Ambe enga kurhanguarhijka ima enga arhintajka

¿Uaa Jeobaeri testigu ma úrani pájina Internetiri o aplikasioni ma para jirinhani né jingoni tembuchani o uambuchani?

Tata Diosï Jeoba uékasïndi eska engaksï tsimani kʼuiripuecha tembuperaaka sésiksï irekaaka, sésiksï kámberaaka ka eskaksï no méni jurajperaaka (Mat. 19:4-6). Enga chá eratsetini jaka uambuchani o tembuchani, ¿nénajtsï uaa exentani nemani enga ambakiti témbeuaka o uámba máeni? Jimbokajtsïni Tata Diosï Jeoba kueraaska, ima mítesti ambe engachi jatsika para úni parakajtsïni sési nicheaka engachi nobiuni o nobiani jatsiaka ka ístu temungurhikuarhu. Ísï úni eskajtsïni Bibliarhu anapu karakatecha na arhijka, méntkisïjtsïni marhuachesïndi. Ju je exeni máru i konsejuechani.

Orheta, jatsiskachi para kurhanguni eska kʼuiripuecheri “mintsita sánderu enganiarpisïn[ga] eska ambe uéjki ka sóntku uékasïndi ambe ma” (Jer. 17:9). Engaksï tsimani kʼuiripuecha eratsejka tembuperani ueenasïndiksï márku uérani, úndasïndiksï sánderu tsitijperani ka i ambe úsïndi eskaksï no uaaka sési erakuni úni ambe ma. Engaksï tembuperaka solu jimbokaksï tsitijperasïnga, tátsekua uaati no ísï uérani ambe ma eskaksï na erokuarhini jaka (Prov. 28:26). Ísï jimbo, no sési jarhasti eskaksï nobiuecha jirejiresï arhijperaaka ambe engaksï p’ikuarherajka, oksï aiatsperani ambe ma ante deksï sési mítperani.

Proverbios 22:3 arhisïndi: “Jánhaskati exesïndi ambe enga no sési úkuarhiaka ka kéndikukuarhisïndi, peru imeecha engaksï no jánhastiika nóksï ambe ma úsïndi ka no sési ambeksï úkuarhinchasïndi”. ¿Ambechi uaa úkuarhinchani engachi úraaska pájina internetirichani ka aplikasionichani para mítperani nemani jingoni? Xáni no sési, máruksï ueenasti míteni nemani interneti jimbo ka tátsekuaksï kuenta íntskukuarhesti eska ima kʼuiripu engaksï míteni japka no uékasïreenga. Ístu, ima kʼuiripuecha engaksï no sáni pʼamojpijka, máteruksï nombri úrasïndi internetirhu paraksï enganiariuani kʼuiripuechani o paraksï sentabu sïpakuani. Ka ménichani, engaksï ini xáni no sési jásï ambe niátajka uandasïrendiksï eskaksï Jeobaeri testiguespka.

Ju je exeni máteru ambe. Máru pájinecha internetiri úraasïndiksï komputadoreri programechani paraksï exeni kʼuiripuni ma na xáni terukusïni máteru nemani jingoni. Peru no ma ambe jarhasti enga xarhatajka eska inde ambe marhuasïnga. ¿Sési japirini eskajtsïni komputadoreri programa erakuchipiringa ambe ma enga xáni jukaparhakueka eska temungurhirikua? Méntku nómbe. Komputadoreri programecha nóksï ménisï ísï marhuauati eska Biblieri karakatecha (Prov. 1:7; 3:5-7).

Biblieri konseju ma enga Proverbios 14:15 jimbo jaka, uandasïndi: “Kʼuiripu no jánhaskati ma iámindu ambe jakajkusïndi, peru ima enga jánhaskatiika jingontku exesïndi ambe”. Kánikua jukaparhakuesti eska kʼuiripu ma sési míteaka imani enga jingoni uambuchaaka o tembuchani. Joperu no fásilisti sési míteni nemani interneti jimbo. Ka nájkirukaksï tsimani kʼuiripuecha míteaka máterueri informasionini ka ióni uandontskuarheni interneti jimbo, ¿uaaksï uandani eskaksï sési jimbo mítperaska? Ka máru engaksï uandapkia eskaksï meru exentaspkia imani jingoni engaksï uambuchapiringa o tembuchani ískuksï pakaraspti jiáni engaksï mítepkia imani kʼuiripuni.

