Ambe enga kurhanguarhijka ima enga arhintajka

¿Káni niáraski Jesusi Kʼéri Saserdoti máeni?

▪ Jesusi niárasti jindeni Kʼéri Saserdoti jiáni enga itsï atakuarhipka, uéxurhini 29 jimbo. ¿Nénachi míteski? Ju je exeni. Enga itsï atakuarhipka, xarhataspti eska uékasïrenga íntspini imeri tsípikuani altarirhu, máteru uandakuecha jingoni, uékasïrendi úni ambe enga Jeoba uéjka (Gal. 1:4; Ebr. 10:5-10). Jimboka altari jiáni uénaska jarhani enga Jesusi itsï atakuarhika, míteskachi eska ístu Jeobaeri templu jiáni uénaska jarhani jimboka altari jindeska ambe ma enga kánikua jukaparhakueka Jeobaeri templurhu. Jeobaeri templu enga xáni kʼéka, iámindu imani ambe arhikuekasïndi engachi újka para Jeobani kómarhini ísï eska ima na jaiapanhintajka Jesusiri uarhikua jimbo (Mat. 3:16, 17; Ebr. 5:4-6, TNM).

Enga na uénapkia Jeobaeri templu jarhani, ístu uétarhisïrendi eska japiringa kʼéri saserdoti ma. Paraka niárapiringa jarhani ma, Jeoba erakuspti Jesusini “espiritu santuni jimbo ka imeri uinhapikuani jimbo” (Uku. 10:37, 38; Mar. 1:9-11). Peru ¿nénachi míteski eska Jesusi jiáni erakunhaspka para Kʼéri Saserdotini ante de uarhini ka tsíntani? Niáraskachi indeni ambe kurhanguni engachi exepka Aaroniri ejempluni ka imecheri engaksï tátsekua niárapka jindeni kʼéri saserdoticha Moisesiri Leiri jurhiatikuecha jimbo.

Lei uandasïrendi eska kʼéri saserdotijkusï uénga inchani tabernakulueri Sánderu Pímbinhasï Kuarturhu ka ísï tátsekua templurhu. Kortina ma jarhaspti enga xarhatenga nani enga jamberi arhukurhienga Pímbinhasï Kuartu ka Sánderu Pímbinhasï Kuartu ka kʼéri saserdoti jiánkusï parhikuendi Sánderu Pímbinhasï Kuarturhu enga jindepiringa Jurhiatikua enga Jeoba Puátspintenga. (Ebr. 9:1-3, 6, 7, TNM). Aaroni ka ístu imecha engaksï tátsekua májkueni jásï ánchikuarhita úpka, niárasptiksï erakunhani paraksï kʼéri saserdotini ante deksï imani kortinani jimbo inchani enga tabernakulurhu japka. Sáno májkueni, Jesusi erakunhapti ante de uarhini para Jeobaeri templurhu Kʼéri Saserdotini ka tátsekua kortinarhu ísï inchaspti, enga arhikuekajka imeri kuerpu, para auandarhu irekani (Ebr. 10:20). Ísï jimbo, apostuli Pablu uandaspti eska Jesusi jurhaska para kʼéri saserdotini” ka eska tátsekua inchaspka templurhu enga no “jájki jimbo úkateka” ka “auandarhusï inchati” (Ebr. 9:11, 24).

¿Káni uénaski marhuani jimbanhi pakatperakua?

▪ Jiáni enga Jesusi auandarhu karhanchentapka ka enga xarhatapka na enga xáni jukaparhapka imeri pímbinhasï tsípikuani enga íntspipka kʼuiripuechani jimbo. Peru ¿ambe uétarhispi paraka i ambe úkuarhipiringa? Ju je exeni tanimu ambe.

Orheta, Jesusi niáraspti Jeobani andarhierani. Tsimani, xarhatakuspti Táti jémbani na enga xáni jukaparhapka imeri pímbinhasï tsípikuani enga íntspipka kʼuiripuechani jimbo. Ka tanimu, Jeoba jiókuarhispti na enga xáni jukaparhapka Jesusiri iurhiri. Jimbanhi pakatperakua uénaspti marhuani enga na úkuarhipkia i tanimu ambe.

Biblia no uandasïndi káni jiókuarhispi Jeoba na enga xáni jukaparhapka Jesusiri iurhiri. Ísï jimbo, nóchi uáka uandani meru káni uénakuarhiski marhuani jimbanhi pakatperakua. Peruchi kʼóru míteska eska Jesusi karhanchentaspka diesi jurhiatikua ante de Pentekostesi (Uku. 1:3). Jamberi indeni jurhiatikuecha jimbo, Jesusi xarhatakupti Jeobani na enga xáni jukaparhapka imeri pímbinhasï tsípikuani enga íntspipka kʼuiripuechani jimbo ka Jeoba jiókuarhispti (Ebr. 9:12). Pentekostesirhu, úkuarhispti ambe enga sési xarhatapka eska Tata Diosï jiókuarhispka (Uku. 2:1-4, 32, 33). Jiáni sési xarharaspti eska jimbanhi pakatperakua uénaspkia marhuani.

Namunitu uandakuecha jimbo, enga Jeoba jiókuarhipka na enga xáni jukaparhaka Jesusiri iurhiri, jimbanhi pakatperakua uénaspti marhuani Kʼéri Saserdoti jingoni enga jindeka Jesusi, engachi jimbo újka andarhierani Jeobani (Ebr. 7:25; 8:1-3, 6; 9:13-15).