Ebreu

11 Mintsikani jindeesti meru jakajkuni eska úkuarhiaka ambe enga ma erokuarhini jaka, mintsikani* eska meru ísïiska ambe enga ma jakajkujka nájkiruka no exeni jauaka. 2 Ka jimbokaksï ióntki anapuecha* ísï mintsikasïreenga, exesptiksï eska Tata Diosï jaiapanheantasïreenga.

3 Jimbokachi mintsikasïnga, úsïngachi exeni eska auanda ka echeri* sési peeranhaska jimboka Tata Diosï ísï uandaska, ísï jimbo, ima ambe enga xarharajka imani ambe jimbosï niárati jarhani enga no xarharajka.

4 Jimboka mintsikasïreenga, Abeli sánderu ambakiti ambe kéjtsïtakuspti Tata Diosïni ka eska Kaíni. Ka jimboka ísï mintsikasïreenga, Tata Diosï xarhatakuspti eska jaiapanhentasïreenga jimboka Abeli sési jámasïreenga ka Tata Diosï jaiapanhentaspti ambe enga kéjtsïtakupka. Ka nájkiruka uarhikia, útasïchi uánikua ambe jorhenguarhisïnga enga ísï mintsikaka.

5 Jimboka mintsikasïreenga, Enoki pánhaspti paraka no exepiringa uarhikuani, ka no nema úspti exentani jimboka Tata Diosï páspka. Ka antede pánhani, ima exespti eska Tata Diosï jaiapanhentasïreenga. 6 Ístu, enga nema no mintsikajka, no úsïndi jaiapanherantani Tata Diosïni, jimboka ima enga Tata Diosïni andarhierajka, jatsisti para jakajkuni eska ima jarhaska ka eska kóndentasïnga imani enga jánguarhintajka úni ambe enga Tata Diosï uéjka.

7 Jimboka mintsikasïreenga, Noé chénharhispti* Tata Diosïni ka arka ma úspti para imeeri kʼumanchikuarhu anapuechani pʼímutaantani ka ísï tátsekuasï úpti enga Tata Diosï na aiangupkia eska úkuarhipiringa ambe enga nótki exenhani japka. Ka jimboka ísï mintsikasïreenga, xarhataspti eskaksï parhakpini anapuecha jirinhakuarhispka eskaksï kʼamajkunhapiringa ka niáraspti ísï exenhani komueska kʼuiripu ma enga sési jámajka jimboka mintsikasïreenga.

8 Jimboka mintsikasïreenga, Abraáni kurhajchaspti Tata Diosïni enga uandajpapka ka uéakuspti imeeri iretarhu ka imani echeri jimbo niraspti nani enga Tata Diosï uékani japka íntskuni komueska erensia. Uéakuspti nájkiruka no mítepka nanisï nirani japi. 9 Jimboka mintsikasïreenga, Abraáni imani echeri jimbo irekaspti enga aiaminhapka, ísï irekaspti enajki no jima anapuepirini ka enajki máteru echeri jimbo japirini. Kʼumanchikuecha sïkuiriiri jimbo irekaspti Isaaki ka Jakobu jingoni, imeecha jingoni engaksï ístu pʼipiringa ambe enga ima aiaminhapka. 10 Jimboka ima erokuarhixapka imani ireta jimbo irekani enga uíuinharhati pítsekuechani jukaaka, imani iretani enga Tata Diosï uandaka na enga jáxepiringa ka enga ima úka.

11 Jimboka mintsikasïreenga, Sarajtu intsïnhaspti uinhapikua para úni sapini ma kánguarhini nájkiruka jatiripkia,* jimboka mítespka eska mintsinharhikueska ima enga ísï aiakuni japka. 12 Ísï jimbo, ma achamasï jimbojku enga ísï pʼikuarhereenga enajki nóteru úpirinia sapiichani kánguarhiani,* uánikua kʼuiripuechaksï niárasti jarhani, xáni uáni komueska auandarhu anapu jóskuecha ka xáni uáni enga jamberi no nema újka miiuani ísï eska kutsari enga marirhu uanamukuteni jarhajka.