Ima enga salmu ma karapka, uandaspti: “No kúnguarhisïnga imani kʼuiripuecha jingoni engaksï tsitijka chkuanderani ka níjtuni jámajka imeecha jingoni engaksï jískajka na engaminduksï jásïika” (Sal. 26:4). Máru kʼuiripuechaksï no no sési exesïndi chkuanderakua ambe jatsikuni imeecheri perfilirhu internetirhu, solu parakaksï kʼuiripuecha uékaaka míteani. Jamberiksï máru no uandantaati na engaksï meru jásïika o máruksï uandani eskaksï Jeobaeri testigueska, ¿joperuksï itsï atakuarhiskia? ¿Jatsiskiksï ambakiti pájperakua Tata Jeoba jingoni? ¿Sésiksï exenhasïni kúnguarhikuarhu? ¿Oksï no ambakiti ejemplueski ka asta no sésiksï úrini? (1 Kor. 15:33; 2 Tim. 2:20, 21). ¿Listuksï jarhaskia para uambuchani o tembuchani ísï eska Biblia na uandajka? Jatsiskachi para míteni i ambe, joperu úkua jukaati engachi no kurhamarhiaska imani erachichani engaksï sési mítejka imani engachi jingoni uékani jaka tembuchani o uambuchani (Prov. 15:22). Ka ambakiti Tata Jeobaeri marhuari ma no méni eratsepirindi tembuchani o májkuentani nemani jingoni enga no Jeobaeri testigueka (2 Kor. 6:14; 1 Kor. 7:39).

Peligrosuesti úrani pájinechani internetiri o aplikasionichani para míteni nemani. ¿Joperuchi nani uaa míteni nemani parachi imani jingoni uambuchani o tembuchani? Engachi újka tánguarhini úsïngachi máteru Jeobaeri testiguechani míteani tánguarhikuecharhu, k’éri tánguarhikuecharhu ka engachi tánguarhiaka para máteru ambe úni.

Engachi no újka tánguarhini komu pʼamenchakua COVID-19 jimbo, úrasïngachi máru aplikasionichani parachi tánguarhikuechani jatsiani ka jimachi úsïnga míteani máteru testiguechani engaksï uátsïka ka tumbiini. Uaakachi exeni na engaksï nitamataraajka máru partichani tánguarhikuecharhu ka na engaksï mintsikajka Jeobani imeecheri mókuntskuechani jimbo (1 Tim. 6:11, 12). Ístuchi uaaka uandontskuarheni enga na kʼamakurhiakia tánguarhikua ima grupu sapirhaticharhu engaksï aplikasionirhu uératini únhajka. Ístu, uaakachi míteni nemani engaksï tánguarhijka máru erachicha interneti jimbo ka ísï úni exeni na enga meru jásïika ka na enga kaajka máteruechani (1 Ped. 3:4). Engajtsï sánhani arhiaka mítperani, tsimarhantsï exeaka sintsï uékaxaki májkueni ambe úni ka sintsï tsimarhani májkueni ambe jukaparharasïni ka sintsï uaa sési pájperani temungurhirini.

Enga uátsï ma o tumbi ma ísï újka eskaksï na uandajka Biblieri karakatecha paraksï exeni né jingoni uambuchani o témbuchani, jamberiksï sánderu sési irekaati. Ka ísï eska na arhijka ari proverbio: “Ima enga exentajka ambakiti témba ma [o uamba ma] jukaparhakua ambe exentasïndi ka Tata Diosï Jeoba jaiapanhentasïndi” (Prov. 18:22).