Segundu Karakata para Korintu anapuecha
10 Jiájkani ji Pablu, uékasïnga eskajtsï chá uaaka ambe engaksïni arhiaka. Engaksïni ji arhijka ambe ma, májkueni úsïnga eska Kristu jimboka ima kaxumbitiiska* ka kánikua sési kámpisïndi. Joperujtsï chá máru uandasïnga eskani ji ísku nemeeska ka eskani no sáni pʼímukukuarhisïnga engaksïni karachijka. 2 Ka ji uékapiringa eskaksï nóteru ísï eratsepiringia imeecha engaksï uandajka eska jucha ísï jámasïnga komueska parhakpini anapuecha, parani ji no uinhamu xukaani jiáni engaksïni niuaka exeni. 3 Jimboka nájkirukani jucha ini parhakpini jimbo irekani jaka, jucha no ísï uarhipesïnga eskaksï parhakpini anapuecha. 4 Jimboka inde uarhipetarakua ambe engachi jucha kámajka parachi uarhipeni, no parhakpini anapuesti, sánderu sési, Tata Diosï úsïndi eska inde ambe sánderu uinhapitiuaka parachi jucha úni kuáskuni indeni ambe enga ísï jaka komueska uíuinhasï tsïntsïkata ma. 5 Jimbokachi jucha kʼamajkuxaka mámaru jásï eratsekua ambe ka ójkutakua ambe enga pʼínguajka kʼuiripuechani paraksï no míteni Tata Diosïni. Ísïisti enajkichi jupikani jaki ambe engaksï kʼuiripuecha eratsejka ka paanchi jarhani paraksï Kristuni kurhajchani. 6 Ka jucha listu jarhaska parachi kastigariuani imeechani engaksï no sési ambe úni jaka jiáni engajtsï chá iámindu ambe jimbo kurhajchani jauakia Kristuni.
7 Chájtsï ísï exesïnga ambe ma eska na xarharajka uérakisï. Enga nema seguru jaka eska Kristueriiska, jatsisti para ménderu sési eratsentani arini ambe: ísï eska ima na Kristueriika, juchajtuchi imeeriiska. 8 Tatajtsïni íntskusti sésikua paraksïni uinhaperantani ka ísïjtsï chá sánderu mintsikani, ka no paraksïni chkérani, jimbosïni no sáni kʼuratsepiringa engani sánisï arhikuarhipiringa jimbokajtsïni Tatasï íntskuka indeni sésikua. 9 Joperuni no uékasïnga eskajtsï chá uandaaka eskaksïni ji uékasïnga chérani engaksïni ísï karachini jaka. 10 Máruksï uandasïndi: “Ambakiti ambejtsïni karachisïndi ka juramukua jingoni, joperu enga juchantsïni jingoni jarhajkia, ísku nemeeni xarharasïndi, ka méntku no sáni kurhandinchakuarhisti na enga uandajka”. 11 Enga nema ísï uandaaka, eska mítetini jauaka eska ambe engachi uandajka karteecha jimbo jiáni engachi no chánksïni jingoni jarhajka, eskachi májkueni uaaka jiáni engachi na chánksïni jingoni jauakia. 12 Jucha no uékasïnga ísïini eska imeecha engaksï arhikuarhijka, nijtuchi uéjki májkueni jámani. Imaksï sési xékuarhisïndi jimbokaksï uandasïnga eskaksï sési ambe úxaka ka ísïksï xarhatasïndi eskaksï no ma ambe kurhangusïnga.
13 Ka jucha no jukari jamberi arhikuarhiaka, imani ambe jimbojkuchisï arhikuarhijka engajtsïni Tata Diosï arhika eskachi uaaka,* jimbokachi ísï úskia ka ístu imajtsïni axasti chánksïni jingoni. 14 Jimboka engachi jucha chánksïni jingoni nípka, jucha imani ambejkuchisï úni japka ambe engajtsïni Tata Diosï arhipka ka juchaksïnisï ueenaka aianguni ambakiti aianhperakua Kristueri ambe. 15 Juchachi indeni ambe jimbojkusï arhikuarhini jaka, jimbokachi jucha úska ambe engajtsïni Tata Diosï arhika ka no imani ambe jimbo enga máteru kʼuiripu úka. Joperuchi jucha uékasïnga eskajtsï chá sánderu mintsikaaka Tata Diosïni paraka inde ambe engachi jucha úka, sánhani arhini jauaka etsakuarhini jima engajtsï chá jaka. Ka ísïchi jucha uaaka sánderu uánikua ambe úni. 16 Jucha uaaka nirani uandantani ambakiti aianhperakuani jiniani sánderu iauani engajtsï chá irekani jaka, parachi no jucha arhikuarhini jarhani imani ambe jimbo enga máteru nema úkia. 17 “Joperu ima enga arhikuarhijka, eska arhikuarhiaka jimboka míteska Tata Diosï Jeobani”. 18 Jimboka no imasï sési exenhajka enga jandiajku sési ambe uandakuarhini jarhajka,* sino imasï sési exenhajti enga Tata Diosï Jeoba sési ambe uandajka imeeri ambe.