Juanu

14 “Asï jáma je uandanhiani chaari mintsitarhu. Mintsika je Tata Diosïni ka ístujtsïni mintsika je jíndeni. 2 Juchiiti Taatiiri kʼumanchikuarhu kánikua ambandesti para irenhani. Enga no ísïipiringa, jíksïni aiangupiringa, jimbokaksïni niraxaka ambantskachini. 3 Ístu, engani na níntaakia ka ambantskachinksïni, ménderuni junguaka ka jucheeniuksïni erokaaka parajtsï jíndeni jingoni jarhani, parajtsï chájtu jima jarhani nani engani ji jauaka. 4 Ka chájtsï míteskia xanharuni parajtsï úni nirani jima engani ji nirani jaka”.

5 Tomási arhispti: “Tata, jucha no míteska tʼu nani niraxaki. ¿Nénachi uaa míteni nákiski ima xanharu?”.

6 Jesúsi arhispti: “Ji jindeeska xanharu, jurhimbikua ka tsípikua. No nema úsïndi andarhierani Taatini enga no jíndeni jimboeuaka. 7 Engajtsïni míteaka jíndeni, ístujtsï míteaka juchiiti Taatini. Ka iásï uératintsï míteskia ka ístujtsï exeskia”.

8 Felipe arhispti: “Tata, exerajtsïni Taatini ka nóteruksïni ambe ma kurhacheakia”.

9 Jesúsi arhispti: “Felipe, sáni iónistia engani chánksïni jingoni jámaka, ¿ka nótkirini mítexaki? Ima engareni exekia jíndeni ístu exestia Taatini. ¿Andiresï tʼu uandajki ‘Exerajtsïni Taatini’? 10 ¿Andi nóri jakajkusïni eskani ji Taatini jingoni jarhaska ka eska Taati jíndeni jingoni jarhaska? Ambe engaksïni ji aiangujka no juchiiti ambeesti, sánderu sési, Taati enga jíndeni jingoni jaka, úxati ambe enga ima uéjka jíndeni úraparini. 11 Jakajkuchejtsïni je engaksïni ji arhijka eskani ji Taati jingoni jarhaska ka eska Taati jíndeni jingoni jarhaska. Ka engajtsï no uéjka jakajkuni, jakajku je ini ambe jimbo engani újka. 12 Jíksïni sési jimbo arhisïnga eska ima engareni mintsikaaka, ístu uaati ambe engani ji újka. Ka sánderu kʼéri ambe uaati jimbokani ji niraxakaia Taatini andarhientani. 13 Ístu, ambe uéjkijtsï kurhajkuarhini juchiiti nombri jimbo, jíksïni íntskuaka, paraka Taati kʼéri ambe arhinhaaka Uájpani jimbo. 14 Engajtsï chá kurhajkuarhiaka ambe ma juchiiti nombri jimbo, jíksïni íntskuaka.

15 ”Engajtsïni chá xénchajka, uaakajtsï ambe engaksïni ji juramuchijka. 16 Ka ji kómarhiaka Taatini ka imaksïni íntskuati máteru ambe engaksïni jarhuataaka* ka enga méntkisï chánksïni jingoni jauaka: 17 espiritu santu enga xarhatajka jurhimbikua ambe, imani engaksï parhakpini anapuecha no újka intsïnhani, jimbokaksï no úsïnga exeni nijtu míteni. Chájtsï míteska ini espirituni jimbokajtsï jatsiska ka chánksïni jingoni jauati. 18 Nóksïni jandiajku jurajkuaka,* ménderuni kʼuanhatsentaaka chánksïni jingoni. 19 No ióni jimbo, parhakpini anapuechajtsïni nóteru exeatia, joperu chájtsïni exeaka, jimbokani ji tsípiti jarhaska ka chájtujtsï tsípiti jauaka. 20 Imani jurhiatikuani jimbo, chájtsï míteaka eskani ji juchiiti Taatini jingoni jarhaska, eskajtsï chá jíndeni jingoni jarhaska ka eskani ji chánksïni jingoni jarhaska. 21 Ima enga jiókuarhijka ambe engani ji juramujka ka ísï úni, imarini xénchasïndi. Ka juchiiti Taati xénchaati imani engareni xénchajka, ka jíjtuni xénchaaka ka jarhuataaka parareni míteni”.

22 Jimajkani Judasï, joperu no Iskariote, arhispti: “Tata, ¿andiresï ísï uandani jaki? ¿Andiresï uéjki eskaksïni jucha sési míteaka ka no parhakpini anapuecha?”.

23 Jesúsi arhispti: “Engareni nema xénchaaka, uaati ambe engani ji uandajka. Ka juchiiti Taati xénchaati, ka tsimarhanchi andarhieraaka ka imani jingonchi irekaaka. 24 Ima engareni no xénchajka, no úsïndi ambe engani ji uandajka. Ambe engaksïni ji arhijka, no juchiiti ambeesti, sánderu sési ima ambeesti engareni Taati arhika, ima engareni axaka.

25 ”Ini ambeksïni arhixaka iásï engani útasï chánksïni jingoni jaka. 26 Joperu espiritu santu, engaksïni jarhuataaka, ka engaksïni Taati axacheaka juchiiti nombri jimbo, imaksïni jorhendaati iámindu ambe ka jarhuataatiksïni parajtsï miántani ambe engaksïni ji xáni arhikia. 27 Jíksïni seguiriini jauaka pínandikua íntskuni; indeni pínandikuani engajtsï iáiasï jatsika jíndeni jingoni. Ka jíksïni no ísï íntskuaka eskaksï parhakpini anapuecha na íntspijka. Asï jáma je uandanhiani chaari mintsitarhu ka nijtujtsï chéni. 28 Chájtsï kurhaaska engaksïni arhipka: ‘Nipaia ka ménderuni kʼuanhatsentaaka chánksïni jingoni’. Engajtsïni chá xénchajka, kánikuajtsï tsípiaka engani ji Taatini jingoni níntaaka, jimboka Taati sánderu kʼéri ambeeska eskani ji. 29 Jíksïni aianguskia íni ambe ante de ísï úkuarhini, parakajtsï chá jakajkuaka enga na ísï úkuarhiakia. 30 Nóteruni ióni uandontskuarheakia chánksïni jingoni, jimboka jurhaxaka i parhakpini anapu juramuti, joperureni ima no úsïndi juramuchini jíndeni. 31 Joperu, parakaksï parhakpini anapuecha míteaka eskani xénchasïnga Taatini, ísïminduni úsïnga eskarini Taati na juramuchika. Jauara je ka juia je.