¿Exeaskijtsïa pruebechani?
“Unibersu ísku jatini niárasti jarhani” (Stephen Hawking ka Leonard Mlodinow: El gran diseño [trad. David Jou i Mirabent], 2010).
“Tata Diosï kueraasti auandani ka echerini” (Biblia, Génesis 1:1).
¿Tata Diosï kueraaski unibersuni ka tsípikuani oksï ísku niáraski jarhani? Ambe engaksï inbestigadoricha uandapka engachi ueenakuarhu exeka ka ambe enga Biblia uandajka íri ambe, kánikua ménderuenisti. Máru kʼuiripuechaksï ma ambe jakajkusïndi ka máteruecha máteru ambe. Asta máruksï kuájpisïndi ambe engaksï jakajkujka libruecharhu engaksï kánikua piánhajka ka telebisioniri programecharhu. Ka máteruechaksï no mítesïndi ambe jakajkuni.
Jamberiksïni eskuelarhu arhiti eska unibersu ka tsípikua ískuksï úkuarhiska ka eska no jarhaska Kuerajpiri ma. Peru, ¿exeraaskiksïni pruebechani enga xarhatajka eska inde ambe ísïiska? O jamberijtsï kurhajchaaka relijioniri orhejtsïkutichani uandani eska jarhaska Kueraajpiri ma. ¿Peruksïni exeraski eska i ambe ísïiska? ¿Oksïni arhiski eskajtsï jatsiska para ísï jakajkuni?
Jamberijtsï mémindu eratsentakia íri ambe ka uandantsï eska úkua jukaska míteni sini jaki Kueraajpiri ma. Ístujtsï jamberi eratsejka eska no jukaparhakueska indeni ambe míteni.
I rebista orheta xarhatasïndi máru ambe enga jarhuataakia uánikuechani jakajkuni eska jarhaska Kueraajpiri ma. Tátsekua uandasïndi andisï xáni jukaparhakue míteni néna ueenaspi jarhani tsípikua.