Jorhenguarhi je néna sánderu sési aianhpeni: jorhenda je estudiuechani ambakiti pʼindekuechani jatsiani de estudiarini

Andisï jukaparhakue. Para estudiu ma sánderu jánhaskani Tata Diosïri ambe, uétarhinchasïndi uinirani imeri eratsitarakuani ka mintsitani sánderu ambe jingoni eska Bibliaeri jorhenguarhikuecha jingontku enga ma jatsiajka para orheta jorhenguarhiani (Ebr. 5:12–6:1). Ísïsti, para estudiarini uétarhisïndi jánguarhintani, jimboka uétarhisïnga exeni néna terokuntasïni ambe engachi mítikia, imani ambe jingoni engachi apenasi jorhenguarhini jaka, ka exeni néna úrani (Prov. 2:1-6). Paraksï exeantaani mókuntskuechani imecheri kurhamarhikuecheri, estudiuechaksï jatsisti para jorhenguarhini inbestigarini. Ka meru jánguarhintani úni ambe engaksï jorhenguarhini jaka, jarhuatauati orhepani uérakuani tsʼéjkukuechani engaksï jatsiaka Tata Diosïni marhuakuparini (Luk. 6:47, 48).

Néna úni:

Xarhata je na enga xáni jukaparhakueka kurhakuni jarhuajperata Jeobani méntkisï engachi estudiarini jámaaka (Juanu 14:26; 1 Kor. 2:10).
Desde uénakuarhu, pʼímarhi je estudiuni antesi prepararikuarhini para imeri jorhenguarhikua Bibliaeri. Jorhenda je raiarini solu uandakuechani o eratsikuechani engaksï jukaparhakueka ka exera je chári libruni nénajtsï úsïni cha.
Kurhaku je eska imeri uandakuecha jimbo mókuntaaka. Asï imantku kurhamarhikuechani úkua je enga mókuantauaka librurhu arhintaparini.
Pʼímarhi je para pauani pauani arhintani Bibliani. Sitiurhu jw.org exentaati programa ma enga jarhuataaka exeni néna arhintani. Uétarhisïndi kánikua jánguarhintani para pʼindeni arhintani Bibliani, peru i ambe jukaparhakuesti (Sal. 1:2, 3).
Jorhenda je úrani BIBLIOTEKA INTERNETIRHU Watchtower para exeantaani mókuntskuechani imeri kurhamarhikuecheri Bibliaeri. Uákachi jorhendani náki letrechaksï arhikuekasïni publikasionichani engaksï sánderu úrakuarhijka tánguarhikuecharhu; ejemplu ma, fg arhikuekasïndi foietuni Ambakiti ambe enga Tata Diosïrika.

Ú je ini ambe ini kutsï jimbo:

Engajtsï kʼamaraaka subtitulu o kapitulu ma, kurhaku je estudiuni eska namunitu uandakuecha jingoni uandaaka ambe jorhenguarhiski. Engajtsï iáiasï no jatsika estudiu ma, tsʼéjku je namunitu uandakuecha jingoni uandantani Bibliaeri uandantskua ma o párrafu ma rebisteri La Atalaya. I ambeksïni jarhuataati sánderu sési kurhanguni ambe engajtsï arhintajka.