Juanu

11 Jimajkani, achamasï ma enga Lásaru arhinheenga, pʼamenchaxapti. Ima Betania anapuespti, jima enga María anapuepka ka imeeri jingonikua Marta. 2 I María jindeespti enga Tatani aseiti atajtsïkupka enga sési jájkundejka ka enga imeeri jauiri jingoni kutsundukuntapka. Ka imeeri mími jémbasï pʼamenchani japti Lásaru. 3 Ísï jimbo, imeeri pirembeechaksï uandakua axakuspti Jesúsini ka arhisptiksï: “Tata, chiiti amigu pʼamenchaxati, ima engari tʼu xáni uékajka”. 4 Joperu, enga Jesúsi mítepka ini ambe, uandaspti: “No jimbosï pʼamenchani jati para ima uarhini, sánderu sési, para Tata Diosï kʼéri ambe arhinhani ka ístu imeeri Uájpa”.

5 Jesúsi kánikua xénchasïreendi Martani, imeeri jingonikuani ka ístu Lásaruni. 6 Joperu enga Jesúsi mítepka eska Lásaru pʼamenchaxapka, útasteru tsimani jurhiatikua pakaraspti jima enga japka. 7 Tátsekua ménderu arhiaspti imeeri chúxapatiichani: “Juia je ménderu Judea”. 8 Joperu imeeri chúxapatiichaksï arhispti: “Jorhentpiri,* iásï no ióniisti engaksïni Judea anapuecha uékeenga tsakapu jimbo atani, ¿andiresï uéjki ménderu jini nirani?”. 9 Jesúsi arhiaspti: “¿Andi jurhiata no 12 ora tʼíntskasïni? Ima enga jurhiakua jámajka no ma ambe jimbo téksarhutasïndi jimboka ini parhakpini anapu t’íntskuani exesïnga. 10 Joperu ima enga chúrikua jámajka, téksarhutasïndi jimboka no tʼíntskuarhu jámasïnga”.

11 Tátsekua uandaspti: “Juchaari amigu Lásaru kʼuístia, joperuni niraxamka parani tsínharhitani”. 12 Jimajkani imeeri chúxapatiichaksï arhispti: “Tata, jiájkani sési pʼikuarherantaati enga kʼuíni jaka”. 13 Enga ísï uandapka, Jesúsi arhikuekaxapti eska Lásaru uarhispkia. Joperu imeeri chúxapatiichaksï eratsespti eska Lásaru kʼuíxapka, eska mintsikuarhixapka. 14 Jimajkani Jesúsi mátirku aianguaspti: “Lásaru uarhistia 15 ka kánikua tsípisïnga chánksïni jimbo engani no jima japka parakajtsï chá uaaka jakajkuni. Ju je nani enga ima jaka”. 16 Ísï jimbo, Tomási, ima engaksï arhijka Jemelu,* arhiaspti máteru chúxapatiichani: “Ju je indeni jingoni, no arhiati engachi juchajtu indeni jingoni uarhiaka”.

17 Enga Jesúsi na niárapkia, tʼuini tʼámu jurhiatikua nitamasptia enga Lásaru jántapka. 18 Betania Jerusaléni no iauani jarhaspti, ma tanimu kilometrisï.* 19 Uánikua judiuechaksï niraspti exeni Martani ka Maríani paraksï sési pʼikuastaantani jimbokaksï uarhiranchaspka mími jémbani. 20 Enga Marta na mítepkia eska Jesúsi jurhaxapkia, niraspti kúmuni; joperu María kʼumanchikuarhu pakaraspti uaxakatini. 21 Jimajkani Marta arhispti Jesúsini: “Tata, engari tʼu ixú japiringa, juchiiti mími no uarhipirindi. 22 Joperuni útasï mintsikasïnga eskakeni Tata Diosï íntskuaka iámindu ambe engari tʼu kurhakuaka”. 23 Jesúsi arhispti: “Chiiti mími tsíntaati”. 24 Ka Marta arhispti: “Jo, míteska eska tsíntaaka jiáni engaksï uarhiricha tsíntaaka, últimu jurhiatikua jimbo”. 25 Ka Jesúsi arhispti: “Ji jindeeska tsíntskua ka tsípikua. Ima engareni jíndeni mintsikaaka, niáraati irekani nájkiruka uarhiaka; 26 ka ima enga tsípiti jauaka ka jíndeni mintsikani, no méni uarhiati. ¿Tʼu jakajkusïni ini ambe?”. 27 Ka ima arhispti: “Jo Tata, ji jakajkusïnga eskari tʼu jindeeska Kristu, Tata Diosïiri Uájpa, ima enga parhakpinirhu jupiringa”. 28 Enga na ísï uandapkia, Marta niraspti pʼirani imeeri jingonikuani, Maríani, ka arhindikuspti: “Janostia Jorhentpiri, junha kókuani”. 29 Ka María chánhatakuarhespti ka niraspti exeni.

