Primeru Karakata para Korintu anapuecha

13 Engani ji mámaru jásï idioma jimbo uandapiringa o ísï uandani eskaksï ánjeliicha na uandajka ka jini ji no uékpini, ísïipiringa komueska tiámu* ma enga ísku kúskani jarhajka o komueska platiiu* ma enga ísku xamonhijka.* 2 Ka engareni Tata Diosï uinhapikua íntskupiringa parani ji uandantani imeeri uandakuani ka engani ji sési kurhangupiringa indeni ambe enga Tata Diosïiriika* ka ístuni iámindu ambe sési míteni, ka xáni kánikua mintsikani engani jamberini úpiringa juáteechani móskuani ka jini ji no uékpini, jiájkani ískuepirindi ambe engani xáni úni japiringa.* 3 Ka engani intsïmpipiringa ambe engani xáni jatsikuarheka parani kʼuiripuechani tʼireraani o jamberini juchiiti tsípikuani íntspini máteruechani jimbo parani sési pʼikuarherani ka jini ji no uékpini, jiájkani ískuepirindi ambe engani úni japiringa.

4 Ima enga uékpijka kánikua tekaantasïndi ka sési kámpisïndi. Ima enga uékpijka no enbidia pʼikuarherasïndi.* No jukari arhikuarhisïndi* ka no kʼéramakuarhisïndi, 5 no no sési pʼikuastpesïndi,* no úsïndi ambe ma para imajkumindu sési uéranchani, no sóntku ikiasïndi. No jatanhetspisïndi.* 6 No tsípisïndi enga no sési úkuarhijka ambe ma, sánderu sési, tsípisïndi enga iámindu ambe sési úkuarhijka. 7 Iámindu ambe tekaantasïndi, iámindu ambe jakajkusïndi, méntku erokuarhini jarhasïndi, méntkisï uinhapikuarhintasïndi para úni tekaantani.

8 Uékperakua no méni kʼamakurhiati.* Joperu ambe enga kʼóru kʼamakurhiaka, jindeesti eskaksï kʼuiripuecha nóteru jindeuakia Tata Diosïiri uandakua páriicha;* níjtuteruksï uaaia mámaru jásï idioma jimbo uandani;* niteruksï uaaia míteni ambe ma milagru ma jimbo. 9 Jimbokachi iásï no iámindu ambe míteska ka ístuchi no iámindu ambe uandantasïnga Tata Diosïiri uandakueri ambe; 10 joperu jiáni engachi na iámindu ambe míteakia ka engachi na iámindu ambe uandantaakia Tata Diosïiri uandakueri ambe, nóteru ma kʼuiripu jauatia enga no iámindu ambe míteaka o enga no iámindu ambe uandantaaka Tata Diosïiri uandakueri ambe. 11 Engani ji sapiipka, ji ísï uandasïreenga eska sapi ma, ísï eratsesïreenga eska sapi ma ka ísï kurhangusïreenga ambe ma eska sapi ma na kurhangujka. Joperu iásï engani kʼériikia, nóteruni ísï jámasïngia eska sapi ma. 12 Jimbokachi iásï espejurhu ma exexaka enga no káni sési xarharajka, joperu jiáni kʼóruchi sési exeakia. Iásï no iámindu ambe míteska Tata Diosïiri ambe, joperuni jiáni kʼóruni iámindu ambe sési míteakia ísï eskarini ima na sési míteka jíndeni. 13 Joperu i ambe kʼóru méntkisï jauati: mintsikani Tata Diosïni, erokuarhini eskajtsïni ima jarhuataaka ka uékperakua. Joperu uékperakuasï sánderu jukaparhakueti.