Mateu

13 Ima jurhiatikua, Jesúsi uéraspti kʼumanchikuarhu ka marirhu uanamukuteni uaxakaspti. 2 Ka uánikua kʼuiripuechaksï niáraspti, jimbosï ima barku sapichu ma jimbo jatapti, ka jima uaxakaspti ka kʼuiripuechaksï marirhu uanamukuteni pakaraspti. 3 Jimajkani uánikua ambe jorhendaaspti ejempluechani jingoni. Arhiaspti: “¡Kurhaa je! Achamasï ma niraspti trigu jatsikuni. 4 Ka enga kʼuájpani* japkia, máru semiiechaksï xanharu jimbo andatseeraspti ka jurhasptiksï pájaruecha ka ántskantasptiksï. 5 Máteruechaksï jima andatseeraspti nani enga tsakapu jatandepka, jima enga no kánikua echeri japka, ka sóntkuksï tsikispti jimbokaksï sántku inchatsespka. 6 Joperu patsïsptiksï enga jurhiata andarapka, ka kʼarhisptiksï jimbokaksï imeeri sïranguecha no iauani inchatsespka. 7 Máteruechaksï jima andatseeraspti nani enga chekamikua ambe jukapka ka chekamikua ambe niáraspti sánderu kʼéni ka ójchakuraaspti planteechani. 8 Máteruechaksï jima andatseeraspti nani enga ambakiti echeri japka ka ueenasptiksï frutu jukani: máruksï 100 xanhari sánderu kánikua jukaspti, máteruechaksï 60 ka máteruechaksï 30. 9 Ima enga kurhandijka, eska jingontku kurhandiaka”.

10 Jimajkani, imeeri chúxapatiichaksï andarhieraspti ka kurhamarhisptiksï: “¿Andiresï ejempluechani jingoni jorhendaajki?”. 11 Jesúsi arhiaspti: “Chájtsï sésikua jatsiska para kurhanguni indeni ambe enga Tata Diosïiriika,* jo, auandarhu anapu Reinueri ambe, joperuksï imeecha nómbe. 12 Jimboka ima enga jatsika, niáraati sánderu intsïnhani ka sánderu uánikua ambe jatsini, joperu ima enga no jatsika, imani jamberi euanhantaati enga jatsika. 13 Jimbosïni ejempluechani jingoni jorhendaajka, jimbokaksï no exesïnga nájkirukaksï exejka ka nóksï kurhandini nájkirukaksï kurhaajka ka nóksï ambe ma úsïndi kurhanguni. 14 Imeechani arhikuekaaxapti Isaíasi enga uandapka: ‘Chájtsï kurhauaka, joperujtsï no méni kurhanguaka ambe engajtsï kurhaajka. Chájtsï exeaka, joperujtsï no méni kurhanguaka ambe engajtsï exejka. 15 Jimboka i kʼuiripuecheeri mintsita nóteru ambe ma pʼikuarherasïndia. Óndikuarhistiksï* ka mínharhistiksï paraksï no úni exeni ka nijtu kurhaani, nijtuksï kurhanguni imeecheeri mintsita jingoni, niksï andarhientani Tata Diosïni* parani ji sési pʼikuastaantani’.

16 ”Joperu tsípisïngajtsï chá, jimbokajtsï chá kʼóru exesïnga ka kurhaani. 17 Jimbokaksïni ji sési jimbo arhisïnga eskaksï uánikua Tata Diosïiri uandakua páriicha* ka imeecha engaksï sési jámeenga, uékasïreendiksï exeni ambe engajtsï chá exeni jaka, joperuksï no exesti, ka uékasïreendiksï kurhaani ambe engajtsï chá kurhaani jaka, joperuksï no kurhaasti.

18 ”Ísï jimbo, kurhaa je ambe enga arhikuekajka ima achamasïiri ejemplu enga nípka trigu jatsikuni. 19 Enga nema kurhaajka Tata Diosïiri Reinueri ambe joperu no kurhanguni, jurhasïndi Noambakiti ka murutasïndi ambe enga imeeri mintsitarhu jatsikunhapka. I semiia jindeesti enga xanharu jimbo andatseerapka. 20 Ima semiia enga andatseerapka nani enga tsakapu jatandepka, imeesti enga kurhaajka Tata Diosïiri uandakuani ka sóntku jiókuarhini tsípikua jingoni. 21 Joperu no iauani inchaskuasïndi sïranguechani imeeri mintsitarhu ka niárasïndi sántku kʼéni. Ka jirejiresï chkésïndi* enga niárajka uandanhiata ambe jatsini o no sési kánhani jimboka jiókuarhiska Tata Diosïiri uandakuani. 22 Ima semiia enga jima andatseerapka nani enga chekamikua ambe jukapka, imeesti enga kurhaajka Tata Diosïiri uandakuani joperu jurajkusïndi eskaksï iásï anapu* uandanhiateecha ka jatsikuarhekua ambe, enga ísï támisï pájpejka, ójchakuraaka ka ísï jimbo Tata Diosïiri uandakua no niárasïndi sánderu uánikua semiia jukani. 23 Ka ima semiia enga ambakiti echeri jimbo andatseerapka, imeestiksï engaksï kurhaajka Tata Diosïiri uandakuani ka kurhangunksï ambe enga arhikuekajka. Íksï kʼóru niárasïndi sánderu uánikua semiia jukani. Máruksï 100 xanhari sánderu, máteruechaksï 60 ka máteruechaksï 30”.

