxa bandla, swi mu pfunile ku vona ndlela leyi Yehovha a nga mu pfuna hi yona ya ku a a nga se tshama a yi vonile khale. Se swi li yini hi Jules? Na yena a li: “Vanghanu va nyuwani va ni pfunile kuva ni titwa na ni li kaya funtshi leswo swi ni pfunile ku titwa na ni lumba bandla leli la nyuwani. A ku va ka bandla leli swi ni tsakise hintamu, lakakuva a swi ta ni karhatela kuva ni tlhela ni suka ka lona.”

a Vona nhlokomhaka leyi nge “Ku Hlangavetana Ni Xipgiqo Xo Khumbuka Ekaya Loko U Ri Entirhweni Wa Xikwembu,” ka Murindzi wa 15 ka Maio wa 1994 (hi Xitsonga).