¿Andisï xáni jukaparhakue míteni sini jaki Kueraajpiri ma?

¿Andisï xáni jukaparhakue míteni sini jaki Kueraajpiri ma? Jimboka engajtsï seguru jauaka eska jarhaska Kueraajpiri ma, jamberijtsï uékaaka míti sini Biblia Tata Diosïni jimboe. Ka engajtsï mintsikaska ambe enga Biblia uandajka, uaakajtsï jatsini arini ambe.

Sánderujtsï tsípikua jingoni irekaaka

BIBLIA UANDASÏNDI: Tata Diosï ústi ambakiti ambe. “Janira[sïndi] paraka jucha ambakiti pʼikuntskua jatsiaka. Ka kánerachisïndijtsïni juchaari tʼirekuani ka tsípini pʼikuastantsïni juchaari mintsitecharhu” (Ukuecha [Hechos] 14:17).

¿AMBE ARHIKUEKASÏNI? Iámindu ambakiti ambe enga Echerirhu jaka, Kueraajpiriri regalu máesti. Engajtsï jorhenguarhiska Bibliarhu na enga xáni uandanhiajka chánksïni jimbo, sánderujtsï sési pʼikuarheraaka indeni regaluecha jingoni.

Exentaakajtsï ambakiti konsejuechani

BIBLIA UANDASÏNDI: “Jimajkani tʼuri kurhanguaka ambe enga jurhimbitika, ambe enga sési jaka ka nóri nani sánderu kʼuetsapeaka, iámindu ambe enga újka eska ambakiti ambe únhaaka” (Proverbios 2:9).

¿AMBE ARHIKUEKASÏNI? Jimboka Tata Diosï jindeeska chaari Kueraajpiri, ima mítesti ambe engajtsï uétarhinchajka parajtsï tsípikua jingoni irekani. Engajtsï jorhenguarhiska ambe enga Biblia uandajka, exentaakajtsï ambakiti konsejuechani engaksïni uaaka jarhuatani.

Bibliarhujtsï uaaka míteni ambe engajtsï kurhamarhikuarhijka

BIBLIA UANDASÏNDI: “Exentaakari Tata Diosïri mímixekua” (Proverbios 2:5).

¿AMBE ARHIKUEKASÏNI? Míteni eska jarhaska Kueraajpiri ma jarhuataatiksïni kurhanguni, ¿andichisï irekani jaki?, ¿andisï xáni kómu nitamakuarhinhajki? ka ¿ambe úkuarhisïni engaksï kʼuiripuecha uarhijka? Exeakajtsï eska ambe enga Biblia uandajka íri ambe meru ísïiska.

Uaakajtsï seguru jarhani eska sánderu orhepani ambakiti ambe jauaka

BIBLIA UANDASÏNDI: “Sési míteska ambe engani eratseni jaka para chá, ísï uandasïndi Tata Diosï Jeoba. Eratsexaka parajtsï pínandikua jatsini, ka no kómu nitamakua ambe. Parajtsï sánderu orhepani sési irekani ka parajtsï erokuarhikua ma jatsini” (Jeremías 29:11).

¿AMBE ARHIKUEKASÏNI? Tata Diosï aiatspesïndi eska kʼamajkuaka no sési jásï ambe, kómu nitamakua ambe ka uarhikuani. Engajtsï mintsikaska ambe enga Tata Diosï aiatspejka, balorijtsï jukaaka ka uaakajtsï orhepani uérakuani uandanhiatechani engajtsï pauani pauani nitamakuarhiajka.

Kánikua jarhuataasti míteni eska jarhaska kueraajpiri ma

“Ískurini pakatasïndi exeni na engareni mámaru jarhuatajka Tata Diosï, jarhuatasïndirini exeni ambe enga sánderu jukaparhakua ambeka, parani sési pájperani máteruecha jingoni ka parani ísï exeni Tata Diosïni komueska amiguni ma...” (Cyndi, Estados Unidos).

“Míteni eska jarhaska Kueraajpiri ma, úsïndi eskani kánikua tsípikua jingoni irekaaka. No méni kuatantasïnga jimboka méntkisï jarhasïndi ambe ma engani jorhenguarhijka imeeri ambe, ambe enga kueraaka ka imeeri Karakateri ambe” (Elise, Francia).

“Iásï sánderuni tsípikua jingoni irekaskia, jimbokani ísï úsïnga eskajtsïni juchaari Tata Kuerajpiri na arhijka Bibliarhu. Nóteruni arhinchaasïngia máteruechani, uandanhiasïnga máteruechani jimbo ka sánderuni sési pʼikuarherasïngia. Ka iásï sánderuni ambakiti taati máeskia” (Peter, Países Bajos).

“Ante de míteni Tata Diosïni, solu tʼiresïreenga, kʼuíni ka ánchikuarhini nirani. No tsípikua jingoni irekaspka. Joperu iásï ísï exesïngia tsípikuani komueska ambakiti regalu ma. Iásï kánikua tsípikua jingoni irekaskia” (Liz, Estonia).

“Ji méntkisï uandanhiani jarhasïnga. Peru míteni eska niáraaka ma jurhiatikua enga nóteru jauakia no sési jásï ambe, no sési kámberakua ka kómu nitamakua ambe, úsïndi eskani sési pʼikuarherantaaka” (Adrien, Francia).