24 Jimajkani jorhendaaspti máteru ejempluni jingoni: “Auandarhu anapu Reinu ísïisti komueska achamasï ma enga ambanharhi semiia jatsikujka imeeri echeri jimbo. 25 Ka jiáni engaksï iáminduecha kʼuíni japka, jurhaspti ima enga ikiakuenga imani achamasïni, kʼuájpaspti* no sési jásï uitsakuani jima enga trigu jatsikunhapka ka kéndikuspti jima uératini. 26 Enga trigu ueenapkia tsikini ka píntsïteecha jukani, ístu andaraspti no sési jásï uitsakua. 27 Jimajkani, jurhasptiksï achamasïiri jántspiriicha ka arhisptiksï: ‘Tata, ¿nóri ambanharhi semiia jatsikuspi chiiti echerirhu? Jiájkani, ¿andisï no sési jásï uitsakua jukarini jaki?’. 28 Ka ima arhiaspti: ‘Ima engareni ikiachejka, ima ústi indeni ambe’. Jántspiriichaksï kurhamarhispti: ‘¿Uékasïndi eskachi niuaka murutani uitsakuani?’. 29 Ima arhiaspti: ‘Nómbe, parajtsï no trigu jingoni pʼíkuni uitsakuani engajtsï murutani jámaaka. 30 Jurajkua je eskaksï májku kʼéri kʼéaka asta jiáni enga pʼikuntskueuakia, ka pʼikuntskuarhu, arhiauaka ánchikuarhiriichani eskaksï orheta no sési jásï uitsakuani murutaaka ka eskaksï tánantaaka* para kurhirani ka eskaksï tátsekua triguni uarhotaaka ka jimaksï patsani nani engani tʼirekua ambe patsajka’”.

31 Ístu jorhendaaspti máteru ejempluni jingoni: “Auandarhu anapu Reinu ísïisti komueska semiia mostaseeri enga achamasï ma imeeri echeri jimbo jatsikupka. 32 I semiia sánderu sapinharhisïndi, joperu enga tsikijkia niárasïndi xáni kʼéni komueska anhatapu ma, jimboksïsï auandarhu anapu pájaruecha indeeri rameechani jimbo jurhajti kuájchakukuarhini”.

33 Ka jorhendaaspti máteru ejempluni jingoni: “Auandarhu anapu Reinu ísïisti komueska xarhipiti* enga uarhiiti ma jeuetapka kánikua* jarina* jingoni ka tátsekua iámu tsïreri niáraspti xarhipini”.

34 Jesúsi jorhendaaspti ini ambe kʼuiripuechani ejempluechani jingoni ka méntkisï enga jorhentpienga, ejempluechani jingoni jorhentpisïreendi. 35 Ísï úkuarhispti ambe enga Tata Diosïiri uandakua pári uandarini japkia: “Ejempluechani jingoni jorhentpiaka; uandantaaka imani ambe enga jískakata jaka desde enga ueenaka jarhani parhakpini”.*

