Juanu

9 Enga Jesúsi jimeesïsï nitamani japka, acheetini ma exespti enga no ueenga exeni ka enga ísï andajpenupka. 2 Ka imeeri chúxapatiichaksï kurhamarhispti: “Jorhentpiri,* ¿né no sési ambe niátaski* paraka i acheeti ísï andajpenupiringa: inde o taati jémbeecha?”. 3 Jesúsi arhiaspti: “No nema no sési ambe niátasti,* ni inde ka nijtu taati jémbeecha. Joperu i ambe ísï úkuarhisti parakaksï kʼuiripuecha uaaka exeni ambe enga újka úni Tata Diosï. 4 Jatsiskachi para úni ambe enga uéjka ima engareni axaka, iásï enga útasï jurhiakueka. Jimboka chúriakia ka jiáni no nema úsïndi ánchikuarhini. 5 Engani jamberi útasï parhakpinirhu jámani jauaka, ji jindeeska parhakpini anapu tʼíntskua”. 6 Enga na ísï uandapkia, tʼuátaspti ka kuechenda jingoni atsïmu úspti ka éskuarhu atanharhikuspti acheetini 7 ka arhispti: “Ní jupanharhintani Siloamiiri pilarhu” —enga arhikuekajka “axakata”—. Ísï jimbo, acheeti niraspti, jupanharhintaspti ka enga na kʼuanhatsentapkia, úsïreendia exeni.

8 Jimajkani besinu jémbeecha ka imeecha engaksï exeenga eska ima sentabu jámasïreenga kurhajkuarhini, ueenasptiksï uandani: “¿Andi no i jindeeski acheeti enga ísku uaxandeenga sentabu kurhajkuarhini?”. 9 Máruksï uandasïreendi: “Jo, jindeesti”. Ka máteruechaksï uandasïreendi: “No jindeesti, jinisï májkueni jánharhiti”. Ka acheeti uandasïreendi: “Jo, jiiska”. 10 Jimajkani kurhamarhisptiksï: “¿Ka nénari jámaski parari únia exeni?”. 11 Ima arhiaspti: “Ima achamasï enga Jesúsi arhinhajka, atsïmu ústi ka éskuecharhurini atanharhikusti ka arhistirini: ‘Ní jupanharhintani Siloami’. Ka ji niraska, jupanharhintaska ka iásï úsïngia exeni”. 12 Ka ménderuksï kurhamarhispti: “¿Nani jarhaski ima achamasï?”. Ka ima arhiaspti: “Jauani, no míteska”.

13 Ka ima kʼuiripuechaksï fariseuecha jingoni páspti imani acheetini enga no ueenga exeni. 14 Ka sábaduespti jiáni enga Jesúsi atsïmu úpka ka enga éskatarantapka imani acheetini. 15 Ísï jimbo, fariseuechajtuksï ueenaspti kurhamarhini néna jámaspi para iásï únia exeni. Ima arhiaspti: “Atsïmurini atanharhikusti éskuecharhu ka ji niraska jupanharhintani ka iásï úsïngia exeni”. 16 Jimajkani fariseuechaksï máru ueenaspti uandani: “No Tata Diosï axasti ini achamasïni jimboka no janhanharhisïnga sábadu jurhiatikuani”. Ka máteruechaksï uandasïreendi: “Joperu, ¿nénajtu uaa no sési úri* ma xárhati milagruechani uaani?”. Ka ueenasptiksï mámaru ambe uandani. 17 Ka ménderuksï ueenaspti arhini imani achamasïni enga no ueenga exeni: “¿Ka tʼu ambe uandasïni imeeri ambe? Jimbokakeni tʼunginisï éskatarantati”. Ka acheeti arhiaspti: “Tata Diosïiri uandakua pári máesti”.*

