Mateu
6 ”Xéparini je, asï jáma je ambakiti ambe úni* kʼuiripuechani japarini nomasi paraksïni imeecha exeni. Jimboka engajtsï ísï úska, chaari Taati enga auandarhu jaka nóksïni ma kóntperata íntskuati. 2 Engari jarhuataska nemani enga uétarhinchani jauaka,* asï jáma kústani jarhani trompetani ísï eskaksï na újka ísku apariicha jima engaksï judiuecha tánguarhijka paraksï Tata Diosïni kómarhini ka ístu xanharuechani jimbo, imaksï ísï úsïndi paraksï máteruecha kʼéri ambe arhiani. Jíksïni sési jimbo arhisïnga eskaksï imeecha intsïnhaskia imeecheeri kóntperatani. 3 Sánderu sési, engari jarhuataska nemani enga uétarhinchani jauaka, eska chiiti jájki uikixkandani anapu no míteaka ambe enga újka chiiti jájki jurhijkandani anapu; 4 ísï úparini, no nema míteati eskari jarhuataasïnga imeechani engaksï uétarhinchajka. Ka jimajkani chiiti Taati enga iámu ambe exejka, maiamuntaatikeni.
5 ”Engajtsï kómarhiaka, asï ísï ú je eska ísku apariicha. Imeechaksï tsitisïndi anhandetini kómarhini jima engaksï judiuecha tánguarhijka para Tata Diosïni kómarhini ka májkuenksï úsïndi eskineecharhu kʼérati xanharuechani jimbo paraksï máteruecha exeani. Jíksïni sési jimbo arhisïnga eskaksï imeecha intsïnhaskia imeecheeri kóntperatani. 6 Joperu tʼu, engari uékaaka kómarhini Tata Diosïni, incha chiiti kuarturhu ka engari na míkaakia puertani, kómarhi chiiti Taatini enga jima jaka enga no ma kʼuiripu újka exeni. Ka jimajkani chiiti Taati enga iámu ambe exejka, maiamuntaatikeni. 7 Engari kómarhini jauaka, nóri méntku úndaaka májku ambe uandani ísï eskaksï na újka ima kʼuiripuecha engaksï no míteka Tata Diosïni, engaksï eratsejka eskaksï kurhajchanhaaka jimbokaksï uánikua ambe uandasïnga. 8 Asï májkueni jáma je eska imeecha. Ante dejtsï jamberi kurhakuni ambe ma chaari Taatini, ima tʼuini mítesïndia ambe engajtsï uétarhinchani jarhajka.
9 ”Chájtsï jatsiska para ísï kómarhini:
”‘Juchaari Taati engari auandarhu jaka, eska niáraaka mítenhani eska chiiti nombri pímbinhasïiska. 10 Eska juuaka chiiti Reinu. Eska úkuarhiaka ambe engari tʼu uéjka, jini auandarhu ka ístu echerirhu. 11 Íntskujtsïni tʼirekua* para i jurhiatikua; 12 puáchentajtsïni imani ambe jimbo engachi no sési újka,* ísï eskachi jucha na puákuantajka imeechani engajtsïni no sési ambe úchijka. 13 Ka jarhuatajtsïni orhepani uérakuani tsʼéjkukuechani* ka ístujtsïni kuájchaku Noambakitiiri’.
14 ”Jimboka enga chá puákuantaska máteruechani ambe engaksïni no sési úchijka, ístuksïni chaari Taati auandarhu anapu puáchentaati chánksïni. 15 Joperu engajtsï chá no puákuantaska máteruechani ambe engaksïni no sési úchijka, ístuksïni chaari Taati no puáchentaati ambe engajtsï chá no sési újka.
16 ”Jiáni engajtsï kʼarhinda jauaka,* ásteru jáma je kómu nínharhini jarhani* ísï eskaksï na újka ísku apariicha, jimbokaksï imeecha kómu nínharhini jarhasïnga paraksï máteruecha exeni eskaksï kʼarhinda jarhaska. Jíksïni sési jimbo arhisïnga eskaksï imeecha intsïnhaskia imeecheeri kóntperatani. 17 Joperu jiáni engari tʼu kʼarhinda jauaka, aseiti pʼuntsumiti atajtsï ka jupanharhikuarhi. 18 Paraksïni no kʼuiripuecha exeni eskari kʼarhinda jarhaska, sino chiiti Taatijku enga jima jaka enga no ma kʼuiripu újka exeni, ka jimajkani chiiti Taati enga iámu ambe exejka, maiamuntaatikeni.
