Petanhantasïndiksï kʼataperakuarhu

EXE ánjilini, jupikaxati kʼataperakuarhu anapu puertani. Petaantaxati Jesusiri apostulichani. Ju exeni andisïksï ónhakata japi.

Nótki ióni nitamasïrendi enga Jesusiri jorhenguarhiticha espiritu santu intsïnhapka. Ka i ambe úkuarhisïndi: Ma inchatirhu Pedru ka Juanu nirasïndiksï Jerusaleniri templurhu. Ka puertarhu no iauani, jarhasti achaati ma enga no méni úka xanharani. Kʼuiripuechaksï jima peerasïndi para tumina kurhakuani imechani engaksï templurhu inchajka. Enga exejka Pedruni ka Juanuni tumina kurhakuasïndi. ¿Ambeksï uá imecha?

Anhaxurhisïndiksï ka exesïndiksï. Pedru arhisïndi: ‘No kámasïnga tumina, perukini íntskuaka ambe engani kámajka. ¡Jesusiri arhinhakuani jimbo jauara ka xanhara!’. Jiájkani Pedru jupijkusïndi achaatini ka i jirejiresï jauarasïndi ka uénasïndi xanharani. I kʼéri milagru, ísku pakataasïndi kʼuiripuechani ka tsíperaasïndi.

Pedru uandasïndi: ‘Jucha úska ini milagruni, Tata Diosïri uinhapikuani jimbo enga tsítantaka Jesusini’. Enga Pedru ka Juanu i ambeksï uandani jarhajka, jurhasïndiksï máru religioniri orhejtsïkuticha, ikiaxatiksï jimboka Pedru ka Juanu aianhpixakaksï eska Jesusi tsíntaska. Ka paasïndiksï ónhaani.

Pauandikua, religioniri orhejtsïkutichaksï tánguarhikua ma jatsisïndi. Juásïndiksï Pedruni, Juanuni ka achaatini engaksï tsinaka. Kurhamarhiasïndiksï: ‘¿Ambe uinhapikua jimbojtsï úski i ambe?’.

Pedru arhiasïndi eska Tata Diosïri uinhapikua jimbo, enga tsítantaka Jesusini. Saserdotichaksï no mítisïndi ambe úni, jimbokaksï no úsïnga uandani eska i ambakiti milagru no úkuarhiska. Jimboksïsï arhiajti apostulichani eskaksï nóteru jámaka uandantani Jesusiri ambe ka jurajkuasïndiksï eskaksï níntaka.

Nitamasïndiksï jurhiatikuecha, ka apostulichaksï seguirisïndi Jesusiri ambe uandantani ka tsinaasïndiksï pʼamenchatichani. Ka uánikuecha mítisïndi i milagruecheri ambe. Ísï jimbo, uánikua kʼuiripuecha engaksï irekaka iretecharhu engaksï uirhipandaka Jerusalenini, juákuasïndiksï pʼamenchatichani paraksï tsinaani. Ísï jimbo, religioniri orhejtsïkuticha enbidia jimbo jupikaasïndiksï apostulichani. Peru úkuarhisïndi ambe ma.

Chúrikua, Tata Diosïri ánjili mítasïndi puertani kʼataperakuarhu, eskari na újka exeni ixú. Ánjili arhiasïndi: ‘Ni je templurhu ka seguiri je eianguani kʼuiripuechani’. Pauandikua, religioniri anapu orhejtsïkuticha axasïndiksï nemani paraksï juaani apostulichani, peruksï ima nóteru jarhasïndia. Tátsekuaksï templurhu exeantasïndi ka paasïndiksï jima engaksï Sanedriniri anapuecha tánguarhijka.

Religioniri anapu orhejtsïkutichaksï arhiasïndi: ‘Juramucheskaksïni eskajtsï nóteru jámapiringa jorhentpini Jesusiri ambe’. ‘Perujtsï etsakuskia chári jorhenguarhikuechani iápurhu Jerusaleni.’ Apostulichaksï uandasïndi: ‘Jatsiskachi para sánderu kurhajchani Tata Diosïni eska juramuti ka no kʼuiripuechani’. Ka seguirisïndiksï eianhpini. ¡Ambakiti ejemplu ma!