Segundu Karakata Pedrueri
1 Ji Simóni Pedru, tata Jesukristueri jántspiriiska ka apostoli, ka karachixakaksïni chánksïni engajtsï úkia sési mintsikani ísï eska jucha,* indeni jimbo enga juchaari Tata Diosï iámindu ambe sési újka ka ístu Tata Jesukristu, ima engajtsïni pʼímutantajka:
2 Eskaksïni Tata Diosï sánhani arhiaka sánderu kánikua kóndentani* ka eskaksïni sánderu pínandikua íntskuaka, jimbokajtsï sési míteska Tata Diosïni ka ístu Jesúsini enga jindeeka juchaari Tata. 3 Jimbokajtsïni Tata Diosï imeeri uinhapikua jimbo íntskuska* ambe enga xáni uétarhijka parachi jucha tsípiti jarhani ka parachi sési marhuakuni imani,* indeni jimbo engachi jucha sési míteka imani engajtsïni ióarhika, jimboka ima xáni kʼéri ambeeska ka sési kámpini.* 4 Ini ambe jimbo, ambakiti ambejtsïni aiachisti ka kʼéri ambe, paraka indeni ambe jimbo engajtsïni aiachika, chájtsï uaaka espiritu máeni ísï eska Tata Diosï. Jimbokajtsï chá nóteru ísï jámasïngia eskaksï parhakpini anapuecha engaksï xáni no sési jámajka jimbokaksï xáni no sési ambe tsitisïnga.
5 Ísï jimbo, engajtsï na mintsikaakia, kánikua jánguarhinta je sési kámpini;* engajtsï na sési kámpini jauakia, jánguarhinta je sánderu sési míteni jurhimbikua ambe; 6 engajtsï na sánderu sési míteakia jurhimbikua ambe, jánguarhinta je pʼíngukuarhini; engajtsï na pʼíngukuarhini jauakia, jánguarhinta je tekaantani; engajtsï na tekaantani jauakia, jánguarhinta je marhuakuni Tata Diosïni;* 7 engajtsï na marhuakuni jauakia Tata Diosïni,* jánguarhinta je ísï xénchperani enajkijtsï iáminduecha ermanutiipirini; engajtsï na ísï xénchperani jauakia enajkijtsï iáminduecha ermanutiipirini, jánguarhinta je iámindu kʼuiripuechani xénchaani. 8 Jimboka engajtsï chá ísï úni jauaka, ka sánderujtsï sési xarhatani ini ambe, chájtsï no méni ísku jauaka ka nójtsï jurajkuaka ambakiti ambe úni* jimbokajtsï sési míteskia juchaari Tata Jesukristueri ambe.
9 Jimboka ima enga no ísï újka no exesïndi, jimboka mínharhisïnga para no exeni tʼíntskuani* ka mirikurhisti eska puáminhantaskia ambe enga ióntki no sési niátapka. 10 Ísï jimbo erachiicha,* útasï sánderu kánikua jánguarhinta je parajtsï seguiriini jarhani jukanchani imeecha jingoni jarhani engaksï ióarhinhaka ka engaksï erakunhaka. Jimboka engajtsï seguiriini jauaka ini ambe úni, nójtsï méni no sési niátaaka. 11 Ka ísï jimbojtsïsï kánikua kóndenhantaaka, jimbokajtsï uaaka inchani indeni Reinurhu enga jindeeka para méntkisï enga juchaari Tata Jesukristueriika, ima engajtsïni pʼímutantajka.
12 Jimboksïnisï uéjka méntku miátantani jarhani ini ambe, nájkirukajtsï chá sési mítekia ini ambe ka sésijtsï uaxastakata jarhania jimbokajtsï míteskia jurhimbikua ambe. 13 Joperu engani útasï ini tabernakulu jimbo jauaka,* ji ísï exesïnga eska uétarhisïnga eskaksïni méntku miátantani jauaka ambe ma paraksïni tsínharhitani, 14 jimbokani míteska eskani no ióni jimbo jurajkuakia ini tabernakuluni ísï eskarini juchaari Tata Jesukristu na aiangupkia. 15 Ji jánguarhintaaka xáni eskani xáni uaaka para jiáni engani ji nóteru jauakia, chá úni miáni* ini ambe.
16 Jimboka jiáni engaksïni jucha aiangupka na enga xáni uinhapitiika juchaari Tata Jesukristu ka eska junguaka, juchaksïni no uandantskua ambejkuksïnisï aianguka engaksï kʼuiripuecha ísku újtsïkuarhentajka, jimbokachi jucha exekuarhiska na enga xáni kʼéri ambeeka ima. 17 Jimboka Tata Diosï enga jindeeka Taati, janhanharhisti ka kʼéri ambe ústi jiáni enga xáni tʼíntskapka ka enga ísï arhipka: “I jindeesti juchiiti Sapi* engani xáni xénchajka; ji jaiapanhentasïnga”. 18 Jo, jiáni engachi jucha imani jingoni japka pímbinhasï juáta jimbo, jucha ísï kurhaaspka auandarhu uératini.
19 Ísï jimbochisï jucha sánderu mintsikajkia eska ísï úkuarhiaka ambe enga xáni uandapka Tata Diosï; jingontku exe je iámindu ini ambe. Ka ambe enga xáni uandanhakia, jatsisti para chaari mintsitarhu ísïini komueska kandela* ma enga meremerexejka jima enga pápkʼandeka. Asï jurajku je ini ambe úni astaka erandeaka ka astaka na xarharaakia ima jóskua enga xarhentku andarajka. 20 Jimbokajtsï chá míteska eska no kʼuiripuecheeri ambeeska ambe enga xáni uandajka Karakateecharhu eska úkuarhiaka. 21 Jimboka no kʼuiripusï ma uandaka ambe enga úkuarhiaka, sánderu sési, Tata Diosïsï uandaraati kʼuiripuechani ísï eska espiritu santu na arhiauenga.*