Roma
5 Ísï jimbo, jimbokachi mintsikasïnga, iásï Tata Diosïjtsïni ísï exesïndia komueska kʼuiripuecha engachi sési jámajka. Jiájkani, Tata Jesukristuni jimbo, ju je seguiriini jarhani sési pájperani* Tata Diosïni jingoni. 2 Jimbokachi jucha mintsikasïnga Jesúsini, úsïngachi andarhierani Tata Diosïni ka ístujtsïni Tata Diosï kánikua kóndentasïndi. Ka ju je sési pʼikuarherani* jimbokachi erokuarhixaka eskajtsïni Tata Diosï kʼéri ambe exeaka. 3 Ísï jimbo, ju je sési pʼikuarherani* engachi no sési nitamakuarhini jauaka, jimbokachi míteska eska engachi no sési nitamakuarhini jarhajka, inde ambejtsïni jarhuatasïndi parachi sánderu tekaantani; 4 ka engachi ísï tekaantajka Tata Diosïjtsïni jaiapanhentasïndi; engajtsïni Tata Diosï jaiapanhentajka, niárasïngachi sánderu mintsikani eskajtsïni ima kóndentaaka, 5 ka nóchi méni kʼuratsekua jingoni pakaraaka engachi ísï mintsikani jauaka; jimboka imani espiritu santuni jimbo engajtsïni íntskujka, Tata Diosïjtsïni xarhatachesïndi eskajtsïni xénchasïnga.
6 Kristu uarhisti pekadoriichani jimbo jiáni enga Tata Diosï ísï uaxastakata jatsipkia, ka i ambe ísï úkuarhisti jiáni engachi útasï chkérini japka. 7 Jamberi no nema uarhiati imani achamasïni jimbo enga sési jámajka, joperu imani achamasïni jimbo enga ambakiti kʼuiripueka, jamberi ini achamasïni jimbo kʼóru nema uékaati uarhini. 8 Joperu Tata Diosïjtsïni xarhatachesti na engajtsïni xáni xénchajka enga ini ambe úka: jimboka jiáni engachi útasï pekadoriipka Kristu uarhisti juchantsïni jimbo. 9 Jesúsiiri iurhirini jimbo, iásïjtsïni Tata Diosï ísï exesïndia komueska kʼuiripuecha engachi sési jámajka, jimbochisï iásï uaakia sánderu mintsikani eskachi jucha pʼímutanhantaaka ima jurhiatikua enga Tata Diosï xarhataaka na enga xáni ikiani jaka. 10 Juchachi no úsïreenga sési pájperani Tata Diosïni jingoni, joperuchi iásï úsïngia sési pájperani imani jingoni enga imeeri Uájpa ísï uarhika, jiájkani, iásïchi uaakia sánderu mintsikani eska Jesúsiiri tsípikua jimbo, uaakachi pʼímutanhantani iásï engachi sési pájperantakia Tata Diosïni jingoni. 11 Kánikuachi sési pʼikuarherasïnga imani ambe jimbo enga Tata Diosï úka Tata Jesukristuni úraparini, jimbokachi iásï imani jimbosï úkia sési pájperantani Tata Diosïni jingoni.
12 Jiájkani, ma achamasï jimbojkusï niárati jarhani pekadu parhakpinirhu ka pekadu jimbo niárasti jarhani uarhikua, ka ísï, iámindu kʼuiripuechaksï niárasïndi uarhini, jimbokaksï iáminduecha pekadoriiska... 13 Jimboka ante de Moisésiiri Lei jarhani, pekadu tʼuini jarhasptia parhakpinirhu, joperu enga no jarhajka lei, no nema uaati arhinhani eska no sési ambe úxaka. 14 Joperu uarhikua juramukuasti iámindu kʼuiripuechani jiáni uératini enga Adáni irekaka asta Moisésiiri jurhiatikuechani jamberi, nájkirukaksï imeecha no ísï pekariipka eska Adáni na pekariipka,* ka Adáni sáno májkueniispti eska ima enga jupiringa.
15 Joperu Tata Diosïiri intsïmperata no májkueniisti eska Adániiri pekadu. Uánikua kʼuiripuechaksï uarhisti jimboka inde achamasï pekariiska. Ka ístu jimbokajtsïni ma achamasï pʼamojkuska,* enga jindeeka tata Jesukristu, iásïjtsïni Tata Diosï úsïndia xarhatacheni na engajtsïni xáni kóndentani jaka ka ístujtsïni íntskuxati imeeri intsïmperata. 16 Joperu ístu Tata Diosïiri intsïmperata no májkueniisti eska Adániiri pekadu arini ambe jimbo: jimboka enga ma achamasï ísï pekariipka, iámindu kʼuiripuechaksï niárasti no sési uéranchani, joperu engaksï na uánikua kʼuiripuecha no sési ambe niátapkia, Tata Diosï íntspisti imeeri intsïmperata, ka indeni ambe jimbo, Tata Diosï ísï exesïndia nemani komueska kʼuiripu ma enga sési jámajka. 17 Enga achamasï ma ísï pekariipka, uarhikua iáminduechani juramukuasti, joperu sánderu kʼéri ambeesti ka sánderu ambakiti ambeesti na engajtsïni Tata Diosï kóndentajka ka ambe engajtsïni intsïmbijka parajtsïni ísï exeni komueska kʼuiripuecha engachi sési jámajka. Imeecha engaksï indeni ambe intsïnhajka, irekaatiksï tata Jesukristuni jimbo ka niáraatiksï juramuni.
18 Jiájkani, pekadu ma jimbo iámindu jásï kʼuiripuechaksï niárasti uarhini, ka májkueni, ambakiti úkua ma jimbo, Tata Diosï ísï exeauati iámindu jásï kʼuiripuechani komueska kʼuiripuecha engaksï sési jámajka, ka íntsauati tsípikua. 19 Uánikua kʼuiripuechaksï pekariisti jimboka ma achamasï no kurhajchaska Tata Diosïni, ka májkueni, jimboka ma achamasï kʼóru kurhajchaska, Tata Diosï uánikua kʼuiripuechani ísï exeauati komueska kʼuiripuecha engaksï sési jámajka. 20 Tata Diosï íntspisti Leini paraka xarhatapiringa na enga xáni no sési úriika kʼuiripu. Joperu enga kʼuiripu sánderu no sési úriijka,* Tata Diosï iauani sánderu kóndeantasïndi. 21 Joperu, ¿andi? Paraka ísï eska pekadu ka uarhikua na juramukuaka iáminduechani, májkueni, Tata Diosïiri kóntperata iáminduechani juramukuauati paraka Tata Diosï ísï exeauaka iáminduechani komueska kʼuiripuecha engaksï sési jámajka, ka i ambe ísï úkuarhisti parakaksï kʼuiripuecha uaaka intsïnhani tsípikua para méntkisï juchaari Tata Jesukristuni jimbo.