Juanu

8 12 Jimajkani, Jesúsi ménderu arhiaspti kʼuiripuechani: “Ji jindeeska parhakpini anapu tʼíntskua. Ima engareni jíndeni chúxapaaka, no méni pápkʼandu jámaati, sánderu sési, jatsiati tʼíntskua enga tsípikua íntspijka”. 13 Ka fariseuechaksï arhispti: “Tʼuri chiiti ambejkusï uandantani jaka. Ísï jimbo, no ísïisti ambe engari uandajka”. 14 Jesúsi arhiaspti: “Juchiiti ambesïni uandantajka ka ísïisti ambe engani ji uandantajka, jimbokani ji míteska nani uératini jurhaski ka nani engani niuaka. Joperujtsï chá no míteska nani uératini jurhaski ka nani engani niuaka. 15 Chájtsï ísï jusgarpisïnga eskaksï kʼuiripuecha na jusgarpijka, joperuni ji no nemani jusgarisïnga. 16 Ka engani ménisï niárapiringa jusgarpini, jurhimbikua jingoni jusgarpipiringa jimbokani ji no jandiajku jarhaska, Taati jíndeni jingoni jarhasti, ima engareni axaka. 17 Ka ístu, karakata jarhasti chaari Leirhu: ‘Ambe engaksï tsimani kʼuiripuecha uandantajka, ísïisti’. 18 Ji uandantasïnga juchiiti ambe, ka Taati engareni axaka, imajtu uandantasïndi juchiiti ambe”. 19 Jimajkanksï kurhamarhispti: “¿Ka nani jarhaski chiiti Taati?”. Jesúsi arhiaspti: “Chájtsïni no míteska jíndeni nijtujtsï míte juchiiti Taatini. Engajtsïni mítepiringa jíndeni, ístujtsï mítepiringa juchiiti Taatini”. 20 Ini ambe uandaspti jiáni enga templurhu jorhentpini japka, jima jarhaspti nani engaksï sentabu jatakuecha japka. Joperu no nema jupikaspti jimboka nótki niárakuxapka jandora.

21 Ísï jimbo, ménderu arhiaspti kʼuiripuechani: “Ji niraxamkia ka chájtsïni jámaaka jirinhantani, joperujtsï chá chaari pekadu jingoni uarhiaka. Jima engani ji niuaka, chájtsï no uaaka nirani”. 22 Judiuechaksï úndaspti arhijperani: “¿O uándikukuarhini uéjki? Jimboka ísï uandasïnga ‘Nani engani ji niuaka, chájtsï no uaaka nirani’”. 23 Ka Jesúsi uandaspti: “Chájtsï ixú kétsekua anapueska ka ji karhakua anapueska. Chájtsï ini parhakpini anapueska joperuni ji no ini parhakpini anapueska. 24 Jimboksïnisï arhika ‘Chájtsï chaari pekaduechani jingoni uarhiaka’. Jimboka, engajtsï no jakajkuska eskani jiiska ima enga jupiringa, chájtsï chaari pekaduechani jingoni uarhiaka”. 25 Ísï jimbo, úndasptiksï kurhamarhini: “¿Andi neeskiri tʼu?”. Jesúsi arhiaspti: “Ískuesti chánksïni arhini jarhani. 26 Uánikua ambeteruni jatsiska para uandani chaari ambe ka ístuni jatsiska para mámaru ambe jimbo jusgarpini. Ka ima engareni axaka, méntkisï jurhimbikua jingoni uandasïndi, ka ambe engani ji kurhachakuka imani, indeni ambesïni uandantajka parhakpinirhu”. 27 Joperu imeechaksï no kurhanguspti eska Jesúsi Taatiiri ambesï uandani japka. 28 Jimajkani Jesúsi uandaspti: “Engajtsï na tarhataakia* Achamasïiri Uájpani, jiájkantsï kurhanguakia eskani jiiska ima enga jupiringa ka eskani no ísku jatini pʼitsïkuarhisïnga parani úni ambe ma, sánderu sési, imani ambesïni uandajka ambe engareni Taati jorhendaka. 29 Ka ima engareni axaka, jíndeni jingoni jarhasti; nóreni méni jandiajku jurajkuxati jimbokani ji méntkisï úsïnga ambe enga ima jaiapanhentajka”. 30 Ka enga jamberi ini ambe uandani japka, uánikuaksï niáraspti jakajkuni* imani.

