Galasia
5 Kristujtsïni pʼímutantasti parachi jucha nóteru jántspiriinia. Ísï jimbo, uíuinhasï ja je ka asï jáma je jurajkutakuarheni parajtsï ménderu jántspiriini.
2 Exe je, ji Pablu, jíksïnisï arhikuarhini jaka eska engajtsï chá pasïri pʼikujtsïkuska tsʼiuerakuani,* méntku no ma ambe marhuauati ambe enga Kristu úka. 3 Ka ménderuksïni arhiaka, ima enga pasïri pʼikujtsïkujka tsʼiuerakuani, jatsisti para úni ambe enga xáni uandajka Lei. 4 Chá engajtsï uéjka eska leini jimbo Tata Diosïksïni ísï exeaka komueska kʼuiripuecha engaksï sési jámajka, chájtsï jarharitixaka Kristuni. Nóterujtsï uékaskia eskaksïni ima kánikua kóndentaaka. 5 Joperuchi jucha, espiritu santuni jimbo uékaxakachia eskajtsïni Tata Diosï ísï exeaka komueska kʼuiripuecha engaksï sési jámajka, jimbokachi mintsikasïnga. 6 Jimboka enga nema Kristu Jesúsi jingoni jarhajka, méntku no marhuasïndi eska pasïri pʼikujtsïkukuaka tsʼiuerakuani nijtu no pʼikujtsïkukuni. Ambe enga kʼóru uétarhijka jindeesti mintsikani, ka enga nema mintsikajka, xarhatasïndi eska xénchpesïnga.
7 Chájtsï sési uiriixapka. Jiájkani, ¿néksïni ójkutaxaki parajtsï chá nóteru únia ambe enga jurhimbikua ambeeka? 8 Ambe engaksïni jorhendajka imeecha engaksïni ójkutani jaka, no Tata Diosïni jimboesti, ima engaksïni erakuka. 9 Sántku xarhipiti,* niárasïndi iámu tsïrerini xarhiperani. 10 Ji mintsikaxaka eskajtsï chá ísï eratseaka eska ji, chá engajtsï Tatani jingoni jaka. Joperu ima engaksïni ójkutani jaka, né uéjki jindeeni, kastigarinhaati ísï eska na jirinhakuarhini jaka. 11 Erachiicha,* engani ji útasï jorhentpini japiringa eska uétarhisïnga pasïri pʼikujtsïkuni tsʼiuerakuani,* imeechajtsïni no jámapirindi xáni no sési kámani ka nóteru nema no sési exepirindia* engani ji jorhentpini jaka eska Jesúsi chkarirhu ma* uarhiska. 12 Uékapiringa sáni eskaksï kaponi* úkuarhipiringa ima achamasïicha engaksïni uéjka támisï jánhastani.
13 Erachiicha, chájtsï erakunhaska parajtsï nóteru jántspiriinia. Joperu engajtsï ísï nóteru jántspiriikia, asï eratsi je eskajtsï uaaka úni ambe enga kuerpu tsitijka, sánderu sési, jimbokajtsï xénchperasïnga, jarhuajpera je iáminduecha. 14 Jimboka i ambesï jindeeka úni ambe enga xáni uandajka Lei: “Xénchaa máteru kʼuiripuechani* ísï eskari tʼujkumindu na xénchakuarhijka”. 15 Joperu, engajtsï chá útasï seguiriini jauaka no sési kámberani, ísïjtsï kámberani jarhani enajkijtsï katsarperani jaki ka máteruechani auantani, xéparini je parajtsï no uándikperani.
16 Jimboksïnisï ísï arhini jaka: seguirii je ísï jámani eska espiritu santu na uéjka, ka engajtsï jánguarhintaaka ísï úni, méntkujtsï no uaaka ambe enga kuerpu tsitijka. 17 Jimboka kuerpu no terukuntasïnga espiritu santuni jingoni, jimboka méntku máteru ambe tsitisïnga, ka nijtu espiritu santu terukuntajki kuerpu jingoni. Ka indeni jimbo engaksï inde tsimarhani no terukujka, chájtsï no úsïnga úni ambe engajtsï uéjka. 18 Ísï jimbo, engaksïni espiritu santu arhijka ambe engajtsï jatsika para úni, jimajkani chájtsï no jatsiska para úni ambe enga lei uandajka.
19 Ka juchachi mítetixaka ambe enga kuerpu niátajka, ka jindeesti ísku jándikua ambe* niátani, ikichakueni jásï ambe, ka no sáni kʼuratsekua jingoni niátani no sési jásï ambe,* 20 diosï úkateechani kómarhiani, sïkuamikua ambe kámani,* no úni sési pájperani máteruechani jingoni, uarhipeni jámani, jatanhetspini jámani, no sési jásï ikiani, no sési arhirperani máteruechani jingoni, inchaakukuani kʼuiripuechani paraksï no májku kʼéri jarhani, imani ambe jámani jakajkuni ambe engaksï kʼuiripuecha jorhentpijka, 21 enbidiarpini jámani, kauini jámani, ka tsïnchentani kʼuínchikuecharhisï ka ístu máteru i jásï ambe. Jíksïni mátirku arhixaka eskaksïni na arhipkia, eskaksï no pʼiuaka Tata Diosïiri Reinuni ima kʼuiripuecha engaksï ini ambe niátajka.
22 Joperu espiritu santu úsïndi eska kʼuiripu ma niáraaka xénchpeni, kánikua tsípini, pínandikua jatsini, tekaantani, ambakiti kʼuiripueni, sési kámpini, mintsikani, 23 iatsitakuarhu jámani,* pʼíngukuarhini. Ka no ma lei jarhasti enga máteru ambe uandajka. 24 Ka imeecha engaksï Kristu Jesúsiiriika, chkarirhuksï cháparhatasti imeecheeri kuerpuni imani ambe jingoni engaksï xáni únchajka ka ambe engaksï xáni tsitijka.
25 Engachi ísï irekani jaka eska espiritu santu na uéjka, jimajkani, ju je seguiriini ísïmindu jámani eska espiritu santu na uéjka. 26 Ju je no jámani kʼéramakuarhini, nijtuchi andaperani jámani, nijtu máteruechani jámani enbidiariuani.