19 ”Ásteru jámia je kánerakuarhini jatsikuarhekua ambe echerirhu, nani enga seperi arhajka ka enga ambe ma niárajka kʼuereni ka nani engaksï sïpariicha niárajka sïpani. 20 Sánderu sési, kánerakuarhi je chaari jatsikuarhekua ambe jini auandarhu, nani enga seperi no arhajka ka enga ambe ma no niárajka kʼuereni ka nani engaksï sïpariicha no újka sïpani. 21 Jimboka nani enga jauaka chiiti jatsikuarhekua ambe, ístu jima jauati chiiti mintsita.
22 ”Éskua ísïisti komueska kuerpurhu anapu tʼíntskua. Engaksï chiiti éskuecha sési exeaka,* iámu chiiti kuerpu meremerexeati. 23 Joperu engaksï chiiti éskuecha jukari tsititspeni jámaaka,* iámu chiiti kuerpu pápkʼandu jauati. Joperu enga inde tʼíntskua engari tʼu jatsika jindeeka pápkʼandekua, ¡na xánimenduri pápkʼandu jaki tʼu!
24 ”No nema úsïndi tsimani patroniichani marhuakuani, jimboka máechakuani kurhunhiaka ka máteruni xénchaati o máechakuani sési marhuakuati ka máteruni ísku exeati. Nójtsï uaaka Tata Diosïni marhuakuni jarhani* ka ístu jánguarhintani jarhani kánikua sentabu andani.
25 ”Jimboksïnisï arhijka: ásteru uandanhiaia je chaari tsípikua jimbo,* ambejtsï tʼirea ka ambejtsï itsïmaa o chaari kuerpu jimbo, ambejtsï xukuparhaa. ¿Andi no sánderu jukaparhaski tsípikua eska tʼirekua ambe ka no sánderu jukaparhaski kuerpu eska xukuparhakua ambe? 26 Jingontku exea je pájaruechani engaksï auandarhisï jámajka, nóksï ambe ma jatsikusïndi nijtuksï pʼikuntajki, nijtuksï tánantajki tʼirekua ambe paraksï patsakuarhini, joperu chaari Taati auandarhu anapu tʼireraasïndi. ¿Andi chá no sánderu jukaparhaski eska imeecha? 27 ¿O chá máisï uaa sánderu sáni ióni irekani engajtsï niáraska uandanhiani? 28 Ístu, ¿andijtsïsï uandanhiajki xukuparhakua ambe jimbo? Jorhenguarhi je ambe ma exepariani imani tsïtsïkiichani engaksï juátarhisï andarajka. Nóksï ánchikuarhisïndi nijtuksï piruakua ambe újki; 29 joperu jíksïni arhisïnga eska Salomóni no niáraspka ísï xukuparhani eskaksï inde tsïtsïkiicha, nájkiruka xáni sési jásï ambe jatsikuarhepka. 30 Jimajkani, enga Tata Diosï ísï xukutajka juátarhu anapu uitsakuani enga iásï jukarini jaka ka pauani chpirirhu kʼuanijpanhani, ¿nóksïni sánderu xukutaa chánksïni, kʼuiripuecha engajtsï xáni sántku mintsikajka imani? 31 Ísï jimbo, asï jáma je uandanhiani ka uandani: ‘¿Ambechi tʼirea?’, o ‘¿Ambechi itsïmaa?’, o ‘¿Ambechi xukuparhaa?’. 32 Jimboka ima kʼuiripuechaksïsï xáni jánguarhintajti ini ambe jatsikuarheni engaksï no marhuakujka Tata Diosïni. Chaari Taati auandarhu anapu mítesti eskajtsï uétarhinchasïnga iámindu ini ambe.
33 ”Ísï jimbo, seguirii je orhetku peerani Tata Diosïiri Reinuni ka ístu imani ambe enga ima uandajka eska sési jarhaska, ka ísï úparini, ístujtsï intsïnhaaka iámindu ini ambe. 34 Ísï jimbo, asï méni uandanhia je pauandikua anapu ambe jimbo, jimboka ísï pauandikuajtu uandanhiata ambe jauaka. Jukariksï uánikua uandanhiateecha jarhasïndia mándani jurhiatikua.