31 Jimajkani Jesúsi arini ambe arhiaspti imani judiuechani engaksï jakajkukupka: “Engajtsï chá méntkisï úska ambe engani ji jorhentpijka,* chájtsï sési jimbo juchiiti chúxapatiuaka; 32 chájtsï míteaka imani ambe enga jurhimbitkueka, ka jimbokajtsï míteaka ambe enga jurhimbitkueka, chájtsï nóteru jántspiriuakia”. 33 Imeechaksï arhispti: “Juchachi Abraáni uájpeeska ka nóchi méni jámaska jántspikuni nemani, ¿andiresï ísï uandajki ‘Chájtsï nóteru jántspiriuakia’?”. 34 Jesúsi arhiaspti: “Jíksïni sési jimbo arhisïnga eska ima enga no sési ambe niátajka pekadueri jántspiriiska. 35 Ístu, jántspiri ma no para méntkisï pakarasïndi imeeri patroniiri kʼumanchikuarhu, joperu uájpa kʼóru jima pakarasïndi para méntkisï. 36 Ísï jimbo, engaksïni Uájpa euajpintaska, chájtsï sési jimbo nóteru jántspiriuakia. 37 Ji míteska eskajtsï chá Abraáni uájpeeska, joperujtsïni chá uékasïnga uándikuni jimbokajtsï no jiókuarhisïnga ambe engani ji jorhentpijka. 38 Ji imani ambesïni uandajka ambe engani exeka jiáni engani juchiiti Taatini jingoni japka, joperujtsï chá imani ambe úsïnga ambe engajtsï chaari taatini kurhachakuka”. 39 Imeechaksï arhispti: “Juchaari taati Abraániisti”. Ka Jesúsi arhiaspti: “Engajtsï chá Abraáni uájpeepiringa, chájtsï májkueni ambe úpiringa eska Abraáni. 40 Joperujtsïni chá uékasïnga uándikuni jíndeni engaksïni jurhimbikua ambe aiangujka, imani ambe engani Tata Diosïni kurhachakuka, joperu Abraáni no méni ísï jámasti. 41 Chájtsï imani ambe úsïnga ambe enga chaari taati újka”. Ka imeechaksï arhispti: “Jucha no ísku kánguarhikateeska;* jucha májku Taatinkusïni jatsika, enga jindeeka Tata Diosï”.

42 Jesúsi arhiaspti: “Enga Tata Diosï chaari Taatipiringa, chájtsïni xénchapiringa jimbokarini Tata Diosïsï axaka ka jimbosïni juka. Ji no jutsïkuarheska, imarinisï axati. 43 Chájtsï no uékasïnga jiókuarhini ambe engani ji jorhentpijka, jimbojtsïsï no újka kurhanguni ambe engani ji uandajka. 44 Chájtsï Noambakitiiri uájpeeska ka uékasïngajtsï úni ambe enga chaari taati uéjka. Ima uándikpitiisti desde enga ueenaka ísï no sési jámani.* Ka no uékasti jurhimbikuarhu jarhani, jimboka no jurhimbikua ambe uandasïnga. Méni enga chkuanderajka, ísï uandasïndi eska ima na jámajka, jimboka chkuandereeska ka ima jindeesti chkuandereecheeri taati jémba. 45 Joperu jíndentsïni no jakajkuchesïnga jimbokaksïni ji jurhimbikua ambe aiangusïnga. 46 ¿Né máisï chá uaa uandani eskani no sési ambe niátaska? Engani ji jurhimbikua ambe uandajka, ¿jiájkani andijtsïnisï no jakajkuchejki? 47 Imeecha engaksï Tata Diosï uájpeeka, kurhaasïndiksï ambe enga Tata Diosï uandajka, joperujtsï chá no uékasïnga kurhaani jimbokajtsï no Tata Diosï uájpeeska”.

48 Engaksï judiuecha kurhaapka ini ambe, arhisptiksï: “Sési jimboksïnisï arhini jaka ‘Tʼuri Samaria anapueska ka demoniukini ma incharhitixati’”. 49 Jesúsi arhiaspti: “Jíndeni no ma demoniu incharhitixati. Sánderu sési, ji janhanharhixaka juchiiti Taatini, joperujtsïni chá no janhanharhisïnga jíndeni. 50 Joperuni ji no uékasïnga eskajtsïni kʼéri ambe arhiaka jíndeni; jarhasti nema enga uéjka eskani ji kʼéri ambe arhinhaaka ka imasï jusgarpijti. 51 Jíksïni sési jimbo arhisïnga eska ima enga uaaka ambe engani ji uandajka, no méni uarhiati”. 52 Judiuechaksï arhispti: “Iásï kʼóruchi exeskia eskakeni tʼungini demoniu ma incharhiska. Abraáni uarhisti ka Tata Diosïiri uandakua páriichajtuksï* uarhisti, joperuri tʼu uandasïnga ‘Ima enga uaaka ambe engani ji uandajka, no méni uarhiati’. 53 ¿Andi tʼu sánderu kʼéri ambeeski eska juchaari taati Abraáni enga uarhikia? Tata Diosïiri uandakua páriichajtuksï uarhistia. Ka, ¿neeskiri tʼu parari ísï uandani jarhani?”. 54 Jesúsi arhiaspti: “Ískuepirindi engani jíjkuni kʼéri ambe arhikuarhini japiringa. Joperu juchiiti taatirenisï kʼéri ambe arhijti, ima enga chá uandajka eska chaari Tata Diosïiska. 55 Joperujtsï chá no míteska imani ka ji kʼóruni míteska. Ka chkuanderani japiringa ísï eska chá engani uandapiringa eskani no míteska. Joperu ji kʼóruni míteska ka úsïnga ambe enga ima uandajka. 56 Chaari Taati Abraáni kánikua tsípisïreendi, jimboka eratsesïreenga eska exepiringa ambe engani ji xáni úpiringa ka exespti imani ambe ka kánikua tsípispti”. 57 Jimajkani judiuechaksï arhispti: “Tʼuri no jamberi 50 uéxurhini jatiriiska, ¿andiresï uandajki eskari exeska Abraánini?”. 58 Jesúsi arhiaspti: “Jíksïni sési jimbo arhisïnga eskani ji tʼuini jarhaspkia ante de Abraáni andajpenuni”. 59 Jimajkanksï tsakapuechani kʼarhaantaspti paraksï Jesúsini kʼuanirani joperu ima jirikuarhespti ka uéntaspti templurhu.