¿Mítespijtsï?

¿Andisï Tata Diosï Jeoba jurajkuapi israelitechani parakaksï kéjtsïtaapiringa palomasï sapinharhichani ka kʼénharhichani?

MOISÉSIRI Lei uandasïreendi eska Tata Diosï Jeoba jiókuarhisïreenga parakaksï kéjtsïtakuapiringa palomasï sapinharhichani (tortolecha) ka palomasï kʼénharhichani. Leicha engaksï kéjtsïtakueri ambe uandajka, méntkisïksï indeni tsimani pájaruechani uandaasïndi. Israelitechaksï úpirindi kéjtsïtani palomasï sapinharhi ma o kʼénharhi ma (Lev. 1:14; 12:8; 14:30). I ambe kánikua sési jarhaspti jimboka no méntkisï jarhasïreenga palomasï sapinharhicha. Ju je exeni andi.

Palomasï sapinharhichaksï imani kutsïcha jimbo jámasïndi Israeli enga aparhikuarhijka. Oktubrini, íksï pájaruecha paisirhu surirhisï nirasïndi jimeesïsï enga aparhikuarhijka ka kʼuanhatsentasïndiksï Israelini jiáni enga primaberejkia (Cant. 2:11, 12; Jer. 8:7). Ísï jimbo, jiáni enga iauani jarhengia, israelitechaksï no úsïreendi jirinhani palomasï sapinharhi ma paraksï kéjtsïtani.

Joperu palomasï kʼénharhicha méntkuksï ma uéxurhini jarhasïreendi Israeli. Ístu, kʼuiripuechaksï úsïreendi kʼumanchikuecharhu jatsiani (terukutanta je Juanu 2:14, 16 jingoni). Seguni libru ma, imani iretechani jimbo, “kʼuiripuechaksï imeecho jatsiasïreendi palomasïchani”. Iámindu kʼumanchikuechaksï jukaspti pʼorhotechani nani engaksï palomasï kʼénharhicha ueenga jarhani (terukutanta je Isaías 60:8 jingoni).

¿Ambejtsïni jorhendasïni i ambe Tata Diosï Jeobaeri? Eska Tata Diosï máeska enga xénchpejka ka enga kurhangutspijka jimboka jurajkuaspka israelitechani eskaksï kéjtsïtakupiringa pájaruni ma engaksï úpiringa konseguirini.