Apokalipsisi
5 Ístuni exespka eska ima enga kʼéri uaxantskuarhu* uaxakatini japka kámaxapka imeeri jájki jurhijkandani jimbo karakata* irhikukata ma enga tsimapuru* karanharhikukata japka. Sési míkuarhetixapti siete seiuechani jingoni. 2 Ka exespka uíuinhasï ánjelini ma enga uinhachaparini ísï uandantani japka: “¿Né jukanchaski pʼirakuni indeni karakatani ka pʼikuani seiuechani?”. 3 Joperu no nema jarhaspti auandarhu, nijtu echerirhu ka nijtu jini inchatsetini enga úpiringa pʼirakuni indeni karakatani* ka exeni ambe enga jima karanharhikukata japka. 4 Ji pʼiáraspka uerani xáni no sési pʼikuarherani jimboka no nema jarhaspka enga jukanchapka pʼirakuni indeni karakatani* ka exeni ambe enga jima karanharhikukata japka. 5 Joperureni orhejtsïkuti ma arhispti: “Ásteru ueraia. Exe, ima Leoni enga Judáeri kʼumanchikuarhu anapueka ka enga Dabidiiri sïrangueka, andastia. Ísï jimbo, imasï uaati pʼirakuni indeni karakatani* ka pʼikuani indeni siete seiuechani”.
6 Ka jima enga kʼéri uaxantskua* japka ka tʼámu kerubiniicha ka ístu orhejtsïkutiicha, exespka eska jima terujkani karichi sapichu ma jarhaspka enga ísï xarhareenga enajki kéjtsïtanhapi. Siete sïuanguechani jukaaspti ka siete éskuechani. —Éskuechaksï indeni siete espirituechani arhikuekaasïndi engaksï Tata Diosïiriika ka engaksï iámu parhakpinirhu axanhaka—. 7 Karichi sapichu jirejiresï andarhieraspti ka pʼíkuspti indeni karakatani* enga jájki jurhijkandani jimbo kámani japka ima enga uaxakatini japka kʼéri uaxantskuarhu.* 8 Ka tʼámu kerubiniicha ka 24 orhejtsïkutiicha, tinguixurhikusptiksï Karichi sapichuni. Mándani arhinksï arpa ma kámaxapti ka platoniichani engaksï orueriipka ka engaksï kʼuájtsïtakua* uinirini japka. —Inde kʼuájtsïtakua pímbinharhatiicheeri kómarhikuechani arhikuekaasïndi—. 9 Ka jimbanhi pirekuaksï ma piresïndi enga ísï arhijka: “Tʼujkuresï jukanchaka pʼíkuni indeni karakatani* ka pʼikuani seiuechani, jimbokari tʼu kéjtsïtanhaska ka chiiti iurhiri jingondi piaaska kʼuiripuechani paraksï Tata Diosïni marhuakuni, kʼuiripuecha engaksï táchani jásï kʼumanchikuarhu* anapueka, engaksï mámaru jásï idioma uandajka ka engaksï táchani iretarhu ka kʼérati iretarhu anapueka. 10 Tʼuri úska eskaksï juramutiipiringa ka eskaksï saserdotiipiringa paraksï juchaari Tata Diosïni marhuakuni. Ka indeechaksï echerirhu juramuati”.
11 Exespka ka uánikua ánjeliichani kurhachakuaspka engaksï uirhipandani japka kʼéri uaxantskuarhu,* kerubiniichani ka orhejtsïkutiichani. Xánksï uánikuespti: 10 mili xanhari 10 mili ka mili xanhari mili, 12 ka uinhachaparinksï uandasïreendi: “Karichi sapichu enga kéjtsïtanhaka jukanchasti juramukua intsïnhani, jatsikuarhekua ambe, jánhaskakua, uinhapikua, eska kʼéri ambe exenhaaka, eska kʼéri ambe arhinhaaka ka eska újchakuranhaaka”.
13 Ka kurhaaspka eska ambe enga xáni kueraakata jaka auandarhu, echerirhu ka jini inchatsetini ka marirhu, méntku iámu ambe, eskaksï ísï uandaxapka: “Eska ima enga kʼéri uaxantskuarhu* uaxakatini jaka ka ístu Karichi sapichu újchakuranhaakaksï, kʼéri ambeksï exenhaaka, kʼéri ambeksï arhinhaaka ka uinhapikuaksï intsïnhani para méntkisï”. 14 Ka tʼámu kerubiniichaksï uandasïreendi: “¡Eska ísï úkuarhiaka!”. Ka orhejtsïkutiichaksï tinguixurhispti ka kómarhisptiksï Tata Diosïni.