Karta Grupueri enga Orhejtsïkuajka iámindu kúnguarhikuechani

Erachicha ka pirenchicha:

“Jucha méntkisï diosmeiamukua arhisïnga Diosïni iámindu chánksïni jimbo. Ka méntkisï engachi kómarhijka, miántasïngaksïni kómarhijpichini, jimbokachi presenti pásïnga Diosï juchari Tátini japarini, na engajtsï xáni sési ánchikuarhini jaka Diosïni mintsikaparini, ka ístu sési marhuakuntsï jarhani Diosïni jimbokajtsï uékasïnga imani, ka ístu na engajtsï xáni tekantskua jingoni erontani jaka juchari tata Jesukristuni.” (1 Tes. 1:2, 3.) ¡Xánksï sési uandajka i uandakuecha ambe engachi pʼikuarherajka chánksïni jimbo! Kánikuachi agradeserikusïnga Jeobani chánksïni jimbo ka ambakiti ánchikuarhita jimbo engajtsï úni jaka.

Interu uéxurhini enga nitamaka okupadujtsï jarhaspka “sési ánchikuarhini” ka ‘sési marhuani’ Reinueri ánchikuarhitarhu. Uánikuajtsï jirinhantaska néna sánderu eianhpini. Ejemplu ma, máruksï mótsisti nani engaksï sánderu uétarhijka Reinueri eianhpiricha, asta jamberi máteru paisi jimbo. Máteruksï ánchikuarhisti eianhperakuarhu xanharuecha jimbo. Ka uánikuaksï uékasti prekursori auxiliari úkuarhini imani tiempu jimbo engachi miántaka Jesusiri uarhikuani, imani kutsï jimbo enga sirkuitueri orhejtsïkuti pʼorhembipka kúnguarhikuani o kampania espesialirhu agostuni 2014. Kánikuachi sési exesïnga engajtsï ánchikuarhini jaka iámu chári alma jingoni, xáni eskajtsï xáni újka, para Jeoba (Kol. 3:23, 24). Kánikuachi agradeserikusïnga juchari Tata Diosïni engajtsï xáni “sési ánchikuarhini” jaka.

Ístuksïni kánikua diosmeiamu arhisïnga engajtsï ‘sési marhuani jaka’ para uáni edifisiuechani para Tata Diosïri ánchikuarhita. Jimboka Jeobaeri ireta sánhani arhixaka kʼéni, íksï edifisiuecha kánikua uétarhisïndi (Is. 60:22). Solu jiniani uéxurhini niárastiksï jarhani 8,201,545 eianhpiricha, ka kondusirinhanksï 9,499,933 estudiu bíblikuecha mándani kutsï. Ini ambe jimbo, uétarhisïndi sánderu kʼéri uántaani o jimbanhi uántaani uánikua sukursalichani. Ístu arhikuekasïndi eskaksï uétarhisïnga sánderu Kʼumanchikuecha Reinueri. Ka uánikua paisicharhu uétarhixatiksï Kʼumanchikuecha para Tradusirinhani paraksï juchari traduktoricha irekani ka tradusirini jima enga uandanhajka imecheri idioma.

Exeparini i ambe, ¿ambechi uá úni para apoiariuani ini ánchikuarhitechani? Jamberichi máru uáka aiakukuarheni para jarhuajpini ini ánchikuarhitecharhu. Peru, engachi jorhenaka úni ini ambe o nómbe, iáminduchi jatsiska kóntperata de jarhuajpini “[juchari] jukaparhakua ambe jingoni” (Prov. 3:9, 10). Antesi de úni tabernakuluni, israelitechaksï xáni uánikua materiali ambe íntspespti engaksï jamberi jatsipka para arhijpini eskaksï nóteru íntspepiringia (Éx. 36:5-7). I járhati ejempluecha engaksï Bibliarhu jaka niárachisïndijtsïni mintsitarhu ka marhuachisïndijtsïni parachi májkueni úni. Juchari erachicha, máteru ambe jimbo engachi diosmeiamu arhijka Jeobani, jindesti jimbokajtsï xáni ‘sési marhuaxaka’ ini ambakiti ánchikuarhitarhu.

Ma ambe engajtsïni mintsitarhu niárachijka, jindesti exeni tekantskua juchari erachicheri ka na engaksï no kuatantajka. Ejemplu ma, desde 1950, máru tumbi Testiguecha engaksï Corea del Sur anapueka niárastiksï arhinhani eskaksï ióni ónhanhaaka ka máteruechaksï no xáni, jimbokaksï no uékasïnga úni serbisiu militari. Uánikua erachichaksï ióni tekantasti i jásï ambe no kuatantaparini. Imecheri tekantskua kánikua uinhaperantasïndi juchari mintsikakuani.

Jini Eritrea, tanimu juchari erachichaksï páxatiia jukari beinte uéxurhini ónhakata. Ka ístuksï jarhasti pirenchicha engaksï ónhanhaka uájpecha jingoni peru menusi de beinte uéxurhini. Nájtuka jánguarhinhatani jaka para úni eskaksï petanhaaka, asta iásï jamberi nótki ambe ma úxati úkuarhini. Nájtuka i ambe úkuarhini jaka, juchari erachichaksï no jurajkusïndi Jeobani. Seguirisïndiksï marhuakuani asta jiáni enga sánderu úkua jukakuajka. Jucha méntkisï miáuasïnga juchari kómarhikuecharhu (Rom. 1:8, 9).

Uánikuajtsï no ónhakata jarhaska chári jakajkukua jimbo. Perujtsï kʼóru jatsisïnga para kómu nitamakuarhini tʼarhepikua jimbo, pʼamenchakuecha, engaksïni familia enga no jakajkutika no sési kámaaka, ka máteru tsʼéjkukua ambe jimbo enga no nema mítika. Perujtsï no jurajkusïnga marhuakuni Jeobani (Sant. 1:12). ¡Sésijtsï úxaka! Chári kʼéri tekantskua máteru ambesti engachi jimbo diosmeiamukua íntskujka Jeobani.

Nochi dudarisïnga: chári ambakiti ánchikuarhita, engajtsï sési marhuani jaka ka tekantani, jindestiksï ima ambe engachi jimbo jatsika para ‘diosmeiamu arhini Jeobani, jimboka ima ambakitiska’ (Sal. 106:1). Kánikuaksïni uékasïnga ka kómarhisïngachi Jeobani paraksïni uinhaperantani, jarhuatani ka újchakurani parajtsï úni marhuakuni para méntkisï.

Chári erachicha,Karta Grupueri enga Orhejtsïkuajka iámindu kúnguarhikuechani