¿Ambeski jukari uandanhiani?

Enga ambe ma úkua jukani jarhajka, uénasïngachi uandanhiani. Juchari kamatsïta uánikua ormonechani axaasïndi iámu kuerpurhu. I ambe úsïndi eska mintsita sánderu sóntku ánchikuarhiaka, juchari presioni ambe sési jarhani, sánderuchi uinhamu o iatsitakuarhu jirejtani ka eskaksï muskuluecha kʼuanhapiaka. Ante dechi kuenta íntskukuarhini ambe enga úkuarhini jarhajka, juchari kuerpu tʼuini listu jarhasïndia para ambe ma jimbo enga úkuarhiaka. Enga nitamajkia ima ambe engajtsïni uandanhiatajka, juchari kuerpu nóteru “jingontku jarhasïndia” ka iámindu ambe sési niántasïndi.

UANDANHIANI UÁTIJTSÏNI MARHUACHINI O NO SÉSI ÚCHINI

Normalisti engachi uénajka uandanhiani, jimboka i ambe úsïnga eskachi uáka orhepani uérakuni ambe ma o peligru ambe. Iámindu ambe kamatsïtarhu uénasïndi. Séskisï uandanhiani, úsïndi eskachi uáka ambe ma o eskachi sóntku manakuarhiaka. Ístu, séskisï uandanhiani, jarhuataatijtsïni parachi úni ambe engachi uéjka úni o parachi sánderu sési úni ambe ma, komu sési úntani eksameni ma, jingontku kurhajchani imani kʼuiripuni engajtsïni entrebistarini jauaka para ánchikuarhini o engachi chʼanani jauaka o ejersisiu úni.

Joperu engachi ióni jamberi uandanhiani jauaka, jukari o méntku uandanhiani jarhani, uátijtsïni kánikua no sési úchini. Engachi méntku uandanhiani jauaka, uákachi no sési úkuni juchari kuerpuni, ikiani o kómu pʼikuarherani ochi no úni sési eratseni. Jamberichi uáka no sési jámani ka no sési kaani máteruechani. Ima kʼuiripuecha engaksï jukari uandanhiajka, sáno méntkisïksï uénasïndi jukari alkooli arhani, droga ambe úrani, jukari pastiia ambe arhani, jukari tʼireni, etsutani ka máteru no sési jásï ambe. Asta jamberi niárani jukari kómu pʼikuarherani, nóteru uékania orhepani uérani o uékani uándikukuarhini.

Nájkiruka uandanhiata ambe no iáminduechani májkueni no sési ambe úkuajka, uáti úni eska uánikua jásï pʼamenchakua ambe úkuarhiaka ka no sési úkuni náki uéjki partini juchari kuerpueri.