Úkuecha

7 Joperu sánderu kʼéri saserdoti kurhamarhispti: “¿Ísïiski i ambe?”. 2 Ka Estebani ísï uandaspti: “Erachiicha* ka taatiicha, kurhaa je. Tata Diosï, enga xáni kʼéri ambeeka, xarhakuspti juchaari ióntki anapu parientini Abraánini jiáni enga Mesopotamia japka, enga nótki niárani japka ireta Aráni para jima pakarani irekani. 3 Ka arhispti: ‘Uéakunta chiiti iretarhu, jurajkua chiiti parientiichani ka ní imani ireta jimbo engakeni ji arhiaka’.* 4 Jimajkani ima uéakuntaspti imani echeri jimbo engaksï kaldeuecha irekaka ka ireta Aráni niraspti irekani. Ka enga taati jémba na uarhipkia, Tata Diosï arhispti eska ini echeri jimbo mótsipiringa irekani engajtsï iásï chá irekani jakaia. 5 Joperu no nani íntskuspti erensia, ni sikiera sáni.* Joperu aiakuspti eska íntskupiringa echerini ka tátsekua imeeri uájpeechani nájkiruka ima nótki ma kánguarhini japka. 6 Ístu, Tata Diosï arhispti eskaksï uájpeecha máteru nani jatsïpepiringa,* echeri ma jimbo enga no imeecheeripiringa, ka eskaksï jima anapuecha ísï kaapiringa komueska jántspiriicha ka eskaksï 400 uéxurhini no sési kaapiringa. 7 Tata Diosï uandaspti: ‘Ji jusgariuaka imani iretani enga ísï káuaka komueska jántspiriicha’. Ístu uandaspti: ‘Ka ísï tátsekua, imaksï uéakuntaati ka ixújtsïni marhuacheati jíndeni’.

8 ”Ístu, ísï pakatperaspti imani jingoni: eskaksï tatakeechani pasïri pʼikujtsïkukuapiringa tsʼiuerakuarhu;* ka ima niáraspti jindeeni Isaakiiri taati jémba, ka ochu jurhiatikua tátsekua enga Isaaki na andajpenupkia, pasïri pʼikujtsïkukuspti tsʼiuerakuarhu. Isaaki Jakobueri taati jémbeespti* ka Jakobu 12 tribuecheeri taati jémbeespti. 9 Ka Joséeri ermanu jémbeechaksï ueenaspti kánikua ikiakuni imani ka Ejiptu anapuechanksï atarakuantaspti. Joperu Tata Diosï imani jingoni jarhaspti, 10 ka enga ima no sési nitamakuarhienga, Tata Diosï méntkisï jarhuatasïreendi ka jarhuatasïreendi para ima jánhaskani ka ístu para Ejiptu anapu juramuti jaiapanhentani. Ka ima Joséni arhispti para Ejiptu juramuni ka imeeri kʼumanchikuarhu. 11 Joperu jiánisï, kʼarhingua ambe jarhaspti iámu Ejiptu ka Kanaáni, meru kánikua no sési nitamakuarhinhaxapti ka juchaari ióntki anapu parientiichaksï méntku no ma ambe jatsispti para arhani. 12 Joperu Jakobu mítespti eska Ejiptu jarhaspka tʼirekua* ka axaaspti juchaari ióntki anapu parientiichani, jiánksïsï ueenapti jini nirani. 13 Ka engaksï ménderu nípka Ejiptu, José aianguaspti ermanu jémbeechani neespi ima. Ka Ejiptu anapu juramuti niáraspti míteni Joséeri familieri ambe. 14 Ísï jimbo, José uandakua axakuaspti ka pʼitajkuarhispti taati jémba Jakobuni ka iámindu imeeri parientiichani: 75 kʼuiripuesptiksï. 15 Ísï jimbo, Jakobu Ejiptu kétsemaspti ka jima uarhispti ka juchaari ióntki anapu parientiichajtuksï jima uarhispti. 16 Sikemiksï paantaspti ka imani tumbarhuksï jatsiantaspti enga Abraáni sentabu* jimbo piákuantapka Amori uájpeechani jini Sikemi.

17 ”Ka meru jiáni enga niárani japkia jurhiatikua para úkuarhini ambe enga Tata Diosï aiakupka Abraánini, Israeli anapuechaksï sánderu uániisptia Ejiptu 18 asta jiáni enga máteru juramuti niárapka Ejiptu enga no mítepka Joséni. 19 I juramuti no sési kaasti juchaari iretarhu anapuechani ka arhiaspti taatiichani eskaksï ísku jurarkuapiringa charhakuechani paraksï uarhini. 20 Ka jiánisï Moisési andajpenuspti ka kánikua sési jáxespti.* Ka taati jémbeechaksï tanimu kutsï kʼuiriperaspti imeecheeri kʼumanchikuarhu. 21 Joperu engaksï taati jémbeecha arhinhapka eskaksï jatsispka para ísku jurarkuni Moisésini, Ejiptu anapu juramutiiri uájpa exentaspti ka ísï kʼuiriperaspti komueska imeeri uájpa. 22 Ísï jimbo, Moisési kánikua ambakiti ambe jorhendanhaspti Ejiptu ka juramukua jingoni uandasïreendi ka kʼéri ambe úsïreendi.

