Segundu Karakata para Korintu anapuecha
2 Ji uandaskia eskaksïni no niuaka ménderu exeni paraksïni no kómu pʼikuastani. 2 Jimboka engaksïni ji kómu pʼikuastaaka, tátsekuarini né sési pʼikuastantaia jíndeni. Imeecha engani ji kómu pʼikuastauaka, imeechajkuksïsï jauati parajtsïni sési pʼikuastantani. 3 Jimboksïnisï ísï karachika parani no kómu pʼikuarherani jarhani imeechani jimbo engani jimbo jatsika parani sési pʼikuarherani jiáni engani niuaka, jimbokani sési mítetixaka eskajtsï chájtu tsípisïnga imani ambe jimbo engani ji tsípijka. 4 Ji kánikua kómu pʼikuarheraxapka ka ístuni kánikua uandanhiaxapka jimboksïnisï ueparini karachipka. Joperuksïni no jimbosï karachika parajtsï chá kómu pʼikuarherani, sánderu sési, parakajtsï míteaka na engaksïni xáni xénchajka ji.
5 Enga nema no sési pʼikuastpeka, nóreni jíndenisï no sési pʼikuastati, sánderu sési, chánksïnisï no sési pʼikuastati —chájtsïni sáni tekaachinta je engani ji ísï uandani jaka—. 6 Jimboka sésku jatiia indeni jingoni engajtsï chá sáno iáminduecha xukaka indeni achamasïni. 7 Joperujtsï iásï jatsiska para mintsita jingoni puákuntani ka sési pʼikuastantani para ima no jukari kómu pʼikuarherani jarhani ka niárani kuatantani. 8 Ísï jimbo, jíksïni kurhachexaka eskajtsï arhiaka eskajtsï xénchasïnga. 9 Ka ístu, ísï jimboksïnisï karachika: parani exeni sintsï úpirini ambe engaksïni ji arhika. 10 Engajtsï chá puákuntaska nemani, jíjtuni puákuntaaka ka engani nemani puákuntaaka iámindu ambe —engachkani ménisï puátspentakia ambe ma—, jindeesti paraksïni chánksïni jarhuatani ka Kristu mítetixati eska ísïiska, 11 parajtsïni Satanási no chʼanachini ka támisïjtsïni páni, jimbokachi sési mítetixaka na enga xáni mámaru jirinhakuntajka ima.
12 Engani niárapka Troasi parani uandantani ambakiti aianhperakuani Kristueri ambe ka enga mítakuarhepka puerta ma parani Tateeri ánchikuarhitani úni, 13 ji kánikua uandanhiaxapka* jimbokani no exentaspka juchiiti erachi* Tituni. Jimbosïni uandanuantapka ka Masedoniaisï niraspka.
14 ¡Juchachi diosmaiamukua arhisïnga Tata Diosïni! Jimbokajtsïni ima arhisïnga naniisïsï nirani engachi Kristuni jingoni uanopijka, ísïchi jámasïnga komueska jiáni engaksï kʼuiripuecha uanopijka jimbokaksï andaska. Tata Diosïiri ambe míteni, ísïisti komueska ambe ma enga kánikua sési jájkundejka ka imajtsïni juchantsïni úrasïndi paraksï iápurisï anapu kʼuiripuecha sïpiruni indeni ambe. 15 Para Tata Diosï, juchachi ísïiska komueska pʼuntsumikua ambe enga kánikua sési jájkundejka, jimbokachi Kristueri ambe uandantasïnga ka imeechaksï jamberi sïpirusïndi engaksï imani xanharu jimbo nirani jaka nani engaksï pʼímutanhantaaka* ka ístu imeecha jamberi engaksï imani xanharu jimbo nirani jaka nani engaksï kʼamajkunhaaka.* 16 Para iicha engani últimu uandaaka, ísïisti enajkiksï uarhikuani sïpiruni jaki, jimbokaksï imani xanharu jimbo niraxaka enga uarhikuarhu pájpejka, joperu para imeecha engani orheta uandaaka, ísïisti enajkiksï tsípikuani sïpiruni jaki, jimbokaksï imani xanharu jimbo niraxaka enga tsípikuarhu pájpejka. Ka jiájkani, ¿né sési jorhendakata jarhaski para ini ambe úni? 17 Jucha, jimbokachi jucha no atarantani jámaxaka Tata Diosïiri uandakuani* ísï eskaksï na újka uánikua kʼuiripuecha. Sánderu sési, Tata Diosïni japarini, jucha mintsita jingoni uandasïnga jimbokachi Kristueri chúxapatiiska ka jimbokajtsïni Tata Diosïsï axaka juchantsïni.