¿Andiksïsï Jeobaeri testiguecha no méntkisï kuájpikuarhijki enga chkuanderakua ambe uandanhajka imecheri ambe?
Jeobaeri testiguechachi úsïnga ambe enga arhijka Biblia enga uandajka eskachi no jatsiska para méntkisï mókukuani imechani engaksï chkuanderakua ambe jauatajka juchari ambe o engajtsïni teresmarhujka. Por ejemplu, Bibliaeri karakata ma arhisïndi: “Ima enga arhijka eska no sési úxaka imani enga teresmarpijka, no sési exekatesïndi” (Proverbios 9:7, 8; 26:4). Enbesi de arhijperani jarhani o uékani kurhangutarani kʼuiripuni eska no ísïska ambe engaksï uandajka juchari ambe, janguarhintasïngachi parajtsïni Tata Diosï jaiapanhintani (Salmo 119:69).
Ísïsti, jarhasti “tiempu para pínasku pakarani ka tiempu para uandani” (Eclesiastés 3:7). Jimbochisï mókukuantajka imani kʼuiripuechani engaksï uéjka jurhimbikua ambe míteni, joperuchi no jámasïnga ísku jatini arhijperani nemani jingoni. Ísï úparini, úsïngachi ambe enga Jesusi jorhentpipka ka úni ka ístu máteru kristianuecha.
Jesusi pínasku pakaraspti jiáni engaksï chkuanderakua ambe uandani japka imeri ambe Pilatuni japarini (Mateu 27:11-14; 1 Pedru 2:21-23). Jiántu no mókukuarhispti engaksï uandani japka eska kauicha máespka ka eska jukari tʼiresïrenga. Sánderu sési, jurajkuspti eskaksï imeri úkuecha xarhatapiringa ambemindusï ísïipi seguni ari karakata: ‘Mímixekua, jángua jimbo xarharasïndi’ (Mateu 11:19, TDU). Joperu jiáni enga kʼuanipka ísï úni, balori jingoni mókukuarhispti engaksï chkuanderakua ambe uandani japka imeri ambe (Mateu 15:1-3; Markusʌ 3:22-30).
Jesusi jorhendaasti imeri chúxapatichani paraksï no no sési pʼikuarherani jiáni engaksï chkuanderakua ambe uandapiringa imecheri ambe. Arhiaspti: “Tsípisïngajtsï cha engaksïni kʼuiripuecha xukajchajka ka nóksïni sési kámani, ka jíndeni jimbo uandatsenksïni mámaru jásï chkuanderakua ambe” (Mateu 5:11, 12). Ístu, Jesusi arhiaspti eska ima ambe enga uandenhenga imecheri ambe, úpiringa jarhuataani paraksï úni aianhpini. Jiáni engaksï ísï nitamakuarhipiringa, Jesusi kumpliripirindi ambe enga aiakuapka: “[Jíksïni] arhistachiaka uandakuechani, ka mámaru ambeksïni mítetarani para eskaksïni iámindu chári ikiatspiticha no uáka andani ka níjtuksïni ambe arhini” (Lukasʌ 21:12-15).
Apostuli Pablu arhiaspti kristianuechani eskaksï no jámapiringa ísku ambe ma jimbo arhijperani, jimboka inde ambe “nómindu marhuasïnga ka níjtu jarhuatpini” (Titu 3:9; Roma 16:17, 18).
Apostuli Pedru arhiaspti kristianuechani eskaksï kuájpipiringa ambe engaksï jakajkuenga jiáni engaksï úpiringa ísï úni (1 Pedru 3:15). Ini ambe jingoni, arhikuekaxapti eska sánderu jukaparhakueska ambe enga ma kʼuiripu újka ka eska ima ambe enga uandajka. Karaspti: “Eskajtsï chári sési jángua jimbo, uáka eskaksï kuamuaka [o pínasku jauaka] kʼuiripuecha engaksï no ma ambe míteka ka níjtuksï ambe ma jánhaskani” (1 Pedru 2:12-15).