23 ”Ka enga na 40 uéxurhini andangutapkia, niraspti pʼorhembiani erachi jémbeechani,* Israeli uájpeechani. 24 Enga exepka eska Ejiptu anapu ma no sési kámaxapka israelitani ma, ima inchaakuspti kuájpini, ka ataspti ka uándikuspti Ejiptu anapuni. 25 Ima eratsespti eskaksï imeeri erachiicha kurhangupiringa eska Tata Diosï kuájpiaxapka imani úraparini, joperu imeechaksï no ísï exespti. 26 Ísï pauandikua, jima niáraspti engaksï tsimani israeliteecha uarhiperani japka ka arhiaspti eskaksï nóteru ísï kámberapiringia.* Arhiaspti: ‘Achamasïicha, chájtsï tsimarhani erachiiska. ¿Andijtsïsï ísï kámberani jaki?’. 27 Joperu ima enga atani japka erachi jémbani, pʼákchakuspti Moisésini ka arhispti: ‘¿Andi nékini arhiski tʼungini parari tʼu jindeeni juchaari juramuti ka juesi? 28 ¿Oreni jíndentu ísï uándikua eskari na uándikuka uitsindekua Ejiptu anapuni?’. 29 Enga Moisési ini ambe kurhaapka, sïpakuarhispti ka Madiánisï niraspti irekani ka jima tsimani uájpeechani kánguarhiaspti.

30 ”Ka 40 uéxurhini tátsekua, ánjeli ma xarhakuspti desierturhu, Sinaí juáta jimbo, anhatapu sapichurhu ma* xarhakuspti enga tixarani* japka. 31 Ka Moisési ísku pakareeraspti imani ambe jimbo enga exeni japka. Ka enga na sánderu andarhierapka para sánderu sési exeni, kurhachakuspti Tata Diosï Jeobani enga uandapka: 32 ‘Ji jindeeska chiiti ióntki anapu parientiicheeri Tata Diosï, Abraániiri Tata Diosï, Isaakiiri Tata Diosï ka Jakobueri Tata Diosï’. Ka Moisési ueenaspti manarani* ka nóteru tekaasptia sánderu andarhierani. 33 Ka Tata Diosï Jeoba arhispti: ‘Pʼiuanta kuarhachiichani jimboka pímbinhaxeska jimini engari atastani jaka. 34 Ji exeskia na engaksï Ejiptu anapuecha no sési kámani jaka juchiiti iretani ka kurhaaskia na engaksï kómu atsïkuarhini jaka ka kétseska parani pʼímutaantani. Ísï jimbo, jútkini, jimbokakeni ji Ejiptu axaaka’. 35 Ka nóksï jaiapanhentaspti Moisésini engaksï ísï arhipka: ‘¿Andi nékini arhiski tʼungini parari tʼu jindeeni juramuti ka juesi?’. Joperu imani ánjelini úraparini enga anhatapu sapichurhu xarhakupka Moisésini, Tata Diosï imanisï axapti para juramukuani ka para pʼímutaantani. 36 Ka i achamasï niraspti ka petaatantaaspti, uánikua ambe* úspti ka uánikua milagruechani uaaspti Ejiptu, mari Charhapitirhu ka ístu jiáni engaksï 40 uéxurhini jámapka desierturhisï.

37 ”Ka i jindeesti Moisési enga arhiapka Israeli anapuechani: ‘Tata Diosï erakuati chaari iretarhu nemani enga jindeuaka imeeri uandakua pári* paraksïni jarhuatani ísï eskani ji’. 38 I achamasï jindeesti enga Israeli anapuecha jingoni jámapka desierturhisï ka enga ánjeli jingoni japka, jiáni enga i ánjeli Sinaí juátarhu uandontskuarhekupka. Ka ístu, i achamasïsï jámapti juchaari ióntki anapu parientiicha jingoni. Ima achamasï intsïnhaspti Tata Diosïiri uandakuani enga uinhapikua jatsika parajtsïni juchantsïni íntskuntani. 39 Juchaari ióntki anapu parientiichaksï no uékaspti kurhajchani ka nóksï jaiapanhentaspti. Ka masi úsptiksï Ejiptu ninhenchantani 40 engaksï arhipka Aarónini: ‘Úchiajtsïni diosï úkateechani parajtsïni orhechepani, jimbokachi no míteska ambendi úkuarhinchia Moisési, ima engajtsïni Ejiptu petaatantaka’. 41 Ka imani jurhiatikuechani jimbo, diosï úkataksï ma úspti enga xáxepka eska beserru ma, kéjtsïtakusptiksï ka kʼuínchikuaksï úntaspti imani ambe jimbo engaksï úpka. 42 Ísï jimbo, Tata Diosï kéndikukuaspti ka jurajkuaspti eskaksï kómarhipiringa jurhiatani, lunani ka jóskuechani engaksï auandarhu jaka, ísï eskaksï Tata Diosïiri uandakua páriicha na karapkia: ‘Oh, Israeli anapuecha, ¿a no eskajtsïni no jíndenisï kéjtsïtachipka xáni mámaru ambe jiáni engajtsï 40 uéxurhini jámapka desierturhisï? 43 Chájtsï masi úska imani kʼumanchikua sïkuiriiri pákuarhini enga jindeeka para Moloki ka ístujtsï páska jóskueri diosï úkatani ma enga Refánini arhikuekajka. Chájtsï indeni diosï úkateechani úkuarhiaska parajtsï kómarhiani. Ísï jimbo, jíksïni Babilonia sánderu iauanisï chútantaaka’.

