Salomoni juramuti jánhaskati ma

ENGA ma juramuti ka imeri nasioni marhuakunksï japiringa Jeobani ka janhanharhinksï imeri juramukuani, ¿nénaksï irekapirini iáminduecha? I ambe úspi xarharani jiájkani enga Salomoni kuarenta uéxurhini juramupka.

Ante de uarhini, Dabidi erakuspti imeri uájpa Salomonini paraka juramutipiringa. Ma jurhiatikua Tata Diosï tsánharhikua ma jimbo xarhakuspti Salomonini ka arhispti eska kurhakupiringa ambe enga uékapiringa. Inde juramuti enga apenasi tumbipka, mímixekua ka jánhaskakua kurhakuspti para úni jurhimbiti juramuni. Jeoba sési exespti ambe enga kurhakupka ka íntskuspti. Ka arhispti eska, enga ima méntkisï kurhajchapiringa, íntskupiringa jatsikuarhekua, iauanisï mítikatepiringa ka eska ióni irekapiringa.

Imeri jánhaskakuani jimbo, Salomoni iauani jamberi mítikuarhispti. Ma jurhiatikua, tsimani uarhiticha nirasptiksï Salomonini exeni, ka charhakunksï ma kámasïrendi engaksï uandaenga eskaksï tsimarani amambespka. ¿Ambe úspi Salomoni? ¡Arhiaspti eskaksï terojkani ústapiringa charhakuni! Uarhiti enga orheta uandapka uékaspti, joperu máteru uarhiti uandaspti eska sánderu sési japiringa eskaksï íntskupiringa máteru uarhitini. Salomoni isï úspti mítini, eska ima uarhiti enga tátsekua uandapka ima jindespka amamba. Enga iámindu nasioni mítipka i ambe, exesptiksï eska Tata Diosï jánhaskakua íntskuxapka Salomonini.

Sánderu kʼéri ánchikuarhita Salomoniri, jindespti Jeobaeri kʼéri templu enga Jerusaleni úpka, engaksï úrapiringa israelitecha para Jeobani kʼéri ambe arhini. Imani jurhiatikua jimbo engaksï uénapka úrani templuni, Salomoni úkuspti Tata Diosïni kómarhikua ma, ka arhispti: “¡Exe! Kʼéri ambeskari, auanda, jo, auandecha sánititu ambejkuesti para tʼu jima irekani; ¡na xáni sánderu sánititu ambejkueski i kʼumanchikua engakini ji úchika!” (1 Reyes 8:27).

Salomoni niáraspti iauani isï jamberi mítikuarhini, jimesïsï jamberi enga arhinhaenga Seba (o Saba), enga Arabia jaka. Uarhiti enga Seba juramuenga, niraspti Israeli para exeni Salomoniri jatsikuarhekuani ka exeni ísïspi na enga uandanhaenga imeri ambe, ka para exeni na xáni jánhaskakua jatsispi. Enga exepka eska ísïspka, ísku pakaraspti ka niáraspti jamberi kʼéri ambe arhini Jeobani jimboka juramuti jánhaskatini ma erakuspka. Indeni jurhiatikuechani jimbo enga Salomoni juramuni japka, israelitechani sánderu sési nikuaspti ka pínandikua jatsisptiksï, jimboka Tata Diosï újchakuraaxapka.

Joperu Salomoni no méntkisï kurhajchaspti ambe enga Jeoba juramukupka. Ma eranhikua jindesti, Tata Diosï arhiaspti eska juramuticha nóksï úpiringa uánikua témbechani jatsiani, joperu Salomoni niáraspti sientu jimbo uarhitichani jatsiani ka íksï diosï úkatechani kómarhiasïrendiksï. Íksï, úspti eska Salomoni sánhani arhipiringa jurajkuni Jeobani, ka eska uénapiringa diosï úkatechani kómarhiani. Isï jimbo, Tata Diosï arhispti eska imeri familiemba sáno iámu juramukuani tsïtapiringa. Imani aiatsperakua jimbo enga Tata Diosï Dabidini aiakupka no tsïtaspti iámu juramukuani. Nájkiruka Salomoni i ambe úpka, Jeoba no mirikurhispti pakatperakuani enga Dabidini jingoni úpka.

(Pʼitakata jarhasti kapituluecha 1 a 11 de 1 Reyes, kapituluecha 1 a 9 de 2 Crónicas ka Deuteronomio 17:17.)