Ju je jánguarhintani jorhendaani iámindu kʼuiripuechani
1. ¿Nénaksï uá pʼímutantskateni kʼuiripuecha?
1 Informi uéxurhini serbisiueri 2014, xarhatasïndi eska Tata Diosïri ireta jánguarhintaxaka eianhpini ambakiti eianhperakua Reinueri ka eska tsípikua jingoni úxaka (Mat. 24:14). Niárakuxakachi sánderu kʼuiripuni Bibliaeri eianhperakua jingoni eska no méni, eianhpiparini kʼumanchikuecharhu, kampania espesialirhu para etsakuani trataduechani ka pʼímarperakuechani ka eianhpiparini xanharuecha jimbo. Ísï jimbo, paraksï kʼuiripuecha pʼímutantskateni, jatsiskachi para jarhuataani Jesusiri jorhenguarhiticheni, jorhendaparini Bibliaeri ambe (1 Tim. 2:4).
2. ¿Náki kurhamarhikuechajtsïni jarhuataa listu jarhani para aiatspiani estudiuechani?
2 Ju je méntkisï aiatspini estudiu ma. Enga kʼuiripu ma uékajka sánderu mítini, ¿jánguarhintasïnchi kurhakuni imeri datuechani ka uandajpani jirejiresï para aiakuni estudiu ma? ¿Kánchi últimu xarhataski nénaeski estudiu ma engachi primeru uelta pʼorhempika? ¿Kánchi últimu aiakuaski estudiu ma imechani engachi rebistechani íntsantajka? ¿Exeraskichia bideuechani ¿Andisï uétarhijki jorhenguarhini Bibliaeri ambe? ka ¿Néna úkuarhisïni estudiu bíbliku ma? kompanieruechani ánchikuarhiteri ka eskuelaeri, besinuechani, familiarichani ka konosiduechani? Engachi úrajka exibidorichani para publikasionichani exerpiani, ¿jánguarhintasïnchi aianguani imechani engaksï pʼíkujka publikasioni ma enga jindeka para estudiu uáni eskaksï ístu uáka gratisi pʼirani estudiu ma?
3. ¿Ambechi uétarhinchasïni parachi úni sési jorhentpini jurhimbikua?
3 Jeobaeri ka Jesusiri jarhuajperata. Enga Jesusi íntspipka juramukuani de jorhendaani iámindu kʼuiripuechani úraaspti uandakuechani “ní je”, ini jingoni uandaxapti eska uétarhisïnga jánguarhintani ka xarhatani eskachi uékasïnga ísï úni. Perujtsïni ima no jandiajku jurajkusti, jimboka aiatspeska juchantsïni jingoni jarhani (Mat. 28:19, 20). Ístu, Jeobajtsïni íntskusti imeri espiritu santu, jarhuajperatechani ka jorhendastijtsïni ambe engachi uétarhinchajka para jorhentpini jurhimbikua (Zac. 4:6; 2 Kor. 4:7). Uákachi kurhakuni eskajtsïni íntskuaka uinhapikua ka eskachi uékaaka úni ini ambakiti ánchikuarhitani (Filip. 2:13).
4. ¿Andichisï jatsi para jánguarhintani jorhendaani iámindu kʼuiripuechani?
4 Eianhpini ambakiti eianhperakua sésijtsïni pʼikuastasïndi. Peru juchari tsípikuarhita sánderu kánesïndi engachi jorhentpijka jurhimbikua ka jarhuatani kʼuiripuni juchantsïni jingoni jámani ‘xanharurhu enga tsípikuarhu pájpijka’ (Mat. 7:14; 1 Tes. 2:19, 20). Ambe enga sánderu jukaparhakueka engachi jánguarhintajka jorhendani iámindu kʼuiripuni, jindesti tsíperani Jeobani “jimboka no uékasïnga eska nema tsïnchiaka sino eska iáminduecha andajkuarhiaka moantani” (2 Ped. 3:9).