TEMA ENGA PORTADARHU JAKA | CHKUANDERAKUECHA ENGAKSÏ ÚJKA ESKACHI JARHARIAKA TATA DIOSÏNI
Chkuanderakua ma úspti eska nóteru úranhapiringia Tata Diosïri nombri
AMBE ENGA KʼUIRIPU UANDAJKA
“Nóchi niáraska de akuerdu jarhani sini Tata Diosï jatsiski nombri ma, ka enga ísïipiringa nóchi úpiringa míteni náki jindeeski imeeri nombri.” (Jorhentpiri David Cunningham, i ambe karasti imeeri librurhu Theological Studies.)
AMBE ENGA BIBLIA UANDAJKA
Tata Diosï mismu uandaspti: “Ji jindeeska Jeoba. Inde jindeesti juchiiti nombri” (Isaías 42:8). Jeoba nombri ebreu máesti enga arhikuekajka “Ima úsïndi eska niáraaka úkuarhini”(Génesis 2:4, nota).
Jeoba uékasïndi eskachi úraaka imeeri nombri. Biblia uandasïndi: “Uandajpa je imeeri nombri jimbo, mítetarpi je iretecharhu ambe enga ima újka. Aianhpi je na enga xáni k’éri ambeeka imeeri nombri”(Isaías 12:4).
Jesúsi úraspti Tata Diosïri nombri ka jorhendaspti imeeri chúxapatichani. Ka ma jurhiani kómarhispti imeeri Taatini, arhiparini: “Ji mítitaraska né engari jindeeka tʼu”. ¿Andisï mítitarapi imeeri chúxapatichani Tata Diosïri nombrini? Ima seguirisïndi uandani: “Para eska inde uékperakua engarini jimbo tʼu uékajka jíndeni, imeecha jingoniuaka ka ístu ji imeecha jingoni jauaka”(Juanu 17:26).
ANDISÏ JUKAPARHAKUE ESKAJTSÏ MÍTIAKA INI AMBE
Walter Lowrie enga Biblieri ambe mítekuka, karasti: “Kʼuiripu enga no míteka Tata Diosïni nombri jimbo no mítesti na enga jásïka [...] ka no úsïndi xénchani enga solu exeaka komu uinhapikua ma”.
No uékani eska mítekuarhiaka Tata Diosïri nombrini o máteru nombri jimbo uandajpani, ísïisti komu Bibliarhu pʼikuntani
Acheeti ma enga Victor arhinhajka, nirasïrendi mándani semana iglesiarhu peru no ma ambe ma mítespti Tata Diosïri ambe. Ima uandasti: “Engani jorhenguarhipka eska Tata Diosïri nombri jindeeska Jeoba, ísï pʼikuarheraspka enajkijtsïni mítitarapi nemani. Iásï kʼóru úspkia míteni imeeri ambe engani xáni kurhandipka, niáraspka ísï exeni Tata Diosïni komueska kʼuiripu ma ka jiáni uératini niáraspti juchiiti amigueni”.
Jeoba andarhieraxati imeechani engaksï eratsentajka imeeri nombrini ka aiakuasïndi: “Jíksïni pʼamojperakua xarhatacheaka, ísï eska acheeti ma na xarhatakujka pʼamojperakua imeeri sapini enga marhuakujka” (Malaquías 3:16, 17). Tata Diosï ístu újchakurasïndi imeechani engaksï uandajpajka imeeri nombrini jimbo. Biblia uandasïndi: “Iámindu imeecha engaksï kómarhiaka Tata Diosï Jeobaeri nombri jimbo, pʼímutantskateuatiksï” (Romanos 10:13, Traducción del Nuevo Mundo).