KRISTIANUECHEERI IREKUA

Jarhuataa je míteni juchaari Kuerajpirini imeechani engaksï no tsitijka relijioniiri ambe

¿Niáraskijtsï ménisï no uékani uandontskuarhekuni kʼuiripuni ma enga no tsitijka relijioniiri ambe? Miá je eska uánikuecha engaksï iásï Jeobaeri testiguekia nóksï jatsispka relijioni ma oksï no jakajkusïreendi Tata Diosïni. Uánikua imeechaksï solu uétarhincheendi eska nema jarhuataapiringa exeani pruebeechani engaksï xarhatajka eska Tata Diosï jarhaska (Ro 1:20; 10:14).

ENGAJTSÏ EXEAKIA BIDEUNI MIÁ JE: IMEECHA ENGAKSÏ NO MINTSIKAJKA TATA DIOSÏNI UAATIKSÏ MINTSIKANI. KʼUIRIPUECHA ENGAKSÏ NO JAKAJKUJKA TATA DIOSÏNI, MÓKUNTA JE ARINI KURHAMARHIKUANI:

• ¿Nénaksïni jarhuatasïni erachiiri ejemplu parajtsï Biblieri ambe aianguani imeechani engaksï no jakajkujka Tata Diosïni?

Mókuntskua

Nénajtsï uaa ísï úni

Engajtsï uandontskuarheni jauaka kʼuiripu ma jingoni enga no jakajkujka Tata Diosïni, iatsitakuarhu uandontskuarheku je, eratsenta je ambe engajtsï uandaaka ka jingontku kurhaa je ambe enga ima eratsejka ka pʼikuarherani (2Ti 2:24). Imeeri ambe uandontskuarheku je enga ima uéjka míteni. ¿Kʼuiripu uékasïni míteni náki pruebeechaksï jarhaski engaksï uánikuechani jarhuataakia jakajkuni eska jarhaska Kuerajpiri ma? Enga ísïika, úraa je imani publikasionichani engaksï úkata jaka para ini kʼuiripuechani jarhuataani. Foietuecha ¿Es la vida obra de un Creador? ka El origen de la vida. Cinco cuestiones dignas de análisis íjtuksï jima jauatia publikasionicharhu engachi úraajka para jorhentpini parakajtsï uaaka sóntku exeantani.

Jamberijtsï orheta chéni pʼikuarheraaka uandontskuarhekuni jurhimbikua ambe nemani enga no jakajkujka Tata Diosïni. Enga ísïika, kurhaku je publikadorini ma enga sánderu eksperiensia jatsika eskaksïni jarhuataaka. Ka asï mirikurhi je: Tata Diosï Jeobaksïni jarhuataati mintsitarhu niárakuani imeechani engaksï ambakiti mintsita ma jataka nájkirukaksï iásï no jakajkujka eska ima jarhaska (Úk 13:48).