13 Iámindu inde kʼuiripuecha kánikuaksï mintsikaspti asta jiáni jamberi engaksï uarhika, nájkirukaksï no pʼika imani ambe engaksï aiaminhapka. Ka nájkiruka i ambe sánderu orhepatini úkuarhipiringa, imeechaksï ísï pʼikuarherasïreendi enajki úkuarhipia iámu ambe ka tsípisptiksï engaksï ísï aiaminhapka ka uandantasptiksï kʼuiripuechani japarini eskaksï uérakua anapuespka ka eskaksï ma ratujku irekapiringa echerirhu. 14 Ka imeecha engaksï ísï uandajka, xarhatasïndiksï eskaksï méntku jámaxaka jirinhani nani irekani. 15 Joperu engaksï méntku miántani japiringa nani engaksï uérapka, xékuntapirindiksï néna kʼuanhatsentani. 16 Joperuksï iásï jánguarhintaxati paraksï jima irekani nani enga sánderu sési jándeka ka enga auandarhu uératini jurhajka. Jimbosï Tata Diosï no sáni kʼuratsejti imeechani jimbo nijtu kʼuratsejki engaksï imeecha uandajka eska imeecheeri Tata Diosïiska, jimboka ima úkuaskia ireta ma paraksï imeecha jima irekani.

17 Jimboka mintsikasïreenga, Abraáni ísï úspti enajki kéjtsïtapia Isaakini jiáni enga Tata Diosï tsʼéjkupka, jo, ima achamasï enga tsípipka enga ísï aiaminhapka sáno kéjtsïtaspti imeeri máechakua uájpani, 18 nájkiruka Tata Diosï arhipka: “Isaakini jimboksïsï juuati imeecha engaksï arhinhaaka eskaksï chiiti uájpeeska”.* 19 Joperu ima kurhanguspti eska Tata Diosï úpiringa tsítantani imeeri uájpani, ka ísï úspti, Tata Diosï no jurajkuspti eska uájpa uarhipiringa. Ka i ambe xarhataxapti ambe enga úkuarhipiringa sánderu orhepatini.

20 Jimboka mintsikasïreenga, Isaakijtu újchakuraspti Jakobuni ka Esaúni, jimboka aianguaspka ambe enga úkuarhipiringa sánderu orhepatini.

21 Jimboka mintsikasïreenga, enga Jakobu uarhini japkia, mándani arhispti újchakuraani Joséeri uájpeechani, ka imeeri tenhexkuarhikua* jimbo pʼíngukuarhiparini, kʼéri ambe arhispti Tata Diosïni.

22 Jimboka mintsikasïreenga, José uandaspti eskaksï Israeli uájpeecha uéakuntapiringa Ejiptu,* ka ístu enga uarhini jámeengia, arhiaspti* eskaksï no jima jurajkuapiringa imeeri úniichani.

23 Jimbokaksï mintsikasïreenga, Moisésiiri taati jémbeechaksï tanimu kutsï jískaspti enga ima na andajpenupkia, jimbokaksï exespka eska kánikua sési jáxespka ka nóksï sáni chéspti no kurhajchani juramutini. 24 Jimboka mintsikasïreenga, enga Moisési na kʼépkia nóteru uékasptia eska arhinhapiringa eska faraoniiri nanaka uájpeespka. 25 Ima uékaspti no sési kánhani Tata Diosïiri ireta jingoni ka eska ma ratku tsípikuarhini pekadu ambe jingoni, 26 jimboka ima ísï exesïreenga eska iauani sánderu ambakiti ambeespka ísï kʼuratsetanhani komueska Kristu ka eska Ejiptu anapu jatsikuarhekua ambe, jimboka mintsita jingoni erokuarhixapka eska kóndenhantapiringa. 27 Jimboka mintsikasïreenga, uéakuspti Ejiptu ka méntku no sáni chéspti juramutini ikiatani, jimboka Moisési seguiriixapka kánikua tekaantani enajki exeni japi imani enga no nema újka exeni. 28 Jimboka mintsikasïreenga, úntaspti Paskuani ka iurhiri atamutaspti puerteecharhu paraka Tata Diosïiri ánjeli no ma ambe úkuapiringa* imeecheeri orheta uájpeechani.

