Roma

1 Ji Pablu, jíksïni karachixaka, Kristu Jesúsiiri jántspiriiska ka erakunhaska parani apostoliini, míndanhaska parani ambakiti aianhperakua aianhpini Tata Diosïiri ambe, 2 imani ambe enga ima ióntki aiatspipka, ambe engaksï imeeri uandakua páriicha* karantaka pímbinhasï Karakateechani jimbo, 3 ka i ambakiti aianhperakua, imeeri Uájpeeri ambesï uandajti. Ima ísï andajpenusti komueska kʼuiripu ma ka Dabidiiri kʼumanchikuarhu anapuesti, 4 joperu sési xarharasïndi eska ima Tata Diosïiri Uájpeeska, jimboka Tata Diosï tsítantaska espiritu santueri uinhapikua jimbo —jo, Jesukristu enga jindeeka juchaari Tata, 5 imani jimbojtsïnisï Tata Diosï kánikua kóndentajti.* Jesúsirini jíndeni erakusti parani apostoliini, parani jarhuataani iámindu iretarhu anapuechani paraksï mintsikani, paraksï kurhajchani ka paraksï kʼéri ambe arhini imeeri nombrini, 6 ka chájtujtsï indeni ireteecharhu uératini erakunhaska parajtsï tata Jesukristuni chúxapani—. 7 Jíksïni chánksïni karachixaka engajtsï Roma anapueka, chánksïni engaksïni Tata Diosï xáni xénchajka ka engajtsï erakunhaka parajtsï pímbinhasïini:

Ji kómarhisïnga eskaksïni Tata Diosï, enga jindeeka juchaari Taati, ka ístu tata Jesukristu kánikua kóndentaaka ka eskaksïni jarhuataaka parajtsï pínandikua jatsini.

8 Para ueenani jámani, tata Jesukristueri nombri jimbo, ji diosmaiamukua arhisïnga juchaari Tata Diosïni iámindu chánksïni jimbo, jimboka iámu parhakpinirhu uandanhasïnga na engajtsï xáni mintsikajka chá. 9 Jimboka ima Tata Diosï engani ji iámu mintsita* jingoni marhuakuni jaka, jimbokani uandantaxaka ambakiti aianhperakuani imeeri Uájpeeri ambe, ima sési mítetixati eskani ji no kuatantasïnga méntkuksïni kómarhijpicheni jarhani, 10 ka kómarhisïnga Tata Diosïni, engani úska nirani ka enga Tata Diosï ísï uékaska, eskaksïni iásï kʼóru uaakia nirani exeni. 11 Jíksïni uékaxakaia exeni paraksïni íntskuni Tata Diosïiri kóntperata ma ka ísïksïni úni uinhaperantani, 12 o sánderu sési, parachi uinhaperperantani indeni ambe jimbo engajtsï chá mintsikajka ka ístu ambe engani ji mintsikajka.

13 Joperu erachiicha,* ji uékasïnga eskajtsï chá mítetini jauaka eskaksïni ji uánikua xanhari uékaskia nirani exeni, nájkirukani iásï jamberi no úni jaka nirani, jimbokani uékasïnga exeni na enga jarhuataani jaka kʼuiripuechani ambe engachi aianhpika jima, ísï eska máteru ireteecharhu. 14 Jimbokani ísï pʼikuarheraxaka enajkini kánguani jaki ambe ma grieguechani ka ístu imeechani engaksï iauanisï anapueka,* imeechani engaksï jánhaskatiika ka ístu imeechani engaksï méntku no jánhaskajka. 15 Jimboksïnisï chánksïntu uékani jakaia aianguni ambakiti aianhperakua jini Roma. 16 Ka ji no kʼuratsesïnga uandantani ambakiti aianhperakuani. Jimboka i ambe Tata Diosïiri uinhapikueska paraksï pʼímutanhantani imeecha engaksï mintsikajka, paraksï orheta judiuecha pʼímutanhantani ka ístu grieguecha. 17 Ka imeechani engaksï mintsikajka, Tata Diosï exerauati ambe enga ima uandajka eska sési jarhaska paraksï ima sánderu mintsikani, ísï eska na karakata jaka: “Joperu ima enga sési jámajka, irekaati jimboka mintsikasïnga”.