30 Jesúsi nótki inchaakuxapti iretarhu, útasï jima jarhaspti nani enga Marta kúntapka. 31 Máru judiuechaksï María jingoni jarhaspti imeeri kʼumanchikuarhu ka exesptiksï enga ima chánhatakuarhepka ka uiriini uéakuni. Ísï jimbo, chúngumasptiksï jimbokaksï eratsesïreenga eska tumbarhu niraxapka uerani. 32 Ka enga María niárapka jima enga Jesúsi japka, tinguikuatsespti ka arhispti: “Tata, engari tʼu ixú japiringa, juchiiti mími no uarhipirindi”. 33 Enga Jesúsi exepka Maríani uerani jarhani, ka ístu imani judiuechani engaksï imani jingoni japka, kánikua pʼamojkuaspti ka kánikua no sési pʼikuarheraspti.* 34 Ka kurhamarhiaspti: “¿Nani jántaski?”. Ka imeechaksï arhispti: “Ju exeni Tata”. 35 Ka Jesúsi pʼiáraspti uerani. 36 Engaksï judiuecha exepka, uandasptiksï: “¡Exe je, kánikua xénchasïreendi!”. 37 Joperuksï máru uandasïreendi: “I achamasï éskatarantaspti imani kʼuiripuni enga no ueenga exeni, ¿andi no úpirini ambakerantani Lásaruni para ima no uarhini?”.

38 Jesúsi ménderu kánikua pʼamojkuaspti ka niraspti jima enga Lásaru jatsinhantapka. Kuebarhu ma jatsinhantaspti enga tsakapu ma jimbo míkuarhetini japka. 39 Jesúsi uandaspti: “Kéndita je tsakapuni”. Joperu Marta, uarhiriiri piremba, arhispti: “Tata, no sési jájkundeni jatiia jimboka tʼámu jurhiatikueskia enga uarhika”. 40 Jesúsi arhispti: “¿Andi nókini arhispia eska engari jakajkuska úpiringari exeni na enga xáni uinhapika Tata Diosï?”. 41 Ísï jimbo, kénditasptiksï tsakapuni. Jimajkani Jesúsi auandarhu eranchespti ka uandaspti: “Taati, jíkeni diosmaiamukua arhisïnga jimbokarini kurhajchaska. 42 Ji míteska eskarini méntkisï kurhajchasïnga, joperuni ini kʼuiripu jimbosïni ísï uandani jaka engaksï ixú jaka parakaksï jakajkuaka eskarini tʼu axaska”. 43 Enga Jesúsi na ísï uandapkia, mátirku uinhachaspti: “¡Lásaru, uéntsï!”. 44 Ka ima enga uarhirini japka, takusï irhijkutini ka irhindutini uéntaspti ka ístu ónharhitixapti máteru takusï jingoni. Ka Jesúsi arhiaspti: “Kueranta je ka jurajku je eska níntaaka”.

45 Ísï jimbo, uánikua judiuecha engaksï nípka Maríani pʼorhembini, mintsikasptiksï Jesúsini engaksï exepka ambe enga úpka. 46 Joperuksï máru kʼuiripuecha niraspti aianguani fariseuechani ambe enga úpka Jesúsi. 47 Ísï jimbo, kʼérati saserdotiicha ka fariseuechaksï tánguarhintaspti Kʼérati Juesiicha* jingoni ka arhiasptiksï: “¿Nénachi jámaia? I achamasï uánikua milagruechani uaaxati. 48 Engachi ísku exeska, iámindu kʼuiripuechaksï imani mintsikaati ka tátsekuaksï Roma anapuecha juuati ka imaksï uékaatia juramuni templurhu* ka ístu juchaari iretarhu”. 49 Joperu Kaifási enga jindeepka sánderu kʼéri saserdoti imani uéxurhini jimbo, arhiaspti: “Chájtsï no ma ambe míteska. 50 ¿Andi nójtsï exesïni eska sánderu sésiiska eska ma achamasï uarhiaka iámu ireta jimbo ka no eska iámu ireta kʼamajkunhaaka?”. 51 Joperu Kaifási no ísku jatinisï ísï uandani japti, sánderu sési, jimboka ima jindeespka sánderu kʼéri saserdoti imani uéxurhini jimbo, Tata Diosï imani uandaraspti eska Jesúsi uarhipiringa iámu ireta jimbo. 52 Ka no ireta jimbojku uarhipirindi, sino ístu para májku kʼéri tánaantani iámindu Tata Diosïiri uájpeechani engaksï etsandurhikuarhetini japka. 53 Ísï jimbo, jiáni uératini ueenasptiksï jirinhakuntani néna uándikuni.

54 Jimbosï Jesúsi nóteru jámeendia judiuechani japarini ka desierturhu no iauanisï niraspti, ireta ma jimbo enga Efraíni arhinhajka ka jima pakaraspti imeeri chúxapatiicha jingoni. 55 Niáraxaptia jurhiatikua paraksï judiuecha Páskua úntani ka uánikua kʼuiripuecha engaksï ireta sapirhatiicha jimbo irekapka, Jerusalénksï karhamaspti ante de Páskua úkuarhini paraksï pímbinhaxentani ísï eska Moisésiiri Lei na uandajka. 56 Ka jámasptiksï jirinhantani Jesúsini. Templurhuksï jarhaspti ka arhijperasïreendiksï: “¿Chájtsï na uandasïni? ¿O ima no juua kʼuínchini?”. 57 Joperu kʼérati saserdotiicha ka fariseuechaksï arhiaspti kʼuiripuechani eska enga nema mítepiringa nani jarhaspi Jesúsi, eskaksï aianguapiringa paraksï imeecha jupikani.