36 Tátsekua enga Jesúsi uandanuantapkia kʼuiripuechani, inchaakuspti kʼumanchikuarhu. Imeeri chúxapatiichaksï andarhieraspti ka arhisptiksï: “Aiangujtsïni ambe arhikuekasïni ima ejemplu no sési jásï uitsakueri enga jima andarapka nani enga trigu jukapka”. 37 Ka Jesúsi ueenaspti aianguani: “Ima achamasï enga ambanharhi semiia jatsikupka, Achamasïiri Uájpani arhikuekasïndi. 38 Echeri, parhakpinini arhikuekasïndi. Ambanharhi semiia, imeechani arhikuekaasïndi engaksï Tata Diosïiri Reinurhu inchaaka. No sési jásï uitsakua, jindeestiksï Noambakitiiri uájpeecha. 39 Ka ima enga ikiakuenga achamasïni ka enga niárapka kʼuájpani* no sési jásï uitsakuani, jindeesti Noambakiti. Pʼikuntskua arhikuekasïndi jiáni enga nóteru ióni kueratani jauakia para kʼamajkunhani parhakpini* ka ánchikuarhiriichaksï jindeesti ánjeliicha. 40 Ísï eska na murutanhajka uitsakua ka kurhiranhani, májkueni úkuarhiati jiáni enga nóteru ióni kueratani jauakia para kʼamajkunhani parhakpini.* 41 Achamasïiri Uájpa axauati imeeri ánjeliichani, ka imeeri Reinurhu, ánjeliichaksï kénditaati iámindu imani ambe enga no sési ambe úrpijka* ka ístu imani kʼuiripuechani engaksï no újka ambe enga lei uandajka, 42 ka jornarhuksï kʼuanijpauati nani enga kurhini jaka. Jimaksï pʼíaraati uerani ka kirisïmiantauatiksï sïniichani.* 43 Imani jurhiatikuechani jimbo, imeecha engaksï sési jámajka ísïksï meremerexeati komueska jurhiata imeecheeri Taatiiri Reinurhu. Ima enga kurhandijka, eska jingontku kurhandiaka.

44 ”Auandarhu anapu Reinu ísïisti komueska ambe ma enga kánikua jukaparhaka enga echeri ma jimbo inchaskukata japka ka enga achamasï ma exentapka. Ima achamasï ménderu inchaskuntaspti, ka jimboka xáni tsípispka, níntaspti ka íntspikuarhispti iámindu ambe enga xáni jatsikuarhepka ka piántaspti imani echerini.

45 ”Ístu, auandarhu anapu Reinu ísïisti komueska kʼuiripu ma enga iauanisï nirajka negosiu ambe úni para ambakiti perleechani jirinhaani. 46 Enga na exentapkia perla ma enga kánikua jukaparhapka, níntaspti ka jirejiresï íntspikuarhispti iámindu ambe enga xáni jatsikuarhepka ka piáspti imani perlani.

47 ”Ístu, auandarhu anapu Reinu ísïisti komueska kurucha pʼitamatarakua* ma engaksï marirhu kʼuanimapka ka enga mámaru járhati kurucheechani pʼitamaapka. 48 Enga na uinipkia kurucha pʼitamatarakua, antsitasptiksï marirhu uanamukuteni jamberi, jimaksï uaxakaspti ka ueenasptiksï erakuani ka támu jatsiraani ambakiti kurucheechani, joperuksï kʼuanikuaspti imeechani engaksï no marhuauenga. 49 I ambesï úkuarhiati jiáni enga nóteru ióni kueratani jauakia para kʼamajkunhani parhakpini.* Juuatiksï ánjeliicha ka támuksï peerauati no sési úriichani ka ístuksï támu peerauati imeechani engaksï sési jámajka 50 ka no sési úriichanksï jornarhu kʼuanijpauati nani enga kurhini jaka. Jimaksï pʼíaraati uerani ka kirisïmiantauatiksï sïniichani.

51 ”¿Kurhanguskijtsï ambe engamindu arhikuekajka iámindu i ambe?”. Imaksï arhispti: “Jo”. 52 Jimajkani ima arhiaspti: “Enga ísïika, mítetini ja je arini ambe: ima jorhentpiri enga auandarhu anapu Reinueri ambe jorhendanhajka, ísïisti komueska kʼumanchikuarhu anapu achamasï ma enga pʼínditantajka ambe enga xáni jatsikuarhejka, jimbanhi ambe ka ístu ióntki anapu ambe”.

53 Enga na jorhendaapkia ini ejempluechani jingoni, Jesúsi kéndikuspti. 54 Enga na niántapkia imeeri iretarhu, ueenaspti jorhentpini jima engaksï judiuecha tánguarhijka para Tata Diosïni kómarhini ka kʼuiripuechaksï ísku pakaraspti. Uandasïreendiksï: “¿Andisï xáni jánhaskatii i achamasï ka néna úsïni xáni kʼérati milagruechani uaani? 55 ¿Andi i no karpinteru uájpeeski? Ka amamba María arhinhasïndi, ¿no ísïiski? Ka Santiagu, José, Simóni ka Judasï, ¿nóksï iiri ermanuecheski? 56 ¿Ka andi nóksï ixú irekaski pirembeecha? Jiájkani, ¿néna úsïni i achamasï iámindu ini ambe úni?”. 57 Ka ini ambe jimbo, nóksï jakajkuspti* imani. Joperu Jesúsi arhiaspti: “Tata Diosïiri uandakua párini ma, iápurisïksï janhanharhisïndi, menusi imeeri ireta jimbo nijtu imeeri kʼumanchikuarhu”. 58 Ka jimbokaksï sántku mintsikaspka, Jesúsi no uánikua milagruechani uaaspti jima.