29 Jimboka mintsikasïreenga, Tata Diosïiri ireta mari Charhapitirhisï parhikuspti ka ísïksï niraspti parhikuni enajki kʼarhikʼarhindepi. Joperu engaksï Ejiptu anapuecha jámapka parhikuni, itsï mátirku ópchakuraaspti.

30 Jimboka mintsikasïreenga, Tata Diosïiri ireta siete jurhiatikua uanotaspti Jerikóni ka bardeechaksï xerekuarhentaspti. 31 Jimboka mintsikasïreenga, Raabi, ima uarhiiti enga ísku jándiipka, no uarhispti imeecha jingoni engaksï no kurhajchapka Tata Diosïni, jimboka sési erokaaspka imani achamasïichani engaksï echerini nípka exeni.

32 ¿Ka ambeteruksïni arhiaia? Jimbokaksïni no úpiringa méntku iámindu ambe aianguni Jedeóniiri ambe, Barakiiri, Sansóniiri, Jeftéeri ka Dabidiiri ambe ka ístu Samueliiri ambe ka máteru Tata Diosïiri uandakua páriicheeri* ambe. 33 Jimbokaksï mintsikasïreenga, andaasptiksï juramutiichani, jarhuajpesptiksï para sési úkuarhini ambe ma, uánikua ambeksï aiaminhaspti, mímukuasptiksï leoniichani, 34 chpiri méntku no ma ambe úkuaspti, úsptiksï uérakuni paraksï no espada jimbo uándikunhani, uinhapikuarhintasptiksï engaksï chkérini japka, nóksï sáni chésïreendi engaksï nireenga uarhipeni ka chéraasptiksï imeechani engaksï nípka imeecheeri ireta jingoni uarhipeni. 35 Jarhasptiksï máru uarhiitiicha engaksï uarhiranchapka nemani joperuksï ménderu exeantaspti jimbokaksï tsíntaspka, joperuksï jarhaspti máteru achamasïicha engaksï no sési kánhapka jimbokaksï no uékasïreenga jurajkuni Tata Diosïni ka ísïksï úspti parakaksï úpiringa sánderu sési irekuarhini engaksï na tsíntapiringia. 36 Ísïisti, máruksï tsʼéjkunhaspti engaksï teresmarhuapka ka kʼuikirhiani, ka no inde ambejku, kadeneecha jingonksï jótaaspti ka ónhaani. 37 Tsakapu jimboksï ataaspti, tsʼéjkunhasptiksï, sierra jimboksï kachundurhiaspti* ka espada jingonksï uándikuaspti, jini ka jiniksï jámasïreendi karichi ka chibueri sïkuiri jingoni xukuparhatini, ménisïksï niáraspti uétarhinchani, úkua jukanchasïreendiksï ka no sésiksï kánhani, 38 ka i kʼuiripuechaksï kánikua ambeespti para i parhakpini. Ískuksï jámasïreendi desierturhisï, juáteecharhisï, kuebeecharhisï ka kʼérati pʼorhoteecharhisïksï pakarasïreendi.

39 Ka nájkirukaksï iáminduecha mítepka eska Tata Diosï jaiapanheantasïreenga jimbokaksï mintsikasïreenga, nóksï intsïnhaspti ambe engaksï aiaminhapka, 40 jimboka Tata Diosï tʼuini eratsekata jatsispkia eskajtsïni íntskupiringa sánderu ambakiti ambe juchantsïni, paraksï no imeecha orheta pʼikurhinhantani pekadu ka jucha nótki ambe.