44 ”Ka engaksï desierturhisï jámapka, juchaari ióntki anapu parientiichaksï imeecha jingoni jatsispti Tabernakuluni.* Tata Diosï arhispti Moisésini eska úpiringa Tabernakuluni, ka xásïksï ma úspti eska Tata Diosï na exerapka. 45 Ka juchaari ióntki anapu parientiichaksï jurajkuminhaspti ka Josué jingonksï páspti imani ireteechani jimbo enga Tata Diosï juchaari ióntki anapu parientiichani japarini chútaantapka. Ka jima jarhaspti Dabidiiri jurhiatikuechani jamberi. 46 Ka Tata Diosï jaiapanhentasïreendi imani, ka ima kurhajkuarhispti eska intsïnhapiringa kóntperata para kʼumanchikua ma úkuni Jakobueri Tata Diosïni. 47 Joperu Salomónisï úkupti kʼumanchikua ma. 48 Joperu auandarhu anapu Tata Diosï no irekasïndi imani kʼumanchikuecharhu engaksï kʼuiripuecha uaajka. Ísïisti eska Tata Diosïiri uandakua pári na uandajka: 49 ‘Auanda jindeesti juchiiti kʼéri uaxantskua* ka echeri jindeesti juchiiti jatandukua. Jiájkani, ¿na jásï kʼumanchikuajtsïni ma úchiaa? Ísï uandasïndi Tata Diosï Jeoba. ¿O nani uaa ji mintsikuarhini? 50 ¿Andi no jísïni ú iámindu i ambe juchiiti jájki jingoni?’.

51 ”Achamasïicha engajtsï meru no kurhangujka. Chájtsï nóteru ambe ma pʼikuarherasïngia chaari mintsitarhu ka ístujtsï nóteru ambe ma uékasïngia kurhaani, chájtsï no méni uékasïnga kurhajchani espiritu santuni. Májkuentsï úxaka eska chaari ióntki anapu parientiicha. 52 Chaari ióntki anapu parientiichaksï no sési kaaspti iámindu Tata Diosïiri uandakua páriichani. Jo, imaksï uándikuaspti imeechani engaksï tʼuini uandantapkia eska jupiringa ima enga sési jámajka, ima engajtsï chá traisionariika ka uándikuni. 53 Chájtsï intsïnhaska Leini ísï eskaksï ánjeliicha na íntspintaka, joperujtsï chá no úxaka ambe enga jima uandajka”.

54 Engaksï ini ambe kurhaapka, imeechaksï kánikua ikiaspti ka ískuksï pakaraspti erateni ka úndasptiksï kirisïmiantani sïniichani. 55 Joperu Tata Diosï íntskuspti espiritu santu, ka ima auandarhu eranchespti ka exesti na enga xáni k’éri ambeeka Tata Diosï ka ístu exespti Jesúsini enga Tata Diosïiri jurhijkandani jimbo anhandetini japka, 56 ka uandaspti: “¡Exe je! Exexaka na enga mítakuarhetini jaka auanda ka ístuni exexaka Achamasïiri Uájpani enga Tata Diosïiri jurhijkandani jimbo anhandetini jaka”. 57 Jimajkani imeechaksï uinhachaspti ka óndikuarhisptiksï ka iáminduechaksï kúnguarhikuntaspti. 58 Engaksï na petaatantapkia iretarhu, úndasptiksï tsakapu jimbo atani. Ka imeecha engaksï kʼamanharhitantani japka, jimaksï peeraspti imeeri xukuparhakua ambe nani enga tumbi ma japka, i tumbi Saulu arhinhasïreendi. 59 Engaksï jamberi tsakapu jimbo atani japka, Estebani uandaspti: “Jesúsi, juchiiti Tata, jíkeni íntskuntaxaka juchiiti tsípikuani”.* 60 Jimajkani tinguikuatsespti ka uinhachaspti: “Tata Diosï Jeoba, asï miá ambe engaksï no sési úni jaka iicha”. Enga na ísï uandapkia, uarhispti.*