Ebreu
4 Ka Tata Diosï útasï aiatspexati eskachi uaaka mintsikuarhini ísï eska ima na mintsikuarhini jaka, ísï jimbo, ju je xéparintku jámani* parajtsï no ma repentku no úni imani jingoni mintsikuarhini. 2 Jimbokachi juchajtu aiangunhaska ini ambakiti aianhperakuani ísï eskaksï imeecha; joperu imeechani no marhuakuaspti ambe* engaksï kurhandipka, jimbokaksï no mintsikasïreenga ísï eskaksï imeecha engaksï kʼóru kurhandirapka. 3 Joperu jucha engachi mintsikaka, juchachi kʼóru mintsikuarhixaka, joperu imeecha jimbo engaksï no kurhandiraka ísï uandaspti “Ka jimbokani xáni ikiaxapka ísï uandaspka: ‘Imeechaksï no mintsikuarhiati ísï eskani ji na mintsikuarhini jaka’”, ka ísï uandaspti nájkiruka kʼamarapkia iámindu ambe úni desde enga ueenaka jarhani parhakpini. 4 Jimboka ísï karakata jarhaska Karakateecharhu eska ima ísï uandaspka jurhiatikua sieteeri ambe: “Ka enga na niárapkia jurhiatikua siete, Tata Diosï mintsikuarhispti ka nóteru ambe ma úsptia”. 5 Ka ístu uandasïndi: “Imeechaksï no mintsikuarhiati ísï eskani ji na mintsikuarhini jaka”.
6 Imeecha engaksï orheta aiangunhapka ambakiti aianhperakuani, nóksï mintsikuarhispti jimbokaksï no kurhandiraspka. Ísï jimbo, jimbokaksï kuerataxaka máru paraksï mintsikuarhini ima jurhiatikua, 7 jimbosï tátsekua Dabidi karapti salmu ma jimbo eska ima ménderu uaxastaspka jurhiatikua ma enga uandapka “iásï”. Jimboka ísïiska eskaksïni na karachipka: “Engajtsïni chá iásï kurhajchani jaka, asï jáma je tátsekua ísï no kurhanguni* eska chaari ióntki anapu parientiicha”. 8 Jimboka enga Josué paapiringa jima engaksï úpiringa mintsikuarhini, jiájkani Tata Diosï nóteru uandapirindia eska japiringa máteru jurhiatikua. 9 Ísï jimbo, útasï jarhasti máteru jurhiatikua para Tata Diosïiri ireta mintsikuarhini komueska sábadu ma jimbo. 10 Jimboka ima kʼuiripu enga mintsikuarhini jakaia ísï eska Tata Diosï na mintsikuarhini jaka, nóteru ambe ma úxatiia ísï eska Tata Diosï na mintsikuarhini jakaia jimboka kʼamaraskia úni ambe ma.
11 Ísï jimbo, ju je jánguarhintani parachi juchajtu mintsikuarhini ísï eska Tata Diosï, paraka no nema jámaaka támisï nirani ka májkueni no kurhandirani eska imeecha. 12 Jimboka Tata Diosïiri uandakua tsípiti jarhaska ka kánikua uinhapikua jatsisti. Sánderu sési atasïndi eska espada ma enga tsimapuru uarhomukukata jaka, ka xáni sési atasïndi enga jamberi újka arhukuni almani* ka espirituni* ka ístu kutukuechani ka senheata,* ka xarhatasïndi* ambe enga kʼuiripu ma eratsejka ka ambe enga pʼikuarhinhejka imeeri mintsitarhu. 13 Ka ambe enga xáni kueraakata jaka no jískakata jarhasti para ima, sánderu sési, méntku iámindu ambe pʼenojchakurakata jarhasti, ka imani engachi jatsika para kuenta íntskuntani, méntku iámindu ambe exesïndi.
14 Ka jimbokachi jucha jatsiska sánderu kʼéri saserdotini ma enga auandarhu inchaka,* enga jindeeka Jesúsi Tata Diosïiri Uájpa, ísï jimbo, ju je seguiriini jarhani imeeri ambe aianguani kʼuiripuechani. 15 Jimbokachi no jatsiska sánderu kʼéri saserdotini ma engajtsïni no uaaka pʼamojkuni juchantsïni, engachi no újka sési úni iámindu ambe, jimboka imajtu májkueni no sési nitamakuarhiska eska jucha, joperu ima kʼóru méntku no jukaraspti pekadu. 16 Ísï jimbo, ju je andarhierani Tata Diosïiri kʼéri uaxantskuani,* ima Tata Diosïiri enga kánikua kóntpintajka ka ju je no sáni chéparini* kómarhini parakajtsïni ima pʼamojkuaka ka ístujtsïni kánikua kóndentani jiáni engachi uétarhinchani jauaka eskajtsïni jarhuataaka.