Galasia
2 Jimajkani 14 uéxurhini ísï tátsekua, ji ménderuni karhamantaspka Jerusaléni Bernabé jingoni ka pájtaspka Tituni. 2 Ka niraspka karhamani jimbokarini Tata exeraspka ambe ma ka aianguaspka erachiichani* indeni ambakiti aianhperakuani engani no judiuechani aianguani jaka. Joperu imeechankusïni aianguapka engaksï kʼéri ambeepka, parani sési mítetini jarhani eskani no ísku jatini uiriixapka ka eskani no ísku jatini uiriiska. 3 Titu jíndeni jingoni jámaxapti, joperuksï méntku no arhispti eska imajtu jatsispka para pasïri pʼikujtsïkuni tsʼiuerakuani* nájkiruka ima grieguepka. 4 Joperu jiánisï ueenati jarhani ambe ma engaksï kúnguarhikuarhu japka máru erachi arhikateecha engaksï ueenapka no sési ambe uandani, imeechaksï sánhani arhispti inchaakuni kúnguarhikuarhu jimbokaksï uékasïreenga exeni eskachi jucha nóteru jántspiriiskia, jimbokachi Kristu Jesúsiiri chúxapatiiska ka afuersaksï uékasïreendi eskachi jucha ménderu leiiri jántspiriipiringa. 5 Joperuni jucha méntku no jurajkutakuarhespka* ka nijtuchi úpi imani ambe engaksï imeecha uékeenga, parajtsï chá úni seguiriini jarhani mintsikani ambakiti aianhperakuani enga jurhimbikua ambeeka.
6 Ka inde achamasïicha engaksï xáni kʼéri ambeeka, indeecha engaksï xáni janhanharhinhajka, nójtsïni ambe ma arhistachisti. Ka jíndeni ambeia né uéjkiksï jindeeni, jimboka Tata Diosï no exesïnga na enga xarharajka ambe ma uérakisï. 7 Sánderu sési, imeechaksï exesti eskani ji arhinhaska parani nirani aianguani no judiuechani* ambakiti aianhperakuani, ísï eska Pedru na arhinhaka para nirani judiuechani* aianguani, 8 jimboka ima enga íntskuka uinhapikua Pedruni para judiuecheeri apostoliini, jíndenturini íntskusti uinhapikua parani apostoliini imeecheeri engaksï no judiueka. 9 Ka imeechaksï jakajkusti eskarini Tata Diosï kánikua kóndentaska. Jimajkani Santiagu, Sefasi* ka Juanu, achamasïicha engaksï orhejtsïkuenga kúnguarhikuani, íntskusptijtsïni imeecheeri jájki jurhijkandani anapu jíndeni ka Bernabéni ka uandasptiksï: “Sési jarhasti, chá ní je aianguani no judiuechani, joperuni jucha judiuechani niuaka aianguani”. 10 Ambe engajtsïni kʼóru arhipka jindeespti eskachi exeani japiringa imeechani engaksï no ma ambe jatsikuarheka, ka indeni ambejtuni jánguarhintaxaka úni.
11 Joperu jiáni enga Sefasi Antiokía jupka, ji arhinharhikuspka ambe enga no sési úni japka.* 12 Jimboka ante de ima achamasïicha niárani enga Santiagu axaapka, Pedru pʼindespti no judiuechani jingoni tʼireni, joperu engaksï na indeecha niárapkia, ima nóteru uékasïreendia imeecha jingoni tʼireni ka jarhariaspti jimboka chérhiasïreenga imeechani engaksï pasïri pʼikujtsïkupka tsʼiuerakuani. 13 Ka máteru judiuechajtuksï ueenaspti májkueni jámani ka Bernabé jamberi ísï jámaspti eska imeecha. 14 Ísï jimbo, engani ji exepka eskaksï ima no ísï jámaxapka eska na terukuntajka ambakiti aianhperakuani jingoni enga jurhimbikua ambeeka, ji iáminduechani japarini arhispka Sefasini: “Tʼuri judiueska joperuri no ísï irekaxaka eska judiu ma, sino ísï eskaksï na irekajka no judiuecha, jiájkani, ¿andiresï afuersa uéjki eskaksï no judiuecha imani ambe uaaka engaksï judiuecha pʼindeka úni?”.
15 Jucha engachi judiueka desde engachi andajpenuka ka nóchi pekadoriini ísï eskaksï no judiuecha, 16 mítetixakachi eska Tata Diosï ísï exesïnga nemani komueska kʼuiripu* ma enga sési jámajka, jimboka mintsikasïnga tata Jesukristuni ka no jimboka úsïnga ambe enga lei uandajka. Jimbochisï jucha mintsikani jaka Kristu Jesúsini: parakajtsïni Tata Diosï ísï exeaka komueska kʼuiripu ma enga sési jámajka jimbokachi mintsikasïnga Kristuni ka no jimbokachi úsïnga ambe enga lei uandajka. Jimboka Tata Diosï no nemani uaaka ísï exeni komueska kʼuiripu ma enga sési jámajka indeni jimbojku enga úni jaka ambe enga lei uandajka. 17 Joperu engachi jucha jánguarhintani jaka parajtsïni Tata Diosï ísï exeni komueska kʼuiripu ma enga sési jámajka Kristuni jimbo ka útasïchi pekadu ambe exeminhani, jiájkani, ¿Kristueski engajtsïni pekadu ambe úrani jaka? ¡Méntku nómbe! 18 Engani ji iásï jauatantani japiringa ambe engani xerentaka ióntki, jiájkani no úni japiringa ambe enga lei uandajka. 19 Jimbokani leini jimbo, ji uarhiska parani nóteruni únia ambe enga lei uandajka, sánderu sési, parani úni irekani para Tata Diosï. 20 Ji Kristuni jingoni cháparhatakata jarhaska chkarirhu. Nóteruni jísïni irekani jakaia, sánderu sési, Kristusï irekani jati jíndeni jingoni. Ísï jimbo, i tsípikua engani iásï irekani jaka, irekaxaka jimbokani mintsikasïnga Tata Diosïiri Uájpani, imani engareni xénchaka ka enga íntspika imeeri tsípikuani jíndeni jimbo. 21 Ji no uandaxaka eskani ji no uékasïnga eskarini Tata Diosï kóndentaaka, jimboka enga Tata Diosï leini jimbo niárajka ísï exeni nemani komueska kʼuiripu ma enga sési jámajka, jimajkani méntku no marhuasti enga Kristu ísï uarhika.