18 Joperu judiuechaksï no jakajkusïreendi eska ima no úsïreenga exeni ka eska iásï éskantaspkia. Jimboksïsï pʼitajkuarhiapti taati jémbeechani. 19 Ka kurhamarhiasptiksï: “¿I chaari uájpeeski, ima engajtsï chá uandajka eska no úsïreenga exeni desde enga andajpenuka? Jiájkani, ¿andisï iásï újkia exeni?”. 20 Ka imeeri taati jémbeechaksï arhiaspti: “Ísïisti, juchaari sapiisti ka ísï andajpenusti, no úsïreendi exeni. 21 Joperuchi no míteska néna jámaski para iásï únia exeni ka ístuchi no míteska né éskatarantaski. Indeni kurhamarhi je, kʼériistia ka uaati jandiajku uandakuarhini”. 22 Taati jémbeechaksï ísï uandaspti jimbokaksï chérhiasïreenga judiuechani; jimbokaksï judiuecha tʼuini uandaspkia eska enga nema uandapiringa eska Jesúsi Kristuespka, chúntapiringaksï jima uératini nani engaksï judiuecha tánguarhijka para Tata Diosïni kómarhini. 23 Jimboksïsï taati jémbeecha uandapti: “Kʼériistia, indeni kurhamarhi je”.

24 Ísï jimbo, ménderuksï pʼitajkuarhispti imani acheetini enga no ueenga exeni ka arhisptiksï: “Sésijtsïni aiangu Tata Diosïni japarini. Jucha sési mítetixaka eska ima achamasï no sési úriiska”.* 25 Ima arhiaspti: “Ji no míteska sini ima no sési úriiski* o nómbe. Ambe engani kʼóruni míteka jindeesti eskani no úsïreenga exeni, joperuni iásï exesïngia”. 26 Jimajkani kurhamarhisptiksï: “¿Ambekini úchiski? ¿Nénakini éskatarantaski?”. 27 Ima arhiaspti: “Arhiskaksïnia ka chájtsïni no jakajkuchesïnga. ¿Andijtsïsï uéjki eskaksïni ménderu aianguaka? ¿Ojtsï chájtu uékasïnia imeeri chúxapatiini?”. 28 Engaksï kurhaapka ini ambe, ueenasptiksï no sési arhini: “Tʼurisï imeeri chúxapatiika, jucha Moisésiiri chúxapatiiska. 29 Juchachi míteska eska Tata Diosïsï uandajpapka Moisésini, joperu nóchi míteska nani uéraski i achamasï”. 30 Acheeti arhiaspti: “No úsïnga jakajkuni eskajtsï chá no míteska nani uératini jurhaski ima achamasï ka jinireni ima éskatarantani. 31 Jucha míteska eska Tata Diosï no kurhajchaasïnga no sési úriichani,* joperu imani kʼóru kurhajchasïndi enga janhanharhijka ka enga újka ambe enga ima uéjka. 32 No méni mítekuarhixapti eska nema éskatarantapiringa kʼuiripuni ma enga no ueenga exeni desde enga andajpenuka. 33 I achamasï no ma ambe úpirindi úni enga no Tata Diosï axapiringa”. 34 Jimajkani arhisptiksï: “¿Nénari tekaasïni tʼujtsïni uékani jarhani jorhendani? Tʼu engari xáni pekadoriika desde engari andajpenuka”. Ka petaatantasptiksï.

35 Jesúsi mítespti eskaksï petaatantaspka, ka enga exentapka, kurhamarhispti: “¿Tʼu jakajkusïni* Achamasïiri Uájpani?”. 36 Ka acheeti arhispti: “Tata, ¿ka neeski ima? Aiangurini parani ji úni imani jakajkuni”.* 37 Jesúsi arhispti: “Tʼuri exeskia. Ka imani jingondi uandontskuarhexaka”. 38 Jimajkani acheeti arhispti: “Tata, ji jakajkusïnga* imani”. Ka kʼéri ambe arhispti.* 39 Ka Jesúsi uandaspti: “Jurhaska ini parhakpinirhu para jusgarpini, parakaksï éskantaaka imeecha engaksï no újka exeni ka parakaksï nóteru uaakia exeni imeecha engaksï újka exeni”. 40 Ka fariseuecha engaksï jima japka, kurhaasptiksï ini ambe ka uandasptiksï: “¿Amberisï uandani jaki? ¿Eskachi juchajtu no úsïnga exeni?”. 41 Jesúsi arhiaspti: “Engajtsï no úpiringa exeni, nójtsï ma pekadu jatsipiringa. Joperujtsï chá uandasïnga eskajtsï exesïnga, jimbojtsïsï no puáminhantaaka chaari pekaduni”.