Ju je sési erokaani imechani engachi pʼímarhiaka

Erokuarhisïngachi eska 23 de marsuni dose miioni kʼuiripu juuaka tata Jesukristueri uarhikueri miántskuarhu. Diskursanti uandaati eska Jeoba ambakiti regalu ma íntsaaska iámindu kʼuiripuechani, jimboka íntspiska imeri uájpani ka iáminduechantsïni uáti marhuachini (Isa 11:6-9; 35:5, 6; 65:21-23; Jn 3:16). Peru no diskursantijkusï uáti jorhentpini imani jurhiatikua enga xáni jukaparhakueka. Juchajtuchi uáka sési erokaani imechani engaksï pʼímarhinhaka (Ro 15:7). Ju je exeni nénachi uá ísï úni.

• Enbesi de uaxakantsï ka erokuarhini eska uénaaka programa, uandontskuarhikua je imechani engaksï pʼímarhinhaka ka imechani engaksï nóteru eianhpijkia. Tsípikua je ka sési kaa je.

• Jingontku ja je imecha jingoni engajtsï cha pʼímarhiaka, peru ístu imani jingoni enga nika jimboka intsïnhaska pʼímarperakua ma. Pʼímarhia je paraksï chánksïni jingoni uaxakani, exeraa je Bibliani ka márku pire je.

• Enga diskursu kʼamaraakia, kurhamarhi je sini jatsiski kurhamarhikua ma. Enga chári kúnguarhikua jatsiaka para sóntku uéntani para máteru inchani, pakatpera je parajtsï máteru jurhiatikua exejperani. Úpiringajtsï arhini: “Uékapiringa mítini nájtsï exeski programani. Uákaksïni telefonu jimbo uandajpani, o pʼorhembini”.