Juanu
17 Enga na ísï uandapkia, eranchespti ka uandaspti: “Taati, niárastia jandora. Kʼéri ambe arhi chiiti uájpani parakeni chiiti uájpajtu kʼéri ambe arhini, 2 ísï eskari na sésikua íntskuka para juramukuani iámindu kʼuiripuechani, paraka ima íntsauaka tsípikua para méntkisï imeechani engari tʼu íntsaaka. 3 Ini ambeksïsï jatsiti para úni paraksï jatsini tsípikua para méntkisï: eskaksïni míteaka tʼungini,* tʼujkurisï jindeeka Tata Diosï enga sési jimboeka, ka eskaksï míteaka imani engari tʼu axaka, tata Jesukristuni. 4 Jíkeni kʼéri ambe arhiska ixú echerirhu; kʼamaraskia úni ambe engareni tʼu arhika. 5 Ísï jimbo, Taati, pántsïrini auandarhu parani ji tʼungini jingoni jarhani, ísï eskani na tʼungini jingoni japka ante de parhakpini jarhani.
6 ”Ini achamasïichani engareni tʼu íntsaaka ixú parhakpinirhu, aianguaskia na engari arhinhajka. Chiitiisptiksï ka íntsaaskarini, ka indeechaksï ústi ambe engari tʼu uandajka. 7 Iásïksï mítestia eska chiitiiska iámindu ambe engareni tʼu íntskuka; 8 jimbokani aianguaskia ambe engareni tʼu arhika ka indeechaksï jakajkusti ka iásïksï sési jimbo mítestia eskani ji chiiti nombri jimbosïni juka ka jakajkustiksï eskarini tʼu axaska. 9 Indeechanisïni kómarhijpikuani jaka, ji no kómarhijpikuaxaka parhakpini anapuechani, sánderu sési, indeechani engareni tʼu íntsaaka, jimbokaksï chiitiiska; 10 ka chiitiisti iámindu ambe enga juchiitiika, ka chiiti ambe juchiitiisti ka indeechajtsïni kʼéri ambe arhisti jíndeni.
11 ”Ji nóteruni parhakpinirhu jarhaskia, joperu indeechaksï kʼóru parhakpinirhu jarhasti ka jíkeni tʼungini niraxaka andarhientani. Taati, tʼu engari pímbinhasïika, kuájchakua* chiiti nombri jimbo, indeni nombri jimbo engani ji aianguakia, parakaksï indeecha májkueuaka* ísï eskachi jucha na májkueka.* 12 Engani ji indeecha jingoni japka, ji exekuarhiaxapka chiiti nombri jimbo, indeni nombri jimbo engani aianguakia; ka kuájchakuaska ka no ma niárasti tsïncheni, imajku enga kʼamajkunhaaka, paraka ísï úkuarhiaka eska na arhijka Karakateecharhu. 13 Joperu iásï, jíkeni niraxamka andarhientani ka ini ambe uandaxaka iásï engani útasï parhakpinirhu jaka parakaksï indeechajtu kánikua tsípiaka, ísï eskani ji na tsípijka. 14 Ji aianguaskia ambe engari tʼu uandajka, joperu parhakpini anapuechaksï ikiakuasïndi jimbokaksï indeecha no ísï jámasïnga eska parhakpini anapuecha, ísï eskani ji na no májkueni jámajka eska parhakpini anapuecha.
15 ”Nókini kómarhixaka eskari kénditauaka parhakpinirhu, sino eskari kuájchakuauaka Noambakitiiri.* 16 Indeechaksï no ísï jámasïndi eska parhakpini anapuecha, ísï eskani ji na no májkueni jámajka eska parhakpini anapuecha. 17 Pímbinhajkuantsï* imani ambe jingoni engari tʼu uandajka; jimboka ambe engari tʼu uandajka, jurhimbikua ambeesti. 18 Jimboka ísï eskarini tʼu na axaka parhakpinirhu, jíjtuni axaaska parhakpinirhu. 19 Ji pímbinhaxekuarhintasïnga indeechani jimbo parakaksï indeechajtu pímbinhasï jauaka indeni ambe jimbo enga jurhimbitkueka.
20 ”Jíkeni no indeechani jimbojkusï kómarhini jaka, ístukeni kómarhixaka imani kʼuiripuechani jimbo engajtsïni niáraaka mintsikani indeecheeri uandakua jimbo, 21 parakaksï méntku iáminduecha májkueuaka. Ísï eskari tʼu, Taati, na jíndeni jingoni jaka ka ji tʼungini jingoni, eskaksï indeechajtu májkueuaka juchantsïni jingoni; ka ísï úparini, parhakpini anapuechaksï jakajkuati eskarini tʼu axaska. 22 Jíjtuni májkueni janhanharhiaska* ísï eskarini tʼu na janhanharhika* jíndeni, parakaksï indeechajtu májkueuaka ísï eskachi jucha na májkueka: 23 ji indeechani jingoni jauaka ka tʼuri jíndeni jingoni jauaka, parakaksï indeecha sési jimbo májku kʼéri jauaka. Ísïksï parhakpini anapuecha míteati eskarini tʼu axaska ka eskari májkueni xénchaaska eskarini jíndeni na xénchaka. 24 Taati, kurhachexakakeni eskaksï jíndeni jingoni jauaka indeecha engareni tʼu íntsaaka ka eskaksï exeaka eskarini tʼu k’éri ambe úska, jimbokarini tʼu tʼuini xénchasïreengia ante de parhakpini jarhani. 25 Taati engari iámindu ambe jurhimbitku újka, parhakpini anapuechaksïni nótki mítexati, joperu jíkeni kʼóru míteska ka iásï indeechaksï mítestia eskarini tʼu axaska. 26 Ji aianguaskia na engari arhinhajka ka útasïni aianguauaka parakaksï indeechajtu ísï xénchauaka máteru kʼuiripuechani ísï eskarini tʼu na xénchajka jíndeni, ka ísï úparini, ji indeechani jingoni jauaka”.