18 Jo, auandarhu uératini, Tata Diosï kánikua ikiakuasïndi imani achamasïichani engaksï meru no sési ambe niátajka. Ka indeni jimbo engaksï xáni no sési jámajka, nóksï jurajkusïndi eska jurhimbikua ambe mítekuarhiaka. 19 Jimboka Tata Diosï exeraaskia ambe engaksï uaaka míteni imeeri ambe ka Tata Diosïsï sési exeraati. 20 Jimboka nájkirukachi no újka exeni Tata Diosïni, engaksï kʼuiripuecha sési exejka ambe enga ima kueraaka jiáni uératini enga parhakpini kueraanhaka, úsïndiksï exeni na enga jásïika ima. Exesïndiksï eska imeeri uinhapikua no méni kʼamakurhiaka ka eska imasï jindeeka Tata Diosï. Jimboksïsï no uaati uandani eskaksï no míteska Tata Diosïni. 21 Ka nájkirukaksï mítepka Tata Diosïni, nóksï kʼéri ambe arhisti ísï eska ima na jukanchaka, jimboka imasï Tata Diosïika, ka ístu nóksï diosmaiamukua arhisti, masi ústiksï ísku ambe ma eratseni ka nóksï ambe ma kurhangusïndi imeecheeri mintsitarhu. 22 Íksï kʼuiripuecha uandasïreendi eskaksï jánhaskatiispka, joperuksï tontuesti 23 ka nóteruksï kʼéri ambe arhistia imani Tata Diosïni enga no méni uarhiaka, sánderuksï sési exesti kʼuiripueni járhatiichani úkuarhiani engaksï kʼóru uarhijka paraksï kʼéri ambe arhiani, ka ístuksï pájarueni járhatiichani úkuarhiasti, animaliichani engaksï tʼámu jantsiriichani jukaajka ka ístu engaksï echerirhisï antsikukuarhijka* paraksï indeechani kʼéri ambe arhiani.

24 Ísï jimbo, Tata Diosï jurajkuasti paraksï ísï úni eskaksï imeecha na tsitijka mintsitarhu ka eskaksï ikichakueni jásï ambe uaaka paraksï kʼuratsetaani imeecheeri kuerpuechani. 25 Imaksï nóteru jakajkustia jurhimbikua ambe enga Tata Diosï jorhentpijka, masi ústiksï chkuanderakua ambe jakajkuni ka sánderuksï sési exesti kʼéri ambe arhini ka marhuakuni imani ambe enga Tata Diosï kueraaka ka no Tata Diosïni enga jindeeka Kuerajpiri enga jukanchaka para méntkisï kʼéri ambe arhinhani. Eska ísï úkuarhiaka. 26 Jimbosï Tata Diosï jurajkuati paraksï kʼuratsekua tsïtani ka ísku jándikua ambeksï niátani. Nanakeechaksï nóteru ísï jatsisïndia relasioni seksuali eska na jindeeka, nájkiruka Tata Diosï no ísï kuerauaka paraksï ísï jámani. 27 Ka ístu, tatakeechaksï nóteru ísï jatsisïndia relasioni seksuali nanakeechani jingoni, ísï eska na jindeeka, masi ústiksï tatakeechani tsitiani ka máteru tatakeechani jingonksï ísku jándikua ambe niátasti ka ikichakueni jásï ambe, ka intsïnhastiksïa ambe engaksï jirinhakuarhika* engaksï xáni no sési ambe niátaka.

28 Ka jimbokaksï ísï eratsesïreenga eska no uétarhisïreenga míteni Tata Diosïni,* Tata Diosï jurajkuasti paraksï imeecha seguiriini ísku ambe ma eratseni ka eskaksï imani ambe niátapiringa enga no sési jaka. 29 Imeechaksï kánikua tsitisïreendi no sési jámani, no sési ambe niátani, jukariksï tsitisïreendi ambe ma; kánikuaksï enbidiarpisïreendi, uándikpinksï jámasïreendi, uarhipeni, chkuanderani ka tsitisïreendiksï no sési ambe úkuani máteruechani; uandatspisïreendiksï 30 ka chkuanderakua ambeksï jauatatspesïreendi, nóksï sáni xénchasïreendi Tata Diosïni, no sésiksï uandasïreendi, kʼéramakuarhisïreendiksï ka arhikuarhini,* no sési ambeksï eratsesïreendi úni ka nóksï kurhajchaasïreendi taati jémbeechani, 31 nóksï ambe ma kurhangusïreendi, nóksï úsïreendi eskaksï na uandeenga, nóksï sési kámpisïreendi ka nóksï sáni pʼamojpesïreendi. 32 Imeechaksï sési mítesti ambe enga Tata Diosï uandajka —eskaksï uarhiaka imeecha engaksï ini ambe niátajka—, joperuksï seguiriixati ini ambe úni ka no indeni ambejkuksïsï újti, ístuksï sési exeasïndi imeechani engaksï ini ambe niátajka.