¿Nénaksïni jarhuatasïni foietu Karakata ma para mándani jurhiatikua?

¿Arhintasïntsï pauani pauani Bibliaeri karakatani ka ístu ambe enga arhijka foietu Karakata ma para mándani jurhiatikua? Engajtsï no pʼindeka ísï úni, ¿úpirintsï uénani arhintani? Uánikuechaksï tsípa arhintasïndi ka úsïndiksï eratsentani ambe engaksï arhintaka engaksï jamberi úni jarhajka ambe ma (Jos 1:8; Sl 119:97). ¿Ambechi úpirini úni parajtsïni sánderu marhuachini mándani jurhiatikua anapu karakata? Arhianta je Bibliarhu imani karakatechani engaksï antesi jaka ka ísï tátsekua parajtsï úni sánderu sési kurhanguni. Eratsi je náki Bibliaeri anapu kʼuiripuechaksï niáraspi úni ambe enga inde karakata arhijka. Tátsekua, ú je ambe eskajtsï jorhenguarhika. Engachi uékani jarhajka úni ambe ma ka kuenta únchi Tata Diosïri Karakatani, jurajkusïngachi parajtsïni jarhuatani ka kánikuajtsïni marhuachisïndi ísï úni (Sl 119:105).

Ante deksï nirani ánchikuarhini, interu parhakpini anapu erachicha engaksï Beteli marhuajka, exesïndiksï ambe enga uandajka foietu Karakata ma para mándani jurhiatikua. Ari uéxurhinicha jimbo, uánikua bideuechaksï uérastia JW Broadcasting^® tsípa anapu jorhenguarhikueri, partirhu engaksï bideuecha jaka PROGRAMECHA JORHENTPERAKUERI. ¿Na jatintsï últimu exeski i jásï bideu ma? Jamberiksï úpirindi imeri ambe uandani engajtsï uétarhinchani jaka. Por ejemplu, ju je exeni ambe enga úkuarhinchapka Loti ka nénajtsïni uá jarhuatani inde ambe.

ENGAJTSÏ EXEAKIA BIDEUNI JU JE NO TSITINI PARHAKPININI (1JN 2:15), MÓKUANTA JE ARINI KURHAMARHIKUECHANI:

• ¿Náki Bibliaeri karakata jimbo pʼitakata jarhaski inde tsípa anapu jorhenguarhikua?

• ¿Nénajtsïni jarhuatasïni ambe enga Loti úkuarhinchapka parachi exeni eskajtsïni uáka kánikua no sési úchini tsitini parhakpinini o parhakpini anapu ambe? (Gé 13:12; 14:12; 19:3, 12, 13, 24-26).

• ¿Nénachi xarhatasïni eskachi xénchasïnga Jeobani ka eskachi no tsitisïnga parhakpinini ni parhakpini anapu ambe?