PARHAKPINIRHU KÁNIKUA NO SÉSI JÁNHASKUARHIXATI

2 Sési úra je sentabuni

¿ANDISÏ XÁNI JUKAPARHAKUE?

Pauani pauani kʼuiripuechaksï kánikua jánguarhintasïndi paraksï imani ambe jatsini engaksï uétarhinchajka. Joperu iásï sánderu úkua jukasti indeni ambe jatsini. ¿Andi?

Enga no sési úkuarhini jarhajka lugari ma jimbo, sánderu jukaparhasïndi tʼirekua ka renta ambe.
No káni jarhasïndi ánchikuarhita ambe ka ánchikuarhirichaksï sántku maiamunhasïndi.
Desastresi naturalicha ka no sési jásï ambe enga úkuarhijka, úsïndiksï kʼamajkuani negosiuechani, kʼumanchikuechani ka máteru ambe engaksï kʼuiripuecha jatsikuarhejka. Ka ini ambe jimbo uánikua kʼuiripuechaksï no ma ambe jingoni pakarasïndi.

¿Mítespijtsï?

Engajtsï sési úraska chaari sentabuni, sánderujtsï preparadu jauaka enga no sési jásï ambe úkuarhiaka.
Sentabu sóntku kʼamakurhisïndi ka na engajtsï xáni andajka ka ambe engajtsï xáni jatsikuarheka, tátsekua úpirindi nóteru xáni jukaparhania.
Sentabu no úsïndi iámindu ambe piáni, komueska paraka familia tsípikua jingoni irekaaka ka eska májku kʼéri jauaka.

¿Ambejtsï uaa úni?

Biblia uandasïndi: “Engachi jatsikuarheaka tʼirekua ka xukuparhakua, jaue tsípini jarhani xáni ambe jingontku” (1 Timoteo 6:8).

Para tsípini pʼikuarherani no arhikuekasïndi iámu imani ambe jatsini engachi uékajka, sino sési pʼikuarherani ima ambe jingoni engachi jatsika. Kánikua jukaparhakuesti eskachi no mirikurhiaka ini ambe ka sánderu jiáni engachi no kánikua sentabu jatsikuarheaka.

Parajtsï tsípikua jingoni irekani jamberijtsï jatsiaka para jorhenguarhini sántku jingoni irekani. Engajtsï imani ambe piáska engajtsï no uaaka maianhpeni, niáraakajtsï kántspeni pakarani.

AMBE ENGAJTSÏ UAAKA ÚNI PARAJTSÏ SÉSI ÚRANI SENTABUNI: Máru konsejuecha

Parajtsï jorhenguarhini sési úrani sentabuni, uaakajtsï arini ambe úni

ASÏ XÁNI KÁNIKUA AMBE PIÁ JE

Asï xáni kánikua ambe piá je

Asï jáma je piáni imani ambe engajtsï no uétarhinchani jauaka. Kurhamarhikuarhi je: “¿Meru uétarhinchaxaki trokani ma? ¿Úpirini berdura ambe jatsintani parani no xáni piáni?”.
Ante dejtsï piáni ambe ma, kurhamarhikuarhi je: “¿Meru uétarhinchaxaki? ¿Uaa maianhpeni?”.
Engajtsï uaaka, kurhajkuarhia je apoiuechani engaksï gobiernuecha ka máteru organisasionicha íntspiajka.

“Uandontskuarhespkachi juchiiti familia jingoni na engachi úrani japka sentabuni ka uandaspkachi eskachi nipiringa tsípikuarhini joperu eskachi nóteru xáni sentabu úrapiringia. Ístuchi ueenaspka imani tʼirekua ambe piáni para úmantani enga no xáni jukaparhajka” (Gilberto).

TʼUINI EXE JEIA NA ENGAJTSÏ XÁNI SENTABU ÚRAAKA

Tʼuini exe jeia na engajtsï xáni sentabu úraaka

Biblia uandasïndi: “Sési nikuati imani enga ánchikuarhirika enga sési eratsentaaka ambe enga uaaka; joperu ima enga jirejiresï uaaka ambe ma, niáraati pobri pakarani” (Proverbios 21:5). Tʼuini exenia na engajtsï xáni úraaka, jarhuataatiksïni parajtsï no sánderu úrani eska na engajtsï xáni andajka.

Orheta, kara je na engajtsï xáni sentabu uaaka andani ma mesi jimbo.
Tátsekua, lista ma ú je ima ambeeri engajtsï ma mesi jimbo piájka ka sési exe je na engajtsï úrani jaka sentabuni.
Últimu, terukutanta je na engajtsï xáni andajka ka na engajtsï xáni úrajka. Engajtsï exeska eskajtsï sánderu úrasïnga eska na engajtsï xáni andajka, uaakajtsï no piáni ambe engajtsï no xáni uétarhinchani jauaka.

“Mándani mesi listachi ma úsïnga parachi exeni na engachi xáni andajka sentabu ka ambe engachi xáni úraaka. Jánguarhintasïngachi patsani sáni sentabu para ima ambe engachi sánderu orhepani uétarhinchaaka. Ísïchi no xáni uandanhiani jarhasïnga jimbokachi mítetini jarhasïnga eskachi patsarini jatsiska sáni” (Carlos).

ASÏ KÁNTSPI JE KA PATSA JE SÁNI SENTABU

Asï kántspi je ka patsa je sentabu

Eratsenta je ambe engajtsï uaaka úni parajtsï no xáni kántspeni sentabu ka engajtsï uaaka asï kántspi je. Sánderu sési, jánguarhintsï je patsani sáni sentabu para piáni imani ambe engajtsï uétarhinchani jauaka.
Mándani mesi, jánguarhinta je patsani sáni sentabu parajtsï úni maianhpeni imani ambe engajtsï no erokuarhini jauaka.

AMBAKITI ÁNCHIKUARHIRI MÁE JE

Biblia uandasïndi: “Enga ma uinhamu ánchikuarhijka ambakiti ambe jarhasïndi” (Proverbios 14:23).

Ambakiti ánchikuarhiri máe je

Jánguarhinta je exeni na engaksïni marhuachejka chaari ánchikuarhita. Nájkirukajtsï tsitipiringa máteru ambe ánchikuarhini, ambe engajtsï iásï ánchikuarhini jaka, jarhuatasïndiksïni parajtsï jatsini sáni sentabu.
Jánguarhinta je ánchikuarhirini ka mintsinharhikueni. Inde ambeksïni jarhuataati parajtsï no sóntku tsïtani ánchikuarhitani ka engajtsï tsïtapiringa, sóntku exentani máteruni.

“Ambe uéjkini ánchikuarhisïnga, nájkirukani no xáni tsitiaka o sántkuni maiamunhani. Jánguarhintasïnga sési úni juchiiti ánchikuarhitani, ísï komueskani na úpiringa enga juchitipiringa” (Daniel).

¿Ánchikuarhitajtsï jirinhaxaki?

Ú je ambe ma. Uaakajtsï nirani o uandajpaani imani empresechani engaksïni úpiringa ánchikuarhita íntskuni, nájkirukaksï no jirinhani jauaka ánchikuarhirichani. Arhia je chaari parientichani ka amiguechani eskajtsï ánchikuarhita jirinhaxaka.
Ánchikuarhi je ambe enga jauaka. Jamberijtsï no uaaka exentani ánchikuarhita ma engajtsï uaaka imani ambe engajtsï tsitijka.